ಸುಂಕ ಹೆಚ್ಚಳ ಸಮರ : ಜಾಗತಿಕವಾಗಿ ಅಮೇರಿಕಾಗೆ ದೊಡ್ಡ ಹೊಡೆತಕ್ಕೆ ಚೀನಾ ಸಜ್ಜು

ಅಮೆರಿಕದಲ್ಲಿ ಎರಡನೇ ಬಾರಿಗೆ ಅಧಿಕಾರಕ್ಕೆ ಬಂದ ನಂತರ ಡೊನಾಲ್ಡ್ ಟ್ರಂಪ್‌ ಜಾಗತಿಕ ಮಟ್ಟದಲ್ಲಿ ಕೆಲ ಆಘಾತಕಾರಿ ಹಾಗೂ ಜನವಿರೋಧಿ ನಿಲುವುಗಳ ಕಾರಣದಿಂದಲೇ ಹೆಚ್ಚು ಸುದ್ದಿಗೆ ಬಂದಿದ್ದಾರೆ. ಅದರಲ್ಲೂ ಚೀನಾ ಮೇಲಿನ ಸುಂಕ ಸಮರವನ್ನು ವೈಯಕ್ತಿಕವಾಗಿ ತೆಗೆದುಕೊಂಡ ಅಮೇರಿಕಾಗೆ ಈಗ ಚೀನಾ ದೊಡ್ಡ ಹೊಡೆತ ನೀಡಲು ಸಜ್ಜಾಗಿದೆ.

ಚೀನಾದಲ್ಲಿ ಉತ್ಪಾದನೆ ಆಗುವ ಡಿಸ್ಟ್ರೋಸಿಯಮ್‌, ನಿಯೋಡೈಮಿಯಮ್‌ ಎನ್ನುವ ಅಪರೂಪದ ಲೋಹಗಳನ್ನು ಅಮೇರಿಕಾಗೆ ಈವರೆಗೆ ಚೀನಾ ಸರಬರಾಜು ಮಾಡುತ್ತಿತ್ತು. ಆದರೆ ಇನ್ನು ಮುಂದೆ ಅಮೇರಿಕಾಗೆ ಇದರ ರಫ್ತನ್ನು ಸಂಪೂರ್ಣ ನಿಲ್ಲಿಸಲು ಚೀನಾ ಉದ್ದೇಶಿಸಿದೆ. ಕೇವಲ ಒಂದು ದಿನದ ಹಿಂದಷ್ಟೇ ಚೀನಾದ ಆಮದುಗಳ ಮೇಲೆ 245 ಪ್ರತಿಶತದವರೆಗೆ ಹೊಸ ಸುಂಕಗಳನ್ನು ವಿಧಿಸುವುದಾಗಿ ಘೋಷಿಸಿತ್ತು. ಆದರೆ ಈಗ ಚೀನಾ ಅಪರೂಪದ ಲೋಹದ ರಫ್ತು ನಿಲ್ಲಿಸುವ ಮೂಲಕ ಅಮೇರಿಕಾ ವಿರುದ್ಧ ನೇರ ಯುದ್ಧಕ್ಕೆ ನಿಂತಿದೆ.

ವಿಶೇಷವಾಗಿ ಸೆಮಿ ಕಂಡಕ್ಟರ್‌ಗಳು, ಇಂಧನ ವಲಯ, ಎಲೇಕ್ಟ್ರಾನಿಕ್‌ ಡಿಸ್‌ಪ್ಲೇ, ರಕ್ಷಣಾ ಉಪಕರಣಗಳು ಸೇರಿದಂತೆ ಬಹುತೇಕ ತಂತ್ರಜ್ಞಾನಗಳ ಬಳಕೆಗೆ ಈ ಲೋಹ ಅಗತ್ಯವಾಗಿವೆ. ಇನ್ನೂ ಗಮನಾರ್ಹ ಅಂಶವೆಂದರೆ ಇಡೀ ವಿಶ್ವದಲ್ಲಿಯೇ ಇದರ ಉತ್ಪಾದನೆಯ ಶೇಕಡಾ 90 ರಷ್ಟು ಪಾಲು ಚೀನಾದ್ದಿದೆ. ಅಮೆರಿಕದ ತೆರಿಗೆ ನೀತಿಯಿಂದ ರೋಸಿ ಹೋಗಿರುವ ಚೀನಾ ಇದೀಗ ಇದರ ರಫ್ತಿಗೆ ನಿರ್ಬಂಧವನ್ನು ವಿಧಿಸಲು ಸಿದ್ಧವಾಗಿದೆ. ಚೀನಾ ಈ ಕ್ರಮ ಕೈಗೊಂಡರೆ ಐಟಿ ಕ್ಷೇತ್ರವನ್ನೇ ಅವಲಂಬಿಸಿರುವ ಅಮೇರಿಕಾಗೆ ಭಾರೀ ಹೊಡೆತ ಬೀಳಲಿದೆ, ಇಷ್ಟೇ ಅಲ್ಲದೆ ಸೆಮಿ ಕಂಡಕ್ಟರ್‌ ಹಾಗೂ ಎಲೆಕ್ಟ್ರಾನಿಕ್‌ ಉಪಕರಣಗಳ ತಯಾರಿಕೆಗೆ ತೀವ್ರ ಹಿನ್ನಡೆಯಾಗಲಿದೆ.

ಇಷ್ಟೇ ಅಲ್ಲದೆ ಅಮೆರಿಕದಲ್ಲಿ ಉತ್ಪಾದನೆಯಾಗುವ ಬೋಯಿಂಗ್‌ ಕಂಪನಿಯ ವಿಮಾನಗಳನ್ನು ಖರೀದಿಸುವುದನ್ನು ಚೀನಾ ಸ್ಥಗಿತಗೊಳಿಸಿದೆ. ಈ ಕುರಿತು ಚೀನಾ ಸರ್ಕಾರವು ತನ್ನ ಎಲ್ಲ ವಿಮಾನಯಾನ ಸಂಸ್ಥೆಗಳಿಗೆ ಆದೇಶ ಹೊರಡಿಸಿದೆ. ಡೊನಾಲ್ಡ್ ಟ್ರಂಪ್ ನ ದಿನಕ್ಕೊಂದು ತೆರಿಗೆ ನೀತಿಯ ಪರಿಣಾಮವಾಗಿ ಈಗಾಗಲೇ ಹಾರಾಟಕ್ಕೆ ಸಿದ್ದವಾಗಿರುವ ವಿಮಾನಗಳ ಖರೀದಿಗೂ ಬ್ರೇಕ್‌ ಹಾಕಿದೆ. ಅಲ್ಲದೆ ವಿಮಾನಗಳ ತಯಾರಿಕೆಗಾಗಿ ಬಳಸುವ ಅಮೆರಿಕದ ಕಂಪನಿಗಳ ವಿಮಾನಕ್ಕೆ ಸಂಬಂಧಿಸಿದ ಉಪಕರಣ, ಬಿಡಿ ಭಾಗಗಳ ಖರೀದಿಯನ್ನು ಮಾಡದಂತೆ ತಾಕೀತು ಮಾಡಿದೆ. ಇದು ಅಮೇರಿಕಾಗೆ ಆಘಾತ ಅಷ್ಟೇ ಅಲ್ಲದೆ ಆರ್ಥಿಕವಾಗಿ ದೊಡ್ಡ ನಷ್ಟಕ್ಕೆ ಕಾರಣವಾಗುವ ನಿರೀಕ್ಷೆ ಎದುರಾಗಿದೆ.

ಚೀನಾದ ಈ ನಿರ್ಧಾರಕ್ಕೆ ಅಮೇರಿಕಾ ನೇರ ಮಾತುಕತೆಗೆ ಹೆಜ್ಜೆ ಇಟ್ಟರೆ ಭವಿಷ್ಯದಲ್ಲಿ ತನ್ನ ದೊಡ್ಡಣ್ಣನ ಸ್ಥಾನ ಉಳಿಸಿಕೊಳ್ಳಲು ಸಾಧ್ಯವಾಗಬಹುದು. ಹಾಗೊಂದು ವೇಳೆ ಇದೇ ರೀತಿ ಸುಂಕ ಹೆಚ್ಚಳದ ಹುಚ್ಚು ನಿರ್ಧಾರಕ್ಕೆ ಚೀನಾ ಮುಂದಾದರೆ ಮುಂದಿನ ದಿನಗಳಲ್ಲಿ ಅಮೇರಿಕಾಗೆ ದೊಡ್ಡ ಆಘಾತ ಕಾದಿದೆ. ತನ್ನ ಸ್ವಯಂಕೃತ ಅಪರಾಧದಿಂದ ಇದೀಗ ಟ್ರಂಪ್‌ ತೀವ್ರ ಆಘಾತಕ್ಕೊಳಗಾಗಿದ್ದಾರೆ.