ಭದ್ರತೆಯ ಕೊರತೆ: ಇಸ್ರೇಲಿನಲ್ಲಿ ಪತ್ರಕರ್ತರ ಮಾರಣಹೋಮ

ಹೊಸದಿಲ್ಲಿ: ಜಗತ್ತಿನಲ್ಲಿ ಎಲ್ಲಿ ಏನು ನಡೆದರೂ ನಿಖರ ಹಾಗೂ ವಾಸ್ತವ ಮಾಹಿತಿ ನೀಡುವ ಪತ್ರಕರ್ತರ ಕುರಿತು ಇಂದು ಮಾತನಾಡುವವರೇ ಇಲ್ಲದಂತಾಗಿದೆ. ಇಂತಹ ಪತ್ರಕರ್ತರ ಬದುಕು ಇಂದು ಗಾಳಿಯಲ್ಲಿಟ್ಟ ದೀಪದಂತಾಗುತ್ತಿದೆ.

ಕಳೆದ ಒಂದು ವರ್ಷದಲ್ಲಿ ನಡೆದಿರುವ ಪತ್ರಕರ್ತರ ಕೊಲೆಗಳೇ ಇದಕ್ಕೆ ನೇರ ಸಾಕ್ಷಿ. ಕಳೆದ ವರ್ಷ 99 ಪತ್ರಕರ್ತರು ಸಾವನ್ನಪ್ಪಿದ್ದಾರೆ. ಅವರಲ್ಲಿ 77 ಮಂದಿ ಗಾಜಾದ ಮೇಲಿನ ಇಸ್ರೇಲ್‌ ದಾಳಿಯ ಬಗ್ಗೆ ವರದಿ ಮಾಡುವಾಗ ತಮ್ಮ ಪ್ರಾಣ ಕಳೆದುಕೊಂಡರು. ಗ್ಲೋಬಲ್ ಮೀಡಿಯಾ ವಾಚ್‌ಡಾಗ್ ‘ಕಮಿಟಿ ಟು ಪ್ರೊಟೆಕ್ಟ್ ಜರ್ನಲಿಸ್ಟ್ಸ್ (ಸಿಪಿಜೆ) ತನ್ನ ವಾರ್ಷಿಕ ವರದಿಯಲ್ಲಿ ಈ ಮಾಹಿತಿಯನ್ನು ಬಹಿರಂಗಪಡಿಸಿದೆ.

ಈ ಮಾಹಿತಿಯ ಪ್ರಕಾರ, 2023 ಪತ್ರಕರ್ತರ ಪಾಲಿಗೆ ಈ ಒಂದು ದಶಕದಲ್ಲೇ ಕೆಟ್ಟ ವರ್ಷವಾಗಲಿದೆ. ಈ ವರ್ಷದಲ್ಲಿ 99 ಪತ್ರಕರ್ತರು ಸಾವನ್ನಪ್ಪಿದ್ದಾರೆ. ಅವರಲ್ಲಿ 77 ಮಂದಿ ಗಾಜಾದ ಮೇಲೆ ಇಸ್ರೇಲಿ ನರಮೇಧವನ್ನು ವರದಿ ಮಾಡುವಾಗ ಪ್ರಾಣ ಕಳೆದುಕೊಂಡಿದ್ದಾರೆ ಎಂಬುದು ಗಮನಾರ್ಹ.

ಇಸ್ರೇಲ್-ಗಾಜಾ ಯುದ್ಧದ ಮೊದಲ ಮೂರು ತಿಂಗಳಲ್ಲಿ ಹಲವಾರು ಪತ್ರಕರ್ತರು ಕೊಲ್ಲಲ್ಪಟ್ಟರು. ಇದು ಈ ದೇಶದಲ್ಲಿ ಒಂದು ವರ್ಷದಲ್ಲಿ ದಾಖಲಾದ ಸಂಖ್ಯೆಗಿಂತ ಹೆಚ್ಚು ಎಂಬುದು ಗಮನಾರ್ಹ. ಈ 77ರಲ್ಲಿ, 72 ಪ್ಯಾಲೆಸ್ಟೈನ್, ಮೂರು ಲೆಬನಾನ್, ಮತ್ತು ಕೇವಲ ಇಬ್ಬರು ಇಸ್ರೇಲ್ ದೇಶಕ್ಕೆ ಸೇರಿದವರು. ಗುರುವಾರದ ವೇಳೆಗೆ ಇಸ್ರೇಲ್-ಗಾಜಾ ಯುದ್ಧದಲ್ಲಿ ಸಾವನ್ನಪ್ಪಿದ ಪತ್ರಕರ್ತರ ಸಂಖ್ಯೆ 88ಕ್ಕೆ ಏರಿದೆ ಎಂದು CPA ಯ ಪ್ರಾಥಮಿಕ ತನಿಖೆ ಹೇಳುತ್ತದೆ.

ತನಿಖೆ ಪೂರ್ಣಗೊಂಡ ನಂತರವೇ ಈ ಸಾವುಗಳನ್ನು ಡೇಟಾ ಬೇಸ್‌ನಲ್ಲಿ ಸೇರಿಸಲಾಗುವುದು ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ. ಪತ್ರಕರ್ತರ ಮೇಲೆ ಇಸ್ರೇಲ್ ಪಡೆಗಳ ದಾಳಿಯನ್ನು ನ್ಯೂಯಾರ್ಕ್ ಮೂಲದ ಸಂಘಟನೆ ಈಗಾಗಲೇ ಖಂಡಿಸಿದೆ. ಇಸ್ರೇಲಿ ಸೇನೆಯು ಉದ್ದೇಶಪೂರ್ವಕವಾಗಿ ಹತ್ತಾರು ಪತ್ರಕರ್ತರನ್ನು ಕೊಂದಿದೆಯೇ ಎಂದು ಸಂಸ್ಥೆ ತನಿಖೆ ನಡೆಸುತ್ತಿದೆ ಎಂದು ವರದಿಯಾಗಿದೆ. ಇದೇ ನಿಜವಾದರೆ ಅದನ್ನು ‘ಯುದ್ಧಾಪರಾಧ’ ಎಂದು ಪರಿಗಣಿಸಬಹುದು.