ಇರಾನ್-ಅಮೆರಿಕ ಸಂಘರ್ಷ: 39 ದಿನಗಳ ಯುದ್ಧದಲ್ಲಿ 39 ಯುದ್ಧ ವಿಮಾನಗಳನ್ನು ಕಳೆದುಕೊಂಡ ಅಮೆರಿಕ

ಇರಾನ್ ವಿರುದ್ಧ ಅಮೆರಿಕ ಹಮ್ಮಿಕೊಂಡಿದ್ದ ‘ಆಪರೇಷನ್ ಎಪಿಕ್ ಫ್ಯೂರಿ’ (Operation Epic Fury) ಕಾರ್ಯಾಚರಣೆಯು ಅಗ್ರರಾಜ್ಯಕ್ಕೆ ಭಾರೀ ಆರ್ಥಿಕ ಮತ್ತು ರಕ್ಷಣಾತ್ಮಕ ನಷ್ಟವನ್ನು ಉಂಟುಮಾಡಿದೆ ಎಂದು ವರದಿಯಾಗಿದೆ. ಸುಮಾರು 39 ದಿನಗಳ ಕಾಲ ನಡೆದ ಈ ಭೀಕರ ಸಂಘರ್ಷದಲ್ಲಿ ಇರಾನ್ ಸೇನೆಯು ಅಮೆರಿಕದ ಒಟ್ಟು 39 ಯುದ್ಧ ವಿಮಾನಗಳನ್ನು ಧ್ವಂಸಗೊಳಿಸಿದೆ.

ಫೆಬ್ರವರಿ 28ರಂದು ಇಸ್ರೇಲ್ ಜೊತೆಗೂಡಿ ಅಮೆರಿಕವು ಇರಾನ್ ಮೇಲೆ ದಾಳಿ ನಡೆಸಿದ ನಂತರ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಜ್ವಾಲೆಗಳು ಭುಗಿಲೆದ್ದಿದ್ದವು. ಐದು ವಾರಗಳಿಗೂ ಹೆಚ್ಚು ಕಾಲ ನಡೆದ ಈ ದ್ವೇಷದ ಹೋರಾಟದಲ್ಲಿ ಅಮೆರಿಕದ ರಕ್ಷಣಾ ವಿಭಾಗಕ್ಕೆ ಹಿಂದೆಂದೂ ಕಾಣದಂತಹ ಹೊಡೆತ ಬಿದ್ದಿದೆ.

ವರದಿಗಳ ಪ್ರಕಾರ, ಅಮೆರಿಕದ ಹೆಮ್ಮೆಯ ಐದನೇ ತಲೆಮಾರಿನ ಅತ್ಯಾಧುನಿಕ ‘ಎಫ್-35 ಸ್ಟೆಲ್ತ್’ (F-35 Stealth) ಯುದ್ಧ ವಿಮಾನವು ಇರಾನ್ ಗಗನತಲದಲ್ಲಿ ಶತ್ರುಗಳ ದಾಳಿಗೆ ತುತ್ತಾಗಿ ಹಾನಿಗೊಳಗಾಗಿದೆ. ಇತಿಹಾಸದಲ್ಲಿಯೇ ಇಂತಹ ಅತ್ಯಾಧುನಿಕ ವಿಮಾನವೊಂದು ಯುದ್ಧದ ವೇಳೆ ಶತ್ರು ರಾಷ್ಟ್ರದ ದಾಳಿಗೆ ಒಳಗಾಗಿರುವುದು ಇದೇ ಮೊದಲು ಎನ್ನಲಾಗಿದೆ. ಇದರೊಂದಿಗೆ ಒಂದು ಎ-10, ನಾಲ್ಕು ಎಫ್-15 ಸ್ಟ್ರೈಕ್ ಈಗಲ್ ಯುದ್ಧ ವಿಮಾನಗಳು ಮತ್ತು ನಾಲ್ಕು ಎಫ್-15ಇ ಫೈಟರ್ ಜೆಟ್‌ಗಳು ಪತನಗೊಂಡಿವೆ.

ಕುತೂಹಲಕಾರಿ ಸಂಗತಿಯೆಂದರೆ, ಕುವೈತ್‌ನಲ್ಲಿ ನಡೆದ ‘ಫ್ರೆಂಡ್ಲಿ ಫೈರ್’ (ತನ್ನದೇ ಪಡೆಗಳ ತಪ್ಪು ಗುರಿ) ಕಾರಣದಿಂದ ಅಮೆರಿಕದ ಮೂರು ಎಫ್-15ಇ ವಿಮಾನಗಳು ಪತನಗೊಂಡಿವೆ ಎಂದು ಯುಎಸ್ ಸೆಂಟಕಾಮ್ ಖಚಿತಪಡಿಸಿದೆ.

ವೈಮಾನಿಕ ದಾಳಿಗಳಷ್ಟೇ ಅಲ್ಲದೆ, ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳ ಮೂಲಕವೂ ಅಮೆರಿಕದ ಮಿಲಿಟರಿ ನೆಲೆಗಳನ್ನು ಇರಾನ್ ಗುರಿಮಾಡಿದೆ. ಸೌದಿ ಅರೇಬಿಯಾದ ವೈಮಾನಿಕ ನೆಲೆಯ ಮೇಲೆ ನಡೆದ ಕ್ಷಿಪಣಿ ದಾಳಿಯಲ್ಲಿ ಅಮೆರಿಕದ ಐದು ಕೆಸಿ-135 ರಿಫ್ಯೂಯಲಿಂಗ್ ವಿಮಾನಗಳು ಮತ್ತು ಬೋಯಿಂಗ್ ಇ-3 ಸೆಂಟ್ರಿ ವಿಚಕ್ಷಣಾ ವಿಮಾನವು ತೀವ್ರವಾಗಿ ಹಾನಿಗೊಳಗಾಗಿದೆ. ಅಲ್ಲದೆ, ಕುವೈತ್‌ನಲ್ಲಿ ನಡೆದ ಡ್ರೋನ್ ದಾಳಿಯಲ್ಲಿ ಒಂದು ಸಿಎಚ್-47 ಚಿನೂಕ್ ಹೆಲಿಕಾಪ್ಟರ್ ಧ್ವಂಸಗೊಂಡಿದೆ.

ಅಮೆರಿಕದ ಡ್ರೋನ್ ವಿಭಾಗಕ್ಕೂ ಈ ಯುದ್ಧವು ಮಾರಕವಾಗಿ ಪರಿಣಮಿಸಿದ್ದು, ಸುಮಾರು 24 ಎಂಕ್ಯೂ-9ಎ ರೀಪರ್ ಡ್ರೋನ್‌ಗಳು ಈ ಸಂಘರ್ಷದಲ್ಲಿ ನಾಶವಾಗಿವೆ ಎಂದು ತಿಳಿದುಬಂದಿದೆ.