ಟ್ರಂಪ್ ಕ್ಯಾಬಿನೆಟ್ ನಿಂದ ಎಲಾನ್ ಮಸ್ಕ್ ಹೊರಕ್ಕೆ; ಅವಕಾಶಕ್ಕೆ ಧನ್ಯವಾದಗಳು ಎಂದ ಬಿಲೇನಿಯರ್

ಬಹುಕೋಟಿ ಉದ್ಯಮಿ ಎಲಾನ್ ಮಸ್ಕ್ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತದ ಕ್ಯಾಬಿನೆಟ್ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ತಮ್ಮದೇ ಒಡೆತನದ X ಖಾತೆಯ ಮೂಲಕ ರಾಜೀನಾಮೆಯ ಅಧಿಕೃತ ಘೋಷಣೆ ಮಾಡಿದ ಎಲಾನ್ ಮಸ್ಕ್, ಟ್ರಂಪ್ ಆಡಳಿತದ DOGE ವಿಭಾಗವನ್ನು ತೊರೆಯಲು ನಿರ್ಧರಿಸಿದ್ದಾರೆ.

ಬುಧವಾರ ಸಂಜೆ ಮಸ್ಕ್ ಅವರು ರಾಜೀನಾಮೆಯನ್ನು ಘೋಷಿಸಿದರು. ಹಾಗೆಯೇ ತಮ್ಮ ಕ್ಯಾಬಿನೆಟ್ ನಲ್ಲಿ ಅವಕಾಶ ಕೊಟ್ಟಿದ್ದಕ್ಕೆ ಟ್ರಂಪ್ ಅವರಿಗೆ ಧನ್ಯವಾದ ತಿಳಿಸಿದ್ದಾರೆ. ಟ್ರಂಪ್ ಆಡಳಿತದಿಂದ ಅವರು ನಿರ್ಗಮಿಸಿರುವುದು ಸಾವಿರಾರು ಮಂದಿಯ ವಜಾ, ಸರ್ಕಾರಿ ಸಂಸ್ಥೆಗಳ ಕಿತ್ತುಹಾಕುವಿಕೆ ಮತ್ತು ಹಲವಾರು ಮೊಕದ್ದಮೆಗಳನ್ನು ಒಳಗೊಂಡ ಪ್ರಕ್ಷುಬ್ಧ ಅಧ್ಯಾಯದ ಅಂತ್ಯವನ್ನು ಸೂಚಿಸುತ್ತದೆ ಎಂದು ರಾಜಕೀಯ ಪಂಡಿತರು ಲೆಕ್ಕಾಚಾರ ಹಾಕಿದ್ದಾರೆ.

‘ವಿಶೇಷ ಸರ್ಕಾರಿ ಉದ್ಯೋಗಿಯಾಗಿ ನನ್ನ ಸೇವೆ ಕೊನೆಗೊಳ್ಳುತ್ತಿದೆ. ಅನಗತ್ಯ ಖರ್ಚುಗಳನ್ನು ಕಡಿಮೆ ಮಾಡಲು ಅವಕಾಶ ನೀಡಿದ್ದಕ್ಕಾಗಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ನಾನು ಧನ್ಯವಾದ ಹೇಳುತ್ತೇನೆ. ಸರ್ಕಾರದ ಕಾರ್ಯ ಶೈಲಿಯ ಭಾಗವಾದಾಗ DOGE ನ ಧ್ಯೇಯವು ಕಾಲಾನಂತರದಲ್ಲಿ ಬಲಗೊಳ್ಳುತ್ತದೆ” ಎಂದು ತಮ್ಮ X ಖಾತೆಯಲ್ಲಿ ಮಸ್ಕ್ ಬರೆದುಕೊಂಡಿದ್ದಾರೆ.

ಟ್ರಂಪ್ ಆಡಳಿತದಲ್ಲಿ ಎಲಾನ್ ಮಸ್ಕ್ ಅವರ ಸರ್ಕಾರಿ ಹುದ್ದೆ ಸಿಕ್ಕ ನಂತರದ ದಿನಗಳಲ್ಲಿ ಟೆಸ್ಲಾ ಸಂಸ್ಥೆಯ ಲಾಭಾಂಶದಲ್ಲಿ ಗಣನೀಯ ಕುಸಿತ ಕಂಡುಬಂದಿತ್ತು. ಎಲಾನ್ ಮಸ್ಕ್ ತಮ್ಮದೇ ಸಂಸ್ಥೆ ನಷ್ಟಕ್ಕೆ ಜಾರುತ್ತಿರುವಾಗ ಸರ್ಕಾರಿ ಹುದ್ದೆಯಲ್ಲಿ ಇರುವುದು ಮುಂದೆ ಇನ್ನಷ್ಟು ನಷ್ಟಕ್ಕೆ ಕಾರಣವಾಗುವ ಮುನ್ನ ಎಚ್ಚೆತ್ತುಕೊಳ್ಳುವುದು ಒಳಿತು ಎಂಬ ಕಾರಣಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ ಎಂಬುದು ಒಂದು ಲೆಕ್ಕಾಚಾರ.

ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ ಟ್ರಂಪ್ ಹಾಗೂ ಎಲಾನ್ ಮಸ್ಕ್ ಇಬ್ಬರ ಒಡನಾಟ ಕೂಡ ಅಷ್ಟು ಸರಿ ಇರಲಿಲ್ಲ ಎಂಬುದು. ಟ್ರಂಪ್ ಅವರ ಬಹು ಚರ್ಚಿತ ಮತ್ತು ವಿವಾದಾತ್ಮಕ ಬಜೆಟ್ ಮಸೂದೆಯ ಬಜೆಟ್ ಬಹು ಟ್ರಿಲಿಯನ್ ಡಾಲರ್ ತೆರಿಗೆ ವಿನಾಯಿತಿ ಮತ್ತು ರಕ್ಷಣಾ ವೆಚ್ಚದಲ್ಲಿ ಪ್ರಮುಖ ಹೆಚ್ಚಳವನ್ನು ಪ್ರಸ್ತಾಪಿಸುತ್ತದೆ.

ಇದರ ಬಗ್ಗೆ ಮಸ್ಕ್ ಸಾರ್ವಜನಿಕವಾಗಿ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದರು. ಸಿಬಿಎಸ್‌ಗೆ ನೀಡಿದ ಸಂದರ್ಶನದಲ್ಲಿ, ಈ ಮಸೂದೆಯು ದೇಶದ ಫೆಡರಲ್ ಕೊರತೆಯನ್ನು ಹೆಚ್ಚಿಸುತ್ತದೆ ಮತ್ತು ‘ಉಳಿತಾಯ ಮತ್ತು ದಕ್ಷತೆ’ಯ ಕಡೆಗೆ DOGE ನ ಪ್ರಯತ್ನಗಳನ್ನು ದುರ್ಬಲಗೊಳಿಸುತ್ತದೆ ಎಂದು ಅವರು ಹೇಳಿದ್ದರು.