‘ಇಂತಹ ವ್ಯಕ್ತಿ ಪಕ್ಕ ಕೂರುವುದೇ ತಪ್ಪು’ ; ಜಗ್ಗೇಶ್ ಗೆ ನಟಿ ರಕ್ಷಿತಾ ಪ್ರೇಮ್ ಡೈರೆಕ್ಟ್ ಹಿಟ್

ನಿರ್ದೇಶಕ, ನಟ ಗುರುಪ್ರಸಾದ್ ಸಾವಿನ ನಂತರ ನಟ ಜಗ್ಗೇಶ್ ತನ್ನ ಕಡೆಯಿಂದ ಬಂದ ಮಾತುಗಳಿಗೆ ತೀವ್ರ ಟೀಕೆಗೆ ಗುರಿಯಾಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಂತೂ ಜಗ್ಗೇಶ್ ವಿರುದ್ದ ತೀವ್ರ ಆಕ್ರೋಶ ಕಂಡುಬಂದಿದೆ. ಇದೀಗ ಖಾಸಗಿ ವಾಹಿನಿಯಲ್ಲಿ ಜಗ್ಗೇಶ್ ಪಕ್ಕ ತೀರ್ಪುಗಾರರಾಗಿ ಕೂರುವ ರಕ್ಷಿತಾ ಪ್ರೇಮ್ ಅವರು ಜಗ್ಗೇಶ್ ಗೆ ಡೈರೆಕ್ಟ್ ಹಿಟ್ ನೀಡಿದ್ದಾರೆ.

ಗುರು ಪ್ರಸಾದ್ ಸಾವಿನ ಬಳಿಕ ಅವರು ಅಹಂಕಾರಿ, ಎಡಪಂಥೀಯ ವಿಚಾರಧಾರೆ ಹೊಂದಿದ್ದರು, ದೇವರಿಗೇ ಬಯ್ಯುತ್ತಿದ್ದರು, ಸೋರಿಯಾಸಿಸ್ ಖಾಯಿಲೆಯಿದ್ದರೂ ನಮ್ಮ ತಟ್ಟೆಗೇ ನೇರವಾಗಿ ಕೈ ಹಾಕುತ್ತಿದ್ದರು, ಆತನಿಂದ ನನಗೆ ಕೆಟ್ಟ ಹೆಸರು ಬಂದಿದೆ ಎಂದೆಲ್ಲಾ ಜಗ್ಗೇಶ್ ಮಾತನಾಡಿದ್ದರು. ಸಾವಿನ ನಂತರ ಇಷ್ಟೆಲ್ಲ ಮಾತನಾಡುವ ಜಗ್ಗೇಶ್ ಗುರುಪ್ರಸಾದ್ ಜೀವಂತ ಇರುವಾಗ ಎಲ್ಲಿ ಹೋಗಿದ್ದರು, ಎನ್ನುವ ಮೂಲಕ ಜಗ್ಗೇಶ್ ವಿರುದ್ದ ಜಾಲತಾಣದಲ್ಲಿ ತೀವ್ರ ಟೀಕೆ ವ್ಯಕ್ತವಾಗಿತ್ತು.

ಅಷ್ಟೇ ಅಲ್ಲದೆ ಖಾಸಗಿ ವಾಹಿನಿಯಲ್ಲಿ ಜಗ್ಗೇಶ್ ಪಕ್ಕವೇ ಕೂತು ತೀರ್ಪು ನೀಡುವ ನಟಿ ರಕ್ಷಿತಾ ಪ್ರೇಮ್ ಬಗ್ಗೆಯೂ ಪ್ರಸ್ತಾಪಿಸಿ, ಖಾಸಗಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಜಗ್ಗೇಶ್, ‘ಗುರುಪ್ರಸಾದ್ ಎಂದರೆ ರಕ್ಷಿತಾ ಪ್ರೇಮ್ ಗೆ ಭಯವಿತ್ತು. ಅವರನ್ನು ಶೋಗೆ ಕರೆಸೋಣವೆಂದು ಹೇಳಿದರೆ ಬೇಕಿದ್ರೆ ನೀವೇ ಇರಿ, ನಾನಂತೂ ಇಲ್ಲಿ ಇರಲ್ಲ ಎಂದು ಎದ್ದು ಹೋಗಿಬಿಡುತ್ತಿದ್ದರು’ ಎಂದು ಜಗ್ಗೇಶ್ ಹೇಳಿಕೆ ನೀಡಿದ್ದಾರೆ.

ಜಗ್ಗೇಶ್ ಅವರ ಈ ಹೇಳಿಕೆಯ ನಂತರ ನಟಿ ರಕ್ಷಿತಾ ಪ್ರೇಮ್ ತಮ್ಮ ಇನ್ ಸ್ಟಾಗ್ರಾಂ ಪುಟದಲ್ಲಿ ‘ಒಬ್ಬ ವ್ಯಕ್ತಿಯ ಬಗ್ಗೆ ಕೆಟ್ಟದಾಗಿ ಕಾಮೆಂಟ್ ಮಾಡುವವರ ಜೊತೆ ನಾವು ಟೇಬಲ್ ಮುಂದೆ ಕೂರುವುದೂ ತಪ್ಪು. ಯಾಕೆಂದರೆ ನಾಳೆ ನೀವು ಅಲ್ಲಿಂದ ಎದ್ದು ಹೋದ ಮೇಲೆ ನಿಮ್ಮ ಬಗ್ಗೆಯೂ ಕೆಟ್ಟದಾಗಿ ಕಾಮೆಂಟ್ ಮಾಡಬಹುದು’ ಎಂದು ಸಾಲೊಂದನ್ನು ಹಾಕಿಕೊಂಡಿದ್ದಾರೆ.

ಇದೊಂದು ಸಾಲು ನೇರವಾಗಿ ಜಗ್ಗೇಶ್ ನಿಲುವಿನ ವಿರುದ್ಧವೇ ಇದ್ದು, ಈ ಬಗ್ಗೆ ಜಗ್ಗೇಶ್ ಪ್ರತಿಕ್ರಿಯೆ ಏನಿರಬಹುದು ಎಂಬ ಕುತೂಹಲ ಕೂಡ ಹೆಚ್ಚಾಗಿದೆ.