ಮೋದಿ ಇಲ್ಲದೆ ಹೋಗಿದ್ದರೆ ನಾವು 150 ಸ್ಥಾನಗಳನ್ನು ಸಹ ಗೆಲ್ಲುತ್ತಿರಲಿಲ್ಲ: ಬಿಜೆಪಿ ಸಂಸದ

ಪ್ರಧಾನಿ ಮೋದಿಯವರ ವರ್ಚಸ್ಸು ಅವರ ಪಕ್ಷದ ಸಾಂಪ್ರದಾಯಿಕವಲ್ಲದ ಮತದಾರರನ್ನು ಸಹ ಆಕರ್ಷಿಸಿದೆ ಎಂದು ಬಿಜೆಪಿ ಸಂಸದ ನಿಶಿಕಾಂತ್ ದುಬೆ ಹೇಳಿದ್ದಾರೆ. ಇಲ್ಲದೆ ಹೋಗಿದ್ದರೆ ಕಳೆದ ಬಾರಿಯ ಚುನಾವಣೆಯಲ್ಲಿ ನಾವು ಗೆಲ್ಲುತ್ತಿರಲಿಲ್ಲ ಎಂದು ಬಿಜೆಪಿ ಸಂಸದ ನಿಶಿಕಾಂತ ದುಬೆ ಹೇಳಿದ್ದಾರೆ.

ಸುದ್ದಿ ಸಂಸ್ಥೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು ಈ ಹೇಳಿಕೆ ನೀಡಿದ್ದಾರೆ.

‘ಈಗ ಮೋದಿ ಮೂರನೇ ಬಾರಿಗೆ ಪ್ರಧಾನಿಯಾಗಿದ್ದಾರೆ. ಅವರು ನಮ್ಮ ನಾಯಕರಾಗಿಲ್ಲದಿದ್ದರೆ, ಬಿಜೆಪಿ 150 ಸ್ಥಾನಗಳನ್ನು ಸಹ ಗೆಲ್ಲುತ್ತಿರಲಿಲ್ಲ. ಮೋದಿ ಬಂದ ನಂತರ, ಹೆಚ್ಚಿನ ಬಡ ಜನರು ನಮ್ಮ ಪಕ್ಷದ ಮೇಲೆ ನಂಬಿಕೆ ಇಟ್ಟಿದ್ದಾರೆ. ನಮ್ಮನ್ನು ಇಷ್ಟಪಡದವರೂ ಇದ್ದಾರೆ. ನಾವು ಎಲ್ಲರನ್ನೂ ಮೆಚ್ಚಿಸಲು ಬಯಸುವುದಿಲ್ಲ. ಇದು ಸತ್ಯ. ಪಕ್ಷಕ್ಕೆ ಮೋದಿ ಬೇಕು. ಒಬ್ಬ ಕಾರ್ಯಕರ್ತನಾಗಿ, ನಾನು ಇದನ್ನು ನಂಬುತ್ತೇನೆ.

ಅವರಿಲ್ಲದೆ, ಪಕ್ಷ ಇಂದಿನಂತೆ ಬಲಿಷ್ಠವಾಗಿರುತ್ತಿರಲಿಲ್ಲ. ಅವರ ಆರೋಗ್ಯ ಅನುಮತಿಸುವವರೆಗೆ, 2047ರ ವಿಕಸಿತ ಭಾರತದ ಕನಸನ್ನು ಸಾಕಾರಗೊಳಿಸಲು ನಮಗೆ ಮೋದಿಯವರ ಅಗತ್ಯವಿದೆ. ಅವರ ವರ್ಚಸ್ಸು ಪಕ್ಷದ ಸಾಂಪ್ರದಾಯಿಕವಲ್ಲದ ಮತದಾರರನ್ನು ಆಕರ್ಷಿಸಿದೆ. ಅವರಿಲ್ಲದೆ, ಈ ಮತದಾರರು ಬಿಜೆಪಿಗೆ ಮತ ಹಾಕುತ್ತಿರಲಿಲ್ಲ’ ಎಂದು ದುಬೆ ಹೇಳಿದರು.

ಕಾಂಗ್ರೆಸ್, ಆರ್‌ಜೆಡಿ ತಮ್ಮ ಸ್ವಂತ ಕುಟುಂಬಗಳ ಮೇಲೆ ಗಮನ ಹರಿಸುತ್ತವೆ ಎಂದು ಅವರು ಆರೋಪಿಸಿದ್ದಾರೆ.

ಈ ಸಂದರ್ಭದಲ್ಲಿ, ಬಿಜೆಪಿ ನಾಯಕರು 75 ವರ್ಷಗಳ ನಂತರ ನಿವೃತ್ತರಾಗುತ್ತಾರೆ ಎಂಬ ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಹೇಳಿಕೆಯನ್ನು ದುಬೆ ತಳ್ಳಿಹಾಕಿದರು.

ಮೋದಿ ಹಾಗೆ ಮಾಡುವ ಅಗತ್ಯವಿಲ್ಲ ಎಂದು ಅವರು ಹೇಳಿದರು. ಮೋದಿ ಪ್ರಧಾನಿಯಾದ ನಂತರ ದೇಶಾದ್ಯಂತ ಬಿಜೆಪಿಯ ಮುಖ ಬದಲಾಗಿದೆ ಎಂದು ಅವರು ಹೇಳಿದರು. ಪಕ್ಷವು ಸತತ ಮೂರು ಲೋಕಸಭಾ ಚುನಾವಣೆಗಳು ಮತ್ತು ಹಲವು ವಿಧಾನಸಭಾ ಚುನಾವಣೆಗಳನ್ನು ಗೆದ್ದಿದೆ ಎಂದು ಅವರು ಹೇಳಿದರು.

ಮೋದಿಯಿಂದಾಗಿ ಪಕ್ಷವು ಅಸ್ತಿತ್ವವಿಲ್ಲದ ರಾಜ್ಯಗಳಲ್ಲಿಯೂ ಸಹ ತನ್ನ ಛಾಪು ಮೂಡಿಸಲು ಸಾಧ್ಯವಾಗಿದೆ ಎಂದು ಅವರು ಹೇಳಿದರು.