ನಾಯಕತ್ವವಿಲ್ಲದ, ಮೀಮ್ಗಳ ಆಧಾರಿತ ಯುವಜನರ ಪ್ರತಿಭಟನೆಗೆ ಮಣಿಯುವಂತಾದ ಬಿಜೆಪಿ ಸರ್ಕಾರವು, ಕಾನೂನುಬದ್ಧ ಪ್ರತಿಭಟನೆಯ ವ್ಯಾಪ್ತಿಯನ್ನು ಕುಗ್ಗಿಸಲು ಮೊದಲೇ ಪದಜಾಲವನ್ನು ಸಿದ್ಧಪಡಿಸಿಕೊಂಡು ಕೆಂಪುಕೋಟೆಯ ವೇದಿಕೆಯನ್ನು ಬಳಸಿಕೊಂಡಿದೆ ಎಂದು ಖ್ಯಾತ ಲೇಖಕ ಹಾಗೂ ಮಾನವ ಹಕ್ಕುಗಳ ಕಾರ್ಯಕರ್ತ ಪ್ರೊಫೆಸರ್ ಆನಂದ್ ತೇಲ್ತುಂಬ್ಡೆ ‘ದ ವೈರ್’ ವೆಬ್ಸೈಟ್ನಲ್ಲಿ ಬರೆದ ಲೇಖನದಲ್ಲಿ ಟೀಕಿಸಿದ್ದಾರೆ. ಅವರ ವಿಶ್ಲೇಷಣೆಯ ಪ್ರಕಾರ, ಸ್ವಾತಂತ್ರ್ಯ ದಿನದಂದು ವಿಜಯಗರ್ವದೊಂದಿಗೆ ಭಾಷಣ ಆರಂಭಿಸಿದ ಪ್ರಧಾನಿ ನರೇಂದ್ರ ಮೋದಿ ಅವರ 75 ನಿಮಿಷಗಳ ಮಾತುಗಳು ಸ್ವಾವಲಂಬನೆ, ತಂತ್ರಜ್ಞಾನ, ಉತ್ಪಾದನೆ, ರಕ್ಷಣೆ ಮತ್ತು ಸಪ್ತಧಾರಾ ಕಾರ್ಯತಂತ್ರಗಳ ಸುತ್ತಲೇ ಸುತ್ತಿದವು.
ಮುಂದಿನ ಐದು ವರ್ಷಗಳಲ್ಲಿ ಅಮೆರಿಕದಿಂದ ಸುಮಾರು 47.85 ಲಕ್ಷ ಕೋಟಿ ರೂಪಾಯಿ ಮೌಲ್ಯದ ಇಂಧನ, ವಾಯುಯಾನ ಮತ್ತು ತಾಂತ್ರಿಕ ಉತ್ಪನ್ನಗಳನ್ನು ಆಮದು ಮಾಡಿಕೊಳ್ಳಲು ಫೆಬ್ರವರಿಯಲ್ಲಿ ಒಪ್ಪಂದ ಮಾಡಿಕೊಂಡಿದ್ದರೂ ಭಾಷಣದಲ್ಲಿ ಆತ್ಮನಿರ್ಭರತೆಯ ಬಗ್ಗೆ ಮಾತನಾಡಲಾಗಿದೆ. ವಿಶೇಷವಾಗಿ ಯುವಜನತೆಯಲ್ಲಿ ಹೆಚ್ಚುತ್ತಿರುವ ಅಸಮಾಧಾನವನ್ನು ಹತ್ತಿಕ್ಕಲು ಪ್ರಧಾನಿಯವರು ‘ದಿಮಾಗೀ ನಕ್ಸಲ್ಸ್’ (ಮಾನಸಿಕ ನಕ್ಸಲರು) ಎಂಬ ಪದವನ್ನು ಪ್ರಯೋಗಿಸಿ ವಿಮರ್ಶೆಗೆ ಗುರಿಯಾಗಿದ್ದಾರೆ. ‘ಕಾಕ್ರೋಚ್ ಮೂವ್ಮೆಂಟ್’ ಎಂದೂ ಕರೆಯಲ್ಪಡುವ ವಿದ್ಯಾರ್ಥಿ ಚಳವಳಿಯು ಬಿಜೆಪಿ ಸರ್ಕಾರವನ್ನು ಮೊದಲ ಬಾರಿಗೆ ತಲೆಬಾಗುವಂತೆ ಮಾಡಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ.
ಮುಂದಿನ 21 ವರ್ಷಗಳವರೆಗೆ ನೀವೇ ಅಧಿಕಾರದಲ್ಲಿರುತ್ತೀರಾ?
ಎಲೆಕ್ಟ್ರಾನಿಕ್ಸ್ ಉತ್ಪಾದನೆ 7 ಪಟ್ಟು ಮತ್ತು ರೈಲು ಕೋಚ್ಗಳ ತಯಾರಿಕೆ 21 ಪಟ್ಟು ಹೆಚ್ಚಾಗಿದೆ ಎಂದು ಪ್ರಧಾನಿ ತಮ್ಮ ಭಾಷಣದಲ್ಲಿ ಹೇಳಿಕೊಂಡಿದ್ದಾರಾದರೂ ಪ್ರಮುಖ ವೈಫಲ್ಯಗಳನ್ನು ಮರೆಮಾಚಿದ್ದಾರೆ. ಭಾರತದ ಜಿಡಿಪಿಯಲ್ಲಿ ಉತ್ಪಾದನಾ ಕ್ಷೇತ್ರದ ಪಾಲು ಕಳೆದ 60 ವರ್ಷಗಳಲ್ಲೇ ಅತ್ಯಂತ ಕನಿಷ್ಠ ಮಟ್ಟವಾದ ಶೇ. 13ಕ್ಕೆ ಕುಸಿದಿರುವ ಮಹತ್ವದ ಅಂಶವನ್ನು ಅವರು ಪ್ರಸ್ತಾಪಿಸಿಲ್ಲ. ಜನಾದೇಶವು ಐದು ವರ್ಷಗಳ ಆಡಳಿತಕ್ಕೆ ಮಾತ್ರವೇ ಹೊರತು 21 ವರ್ಷಗಳಿಗಲ್ಲ. ಹಾಗಿರುವಾಗ 2047ರವರೆಗೂ ತಾವೇ ಅಧಿಕಾರದಲ್ಲಿರುತ್ತೇವೆ ಎಂಬಂತೆ 21 ವರ್ಷಗಳ ನಂತರದ ಗುರಿಗಳ ಬಗ್ಗೆ ಮಾತನಾಡುವ ಬದಲು, ಇಂದಿನ ನೈಜ ಸಮಸ್ಯೆಗಳಿಗೆ ಉತ್ತರಿಸಬೇಕಿತ್ತು ಎಂದು ಅವರು ಪ್ರಶ್ನಿಸಿದ್ದಾರೆ.
ಪ್ರಶ್ನಿಸುವವರೆಲ್ಲರೂ ನಕ್ಸಲರೇ?
ನಾಗರಿಕರ ಸಮಸ್ಯೆಗಳು ಮತ್ತು ಕಳವಳಗಳ ಕುರಿತು ಮಾತನಾಡುವ ಬದಲು, ಪ್ರಧಾನಿಯವರು ಯಾವುದೋ ಶತ್ರುವಿನ ವಿರುದ್ಧ ಹೋರಾಡುತ್ತಿರುವಂತೆ ಮಾತನಾಡಿದ್ದಾರೆ. ತಮ್ಮನ್ನು ಪ್ರಶ್ನಿಸುವ ಪ್ರತಿಯೊಬ್ಬರನ್ನೂ ಶತ್ರುಗಳೆಂಬಂತೆ ಬಿಂಬಿಸಲಾಗುತ್ತಿದ್ದು, ರಾಜಕೀಯವಾಗಿ ಧ್ವನಿ ಎತ್ತುತ್ತಿರುವ ಜೆನ್-ಝಡ್ (Gen-Z) ಮತ್ತು ಜೆನ್ ಆಲ್ಫಾ (Gen-Alpha) ಪೀಳಿಗೆಯವರೇ ತಮ್ಮ ವಿರೋಧಿಗಳು ಎಂಬ ಪರೋಕ್ಷ ಸಂದೇಶ ನೀಡಿದ್ದಾರೆ. ಮೋದಿ ಬಳಸಿದ ‘ದಿಮಾಗೀ ನಕ್ಸಲ್ಸ್’ ಪದವು ವಿವಾದಿತ ‘ಅರ್ಬನ್ ನಕ್ಸಲ್’ ಎಂಬ ಹಣೆಪಟ್ಟಿಯನ್ನೇ ಹೋಲುತ್ತದೆ. ಕಳೆದ ಕೆಲವು ವರ್ಷಗಳಿಂದ ಶಿಕ್ಷಣ ತಜ್ಞರು ಮತ್ತು ವಿಮರ್ಶಕರ ಮೇಲೆ ಇಂತಹ ಹಣೆಪಟ್ಟಿ ಕಟ್ಟಿ ಟೀಕಿಸಲಾಗುತ್ತಿದೆ ಎಂದು ತೇಲ್ತುಂಬ್ಡೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
