ರೋಹಿತ್ ಟೆಸ್ಟ್ ಭವಿಷ್ಯ: ದೊಡ್ಡ ಸುಳಿವು ನೀಡಿದ ಅಗರ್ಕರ್ ತಂಡ!

ಟೀಮ್ ಇಂಡಿಯಾ ಸತತ ಮೂರನೇ ಬಾರಿಗೆ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್ ತಲುಪುವ ಅವಕಾಶವನ್ನು ಕಳೆದುಕೊಂಡಿದೆ. ಭಾರತ ತಂಡವು ಬಾರ್ಡರ್-ಗವಾಸ್ಕರ್ ಟ್ರೋಫಿಯನ್ನು ಆಸೀಸ್ ವಿರುದ್ಧ ಸೋತ ನಂತರ ಈ ಪರಿಸ್ಥಿತಿ ಎದುರಾಗಿದೆ .

ಇದರಿಂದಾಗಿ ರೋಹಿತ್ ಅವರನ್ನು ನಾಯಕ ಸ್ಥಾನದಿಂದ ತೆಗೆದುಹಾಕಬೇಕೆಂಬ ಬೇಡಿಕೆಗಳು ಕೇಳಿಬಂದವು. ಕ್ರಿಕೆಟಿಗರು ಪ್ರಸ್ತುತ ಇಂಡಿಯನ್ ಪ್ರೀಮಿಯರ್ ಲೀಗ್‌ನ 18ನೇ ಸೀಸನ್‌ನಲ್ಲಿ ಬ್ಯುಸಿಯಾಗಿದ್ದಾರೆ. ಇದು ಮೇ ಅಂತ್ಯದಲ್ಲಿ ಕೊನೆಗೊಳ್ಳುತ್ತದೆ. ನಂತರ ಭಾರತ ಜೂನ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಐದು ಟೆಸ್ಟ್ ಸರಣಿಯನ್ನು ಆಡಲಿದೆ. ಅಂದಿನಿಂದ ನಾಲ್ಕನೇ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಆರಂಭವಾಗಲಿದೆ.

ಎರಡು ಬಾರಿ ಫೈನಲ್ ತಲುಪಿದ್ದರೂ ಗೆಲುವು ಸಾಧಿಸುವಲ್ಲಿ ವಿಫಲವಾಗಿರುವ ಟೀಮ್ ಇಂಡಿಯಾ, WTCಯ ನಾಲ್ಕನೇ ಋತುವನ್ನು ಭರ್ಜರಿಯಾಗಿ ಆರಂಭಿಸುವ ಆಶಯದಲ್ಲಿದೆ. ಆದರೆ, ಆಸೀಸ್ ವಿರುದ್ಧದ ಟೆಸ್ಟ್ ಸರಣಿಯ ವೇಳೆ ರೋಹಿತ್ ಶರ್ಮಾ ದೀರ್ಘ ಸ್ವರೂಪದ ಕ್ರಿಕೆಟಿಗೆ ವಿದಾಯ ಹೇಳಲಿದ್ದಾರೆ ಎಂಬ ವರದಿಗಳು ಬಂದಿದ್ದವು.

ಅಂತಹ ನಿರ್ಧಾರ ತಾನು ಕೈಗೊಂಡಿಲ್ಲ ಎಂದು ಸ್ವತಃ ಹಿಟ್‌ಮ್ಯಾನ್‌ ಹೇಳಿದ್ದರು. ಆದರೆ ಅವರು ಆಡಬೇಕೋ ಅಥವಾ ಮನೆಯಲ್ಲಿ ಕೂರಬೇಕೋ ಎನ್ನುವುದನ್ನು ತೀರ್ಮಾನಿಸುವ ಅಧಿಕಾರ ಈಗ ಗ ಆಯ್ಕೆದಾರರ ಕೈಯಲ್ಲಿದೆ. ರೋಹಿತ್ ನಾಯಕತ್ವ ಮತ್ತು ಟೆಸ್ಟ್ ಕ್ರಿಕೆಟ್‌ನ ಭವಿಷ್ಯದ ಬಗ್ಗೆ ಅಜಿತ್ ಅಗರ್ಕರ್ ತಂಡವು ಪ್ರಮುಖ ಸುಳಿವು ನೀಡಿರುವ ಹಾಗೆ ಕಾಣುತ್ತಿದೆ.

ಇದೀಗ ಇಂಗ್ಲೆಂಡ್ ವಿರುದ್ಧದ ಸರಣಿಯನ್ನೂ ರೋಹಿತ್ ಮುನ್ನಡೆಸಲಿದ್ದಾರೆ ಎಂದು ವರದಿಯಾಗಿದೆ. ನ್ಯೂಜಿಲೆಂಡ್ ಮತ್ತು ಆಸೀಸ್ ವಿರುದ್ಧ ಸರಣಿ ಸೋತ ನಂತರವೂ ಅವರು ರೋಹಿತ್ ಅವರನ್ನು ನಂಬುವುದನ್ನು ಆಯ್ಕೆಗಾರರು ಮುಂದುವರಿಸುವಂತೆ ಕಾಣುತ್ತಿದೆ.

ಪ್ರಸ್ತುತ 37 ವರ್ಷ ವಯಸ್ಸಿನ ರೋಹಿತ್ ಅವರನ್ನು 2025-27ರ WTC ತನಕ ಉಳಿಸಿಕೊಳ್ಳುತ್ತದೆಯೇ? ಅಥವಾ ಇಲ್ಲವೇ ಎನ್ನುವ ಬಗ್ಗೆ ಸ್ಪಷ್ಟತೆ ಇಲ್ಲ. WTC ಯ ನಾಲ್ಕನೇ ಋತುವಿನ ಫೈನಲ್ ಪಂದ್ಯ 2027ರಲ್ಲಿ ನಡೆಯಲಿದೆ. ಅದೇ ವರ್ಷದಲ್ಲಿ ODI ವಿಶ್ವಕಪ್ ಕೂಡ ಇದೆ.

ಈಗಾಗಲೇ ಟಿ20ಗೆ ವಿದಾಯ ಹೇಳಿರುವ ರೋಹಿತ್, 50 ಓವರ್‌ಗಳ ವಿಶ್ವಕಪ್ ಗೆಲ್ಲುವ ಗುರಿಯನ್ನು ಹೊಂದಿರುವಂತೆ ತೋರುತ್ತಿದೆ. ಇಲ್ಲದಿದ್ದರೆ, ಚಾಂಪಿಯನ್ಸ್ ಟ್ರೋಫಿ (ಏಕದಿನ ಸ್ವರೂಪ) ಗೆದ್ದ ನಂತರ ಅವರು ವಿದಾಯ ಹೇಳುತ್ತಿದ್ದರು ಎಂದು ಕ್ರಿಕೆಟ್ ವಿಶ್ಲೇಷಕರು ಹೇಳುತ್ತಾರೆ. ಮತ್ತೊಂದೆಡೆ, ಮುಖ್ಯ ಕೋಚ್ ಗೌತಮ್ ಗಂಭೀರ್ ಹೊಸ ನಾಯಕತ್ವದಲ್ಲಿ WTC ಜೊತೆಗೆ ODI ವಿಶ್ವಕಪ್ ಪ್ರವೇಶಿಸಲು ಯೋಜಿಸುತ್ತಿರುವಂತೆ ತೋರುತ್ತಿದೆ.

ಕಳೆದ ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಬೆನ್ನುನೋವಿನಿಂದ ಬಳಲುತ್ತಿದ್ದ ಜಸ್ಪ್ರೀತ್ ಬುಮ್ರಾ ಪಂದ್ಯದಿಂದ ಹೊರಗುಳಿದಿದ್ದರು. ಈಗಾಗಲೇ ಆರಂಭವಾಗಿರುವ ಐಪಿಎಲ್ 18ನೇ ಋತುವಿನ ಮೊದಲ ಹಂತದಲ್ಲಿ ಕೆಲವು ಪಂದ್ಯಗಳಲ್ಲಿ ಅವರು ಆಡುವುದು ಕಷ್ಟ.

ಅವರ ಫಿಟ್ನೆಸ್‌ಗೆ ಶ್ರೇಷ್ಠತಾ ಕೇಂದ್ರದಿಂದ ಯಾವುದೇ ಅನುಮೋದನೆ ದೊರೆತಿರಲಿಲ್ಲ. ಐಪಿಎಲ್ ನಲ್ಲಿ ಆಡುವ ಮೂಲಕ ಫಿಟ್ನೆಸ್ ಸಾಬೀತುಪಡಿಸಿದರೆ ಮಾತ್ರ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಗೆ ಆಯ್ಕೆಯಾಗುವ ಅವಕಾಶವಿದೆ.

ಈ ಋತುವಿನ ಕೊನೆಯ ವಾರದಲ್ಲಿ ತಂಡವನ್ನು ಆಯ್ಕೆ ಮಾಡಲಾಗುವುದು ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ. ಲಯನ್ಸ್ ವಿರುದ್ಧ ಆಡಲು ಭಾರತ ಎ ತಂಡವನ್ನೂ ಆಯ್ಕೆ ಮಾಡಲಾಗುತ್ತದೆ. ಆ ತಂಡದೊಂದಿಗೆ ಮುಖ್ಯ ಕೋಚ್ ಗೌತಮ್ ಗಂಭೀರ್ ಹೋಗಲಿದ್ದಾರೆ ಎಂದು ವರದಿಯಾಗಿದೆ.