ಹಮಾಸ್‌ಗೆ ಬೆಂಬಲ ನೀಡಿದ ಆರೋಪ: ಅಮೇರಿಕಾದಲ್ಲಿ ಪ್ಯಾಲಸ್ತೀನ್‌ ಬೆಂಬಲಿಗ ಭಾರತೀಯ ವಿದ್ಯಾರ್ಥಿಯ ಬಂಧನ

ವಾಷಿಂಗ್ಟನ್: ಪ್ಯಾಲೆಸ್ಟೀನಿಯನ್ ಭಯೋತ್ಪಾದಕ ಸಂಘಟನೆ ಹಮಾಸ್ ಪರವಾಗಿ ಸಾಮಾಜಿಕ ಮಾಧ್ಯಮದಲ್ಲಿ ಪ್ರಚಾರ ಮಾಡಿದ ಆರೋಪದ ಮೇಲೆ ಭಾರತೀಯ ವಿದ್ಯಾರ್ಥಿ ಬದರ್ ಖಾನ್ ಸೂರಿಯನ್ನು ಅಮೆರಿಕದ ಭದ್ರತಾ ಅಧಿಕಾರಿಗಳು ಬಂಧಿಸಿದ್ದಾರೆ.

ಬಾದರ್ ಖಾನ್ ವಾಷಿಂಗ್ಟನ್‌ನ ಜಾರ್ಜ್‌ಟೌನ್ ವಿಶ್ವವಿದ್ಯಾಲಯದಲ್ಲಿ ಸಂಶೋಧಕರಾಗಿದ್ದಾರೆ. ಸೋಮವಾರ ತಡರಾತ್ರಿ ವರ್ಜೀನಿಯಾದಲ್ಲಿರುವ ಅವರ ಮನೆಯಲ್ಲಿ ಫೆಡರಲ್ ಏಜೆಂಟರು ಅವರನ್ನು ಬಂಧಿಸಿದರು. ಅವರ ವೀಸಾವನ್ನು ಸಹ ರದ್ದುಗೊಳಿಸಲಾಗಿದೆ ಎಂದು ಅಮೆರಿಕದ ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆ (ಡಿಎಚ್‌ಎಸ್) ತಿಳಿಸಿದೆ. ಸಾಮಾಜಿಕ ಮಾಧ್ಯಮದಲ್ಲಿ ಹಮಾಸ್‌ಗೆ ಬೆಂಬಲವನ್ನು ಪ್ರಚಾರ ಮಾಡಿದ್ದಕ್ಕಾಗಿ ಅವರನ್ನು ಬಂಧಿಸಲಾಗಿದೆ ಮತ್ತು ಅವರನ್ನು ಭಾರತಕ್ಕೆ ಗಡೀಪಾರು ಮಾಡಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಡಿಎಚ್‌ಎಸ್ ಸ್ಪಷ್ಟಪಡಿಸಿದೆ.

ಈ ನಡುವೆ, ಬದರ್ ಖಾನ್ ತನ್ನ ಬಂಧನ ಮತ್ತು ಗಡೀಪಾರು ಮಾಡುವಿಕೆಯನ್ನು ವಲಸೆ ನ್ಯಾಯಾಲಯದಲ್ಲಿ ಪ್ರಶ್ನಿಸಿದರು. ತನ್ನ ಪತ್ನಿಯ ಪ್ಯಾಲೆಸ್ಟೀನಿಯನ್ ಬೇರುಗಳಿಂದಾಗಿ ಅಮೆರಿಕ ಸರ್ಕಾರ ಈ ಕ್ರಮಗಳನ್ನು ತೆಗೆದುಕೊಂಡಿದೆ ಮತ್ತು ತನ್ನ ಮೇಲೆ ಯಾವುದೇ ಕ್ರಿಮಿನಲ್ ದಾಖಲೆ ಇಲ್ಲ ಎಂದು ಬದರ್ ಖಾನ್ ತನ್ನ ಅರ್ಜಿಯಲ್ಲಿ ತಿಳಿಸಿದ್ದಾರೆ.

ಬದರ್ ಹಿನ್ನೆಲೆ

ಬದರ್ ಖಾನ್ ಭಾರತದವರು. ಆದಾಗ್ಯೂ, ಅವರ ಊರಿನ ಬಗ್ಗೆ ಯಾವುದೇ ಸ್ಪಷ್ಟತೆ ಇಲ್ಲ. ಆದರೆ, ಅವರ ಶಿಕ್ಷಣ ಭಾರತದಲ್ಲಿ ನಡೆದಂತೆ ತೋರುತ್ತದೆ. ಅವರು ನವದೆಹಲಿಯ ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ವಿಶ್ವವಿದ್ಯಾಲಯದಿಂದ ಶಾಂತಿ ಮತ್ತು ಸಂಘರ್ಷ ಅಧ್ಯಯನದಲ್ಲಿ ಪಿಎಚ್‌ಡಿ ಪಡೆದರು. ನಂತರ ಅವರು ಇರಾಕ್ ಮತ್ತು ಅಫ್ಘಾನಿಸ್ತಾನದಲ್ಲಿ ಶಾಂತಿ ನಿರ್ಮಾಣಕ್ಕೆ ಸಂಬಂಧಿಸಿದ ವಿಷಯಗಳ ಕುರಿತು ಸಂಶೋಧನೆ ನಡೆಸಿದರು.

ಅಮೆರಿಕಕ್ಕೆ ವಲಸೆ ಬಂದ ಬದ್ರ್, ಪ್ಯಾಲೆಸ್ಟೀನಿಯನ್ ಮೂಲದ ಅಮೇರಿಕನ್ ಪ್ರಜೆ ಮಾಫೀಜ್ ಅಹ್ಮದ್ ಯೂಸೆಫ್ ಸಲೇಹ್ ಅವರನ್ನು ವಿವಾಹವಾದರು. ಆದಾಗ್ಯೂ, DHS ಆಕೆಯ ತಂದೆಯನ್ನು ಹಮಾಸ್‌ನ ಪ್ರಮುಖ ನಾಯಕ ಅಹ್ಮದ್ ಯೂಸೆಫ್ ಎಂದು ಗುರುತಿಸಿದೆ.