‘ಮತಗಳ್ಳತನ’ ಆರೋಪ: ರಾಹುಲ್ ಗಾಂಧಿಯವರ ಹೇಳಿಕೆಗಳ ಕುರಿತು ಎಸ್‌ಐಟಿ ರಚಿಸಲು ಸುಪ್ರೀಂ ಕೋರ್ಟ್ ನಿರಾಕರಣೆ

ದೆಹಲಿ: ವಿರೋಧ ಪಕ್ಷದ ನಾಯಕ ಮತ್ತು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು 2024ರ ಲೋಕಸಭಾ ಚುನಾವಣೆಯಲ್ಲಿ ಮತ ಕಳುವಾಗಿದೆ ಎಂದು ಮಾಡಿದ್ದ ಆರೋಪಗಳ ಬಗ್ಗೆ ವಿಶೇಷ ತನಿಖಾ ದಳ (SIT) ರಚಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ವಜಾ ಮಾಡಿದೆ.

ನ್ಯಾಯಮೂರ್ತಿಗಳಾದ ಸೂರ್ಯಕಾಂತ್ ಮತ್ತು ಜೋಯಿಮಾಲ್ಯ ಬಾಗ್ಚಿ ಅವರ ಪೀಠವು ಈ ಅರ್ಜಿಯನ್ನು ಪರಿಗಣಿಸಲು ನಿರಾಕರಿಸಿತು. ಅರ್ಜಿದಾರರಾದ ವಕೀಲ ರೋಹಿತ್ ಪಾಂಡೆ ಅವರಿಗೆ, “ನೀವು ನಿಮ್ಮ ದೂರನ್ನು ಭಾರತದ ಚುನಾವಣಾ ಆಯೋಗದ ಮುಂದೆ ಮಂಡಿಸಬಹುದು” ಎಂದು ಸೂಚಿಸಿತು.

ಪೀಠವು, “ನಾವು ಅರ್ಜಿದಾರರ ವಕೀಲರ ವಾದವನ್ನು ಆಲಿಸಿದ್ದೇವೆ. ಸಾರ್ವಜನಿಕ ಹಿತಾಸಕ್ತಿಯಲ್ಲಿ ಸಲ್ಲಿಸಲಾಗಿದೆ ಎನ್ನಲಾದ ಈ ಅರ್ಜಿಯನ್ನು ನಾವು ಪರಿಗಣಿಸಲು ಇಚ್ಛಿಸುವುದಿಲ್ಲ. ಸಲಹೆ ನೀಡಿದಂತೆ, ಅರ್ಜಿದಾರರು ಚುನಾವಣಾ ಆಯೋಗದ ಮುಂದೆ ತಮ್ಮ ವಿಷಯವನ್ನು ಮಂಡಿಸಬಹುದು” ಎಂದು ಹೇಳಿತು.

ಅರ್ಜಿದಾರ ರೋಹಿತ್ ಪಾಂಡೆ, ರಾಹುಲ್ ಗಾಂಧಿಯವರ ಆರೋಪಗಳ ಕುರಿತು ತಾವೇ ಸ್ವತಃ ತನಿಖೆ ನಡೆಸಿರುವುದಾಗಿ ಹೇಳಿದ್ದರು. ಈ ಆರೋಪಗಳು “ಸರಿಯಾದ ಮತಗಳನ್ನು ತಿರಸ್ಕರಿಸುವ ಪಿತೂರಿಯನ್ನು” ಬಯಲು ಮಾಡಿವೆ ಎಂದು ಅವರು ವಾದಿಸಿದ್ದರು. ಈ ಕಾರಣದಿಂದಾಗಿ, ತಕ್ಷಣವೇ ಸ್ವತಂತ್ರ ತನಿಖೆಗಾಗಿ ಎಸ್‌ಐಟಿ ರಚಿಸಿ ಸುಪ್ರೀಂ ಕೋರ್ಟ್ ಮಧ್ಯಪ್ರವೇಶಿಸಬೇಕು ಎಂದು ಅವರು ಮನವಿ ಮಾಡಿದ್ದರು.

ಮತದಾರರ ಪಟ್ಟಿಗಳ ಸ್ವತಂತ್ರ ಲೆಕ್ಕಪರಿಶೋಧನೆ (independent audit) ಪೂರ್ಣಗೊಳ್ಳುವವರೆಗೆ, ಅವುಗಳಲ್ಲಿ ಯಾವುದೇ ಬದಲಾವಣೆ ಅಥವಾ ಅಂತಿಮಗೊಳಿಸುವಿಕೆ ನಡೆಸದಂತೆ ನಿರ್ದೇಶನ ನೀಡಬೇಕು ಎಂದೂ ಪಾಂಡೆ ಕೋರ್ಟ್‌ಗೆ ಮನವಿ ಮಾಡಿದ್ದರು.

ಆಗಸ್ಟ್ ತಿಂಗಳಲ್ಲಿ ರಾಹುಲ್ ಗಾಂಧಿ ಅವರು ಚುನಾವಣಾ ಆಯೋಗ ಮತ್ತು ಭಾರತೀಯ ಜನತಾ ಪಕ್ಷದ ವಿರುದ್ಧ 2024ರ ಚುನಾವಣೆಗಳಲ್ಲಿ “ಬೃಹತ್ ಕ್ರಿಮಿನಲ್ ವಂಚನೆ” ನಡೆದಿದೆ ಎಂದು ಆರೋಪಿಸಿದ್ದರು.

ಪತ್ರಿಕಾಗೋಷ್ಠಿಯಲ್ಲಿ ಅವರು, ಕರ್ನಾಟಕದ ಬೆಂಗಳೂರು ಸೆಂಟ್ರಲ್ ಲೋಕಸಭಾ ಕ್ಷೇತ್ರದಲ್ಲಿ ಐದು ವಿಭಿನ್ನ ವಿಧಾನಗಳ ಮೂಲಕ ಮತಗಳನ್ನು ಕಳವು ಮಾಡಲಾಗಿದೆ ಎಂದು ಪಟ್ಟಿ ಮಾಡಿದ್ದರು.

ಈ ಆರೋಪಗಳಿಗೆ ಪುಷ್ಟಿ ನೀಡಲು, ಬೆಂಗಳೂರು ಸೆಂಟ್ರಲ್ ಕ್ಷೇತ್ರದ ಮಹದೇವಪುರ ವಿಧಾನಸಭಾ ವಿಭಾಗದಲ್ಲಿ ಕಾಂಗ್ರೆಸ್ ನಡೆಸಿದ ತನಿಖೆಯ ವರದಿಗಳನ್ನು ಬಿಡುಗಡೆ ಮಾಡಿದ್ದರು. ಆ ಲೋಕಸಭಾ ಸ್ಥಾನವನ್ನು ಬಿಜೆಪಿ 32,707 ಮತಗಳ ಅಂತರದಿಂದ ಗೆದ್ದಿತ್ತು.

ರಾಹುಲ್ ಗಾಂಧಿಯವರು ಶೀಘ್ರದಲ್ಲೇ “ಮತಗಳ್ಳತನದ” ಮತ್ತೊಂದು ಹಂತದ ಕುರಿತು (ಅದಕ್ಕೆ ಅವರು ಹೈಡ್ರೋಜನ್ ಬಾಂಬ್ ಎಂದು ಹೆಸರಿಸಿದ್ದಾರೆ) ಮಾಹಿತಿ ಬಿಡುಗಡೆ ಮಾಡುವುದಾಗಿ ಹೇಳಿದ್ದಾರೆ.