ಅತೀಕ್ ಅಹಮದ್ ಕಿರಿಯ ಮಗ ಅಬಾನ್ ಅಹಮದ್ ಝಾನ್ಸಿಯಲ್ಲಿ ರಸ್ತೆ ಅಪಘಾತಕ್ಕೆ ಬಲಿ

ಕೊಲೆಗೀಡಾದ ದಂಗೆಕೋರ ರಾಜಕಾರಣಿ ಅತೀಕ್ ಅಹಮದ್ ಅವರ ಕಿರಿಯ ಮಗ ಅಬಾನ್ ಅಹಮದ್ (21), ಉತ್ತರ ಪ್ರದೇಶದ ಝಾನ್ಸಿ ಜಿಲ್ಲಾ ಜೈಲಿನಲ್ಲಿರುವ ತಮ್ಮ ಅಣ್ಣ ಅಲಿ ಅಹಮದ್ ಅವರನ್ನು ಭೇಟಿಯಾಗಲು ತೆರಳುತ್ತಿದ್ದಾಗ ಗುರುವಾರ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ.

ಈ ಅಪಘಾತದಲ್ಲಿ ವಾಹನದಲ್ಲಿದ್ದ ಸೋನು ಎಂಬ ಮತ್ತೊಬ್ಬ ವ್ಯಕ್ತಿಯೂ ಮೃತಪಟ್ಟಿದ್ದು, ಜೊತೆಯಲ್ಲಿದ್ದ ಮೂವರು ಗಂಭೀರವಾಗಿ ಗಾಯಗೊಂಡು ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಹೈವೇ ಡಿವೈಡರ್‌ಗೆ ಢಿಕ್ಕಿ ಹೊಡೆದ ಕಾರು

ಪೊಲೀಸರ ಮಾಹಿತಿಯ ಪ್ರಕಾರ, ಅಬಾನ್ ಅಹಮದ್ ಮತ್ತು ಅವರ ನಾಲ್ಕೈದು ಮಂದಿ ಸ್ನೇಹಿತರು ಬಿಳಿ ಬಣ್ಣದ ಹ್ಯುಂಡೈ ಕ್ರೇಟಾ ಕಾರಿನಲ್ಲಿ ಪ್ರಯಾಗ್‌ರಾಜ್‌ನಿಂದ ಝಾನ್ಸಿಗೆ ಪ್ರಯಾಣಿಸುತ್ತಿದ್ದರು. ಝಾನ್ಸಿ-ಕಾನ್ಪುರ ರಾಷ್ಟ್ರೀಯ ಹೆದ್ದಾರಿಯ ಪೂಂಛ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಕಾರು ಚಾಲಕನ ನಿಯಂತ್ರಣ ತಪ್ಪಿ ರಸ್ತೆಯ ಡಿವೈಡರ್‌ಗೆ ಬಲವಾಗಿ ಢಿಕ್ಕಿ ಹೊಡೆದಿದೆ. ಢಿಕ್ಕಿಯ ರಭಸಕ್ಕೆ ಕಾರಿನ ಮುಂಭಾಗ ಸಂಪೂರ್ಣವಾಗಿ ನಜ್ಜುಗುಜ್ಜಾಗಿದೆ.

ಘಟನೆಯ ಕುರಿತು ಪ್ರತಿಕ್ರಿಯಿಸಿರುವ ಝಾನ್ಸಿ ಎಸ್ಎಸ್‌ಪಿ ಬಿ.ಬಿ.ಜಿ.ಟಿ.ಎಸ್. ಮೂರ್ತಿ, “ಬೆಳಿಗ್ಗೆ ಸುಮಾರು 10:30 ರ ಸುಮಾರಿಗೆ ಅಪಘಾತದ ಮಾಹಿತಿ ಲಭ್ಯವಾಯಿತು. ಅಪಘಾತದಲ್ಲಿ ಇಬ್ಬರು ಮೃತಪಟ್ಟಿದ್ದು, ಗಾಯಗೊಂಡ ಮೂವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ,” ಎಂದು ತಿಳಿಸಿದ್ದಾರೆ.

ಜೈಲಿನಲ್ಲಿರುವ ಅಣ್ಣನನ್ನು ಭೇಟಿಯಾಗಲು ತೆರಳುತ್ತಿದ್ದ ಅಬಾನ್

ಉಮೇಶ್ ಪಾಲ್ ಕೊಲೆ ಪ್ರಕರಣ ಹಾಗೂ ಸುಲಿಗೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂದಿತನಾಗಿರುವ ಅತೀಕ್‌ನ ಎರಡನೇ ಮಗ ಅಲಿ ಅಹಮದ್‌ನನ್ನು 2025 ರ ಅಕ್ಟೋಬರ್‌ನಲ್ಲಿ ನೈನಿ ಸೆಂಟ್ರಲ್ ಜೈಲಿನಿಂದ ಭದ್ರತಾ ಕಾರಣಗಳಿಗಾಗಿ ಝಾನ್ಸಿ ಜಿಲ್ಲಾ ಜೈಲಿಗೆ ಸ್ಥಳಾಂತರಿಸಲಾಗಿತ್ತು. ಅಬಾನ್ ತನ್ನ ಸ್ನೇಹಿತರೊಂದಿಗೆ ಅಲಿ ಅಹಮದ್‌ನನ್ನು ಜೈಲಿನಲ್ಲಿ ಭೇಟಿಯಾಗಲು ತೆರಳುತ್ತಿದ್ದಾಗ ಈ ದುರಂತ ಸಂಭವಿಸಿದೆ.

ಮತ್ತೊಮ್ಮೆ ಸುದ್ದಿಯಲ್ಲಿದ್ದ ಝಾನ್ಸಿ ಹಾಗೂ ಅತೀಕ್ ಕುಟುಂಬ

2023 ರ ಏಪ್ರಿಲ್ 13 ರಂದು ಉಮೇಶ್ ಪಾಲ್ ಕೊಲೆ ಪ್ರಕರಣದ ಆರೋಪಿಯಾಗಿದ್ದ ಅತೀಕ್ ಅಹಮದ್‌ನ ಮೂರನೇ ಮಗ ಅಸದ್ ಅಹಮದ್‌ನನ್ನು ಯುಪಿ ಎಸ್‌ಟಿಎಫ್ ಪಡೆ ಇದೇ ಝಾನ್ಸಿಯ ಪರೀಛಾ ಡ್ಯಾಮ್ ಬಳಿ ಎನ್‌ಕೌಂಟರ್‌ನಲ್ಲಿ ಹೊಡೆದುರುಳಿಸಿತ್ತು.ಇದೀಗ ಮೂರು ವರ್ಷಗಳ ನಂತರ ಅದೇ ಝಾನ್ಸಿಯಲ್ಲಿ ಅತೀಕ್‌ನ ಕಿರಿಯ ಮಗ ರಸ್ತೆ ಅಪಘಾತದಲ್ಲಿ ಸಾವನ್ನಪ್ಪಿರುವುದು ಗಮನಾರ್ಹ.

ಅತೀಕ್ ಅಹಮದ್ ಕುಟುಂಬದ ಪ್ರಸ್ತುತ ಸ್ಥಿತಿ:

ಅತೀಕ್ ಅಹಮದ್ ಅವರಿಗೆ ಐವರು ಗಂಡುಮಕ್ಕಳಿದ್ದರು.

• ಹಿರಿಯ ಮಗ ಉಮರ್ ಅಹಮದ್ ಲಖನೌ ಜೈಲಿನಲ್ಲಿ ಬಂದಿಯಾಗಿದ್ದಾನೆ.
• ಎರಡನೇ ಮಗ ಅಲಿ ಅಹಮದ್ ಝಾನ್ಸಿ ಜೈಲಿನಲ್ಲಿದ್ದಾನೆ.
• ಮೂರನೇ ಮಗ ಅಸದ್ ಅಹಮದ್ 2023 ರಲ್ಲಿ ಎನ್‌ಕೌಂಟರ್‌ನಲ್ಲಿ ಮೃತಪಟ್ಟಿದ್ದ.
• ನಾಲ್ಕನೇ ಮಗ ಅಹ್ಜಮ್ ಅಹಮದ್ ಜೈಲಿನಿಂದ ಹೊರಬಂದಿದ್ದಾನೆ.
• ಕಿರಿಯ ಮಗ ಅಬಾನ್ ಅಹಮದ್ ಗುರುವಾರ ನಡೆದ ರಸ್ತೆ ಅಪಘಾತದಲ್ಲಿ ಪ್ರಾಣ ಕಳೆದುಕೊಂಡಿದ್ದಾನೆ.

2023 ರ ಏಪ್ರಿಲ್ 15 ರಂದು ಮಾಜಿ ಸಂಸದ ಅತೀಕ್ ಅಹಮದ್ ಮತ್ತು ಆತನ ಸಹೋದರ ಅಶ್ರಫ್ ಅಹಮದ್ ಅವರನ್ನು ವೈದ್ಯಕೀಯ ತಪಾಸಣೆಗೆ ಕರೆದೊಯ್ಯುತ್ತಿದ್ದಾಗ ಮಾಧ್ಯಮ ಪ್ರತಿನಿಧಿಗಳ ಸೋಗಿನಲ್ಲಿ ಬಂದ ಮೂವರು ಬಂದೂಕುಧಾರಿಗಳು ಸಾರ್ವಜನಿಕವಾಗಿ ಗುಂಡಿಕ್ಕಿ ಹತ್ಯೆ ಮಾಡಿದ್ದರು.