ಬಂದೇ ಬಿಡ್ತು ಕಿಂಗ್ ಕೊಹ್ಲಿ 71ನೇ ಶತಕ

ಭಾರತೀಯ ಕ್ರಿಕೆಟ್ ಪ್ರೇಮಿಗಳು ಬಹುದಿನಗಳಿಂದ ಕಾಯುತ್ತಿದ್ದ ಆ ಅದ್ಭುತ ಕ್ಷಣ ಕೊನೆಗೂ ಮೂರು ವರ್ಷಗಳ ನಂತರ ಬಂದೇ ಬಿಡ್ತು. ಕಳೆದ ಮೂರು ವರ್ಷಗಳಿಂದ ವಿರಾಟ್ ಕೊಹ್ಲಿ ಅವರ ಶತಕಕ್ಕಾಗಿ ಕಾಯುತ್ತಿದ್ದ ಅಭಿಮಾನಿಗಳಿಗೆ ಇಂದು ಕನಸು ನನಸಾದ ದಿನ. ಏಷ್ಯಾಕಪ್ ನಿಂದ ಹೊರಬಿದ್ದಿದ್ದರೂ ಆಫ್ಗಾನಿಸ್ಥಾನದ ಮೇಲೆ ಔಪಚಾರಿಕ ಪಂದ್ಯದಲ್ಲಿ ಅದ್ಭುತ ಆಟ ಪ್ರದರ್ಶನ ಬಂದಿದ್ದು ಮಾಜಿ ನಾಯಕ ವಿರಾಟ್ ಕೊಹ್ಲಿ ಅವರಿಂದ. ಕೊನೆಗೂ ಅವರ ಬ್ಯಾಟಿನಿಂದ ಶತಕ ಸಿಡಿದಿದ್ದನ್ನು ನೋಡಿ ಭಾರತೀಯ ಅಭಿಮಾನಿಗಳು ಸಂತಸದ ಅಲೆಯಲ್ಲಿ ತೇಲುತ್ತಿದ್ದಾರೆ. ಏಷ್ಯಾಕಪ್ ನಿಂದ ಹೊರಬಿದ್ದೆವು ಎನ್ನುವ ಬೇಸರವನ್ನು ಕೊಹ್ಲಿ ಗಳಿಸಿದ ಶತಕ ತಕ್ಕ ಮಟ್ಟಿಗೆ ಕಡಿಮೆ ಮಾಡಿದೆ. ಈ ಸಾಧನೆಯಿಂದಾಗಿ ವಿರಾಟ್ ಕೊಹ್ಲಿ ಸಚಿನ್ ತೆಂಡೂಲ್ಕರ್ ಅವರ ನಂತರ ಅಂತರಾಷ್ಟ್ರೀಯ ಪಂದ್ಯಗಳಲ್ಲಿ ಅತಿ ಹೆಚ್ಚು ಶತಕ ಗಳಿಸಿದ ಆಟಗಾರ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. ಟಾಸ್ ಗೆದ್ದು ಭಾರತಕ್ಕೆ ಬ್ಯಾಟಿಂಗ್ ಕೊಟ್ಟ ಆಫ್ಗನ್ನರಿಗೆ ಮುಟ್ಟಿ ನೋಡಿಕೊಳ್ಳುವಂಥ ಬ್ಯಾಟಿಂಗ್ ಪ್ರದರ್ಶನ ತೋರಿಸಿದ ಕೊಹ್ಲಿ 200 ರ ಶತಕ ಗಳಿಸಿದ್ದಲ್ಲದೆ 200ರ ಸ್ಟ್ರೈಕ್ ರೇಟ್ ನಲ್ಲಿ 61 ಬಾಲ್ ಗಳಲ್ಲಿ 122 ರನ್ ಗಳಿಸಿ ಅದ್ಭುತ ರೀತಿಯಲ್ಲಿ ನಾನು ಫಾರ್ಮ್ ನಲ್ಲಿದ್ದೇನೆ ಎಂಬುದನ್ನು ಸಾಬೀತು ಪಡಿಸಿದರು. ರೋಹಿತ್ ಶರ್ಮಾ ಅಲಭ್ಯತೆಯ ಕಾರಣ ಆರಂಭಿಕರಾಗಿ ಕಣಕ್ಕಿಳಿದಿದ್ದ ಕೊಹ್ಲಿ ಕೊನೆಯವರೆಗೂ ನಾಟ್ ಔಟ್ ಆಗಿ ಉಳಿದರು. ಕೊಹ್ಲಿ ಅವರ ಈ ಆಟದಿಂದಾಗಿ ಭಾರತ 20 ಓವರ್ ಗಳಲ್ಲಿ 212 ರನ್ ಗಳ ಮೊತ್ತ ಕಲೆ ಹಾಕಿದೆ.ಆಫ್ಗನ್ನರ ವಿರುದ್ಧ ವಿರಾಟ್ ಆಟ