ಭೋಪಾಲ್: ಜಾತಿ ಆಧಾರಿತ ತಾರತಮ್ಯದ ಕುರಿತು ಗಂಭೀರ ಕಳವಳ ವ್ಯಕ್ತಪಡಿಸಿರುವ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್ಎಸ್ಎಸ್) ಸರಕಾರ್ಯವಾಹ (ಪ್ರಧಾನ ಕಾರ್ಯದರ್ಶಿ) ದತ್ತಾತ್ರೇಯ ಹೊಸಬಾಳೆ, ಇದು ಹಿಂದೂ ಸಮಾಜಕ್ಕೆ ಅಂಟಿರುವ ಕಳಂಕವಾಗಿದ್ದು, ಹಿಂದೂ ಸಂಸ್ಕೃತಿಯ ಭಾಗವಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ವೈಯಕ್ತಿಕ ನಡವಳಿಕೆ ಮತ್ತು ಆಚರಣೆಗಳ ಮೂಲಕ ಈ ತಾರತಮ್ಯವನ್ನು ತೊಡೆದುಹಾಕುವಂತೆ ಅವರು ಸಮಾಜಕ್ಕೆ ಕರೆ ನೀಡಿದ್ದಾರೆ.
ಮಧ್ಯಪ್ರದೇಶದ ರಾಜಧಾನಿ ಭೋಪಾಲ್ನಲ್ಲಿ ಭಾನುವಾರ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ಜನರ ನಡುವೆ ಯಾವುದೇ ರೀತಿಯ ತಾರತಮ್ಯ ಇರಬಾರದು ಎಂದು ಪ್ರತಿಪಾದಿಸಿದರು. “ನಾವೆಲ್ಲರೂ ಭಾರತ ಮಾತೆಯ ಮಕ್ಕಳು ಹಾಗೂ ದೇವರ ಮಕ್ಕಳು. ಹೀಗಿರುವಾಗ ಮನುಷ್ಯರ ನಡುವೆ ಯಾವುದೇ ಬಗೆಯ ಭೇದಭಾವ ಇರಕೂಡದು,” ಎಂದು ಹೇಳಿದರು.
ಹುಟ್ಟಿನ ಆಧಾರದ ಮೇಲೆ ತಾರತಮ್ಯ ಮಾಡುವುದು ಹಿಂದೂ ಸಂಸ್ಕೃತಿಯ ಲಕ್ಷಣವಲ್ಲ ಎಂದ ಅವರು, ಜಾತಿಯ ಹೆಸರಿನಲ್ಲಿ ಸಮಾಜದಲ್ಲಿ ನಡೆಯುವ ಕೆಟ್ಟ ಆಚರಣೆಗಳು ಸಮಾಜವನ್ನು ಒಳಗಿನಿಂದಲೇ ಟೊಳ್ಳು ಮತ್ತು ದುರ್ಬಲಗೊಳಿಸುತ್ತವೆ ಎಂದು ಎಚ್ಚರಿಸಿದರು.
ದೇಶದ ಹಿತವನ್ನು ನಿಸ್ವಾರ್ಥವಾಗಿ ಬಯಸುವವರು ಈ ಬದಲಾವಣೆಯನ್ನು ತಮ್ಮಿಂದಲೇ ಆರಂಭಿಸಬೇಕೆಂದು ಹೊಸಬಾಳೆ ಮನವಿ ಮಾಡಿದರು. “ನಿಸ್ವಾರ್ಥ ಮನೋಭಾವ ಹೊಂದಿರುವ ಮತ್ತು ದೇಶದ ಬಗ್ಗೆ ಪ್ರಾಮಾಣಿಕವಾಗಿ ಯೋಚಿಸುವ ಪ್ರತಿಯೊಬ್ಬರೂ ತಮ್ಮ ಮನೆ, ನಡವಳಿಕೆ ಹಾಗೂ ದೈನಂದಿನ ಜೀವನದಿಂದಲೇ ಈ ತೊಡೆದುಹಾಕುವ ಪ್ರಕ್ರಿಯೆಯನ್ನು ಪ್ರಾರಂಭಿಸಬೇಕು,” ಎಂದರು.
ಜಾತಿ ತಾರತಮ್ಯದಿಂದ ಸಮಾಜ ಮುಕ್ತವಾಗಬೇಕು ಎಂದು ಕರೆ ನೀಡಿದ ಅವರು, ಕೇವಲ ಕಾನೂನು ರೂಪಿಸುವುದರಿಂದ, ಭಗವಂತನ ಅವತಾರಗಳಿಂದ ಅಥವಾ ಕೇವಲ ಉಪದೇಶ ನೀಡುವುದರಿಂದ ಈ ಪಿಡುಗು ಕೊನೆಗೊಳ್ಳುವುದಿಲ್ಲ ಎಂದು ಹೇಳಿದರು. “ಇದು ನಮ್ಮ ಸ್ವಂತ ನಡವಳಿಕೆ ಮತ್ತು ಆಚರಣೆಯಿಂದ ಮಾತ್ರ ಸಾಧ್ಯ. ನಾವೆಲ್ಲರೂ ಈ ಕಳಂಕದಿಂದ ಮುಕ್ತರಾಗಲು ಸಂಕಲ್ಪ ಮಾಡಿ ಮುನ್ನಡೆಯೋಣ,” ಎಂದು ಕರೆ ನೀಡಿದರು.