ಜಾಗತಿಕ ಆರ್ಥಿಕತೆಗೆ ಅಗೋಚರವಾದ ದೊಡ್ಡ ಬಿಕ್ಕಟ್ಟೊಂದು ಎದುರಾಗುತ್ತಿದೆ. ಮುಂಬರುವ ಹತ್ತು ವರ್ಷಗಳಲ್ಲಿ ಜಾಗತಿಕ ದಕ್ಷಿಣದ ದೇಶಗಳಲ್ಲಿ (ಗ್ಲೋಬಲ್ ಸೌತ್) ಸುಮಾರು 120 ಕೋಟಿ ಯುವಕರು ದುಡಿಯುವ ವಯಸ್ಸಿಗೆ ಕಾಲಿಡಲಿದ್ದಾರೆ. ಆದರೆ ಅದೇ ಅವಧಿಯಲ್ಲಿ ಜಗತ್ತಿನಾದ್ಯಂತ ಸೃಷ್ಟಿಯಾಗಬಹುದಾದ ಗರಿಷ್ಠ ಉದ್ಯೋಗಗಳ ಪ್ರಮಾಣ 40 ಕೋಟಿಯನ್ನು ಮೀರಲಿಕ್ಕಿಲ್ಲ ಎಂದು ವಿಶ್ವ ಬ್ಯಾಂಕ್ ಅಂದಾಜಿಸಿದೆ.
ಅಂದರೆ ಸರಿಸುಮಾರು 80 ಕೋಟಿ ಯುವಜನರಿಗೆ ಸೂಕ್ತ ಉದ್ಯೋಗ ಸಿಗದ ಅತಂತ್ರ ಸ್ಥಿತಿ ನಿರ್ಮಾಣವಾಗಲಿದೆ. ಜನಸಂಖ್ಯೆಯ ಹೆಚ್ಚಳವು ಆರ್ಥಿಕ ಪ್ರಗತಿಗೆ ವರವಾಗಬೇಕಿದ್ದ ಜಾಗದಲ್ಲಿ.. ನಿರುದ್ಯೋಗ, ಬಡತನ, ವಲಸೆ ಹಾಗೂ ಸಾಮಾಜಿಕ ಅಸ್ಥಿರತೆಗೆ ದಾರಿಯಾಗುವ ಅಪಾಯ ಸ್ಪಷ್ಟವಾಗಿ ಗೋಚರಿಸುತ್ತಿದೆ.
ಯುವಜನತೆ ಹೆಚ್ಚಿರುವುದು ಯಾವುದೇ ದೇಶಕ್ಕೆ ಆರ್ಥಿಕವಾಗಿ ದೊರೆಯುವ ಮಹತ್ವದ ಅವಕಾಶ ಎಂದು ಪರಿಗಣಿಸಲಾಗುತ್ತದೆ. ದುಡಿಯುವ ವಯಸ್ಸಿನ ಜನಸಂಖ್ಯೆ ಹೆಚ್ಚಾದಾಗ ಉತ್ಪಾದನೆ, ಉಳಿತಾಯ ಮತ್ತು ಹೂಡಿಕೆಗಳು ಗರಿಗೆದರಿ ದೇಶ ವೇಗವಾಗಿ ಬೆಳೆಯುತ್ತದೆ ಎಂಬುದು ಆರ್ಥಿಕ ತಜ್ಞರ ಲೆಕ್ಕಾಚಾರವಾಗಿತ್ತು. ಆದರೆ ಈಗ ಆ ಪರಿಸ್ಥಿತಿ ಸಂಪೂರ್ಣ ಬುಡಮೇಲಾಗುತ್ತಿದೆ.
ಯುವಜನರ ಬೆಳವಣಿಗೆಯ ವೇಗಕ್ಕೆ ತಕ್ಕಂತೆ ಉದ್ಯೋಗಗಳು ಸೃಷ್ಟಿಯಾಗುತ್ತಿಲ್ಲ. ವಿಶ್ವ ಬ್ಯಾಂಕ್ ಅಧ್ಯಕ್ಷ ಅಜಯ್ ಬಂಗಾ ನೀಡಿರುವ ಎಚ್ಚರಿಕೆಯ ಪ್ರಕಾರ, ಮುಂದಿನ ಒಂದು ದಶಕದಲ್ಲಿ ಗ್ಲೋಬಲ್ ಸೌತ್ ವ್ಯಾಪ್ತಿಯಲ್ಲಿ 120 ಕೋಟಿ ಯುವಕರು ಉದ್ಯೋಗ ಮಾರುಕಟ್ಟೆಗೆ ಪ್ರವೇಶಿಸಲಿದ್ದು, ಜಾಗತಿಕ ಆರ್ಥಿಕತೆ ಒದಗಿಸಬಲ್ಲ ಉದ್ಯೋಗಗಳು ಕೇವಲ 40 ಕೋಟಿ ಮಾತ್ರ. ಇದರಿಂದ ಬರೋಬ್ಬರಿ 80 ಕೋಟಿ ಉದ್ಯೋಗಾವಕಾಶಗಳ ಕೊರತೆ ತಲೆದೋರಲಿದೆ.
ಜನಸಂಖ್ಯಾ ಲಾಭ.. ಬಿಕ್ಕಟ್ಟಾಗಿ ಬದಲಾಗುವ ಅಪಾಯ
ದಶಕಗಳಿಂದಲೂ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ‘ಜನಸಂಖ್ಯಾ ಲಾಭಾಂಶ’ (ಡೆಮೋಗ್ರಾಫಿಕ್ ಡಿವಿಡೆಂಡ್) ಆರ್ಥಿಕ ಬೆಳವಣಿಗೆಯ ಬೆನ್ನೆಲುಬಾಗಿ ನಿಂತಿತ್ತು. ಜನನ ಪ್ರಮಾಣ ತಗ್ಗಿ, ದುಡಿಯುವ ವರ್ಗಕ್ಕೆ ಹೋಲಿಸಿದರೆ ಮಕ್ಕಳು ಮತ್ತು ವೃದ್ಧರ ಸಂಖ್ಯೆ ಕಡಿಮೆಯಿದ್ದಾಗ ದೇಶಕ್ಕೆ ಗರಿಷ್ಠ ಉತ್ಪಾದಕತೆ, ಉಳಿತಾಯ ಹಾಗೂ ಬಂಡವಾಳ ಹೂಡಿಕೆಗೆ ರಹದಾರಿ ಸಿಗುತ್ತದೆ.
ಪೂರ್ವ ಏಷ್ಯಾ ರಾಷ್ಟ್ರಗಳ ಆರ್ಥಿಕ ಯಶಸ್ಸಿಗೆ ಇದೇ ಮುಖ್ಯ ಕಾರಣವಾಗಿತ್ತು. ಆದರೆ ಪ್ರಸ್ತುತ ಪರಿಸ್ಥಿತಿ ಭಿನ್ನವಾಗಿದೆ. ಭಾರತ ಸೇರಿದಂತೆ ಹಲವು ಮುಂದುವರಿಯುತ್ತಿರುವ ದೇಶಗಳಲ್ಲಿ ಯುವಜನತೆ ಹೆಚ್ಚುತ್ತಿದ್ದರೂ, ಅವರಿಗೆ ತಕ್ಕ ಉದ್ಯೋಗಗಳನ್ನು ಕಲ್ಪಿಸುವ ಮಟ್ಟದಲ್ಲಿ ಮಾರುಕಟ್ಟೆಗಳು, ಮೂಲಸೌಕರ್ಯಗಳು ಮತ್ತು ಸಾಂಸ್ಥಿಕ ವ್ಯವಸ್ಥೆಗಳು ಬೆಳೆದಿಲ್ಲ. ಪರಿಣಾಮವಾಗಿ, ಜನಸಂಖ್ಯಾ ಅನುಕೂಲವೇ ಈಗ ನಿರುದ್ಯೋಗ ಬಿಕ್ಕಟ್ಟಾಗಿ ಮಾರ್ಪಡುವ ಭೀತಿ ಮೂಡಿದೆ.
ಕೈಗಾರಿಕೆಗಳಲ್ಲಿ ಉದ್ಯೋಗ ಕಡಿತ
ಹಿಂದೆ ಬಡ ರಾಷ್ಟ್ರಗಳು ಕೃಷಿಯಿಂದ ಕೈಗಾರಿಕೆಗಳತ್ತ ಮುಖ ಮಾಡಿದಾಗ, ಕಡಿಮೆ ಕೌಶಲ್ಯವಿದ್ದ ಲಕ್ಷಾಂತರ ಕಾರ್ಮಿಕರಿಗೆ ಉತ್ಪಾದನಾ ವಲಯವು ಉದ್ಯೋಗ ನೀಡುತ್ತಿತ್ತು. ಆದರೆ ಈಗ ಯಂತ್ರೋಪಕರಣಗಳು, ರೋಬೋಟ್‌ಗಳು ಮತ್ತು ಆಧುನಿಕ ತಂತ್ರಜ್ಞಾನಗಳ ಪ್ರಭಾವದಿಂದಾಗಿ ಮ್ಯಾನುಫ್ಯಾಕ್ಚರಿಂಗ್ ರಂಗದಲ್ಲಿ ಮಾನವ ಶ್ರಮದ ಅಗತ್ಯತೆ ಕಡಿಮೆಯಾಗುತ್ತಿದೆ. ಇದರ ಫಲವಾಗಿ ಅಭಿವೃದ್ಧಿಶೀಲ ದೇಶಗಳು ನಿರೀಕ್ಷಿತ ಆದಾಯದ ಮಟ್ಟವನ್ನು ಮುಟ್ಟುವ ಮುನ್ನವೇ ಕೈಗಾರಿಕಾ ಉದ್ಯೋಗಗಳು ಕರಗುತ್ತಿವೆ.
ಜೊತೆಗೆ, ಆಧುನಿಕ ಆರ್ಥಿಕತೆಯಲ್ಲಿ ಹೆಚ್ಚಿನ ಕೌಶಲ್ಯ ಮತ್ತು ಡಿಜಿಟಲ್ ಜ್ಞಾನ ಹೊಂದಿರುವವರಿಗೆ ಮಾತ್ರ ಹೆಚ್ಚಿನ ಅವಕಾಶಗಳು ದಕ್ಕುತ್ತಿವೆ. ಗುಣಮಟ್ಟದ ಶಿಕ್ಷಣ, ವೃತ್ತಿಪರ ತರಬೇತಿ ಮತ್ತು ಡಿಜಿಟಲ್ ಸೌಲಭ್ಯಗಳಿಂದ ವಂಚಿತರಾದ ಕೋಟ್ಯಂತರ ಯುವಕರು ಉದ್ಯೋಗ ಸ್ಪರ್ಧೆಯ ಜಗತ್ತಿನಲ್ಲಿ ಹಿಂದುಳಿಯುತ್ತಿದ್ದಾರೆ.
ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಉತ್ತೇಜನ ಅಗತ್ಯ
ಈ ಉದ್ಯೋಗ ಬಿಕ್ಕಟ್ಟನ್ನು ಸಮರ್ಥವಾಗಿ ಎದುರಿಸಲು ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ (MSME) ಹೆಚ್ಚಿನ ಉತ್ತೇಜನ ನೀಡಬೇಕು ಎಂದು ವಿಶ್ವ ಬ್ಯಾಂಕ್ ಸಲಹೆ ಮಾಡಿದೆ. ವಿಪರೀತ ಬಡ್ಡಿದರಗಳು, ಜಟಿಲ ನಿಯಮಗಳು, ಅನಿಶ್ಚಿತ ಸರ್ಕಾರದ ನೀತಿಗಳು ಹಾಗೂ ಅಧಿಕ ತೆರಿಗೆಗಳು ಹೊಸ ಉದ್ಯಮಗಳ ಸ್ಥಾಪನೆಗೆ ಅಡ್ಡಿಯಾಗುತ್ತಿವೆ.
ನಿಯಮಗಳನ್ನು ಸರಳೀಕರಿಸಿ, ಪಾರದರ್ಶಕ ಆಡಳಿತ ಮತ್ತು ಸದೃಢ ಕಾನೂನು ಚೌಕಟ್ಟನ್ನು ಕಲ್ಪಿಸಿದರೆ ಬಂಡವಾಳ ಹೂಡಿಕೆಗಳನ್ನು ಆಕರ್ಷಿಸಬಹುದು. ಸಣ್ಣ ಮತ್ತು ಮಧ್ಯಮ ಉದ್ದಿಮೆಗಳು ದೊಡ್ಡ ಪ್ರಮಾಣದಲ್ಲಿ ಉದ್ಯೋಗಗಳನ್ನು ಸೃಷ್ಟಿಸಬಲ್ಲವು. ಇದರೊಂದಿಗೆ ಮೂಲಸೌಕರ್ಯಗಳ ಅಭಿವೃದ್ಧಿಯೂ ಅತ್ಯಂತ ಪ್ರಮುಖವಾಗಿದೆ.
ವಿದ್ಯುತ್ ವ್ಯತ್ಯಯ, ದುಬಾರಿ ಸಾರಿಗೆ ವೆಚ್ಚ, ಕೆಟ್ಟ ರಸ್ತೆಗಳು ಮತ್ತು ಬಂದರುಗಳಲ್ಲಿನ ವಿಳಂಬಗಳು ವ್ಯಾಪಾರ ವಹಿವಾಟಿಗೆ ತಡೆಗೋಡೆಯಾಗಿವೆ. ಮೂಲಸೌಕರ್ಯಗಳ ನಿರ್ಮಾಣವು ತಕ್ಷಣಕ್ಕೆ ಕೆಲಸಗಳನ್ನು ಒದಗಿಸುವುದು ಮಾತ್ರವಲ್ಲದೆ, ಮುಂದೆ ಉದ್ಯಮ ನಿರ್ವಹಣಾ ವೆಚ್ಚವನ್ನೂ ತಗ್ಗಿಸುತ್ತದೆ.
ವಲಯವಾರು ಉದ್ಯೋಗ ತಂತ್ರಗಳು
ಕೃಷಿಯನ್ನು ಆಧುನೀಕರಣಗೊಳಿಸುವುದರಿಂದ ಗ್ರಾಮೀಣ ಭಾಗದಲ್ಲೇ ಭಾರಿ ಪ್ರಮಾಣದ ಕೆಲಸಗಳನ್ನು ಸೃಷ್ಟಿಸಲು ಸಾಧ್ಯವಿದೆ. ಅಧಿಕ ಇಳುವರಿ ನೀಡುವ ಬೆಳೆಗಳು, ಕೃಷಿ ತಂತ್ರಜ್ಞಾನ, ಶೀತಲೀಕರಣ ಗೋದಾಮುಗಳು, ಆಹಾರ ಸಂಸ್ಕರಣೆ ಮತ್ತು ಹವಾಮಾನ ಬದಲಾವಣೆಯನ್ನು ತಡೆದುಕೊಳ್ಳುವ ಕೃಷಿ ಪದ್ಧತಿಗಳಿಗೆ ಬಂಡವಾಳ ಹೆಚ್ಚಿಸಬೇಕು. ಇದರಿಂದ ಗ್ರಾಮೀಣ ಯುವಜನರಿಗೆ ಸ್ಥಳೀಯವಾಗಿಯೇ ಉತ್ತಮ ಉದ್ಯೋಗ ಸಿಕ್ಕು, ನಗರಗಳತ್ತ ವಲಸೆ ಹೋಗುವುದು ತಪ್ಪುತ್ತದೆ.
ಆರೋಗ್ಯ ಮತ್ತು ಆರೈಕೆ (ಕೇರ್‌ಗೇವಿಂಗ್) ಕ್ಷೇತ್ರಗಳೂ ಗಣನೀಯ ಉದ್ಯೋಗಗಳನ್ನು ಸೃಷ್ಟಿಸಬಲ್ಲವು. ವೈದ್ಯಕೀಯ ಸಿಬ್ಬಂದಿ, ನರ್ಸ್‌ಗಳು, ಆಶಾ ಕಾರ್ಯಕರ್ತೆಯರು ಮತ್ತು ವೃದ್ಧರ ಆರೈಕೆ ಮಾಡುವ ತಜ್ಞರಿಗೆ ಬೇಡಿಕೆ ಹೆಚ್ಚುತ್ತಿದೆ. ಮುಖ್ಯವಾಗಿ ಯುವತಿಯರು ಮತ್ತು ಮಹಿಳೆಯರಿಗೆ ಈ ರಂಗಗಳು ಹೆಚ್ಚಿನ ಅವಕಾಶ ನೀಡುತ್ತವೆ.
ಪ್ರವಾಸೋದ್ಯಮ ಮತ್ತು ಸಾಂಸ್ಕೃತಿಕ ರಂಗಗಳು ಕಡಿಮೆ ಕೌಶಲ್ಯ ಹೊಂದಿದವರಿಗೂ ಆದಾಯ ತಂದುಕೊಡುತ್ತವೆ. ಸಾರಿಗೆ, ವಸತಿ, ಕರಕುಶಲ ವಸ್ತುಗಳು ಹಾಗೂ ಸ್ಥಳೀಯ ಸೇವೆಗಳಿಂದ ವಿವಿಧ ವರ್ಗಗಳಿಗೆ ಆದಾಯ ಹರಿದುಬರುತ್ತದೆ. ಉತ್ಪಾದನಾ ರಂಗದಲ್ಲೂ ಹೊಸ ಸಾಧ್ಯತೆಗಳನ್ನು ಹುಡುಕಬೇಕಿದೆ. ಸೌರಶಕ್ತಿ ಉಪಕರಣಗಳು, ಇ-ವಾಹನಗಳು ಮತ್ತು ಇಂಧನ ಉಳಿತಾಯ ಪರಿಕರಗಳ ಉತ್ಪಾದನೆಯಂತಹ ಹಸಿರು ಕೈಗಾರಿಕೆಗಳನ್ನು ಬೆಳೆಸಿ, ಅಗತ್ಯ ಕೌಶಲ್ಯ ತರಬೇತಿ ನೀಡಬೇಕಿದೆ.
ಭಾರತಕ್ಕೆ ಎದುರಾಗಿದೆ ಬಹುದೊಡ್ಡ ಸವಾಲು
ವಿಶ್ವದಲ್ಲೇ ಅತ್ಯಧಿಕ ಜನಸಂಖ್ಯೆ ಹೊಂದಿರುವ ದೇಶವಾಗಿರುವ ಭಾರತ ಈ ಬಿಕ್ಕಟ್ಟಿನ ಕೇಂದ್ರಬಿಂದುವಾಗಿದೆ. ಪ್ರತಿ ವರ್ಷ ಲಕ್ಷಾಂತರ ಯುವಕರು ಪದವಿ ಮುಗಿಸಿ ಉದ್ಯೋಗ ಮಾರುಕಟ್ಟೆಗೆ ಬರುತ್ತಿದ್ದಾರೆ. ಆದರೆ ಅದೇ ಪ್ರಮಾಣದಲ್ಲಿ ಉದ್ಯೋಗಗಳು ಸೃಷ್ಟಿಯಾಗುತ್ತಿಲ್ಲ. ಯುವಜನರ ಕೌಶಲ್ಯ ಮತ್ತು ಮಾರುಕಟ್ಟೆಯ ಅಗತ್ಯತೆಗಳ ನಡುವಿನ ಕಂದಕ, ಅರೆಕಾಲಿಕ ಉದ್ಯೋಗ ಹಾಗೂ ಉದ್ಯೋಗ ಮಾರುಕಟ್ಟೆಯಲ್ಲಿ ಮಹಿಳೆಯರ ಕಡಿಮೆ ಭಾಗವಹಿಸುವಿಕೆ ಇಲ್ಲಿನ ಪ್ರಮುಖ ಸಮಸ್ಯೆಗಳಾಗಿವೆ.
ಕೃಷಿ ವಲಯವು ಇಂದಿಗೂ ದೇಶದ ಅರ್ಧದಷ್ಟು ಜನರಿಗೆ ಜೀವನೋಪಾಯ ಒದಗಿಸುತ್ತಿದ್ದರೂ, ಒಟ್ಟು ದೇಶೀಯ ಉತ್ಪನ್ನಕ್ಕೆ (GDP) ಅದರ ಕೊಡುಗೆ 2023–24ರಲ್ಲಿ ಕೇವಲ ಶೇ. 16ರಷ್ಟಿದೆ. ಸರಾಸರಿ 30 ವರ್ಷದೊಳಗಿನ ಯುವ ಜನಸಂಖ್ಯೆಯನ್ನು ಹೊಂದಿರುವ ಭಾರತಕ್ಕೆ ಇದು ನಿರ್ಣಾಯಕ ಘಟ್ಟ. ಈ ಅಪಾರ ಯುವಶಕ್ತಿಯನ್ನು ಉತ್ಪಾದಕತೆಯ ಶಕ್ತಿಯನ್ನಾಗಿ ಪರಿವರ್ತಿಸಿದರೆ ಅದು ಬೃಹತ್ ಆರ್ಥಿಕ ಅವಕಾಶವಾಗುತ್ತದೆ; ಇಲ್ಲವಾದರೆ ನಿರುದ್ಯೋಗ, ಹತಾಶೆ, ವಲಸೆ ಮತ್ತು ಸಾಮಾಜಿಕ ಉದ್ವಿಗ್ನತೆಗಳು ಹೆಚ್ಚಾಗಲಿವೆ ಎಂದು ತಜ್ಞರು ಮತ್ತು ವಿಶ್ಲೇಷಕರು ಎಚ್ಚರಿಸಿದ್ದಾರೆ.
ಉದ್ಯೋಗ ಬಿಕ್ಕಟ್ಟು ಮುಂದುವರಿದರೆ ಅನಿವಾರ್ಯವಾಗುವ ವಲಸೆ
ಕೆಲಸವಿಲ್ಲದೆ ಹೋದಾಗ ಯುವಜನತೆಯಲ್ಲಿ ಸರ್ಕಾರಗಳ ಮೇಲಿನ ವಿಶ್ವಾಸ ಕುಸಿದು, ಸಾಮಾಜಿಕ ಕಂದಕಗಳು ಹೆಚ್ಚಾಗುತ್ತವೆ. ಜೊತೆಗೆ ಅಪರಾಧಗಳು ಮತ್ತು ತೀವ್ರಗಾಮಿ ಸಿದ್ಧಾಂತಗಳತ್ತ ಆಕರ್ಷಿತರಾಗುವ ಅಪಾಯವಿರುತ್ತದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ. ಗ್ಲೋಬಲ್ ಸೌತ್ ದೇಶಗಳಲ್ಲಿ ಉದ್ಯೋಗ ಬಿಕ್ಕಟ್ಟು ತೀವ್ರಗೊಂಡರೆ, ಬದುಕಿನ ದಾರಿ ಹುಡುಕಿಕೊಂಡು ಮುಂದುವರಿದ ದೇಶಗಳತ್ತ ಅಕ್ರಮ ವಲಸೆ ಹೆಚ್ಚಾಗುವ ಸಾಧ್ಯತೆಯಿದೆ.
ಅಂತರರಾಷ್ಟ್ರೀಯ ಆರ್ಥಿಕ ಸಂಸ್ಥೆಗಳು ಮತ್ತು ಮುಂದುವರಿದ ದೇಶಗಳು ಕಡಿಮೆ ವೆಚ್ಚದ ದೀರ್ಘಕಾಲೀನ ಸಾಲ ಹಾಗೂ ತಂತ್ರಜ್ಞಾನ ವರ್ಗಾವಣೆಯ ನೆರವು ನೀಡಬೇಕಿದೆ. ಅಭಿವೃದ್ಧಿಶೀಲ ರಾಷ್ಟ್ರಗಳೂ ಆಡಳಿತ ಸುಧಾರಣೆ, ಕೌಶಲ್ಯಾಭಿವೃದ್ಧಿ, ಮೂಲಸೌಕರ್ಯ ಮತ್ತು ಉದ್ಯೋಗ ಸೃಷ್ಟಿ ಮಾಡುವ ಕೈಗಾರಿಕೆಗಳ ಮೇಲೆ ಚಿತ್ತ ಹರಿಸಬೇಕಿದೆ.
ಯುವ ಸಮುದಾಯಕ್ಕೆ ಗೌರವಾನ್ವಿತ ಕೆಲಸ ಮತ್ತು ಬದುಕು ನೀಡುವಲ್ಲಿ ಜಗತ್ತು ವಿಫಲವಾದರೆ, 21ನೇ ಶತಮಾನದ ‘ಜನಸಂಖ್ಯಾ ಲಾಭಾಂಶ’ವು ಜಾಗತಿಕ ಮಹಾಸಂಕಟವಾಗಿ ಪರಿಣಮಿಸಲಿದೆ.
