ದೆಹಲಿ: ಕೃತಕ ಬುದ್ಧಿಮತ್ತೆ (ಎಐ) ವಲಯದಲ್ಲಿ ಸುರಕ್ಷತಾ ನಿಯಮಗಳಿಗಿಂತ ಮಾರುಕಟ್ಟೆ ಸ್ಪರ್ಧೆಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ ಎಂಬ ಆರೋಪಗಳ ನಡುವೆ, ಪ್ರಮುಖ ಎಐ ಸಂಶೋಧನಾ ಸಂಸ್ಥೆಗಳ ವಿಜ್ಞಾನಿಗಳ ರಾಜೀನಾಮೆ ಸರಣಿ ಮುಂದುವರಿದಿದೆ. ಈ ಸಾಲಿಗೆ ಇದೀಗ ಓಪನ್‌ಎಐ (OpenAI) ಸಂಸ್ಥೆಯ ಪ್ರಮುಖ ಸುರಕ್ಷತಾ ಮುಖ್ಯಸ್ಥ ಡೇವಿಡ್ ರಾಬಿನ್ಸನ್ ಸೇರ್ಪಡೆಗೊಂಡಿದ್ದು, ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿ ಸಂಸ್ಥೆಯ ಆಂತರಿಕ ಸಂಸ್ಕೃತಿಯ ವಿರುದ್ಧ ತೀವ್ರ ಕಳವಳ ಹೊರಹಾಕಿದ್ದಾರೆ.
ಓಪನ್‌ಎಐನಲ್ಲಿ ದೀರ್ಘಕಾಲದಿಂದ ಸೇವೆ ಸಲ್ಲಿಸುತ್ತಿದ್ದ ಹಾಗೂ ಪ್ರಮುಖ ಎಐ ಮಾದರಿಗಳ ಬಿಡುಗಡೆಯ ಸುರಕ್ಷತಾ ವರದಿಗಳ ನೇತೃತ್ವ ವಹಿಸಿದ್ದ ರಾಬಿನ್ಸನ್, ‘ದಿ ಅಟ್ಲಾಂಟಿಕ್’ (The Atlantic) ಪತ್ರಿಕೆಯಲ್ಲಿ ಬರೆದ ತಮ್ಮ ವಿಶೇಷ ಲೇಖನದಲ್ಲಿ ರಾಜೀನಾಮೆಗೆ ಕಾರಣಗಳನ್ನು ಬಹಿರಂಗಪಡಿಸಿದ್ದಾರೆ.
“ಹೆಚ್ಚು ಸುಧಾರಿತ ಮತ್ತು ಪ್ರಬಲ ಎಐ ಮಾದರಿಗಳು ಮುನ್ನೆಲೆಗೆ ಬರುತ್ತಿರುವ ಇಂದಿನ ದಿನಗಳಲ್ಲಿ ಇಡೀ ಉದ್ಯಮವೇ ಗಂಭೀರ ಅಪಾಯದ ಅಂಚಿನಲ್ಲಿದೆ. ಎಐ ಅಭಿವೃದ್ಧಿಪಡಿಸುವ ಕಂಪನಿಗಳು ತೆಗೆದುಕೊಳ್ಳಬೇಕಾದಷ್ಟು ಮುನ್ನೆಚ್ಚರಿಕೆಗಳನ್ನು ವಹಿಸುತ್ತಿಲ್ಲ. ಪ್ರಸ್ತುತ ಎಐ ಸಾಗುತ್ತಿರುವ ಈ ಅಪಾಯಕಾರಿ ಹಾದಿಯನ್ನು ಒಪ್ಪಿಕೊಳ್ಳಲು ಸಾಧ್ಯವಾಗದ ಕಾರಣ ನಾನು ಸಂಸ್ಥೆಯಿಂದ ಹೊರಬಂದಿದ್ದೇನೆ,” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಕೇವಲ ಹೊಸ ನಿಯಮಗಳು ಅಥವಾ ಸರ್ಕಾರಿ ಕಾಯ್ದೆಗಳಿಂದ ಈ ಸಮಸ್ಯೆಯನ್ನು ಪರಿಹರಿಸಲು ಸಾಧ್ಯವಿಲ್ಲ ಎಂದಿರುವ ರಾಬಿನ್ಸನ್, ಎಐ ಸಂಸ್ಥೆಗಳಲ್ಲಿರುವ ಸಂಸ್ಕೃತಿಯೇ ಆಮೂಲಾಗ್ರವಾಗಿ ಬದಲಾಗಬೇಕಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
“ಪ್ರಾಯೋಗಿಕ ತಪ್ಪುಗಳಿಂದ ಕಲಿಯುವ (Trial and error) ಕಾಲ ಈಗ ಮುಗಿದಿದೆ. ಪರಮಾಣು ಸ್ಥಾವರಗಳು ಅಥವಾ ವಿಮಾನಯಾನ ರಂಗದಲ್ಲಿ ಅಳವಡಿಸುವಂತಹ ಅತ್ಯುನ್ನತ ಮಟ್ಟದ ಸುರಕ್ಷತಾ ಕ್ರಮಗಳು ಎಐ ಕ್ಷೇತ್ರಕ್ಕೂ ತಕ್ಷಣವೇ ಅಗತ್ಯವಿದೆ. ಎಐ ಭವಿಷ್ಯವು ಅದನ್ನು ರೂಪಿಸುವ ಕಂಪನಿಗಳ ಕೈಯಲ್ಲೇ ಇದೆ; ಆದರೆ ಇಡೀ ಸಿಲಿಕಾನ್ ವ್ಯಾಲಿಯಲ್ಲಿ ಇಂದು ನಿಜವಾದ ‘ವಿವೇಕ’ದ (Wisdom) ಕೊರತೆ ಎದ್ದು ಕಾಣುತ್ತಿದೆ. ಅಪಾಯಕಾರಿ ತಂತ್ರಜ್ಞಾನವನ್ನು ಹೇಗೆ ನಿಭಾಯಿಸಬೇಕು ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ಸಮಾಜದ ಬಗ್ಗೆ ಹೇಗೆ ಕಾಳಜಿ ವಹಿಸಬೇಕು ಎಂಬ ಜವಾಬ್ದಾರಿಯುತ ವಿವೇಕ ಇಂದು ಅತ್ಯಂತ ತುರ್ತಾಗಿ ಬೇಕಾಗಿದೆ,” ಎಂದು ಅವರು ಎಚ್ಚರಿಸಿದ್ದಾರೆ.
