ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ನ ಸೈನಿಕ ಸಾಮರ್ಥ್ಯದ ಕುರಿತು ಅತ್ಯಂತ ಕುತೂಹಲಕಾರಿ ಹೇಳಿಕೆ ನೀಡಿದ್ದು, ಇರಾನ್ ಮಿಲಿಟರಿ ಶಕ್ತಿಯನ್ನು ತಾವು ಸಂಪೂರ್ಣವಾಗಿ ನಿರ್ವೀರ್ಯಗೊಳಿಸಿರುವುದಾಗಿ ಘೋಷಿಸಿದ್ದಾರೆ. ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ಜಂಟಿ ಸೈನಿಕ ದಾಳಿಗಳ ಹಿನ್ನೆಲೆಯಲ್ಲಿ ಮಾತನಾಡಿದ ಅವರು, ಇರಾನ್ ತನ್ನ ಇಡೀ ರಕ್ಷಣಾ ವ್ಯವಸ್ಥೆಯನ್ನು ಕಳೆದುಕೊಂಡಿದೆ ಮತ್ತು ಆ ದೇಶದ ಸೈನ್ಯವು ಈಗ ಅಸ್ತಿತ್ವದ ಬಿಕ್ಕಟ್ಟನ್ನು ಎದುರಿಸುತ್ತಿದೆ ಎಂದು ತಿಳಿಸಿದ್ದಾರೆ.
ಟ್ರಂಪ್ ಅವರ ಪ್ರಕಾರ, ಇರಾನ್ನ ನೌಕಾದಳವು ಈಗ ಇತಿಹಾಸ ಪುಟಕ್ಕೆ ಸೇರಿದೆ. ಆ ದೇಶವು ಹೊಂದಿದ್ದ ಸುಮಾರು 32 ಯುದ್ಧನೌಕೆಗಳು ಈಗ ಸಮುದ್ರದ ತಳ ಸೇರಿದ್ದು, ಇರಾನ್ಗೆ ಈಗ ನೌಕಾದಳ ಎಂಬುವುದೇ ಇಲ್ಲದಂತಾಗಿದೆ. ಅಷ್ಟೇ ಅಲ್ಲದೆ, ವಾಯುಪಡೆಯು ಕೂಡ ಸಂಪೂರ್ಣವಾಗಿ ನಾಶವಾಗಿದ್ದು, ವಾಯುಪ್ರದೇಶವನ್ನು ರಕ್ಷಿಸಿಕೊಳ್ಳುವ ಶಕ್ತಿಯನ್ನು ಇರಾನ್ ಕಳೆದುಕೊಂಡಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ದಾಳಿಯ ತೀವ್ರತೆಯಿಂದಾಗಿ ಇರಾನ್ನ ಸಂವಹನ ಮತ್ತು ಕಮ್ಯೂನಿಕೆಷನ್ ವ್ಯವಸ್ಥೆಗಳು ಸಂಪೂರ್ಣವಾಗಿ ಧ್ವಂಸಗೊಂಡಿವೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಈ ಕಾರಣದಿಂದಾಗಿ ಸೈನ್ಯದ ನಡುವಿನ ಸಮನ್ವಯವು ತಪ್ಪಿಹೋಗಿದೆ. ಇರಾನ್ನ ಉನ್ನತ ಮಟ್ಟದ ಮೊದಲ ಮತ್ತು ಎರಡನೇ ಹಂತದ ನಾಯಕತ್ವವು ಈಗಾಗಲೇ ಅಂತ್ಯಗೊಂಡಿದ್ದು, ಪ್ರಸ್ತುತ ಆ ದೇಶವು ಮೂರನೇ ಹಂತದ ನಾಯಕತ್ವದೊಂದಿಗೆ ಹೇಗೋ ಪರಿಸ್ಥಿತಿಯನ್ನು ಎದುರಿಸುತ್ತಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
