ಆರ್ಥಿಕ ಅನ್ಯಾಯ | ಜಿಎಸ್‌ಟಿಗೆ ಸುಧಾರಣೆ ತರುವುದು ಅಗತ್ಯ: ವಿಪಕ್ಷ ನಾಯಕ ರಾಹುಲ್‌ ಗಾಂಧಿ

ದೆಹಲಿ: ಎಂಟು ವರ್ಷಗಳಷ್ಟು ಹಳೆಯದಾದ ಜಿಎಸ್‌ಟಿ (ಸರಕು ಮತ್ತು ಸೇವಾ ತೆರಿಗೆ) ತೆರಿಗೆ ವ್ಯವಸ್ಥೆಯನ್ನು ಆರ್ಥಿಕ ಅನ್ಯಾಯ ಮತ್ತು ಕಾರ್ಪೊರೇಟ್ ಪ್ರೋತ್ಸಾಹವನ್ನು ಬೆಳೆಸುವ ಕ್ರೂರ ಸಾಧನ ಎಂದು ಕಾಂಗ್ರೆಸ್ ನಾಯಕ ಮತ್ತು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಟೀಕಿಸಿದ್ದಾರೆ.

ಮಂಗಳವಾರ ‘ಎಕ್ಸ್’ ಮೂಲಕ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ ಅವರು, ಜನರಿಗೆ ಆದ್ಯತೆ ನೀಡುವುದರ ಜೊತೆಗೆ, ನಿಜವಾದ ಒಕ್ಕೂಟ ಮನೋಭಾವವನ್ನು ಪ್ರತಿಬಿಂಬಿಸಲು ಜಿಎಸ್‌ಟಿಯಲ್ಲಿ ಸುಧಾರಣೆಗಳನ್ನು ಮಾಡಬೇಕೆಂದು ಕರೆ ನೀಡಿದರು. ‘

‘ಸಣ್ಣ ಅಂಗಡಿಯವರಿಂದ ಹಿಡಿದು ರೈತರವರೆಗೆ ಪ್ರತಿಯೊಬ್ಬ ಭಾರತೀಯರೂ ದೇಶದ ಪ್ರಗತಿಯಲ್ಲಿ ಪಾಲುದಾರರಾಗಲು ಭಾರತಕ್ಕೆ ಸಾರ್ವತ್ರಿಕ ತೆರಿಗೆ ವ್ಯವಸ್ಥೆಯ ಅಗತ್ಯವಿದೆ. ಕಳೆದ ಎಂಟು ವರ್ಷಗಳಿಂದ ಮೋದಿ ಸರ್ಕಾರ ಹೇರುತ್ತಿರುವ ಜಿಎಸ್‌ಟಿ ನೀತಿಯನ್ನು ಬಡವರನ್ನು ಶಿಕ್ಷಿಸಲು, ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳನ್ನು (ಎಂಎಸ್‌ಎಂಇ) ಮುಚ್ಚಲು ಮತ್ತು ಪ್ರಧಾನ ಮಂತ್ರಿಯವರ ಕೆಲವೇ ಕೆಲವು ಬಿಲಿಯನೇರ್ ಸ್ನೇಹಿತರಿಗೆ ಪ್ರಯೋಜನ ಮಾಡಿಕೊಡುವ ಸಲುವಾಗಿ ರಾಜ್ಯಗಳನ್ನು ದುರ್ಬಲಗೊಳಿಸಲು ಬಳಸಲಾಗುತ್ತಿದೆʼ ಎಂದು ರಾಹುಲ್ ಹೇಳಿದರು.

ಭಾರತದ ಬಹುಪಾಲು ಜನರಿಗೆ ಉದ್ಯೋಗ ನೀಡುವ 18 ಲಕ್ಷಕ್ಕೂ ಹೆಚ್ಚು ಎಂಎಸ್‌ಎಂಇಗಳು ಕಳೆದ ಎಂಟು ವರ್ಷಗಳಲ್ಲಿ ಮುಚ್ಚಲ್ಪಟ್ಟಿವೆ ಎಂದು ಅವರು ಹೇಳಿದರು. ಈ ದೇಶದ ನಾಗರಿಕರು ಚಹಾದಿಂದ ಹಿಡಿದು ಆರೋಗ್ಯ ವಿಮೆಯವರೆಗೆ ಪ್ರತಿಯೊಂದಕ್ಕೂ ಜಿಎಸ್‌ಟಿ ಪಾವತಿಸುತ್ತಿದ್ದರೆ, ಕಾರ್ಪೊರೇಟ್‌ಗಳು ಪ್ರತಿ ವರ್ಷ 1 ಲಕ್ಷ ಕೋಟಿ ರೂ.ಗಳಿಗೂ ಹೆಚ್ಚು ತೆರಿಗೆ ವಿನಾಯಿತಿ ಪಡೆಯುತ್ತಿದ್ದಾರೆ.

ಜಿಎಸ್‌ಟಿ ಬಾಕಿಯನ್ನು ಅಸ್ತ್ರವಾಗಿ ಬಳಸಿಕೊಂಡು ಕೇಂದ್ರವು ಬಿಜೆಪಿಯೇತರ ಆಡಳಿತದ ರಾಜ್ಯಗಳನ್ನು ಶಿಕ್ಷಿಸುತ್ತಿದೆ. ಇದು ಮೋದಿ ಸರ್ಕಾರದ ಫೆಡರಲ್ ವಿರೋಧಿ ಕಾರ್ಯಸೂಚಿಗೆ ಸಾಕ್ಷಿಯಾಗಿದೆ. ಭಾರತದ ಮಾರುಕಟ್ಟೆಗಳನ್ನು ಏಕೀಕರಿಸಲು ಮತ್ತು ತೆರಿಗೆ ವ್ಯವಸ್ಥೆಯನ್ನು ಸರಳೀಕರಿಸಲು ತರಲಾದ ಜಿಎಸ್‌ಟಿ ಯುಪಿಎ ಸರ್ಕಾರದ ದೂರದೃಷ್ಟಿಯ ಕಲ್ಪನೆಯಾಗಿದೆ.

ಆದರೆ ಇದು ಕಳಪೆ ಅನುಷ್ಠಾನ ಮತ್ತು ರಾಜಕೀಯ ಪಕ್ಷಪಾತದಿಂದ ಬದಿಗೆ ತಳ್ಳಲ್ಪಟ್ಟಿದೆ ಎಂದು ರಾಹುಲ್ ಹೇಳಿದರು.