ಪಾಕಿಸ್ತಾನದ ಗಡಿ ಸಮೀಪದ ಅಫ್ಘಾನಿಸ್ತಾನದಲ್ಲಿ ಪ್ರಬಲ ಭೂಕಂಪ: 250ಕ್ಕೂ ಹೆಚ್ಚು ಸಾವು, ಹಲವರಿಗೆ ಗಾಯ

ಆಗ್ನೇಯ ಅಫ್ಘಾನಿಸ್ತಾನದ ಪಾಕಿಸ್ತಾನ ಗಡಿ ಪ್ರದೇಶದಲ್ಲಿ ಭಾನುವಾರ ಸಂಭವಿಸಿದ 6.0 ತೀವ್ರತೆಯ ಭೂಕಂಪದಿಂದ ಕನಿಷ್ಠ 250ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, 100ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ಬಿಬಿಸಿ ವರದಿ ಮಾಡಿದೆ.

ಭೂಕಂಪದ ಕೇಂದ್ರಬಿಂದು ಅಫ್ಘಾನಿಸ್ತಾನದ ಬಸಾವುಲ್‌ನಿಂದ ಉತ್ತರಕ್ಕೆ 22 ಮೈಲುಗಳ ದೂರದಲ್ಲಿ 6.2 ಮೈಲುಗಳಷ್ಟು ಆಳದಲ್ಲಿ ಇತ್ತು. ಯುಎಸ್ ಭೂವೈಜ್ಞಾನಿಕ ಸಮೀಕ್ಷೆಯ ಪ್ರಕಾರ, ಇದು ಸ್ಥಳೀಯ ಕಾಲಮಾನ ರಾತ್ರಿ 11:47ಕ್ಕೆ ಸಂಭವಿಸಿದೆ.

ಭೂಕಂಪದಿಂದಾಗಿ 100ಕ್ಕೂ ಹೆಚ್ಚು ಜನರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಅನೇಕ ಮನೆಗಳು ಅವಶೇಷಗಳ ಅಡಿಯಲ್ಲಿ ಸಿಲುಕಿವೆ ಎಂದು ವರದಿಯಾಗಿದೆ. ಸಾವಿನ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಮೂಲಗಳು ಹೇಳಿವೆ.

ಸುಮಾರು 20 ನಿಮಿಷಗಳ ನಂತರ ಅದೇ ಪ್ರಾಂತ್ಯದಲ್ಲಿ 10 ಕಿಲೋಮೀಟರ್ ಆಳದಲ್ಲಿ 4.5 ತೀವ್ರತೆಯ ಎರಡನೇ ಭೂಕಂಪವೂ ಸಂಭವಿಸಿದೆ. ಇಂತಹ ವಿನಾಶಕಾರಿ ಭೂಕಂಪನ ಘಟನೆಗಳ ಇತಿಹಾಸ ಅಫ್ಘಾನಿಸ್ತಾನದಲ್ಲಿ ಇದೆ.

ಅಕ್ಟೋಬರ್ 7, 2023ರಂದು, 6.3 ತೀವ್ರತೆಯ ಭೂಕಂಪ ಸಂಭವಿಸಿತ್ತು. ಆಗ ತಾಲಿಬಾನ್ ಸರ್ಕಾರವು ಅಂದಾಜು 4,000 ಸಾವುಗಳು ಸಂಭವಿಸಿವೆ ಎಂದು ತಿಳಿಸಿದರೆ, ವಿಶ್ವಸಂಸ್ಥೆಯು ಸುಮಾರು 1,500 ಸಾವುಗಳನ್ನು ವರದಿ ಮಾಡಿತ್ತು. ಯುನಿಸೆಫ್ ಪ್ರಕಾರ, ಮೃತಪಟ್ಟವರಲ್ಲಿ 90%ಕ್ಕೂ ಹೆಚ್ಚು ಜನರು ಮಹಿಳೆಯರು ಮತ್ತು ಮಕ್ಕಳು.