ಸಲ್ಮಾನ್ ನಂತರ ಶಾರುಖ್ ಖಾನ್ ಗೂ ಬಂತು ಕೊಲೆ ಬೆದರಿಕೆ ಕರೆ, ತೀವ್ರಗೊಂಡ ತನಿಖೆ

ಬಾಲಿವುಡ್ ಕಿಂಗ್ ಖಾನ್ ಬಿರುದಾಂಕಿತ ಶಾರುಖ್ ಖಾನ್ ಅವರಿಗೆ ಕೊಲೆ ಬೆದರಿಕೆ ಬಂದಿದೆ ಎಂದು ಮುಂಬೈ ಪೊಲೀಸರು ತಿಳಿಸಿದ್ದಾರೆ. ಛತ್ತೀಸ್ಗಢದ ರಾಯ್ಪುರದ ಫೈಜಾನ್ ಎಂಬ ವ್ಯಕ್ತಿಯ ಹೆಸರಿನಲ್ಲಿ ನೋಂದಾಯಿಸಲಾದ ಸಂಖ್ಯೆಯಿಂದ ಈ ಬೆದರಿಕೆ ಬಂದಿದೆ.

ಶಾರುಖ್ ಖಾನ್ ಅವರ ವ್ಯೆಯಕ್ತಿಕ ಮೊಬೈಲ್‌ಗೆ ಇಂದು ವ್ಯಕ್ತಿಯೊಬ್ಬ ಕರೆ ಮಾಡಿ ಕೂಡಲೇ ಐವತ್ತು ಲಕ್ಷ ಹಣ ನೀಡುವಂತೆ ಬೆದರಿಕೆಯನ್ನು ವ್ಯಕ್ತಿ ಹಾಕಿದ್ದಾನೆ. ಹಣ ನೀಡದೇ ಇದ್ದರೆ ಹೆಣ ಬೀಳುತ್ತೆ ಎಂದು ಬೆದರಿಕೆಯನ್ನು ಹಾಕಿದ್ದಾನೆ. ಬೆದರಿಕೆ ಕರೆಗೆ ಹೆದರಿದ ಶಾರುಖ್ ಖಾನ್ ಮುಂಬೈನ ಬಾಂದ್ರಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ನಟ ಶಾರುಖ್ ಖಾನ್ ನೀಡಿದ ದೂರಿನ ಅನ್ವಯ ಬಾಂದ್ರಾ ಪೊಲೀಸರು BNS ಕಾಯಿದೆಯ ಸೆಕ್ಷನ್ 308(4) ಮತ್ತು 351(3)(4) ಅಡಿಯಲ್ಲಿ ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ. ಬೆದರಿಕೆ ಹಾಕಿದ ವ್ಯಕ್ತಿಗೆ ಬಲೆಯನ್ನು ಬೀಸಿದ್ದಾರೆ. ಬೆದರಿಕೆ ಕರೆ ಮಾಡಿರುವ ವ್ಯಕ್ತಿಯ ಮೊಬೈಲ್‌ ಲೊಕೇಷನ್ ಪತ್ತೆ ಮಾಡಿರುವ ಪೊಲೀಸರು, ವ್ಯಕ್ತಿಯನ್ನು ಹುಡುಕುತ್ತಾ ಛತ್ತೀಸ್ ಘಡ್ ಗೆ ತೆರಳಿದ್ದಾರೆ ಎಂದು ತಿಳಿದು ಬಂದಿದೆ.

ಬಾಬಾ ಸಿದ್ದಿಕಿ ಹತ್ಯೆಯ ನಂತರ ಜೈಲಿನಲ್ಲಿರುವ ಲಾರೆನ್ಸ್ ಬಿಷ್ಣೋಯ್, ಬಾಬಾ ಸಿದ್ದಿಕಿಯ ನಿಕಟ ಸಂಪರ್ಕದಲ್ಲಿ ಯಾರೆಲ್ಲ ಇದ್ದರು, ಅವರಿಗೆಲ್ಲ ಬಾಬಾ ಸಿದ್ದಿಕಿಯಂತೆಯೇ ಹೊಡೆದುರುಳಿಸವುದಾಗಿ ಹೇಳಿದ್ದ. ಇನ್ನೂ ಬಾಬಾ ಸಿದ್ದಿಕಿಗೆ ಕೇವಲ ಸಲ್ಮಾನ್ ಖಾನ್ ಮಾತ್ರ ಆಪ್ತವಾಗಿರಲಿಲ್ಲ. ಶಾರುಖ್ ಖಾನ್ ಕೂಡ ಆಪ್ತರಾಗಿದ್ದರು ಎಂಬುದು ಗಮನಾರ್ಹ.

ಸಧ್ಯ ಈ ಬೆದರಿಕೆ ಕರೆ ಬಿಷ್ಣೋಯ್ ಗ್ಯಾಂಗ್ ಕಡೆಯಿಂದಲೂ ಬಂದಿರಬಹುದು ಎಂಬ ಮಾಹಿತಿಯ ಮೇರೆಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ವಿಚಾರದ ಕುರಿತು ಮುಂಬೈ ಪೊಲೀಸರು ಶಾರುಖ್ ಖಾನ್ ಬಳಿ ಪ್ರಶ್ನೆಯನ್ನು ಮಾಡಲಿದ್ದಾರೆ.