ಮೋದಿ ಪ್ರಮಾಣವಚನ ಸ್ವೀಕರಿಸಿದ ಕೆಲವೇ ಕ್ಷಣಗಳಲ್ಲಿ ಬಸ್‌ ಮೇಲೆ ಉಗ್ರರ ದಾಳಿ: 10 ಸಾವು, 32 ಮಂದಿಗೆ ಗಾಯ

ಭಾನುವಾರ ಸಂಜೆ ಜಮ್ಮು ಮತ್ತು ಕಾಶ್ಮೀರದ ರಿಯಾಸಿ ಜಿಲ್ಲೆಯಲ್ಲಿ ಭಯೋತ್ಪಾದಕರು ಯಾತ್ರಾರ್ಥಿ ಬಸ್ ಮೇಲೆ ಹೊಂಚು ಹಾಕಿ ದಾಳಿ ನಡೆಸಿದ್ದಾರೆ. ಉತ್ತರ ಪ್ರದೇಶ ಮತ್ತು ದೆಹಲಿಯಿಂದ ಯಾತ್ರಾರ್ಥಿಗಳನ್ನು ಹೊತ್ತೊಯ್ಯುತ್ತಿದ್ದ ಬಸ್ ದಾಳಿಯ ನಂತರ ಆಳವಾದ ಕಮರಿಗೆ ಬಿದ್ದಿದ್ದು, ಮೂವರು ಮಹಿಳೆಯರು ಸೇರಿದಂತೆ 10 ಜನರು ಸಾವನ್ನಪ್ಪಿದ್ದಾರೆ ಮತ್ತು 32 ಮಂದಿ ಗಾಯಗೊಂಡಿದ್ದಾರೆ ಎಂದು ಹೇಳಲಾಗಿದೆ.

ಸಂಜೆ 6:15 ರ ಸುಮಾರಿಗೆ ಗುಂಡಿನ ದಾಳಿಯ ನಂತರ 53 ಆಸನಗಳ ಬಸ್ ರಸ್ತೆ ಬಿಟ್ಟು ಆಳವಾದ ಕಂದಕಕ್ಕೆ ಬಿದ್ದಿತು. ಪೋನಿ ಪ್ರದೇಶದ ತೆರಯತ್ ಗ್ರಾಮದ ಬಳಿಯ ಶಿವ ಖೋರಿ ದೇವಸ್ಥಾನದಿಂದ ಕತ್ರಾದಲ್ಲಿರುವ ಮಾತಾ ವೈಷ್ಣೋ ದೇವಿ ದೇವಸ್ಥಾನಕ್ಕೆ ತೆರಳುತ್ತಿದ್ದಾಗ ಭಯೋತ್ಪಾದಕರು ಬಸ್ ಮೇಲೆ ಗುಂಡಿನ ದಾಳಿ ನಡೆಸಿದ್ದಾರೆ.

‘ಬಸ್ ಮೇಲೆ ಮನಬಂದಂತೆ ಗುಂಡಿನ ದಾಳಿ’

ಸುದ್ದಿ ಸಂಸ್ಥೆ ಪಿಟಿಐ ಪ್ರಕಾರ, ಬಸ್‌ನಲ್ಲಿ 25ರಿಂದ 30 ಬುಲೆಟ್‌ಗಳು ಹಾರಿದವು ಮತ್ತು ಬಸ್ ಕಂದಕಕ್ಕೆ ಬಿದ್ದಿತು ಎಂದು ಬಸ್‌ನಲ್ಲಿ ಪ್ರಯಾಣಿಸುತ್ತಿದ್ದ ಸಂತ್ರಸ್ತರೊಬ್ಬರು ಹೇಳಿದ್ದಾರೆ. ಕೆಂಪು ಮಫ್ಲರ್ ಧರಿಸಿದ್ದ ಮುಸುಕುಧಾರಿ ದಾಳಿಕೋರನೊಬ್ಬ ಬಸ್‌ನಲ್ಲಿ ಗುಂಡು ಹಾರಿಸುತ್ತಿರುವುದನ್ನು ತಾನು ನೋಡಿದೆ ಎಂದು ಸಂತ್ರಸ್ತನೊಬ್ಬ ಹೇಳಿದ್ದಾನೆ. ನಾವು ಸಂಜೆ 4 ಗಂಟೆಗೆ ಹೊರಡಬೇಕಿತ್ತು, ಆದರೆ ಬಸ್ ಸಂಜೆ 5.30 ಕ್ಕೆ ಹೊರಟಿತು. ನಂತರ ಇದ್ದಕ್ಕಿದ್ದಂತೆ ಗುಂಡು ಹಾರಿತು ಎಂದು ತೆರಯತ್ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಬನಾರಸ್‌ನ ಗಾಯಗೊಂಡ ಯಾತ್ರಿಕರೊಬ್ಬರು ಹೇಳಿದರು.