ಇರಾನ್ ವಿರುದ್ಧದ ಮಿಲಿಟರಿ ಕಾರ್ಯಾಚರಣೆ ನಿಲ್ಲಿಸಲು ತೀರ್ಮಾನಿಸಿದ ಅಮೇರಿಕಾ ಸೆನೆಟ್: ಅಧ್ಯಕ್ಷ ಟ್ರಂಪ್‌ಗೆ ಭಾರಿ ಹಿನ್ನಡೆ!

ವಾಷಿಂಗ್ಟನ್: ಇರಾನ್ ಮೇಲಿನ ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಯನ್ನು ತಕ್ಷಣವೇ ನಿಲ್ಲಿಸುವಂತೆ ಮತ್ತು ಮುಂದಿನ ಯಾವುದೇ ಸೈನಿಕ ಕ್ರಮಗಳಿಗಾಗಿ ಕಡ್ಡಾಯವಾಗಿ ಸಂಸತ್ತಿನ (ಕಾಂಗ್ರೆಸ್) ಪೂರ್ವಾನುಮತಿ ಪಡೆಯುವಂತೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ನಿರ್ದೇಶಿಸುವ ಅತ್ಯಂತ ಪ್ರಮುಖ ಯುದ್ಧ ಅಧಿಕಾರ ನಿರ್ಣಯವನ್ನು ಅಮೆರಿಕದ ಸೆನೆಟ್ ಆಮೋದಿಸಿದೆ.

ಮಂಗಳವಾರ ನಡೆದ ತೀವ್ರ ಕುತೂಹಲಕಾರಿ ಮತದಾನದಲ್ಲಿ 50-48 ಮತಗಳ ಅಲ್ಪ ಬಹುಮತದಿಂದ ಈ ಜಂಟಿ ನಿರ್ಣಯವನ್ನು ಪಾಸ್ ಮಾಡಲಾಗಿದೆ. ಇತ್ತೀಚೆಗಷ್ಟೇ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ (ಕೆಳಮನೆ) ಈ ನಿರ್ಣಯಕ್ಕೆ ಒಪ್ಪಿಗೆ ನೀಡಿತ್ತು, ಈಗ ಸೆನೆಟ್‌ನಲ್ಲೂ ಇದು ಅಂಗೀಕಾರಗೊಂಡಿರುವುದು ಅಧ್ಯಕ್ಷ ಟ್ರಂಪ್ ಅವರ ವಿದೇಶಾಂಗ ನೀತಿಗೆ ಮತ್ತು ಇರಾನ್ ವಿರುದ್ಧದ ಯುದ್ಧದ ನಿರ್ಧಾರಗಳಿಗೆ ಎದುರಾದ ದೊಡ್ಡ ರಾಜತಾಂತ್ರಿಕ ಹಿನ್ನಡೆ ಎಂದೇ ವಿಶ್ಲೇಷಿಸಲಾಗುತ್ತಿದೆ.

ಪ್ರಸ್ತುತ ಸೆನೆಟ್‌ನಲ್ಲಿ ರಿಪಬ್ಲಿಕನ್ ಪಕ್ಷವು ಬಹುಮತ ಹೊಂದಿದ್ದರೂ, ಆಡಳಿತ ಪಕ್ಷದ ನಾಲ್ವರು ಪ್ರಮುಖ ಸೆನೆಟರ್‌ಗಳಾದ ಸುಸಾನ್ ಕಾಲಿನ್ಸ್, ಲಿಸಾ ಮುರ್ಕೋವ್ಸ್ಕಿ, ಬಿಲ್ ಕ್ಯಾಸಿಡಿ ಮತ್ತು ರಾಂಡ್ ಪಾಲ್ ಅವರು ತಮ್ಮದೇ ಸರ್ಕಾರದ ನಿರ್ಧಾರವನ್ನು ವಿರೋಧಿಸಿ ಡೆಮೋಕ್ರಾಟ್‌ಗಳ ಜೊತೆಗೂಡಿ ನಿರ್ಣಯದ ಪರವಾಗಿ ಮತ ಚಲಾಯಿಸಿದರು. ಇದೇ ವೇಳೆ ಮಿಚ್ ಮೆಕ್‌ಕಾನ್ನೆಲ್ ಸೇರಿದಂತೆ ಇಬ್ಬರು ರಿಪಬ್ಲಿಕನ್ ಸದಸ್ಯರು ಅನಾರೋಗ್ಯದ ಕಾರಣ ಹಾಜರಿರದಿದ್ದುದು ಸಹ ನಿರ್ಣಯದ ಯಶಸ್ಸಿಗೆ ಕಾರಣವಾಯಿತು. ಡೆಮೋಕ್ರಾಟ್ ಪಕ್ಷದ ಜಾನ್ ಫೆಟರ್‌ಮನ್ ಮಾತ್ರ ನಿರ್ಣಯದ ವಿರುದ್ಧವಾಗಿ ಮತ ಚಲಾಯಿಸಿದ ಏಕೈಕ ವಿರೋಧ ಪಕ್ಷದ ಸದಸ್ಯರಾಗಿದ್ದಾರೆ.

ಕೇಂದ್ರ ಸರ್ಕಾರ ಮತ್ತು ಇರಾನ್ ಈಗಾಗಲೇ ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ 60 ದಿನಗಳ ತಾತ್ಕಾಲಿಕ ಕದನ ವಿರಾಮ ಒಪ್ಪಂದಕ್ಕೆ ಸಹಿ ಹಾಕಿ ಶಾಂತಿ ಮಾತುಕತೆಯಲ್ಲಿ ತೊಡಗಿರುವುದರಿಂದ ಈ ನಿರ್ಣಯವು ಸದ್ಯಕ್ಕೆ ಸಾಂಕೇತಿಕ ರೂಪದ್ದಾಗಿದೆ. ಅಲ್ಲದೆ ಇದಕ್ಕೆ ಅಧ್ಯಕ್ಷರ ಸಹಿಯ ಅಗತ್ಯವೂ ಇರುವುದಿಲ್ಲ. ಆದಾಗ್ಯೂ, ಮುಂಬರುವ ನವೆಂಬರ್ ಮಧ್ಯಾವಧಿ ಚುನಾವಣೆಯ ಮುನ್ನವೇ ಅಮೆರಿಕದ ಸಾರ್ವಜನಿಕರಲ್ಲಿ ಈ ಯುದ್ಧದ ಕುರಿತು ಇರುವ ತೀವ್ರ ಅಸಮಾಧಾನ ಮತ್ತು ಇಂಧನ ಬೆಲೆ ಏರಿಕೆಯ ಹಿನ್ನೆಲೆಯಲ್ಲಿ ಸಂಸತ್ತು ತನ್ನ ಸಾಂವಿಧಾನಿಕ ನಿಯಂತ್ರಣವನ್ನು ಮರುಸ್ಥಾಪಿಸಲು ಈ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ.

ಸೆನೆಟ್‌ನ ಈ ನಿರ್ಧಾರವನ್ನು ಸ್ವಾಗತಿಸಿರುವ ಡೆಮೋಕ್ರಾಟ್ ನಾಯಕ ಚಕ್ ಶೂಮರ್, ಇರಾನ್ ಮೇಲಿನ ಯುದ್ಧವು ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ಕೆಟ್ಟ ವಿದೇಶಾಂಗ ನೀತಿಯಾಗಿದೆ ಎಂದು ಟ್ರಂಪ್ ಸರ್ಕಾರವನ್ನು ಕಟುವಾಗಿ ಟೀಕಿಸಿದ್ದಾರೆ.