ರಾಜ್ಯಾದ್ಯಂತ ದಿಗ್ಭ್ರಮೆ ಮೂಡಿಸಿದ ಧರ್ಮಸ್ಥಳದ ಸೌಜನ್ಯಾಳ ಸಾವಿಗೆ ಇಂದಿಗೆ ಹತ್ತು ವರ್ಷಗಳು. ಪೊಲೀಸರ ಸಂಪೂರ್ಣ ವೈಫಲ್ಯ ಮತ್ತು ಪ್ರಭಾವಿಗಳ ಕೈವಾಡಕ್ಕೆ ಸಿಲುಕಿ ಪ್ರಕರಣ ಹಳ್ಳಹಿಡಿದಿದೆ. ಈ ಪ್ರಕರಣದ ಕುರಿತು ಡಾ. ಅಶೋಕ್ ಕೆ. ಆರ್ ತಮ್ಮ ನೆನಪುಗಳನ್ನು ಬಿಚ್ಚಿಟ್ಟಿದ್ದಾರೆ.
ಅದು ದೈವಗಳ ನಾಡು, ಧಾರ್ಮಿಕತೆಯ ಧರ್ಮ ಸೂಕ್ಷ್ಮರ ನಾಡು. ಅದು ದಕ್ಷಿಣ ಕನ್ನಡ. ಹಸಿರ ಪರಿಸರದಲ್ಲಿ ಕಾನನದ ನಡುವೆ ಅರಳಿರುವ ಊರು. ದಟ್ಟ ಕಾನನ ನಮ್ಮ ಪೂರ್ವಿಕರಿಗೆ ಹುಟ್ಟಿಸಿದ ಭೀತಿಯ ಕಾರಣದಿಂದಲೋ ಏನೋ ಇಲ್ಲಿರುವ ದೇವಳಗಳ ಸಂಖೈಯೂ ಅಧಿಕ. ದೈವಾರಾಧನೆಯ ಜೊತೆಜೊತೆಗೆ ಭೂತಾರಾಧಾನೆ ಕೂಡ ಇಲ್ಲಿನ ವಿಶೇಷ. ಶಿಕ್ಷಿತರ ಅನುಪಾತ ಗಮನಿಸಿದಾಗ ದಕ್ಷಿಣ ಕನ್ನಡ ಬುದ್ಧಿವಂತರ ಜಿಲ್ಲೆ. ಸಾಂಸ್ಕೃತಿಕವಾಗಿ ಧಾರ್ಮಿಕವಾಗಿ ಶೈಕ್ಷಣಿಕವಾಗಿ ಉತ್ತಮ ಸ್ಥಾನದಲ್ಲಿರುವ ಜಿಲ್ಲೆಯಲ್ಲಿ ನಾಗರೀಕತೆಯ ಅತ್ಯುನ್ನತ ಮಜಲನ್ನು ಕಾಣಬೇಕಿತ್ತು. ಆದರೆ ಧಾರ್ಮಿಕ ಮೂಲಭೂತವಾದತನ ಇಲ್ಲಿರುವ ಎಲ್ಲ ಧರ್ಮಗಳಲ್ಲೂ ಸಮಾನ ರೀತಿಯಲ್ಲಿ ಪ್ರವಹಿಸುತ್ತ ದಕ್ಷಿಣ ಕನ್ನಡಕ್ಕೆ ಮೂಲಭೂತವಾದಿಗಳ, ಸಂಕುಚಿತ ಮನೋಭಾವದವರ ಊರೆಂಬ ಅಪಖ್ಯಾತಿ ದೊರೆಯುವಂತೆ ಮಾಡಿಬಿಟ್ಟಿರುವುದು ದುರಂತ. ಒಂದು ಅಪರಾಧಕ್ಕೆ ಸಿಗುವ ಪ್ರತಿಕ್ರಿಯೆ ಅಪರಾಧಿಯ ಧರ್ಮವನ್ನು ಆಧರಿಸುತ್ತದೆಯೇ ಹೊರತು ಅಪರಾಧಿಯ ಕೃತ್ಯಕ್ಕಲ್ಲ ಎಂಬುದೇ ಇಲ್ಲಿನ ದುರಂತ.
ಈ ದೈವದತ್ತ ನಾಡಿನಲ್ಲೂ ಕೆಲವು ದೇವರುಗಳು ಉಳಿದೆಲ್ಲ ದೇವರಿಗಿಂತ ಹೆಚ್ಚು ಪ್ರಸಿದ್ಧಿ ಪಡೆದಿವೆ, ಹೆಚ್ಚು ಶಕ್ತಿಯುತವಾದ ದೇವರುಗಳೆಂಬ ನಂಬಿಕೆಗೆ ಪಾತ್ರವಾಗಿವೆ. ದೇಶಾದ್ಯಂತ ಪ್ರಸಿದ್ಧಿ ಪಡೆದಿರುವ ಧರ್ಮಸ್ಥಳ ಕ್ಷೇತ್ರ ಅವುಗಳಲ್ಲೊಂದು. ಧರ್ಮಸ್ಥಳ ಮಂಜುನಾಥ ಎಷ್ಟು ಪ್ರಸಿದ್ಧಿ ಪಡೆದಿದೆಯೋ ಅಷ್ಟೇ ಪ್ರಸಿದ್ಧಿ ಮತ್ತು ಪ್ರವಾಸಿಗರ ಮೆಚ್ಚುಗೆಗೆ ಪಾತ್ರವಾಗುವುದು ಧರ್ಮಸ್ಥಳದಲ್ಲಿನ ವ್ಯವಸ್ಥೆ. ಅತಿ ಕಡಿಮೆ ದರದಲ್ಲಿ ಸಿಗುವ ರೂಮುಗಳು, ಅನ್ನ ದಾಸೋಹದ ಅಚ್ಚುಕಟ್ಟು ನಿರ್ವಹಣೆಯನ್ನು ಗಮನಿಸಿದ ಮೇಲೆ ಧರ್ಮಸ್ಥಳದ ದೇವಳದ ವ್ಯವಸ್ಥೆಯನ್ನು ಮೆಚ್ಚದೆ ಇರಲಾಗದು. ವಿರೇಂದ್ರ ಹೆಗ್ಡೆಯವರು ಆಡಳಿತಾಧಿಕಾರಿಯಾಗಿರುವ ಧರ್ಮಸ್ಥಳ ಕೇವಲ ಹಣ ಬಾಚುವ ಸಂಸ್ಥೆಯಾಗಿ ಸೀಮಿತವಾಗದೆ ರಾಜ್ಯದ ಬಹುತೇಕ ಕಡೆ ಅನೇಕ ವಿದ್ಯಾ ಸಂಸ್ಥೆಗಳನ್ನು ಪ್ರಾರಂಭಿಸಿದೆ (ಆ ವಿದ್ಯಾ ಸಂಸ್ಥೆಗಳಲ್ಲಿ ಕೆಲವು ಇತರ ವಿದ್ಯಾಸಂಸ್ಥೆಗಳ ರೀತಿಯಲ್ಲಿಯೇ ಹಣ ಮಾಡುವ ಸಂಸ್ಥೆಗಳಾಗಿರುವುದು ಹೌದು). ಧರ್ಮಸ್ಥಳದ ಬಗ್ಗೆ, ವೀರೇಂದ್ರ ಹೆಗ್ಡೆಯವರ ಬಗ್ಗೆ ಕೇವಲ ಒಳ್ಳೆಯದನ್ನೇ ಕೇಳುತ್ತ ಬಂದಿದ್ದ ನಾಡ ಜನತೆಯನ್ನು ಬೆಚ್ಚಿಬೀಳಿಸುವ ಘಟನೆಯೊಂದು ಎದುರಾಯಿತು. ‘ಧರ್ಮಸ್ಥಳದಲ್ಲಿ ನೆಲದ ಕಾನೂನ್ಯಾವುದೂ ಅನ್ವಯಿಸುವುದಿಲ್ಲ’ ‘ಇದು ರಿಪಬ್ಲಿಕ್ ಆಫ್ ಧರ್ಮಸ್ಥಳ’ ‘ವೀರೇಂದ್ರ ಹೆಗ್ಡೆಯವರೇ ಇಲ್ಲಿ ಸರ್ವಾಧಿಕಾರಿ’ ‘ಅವರ ಹಿಂಬಾಲಕರೇ ಇಲ್ಲಿನ ಆಡಳಿತ ನೋಡಿಕೊಳ್ಳುವವರು’ – ಈ ರೀತಿಯಾಗಿ ಧರ್ಮಸ್ಥಳದ ಬಗ್ಗೆ ಅನೇಕ ಮಾತುಗಳು ಪದೇ ಪದೇ ಕೇಳಲಾರಂಭಿಸಿದವು. ಇದಕ್ಕೆ ಕಾರಣವಾದರೂ ಏನು?
2012ರ ಡಿಸೆಂಬರ್ ಹದಿನಾರರಂದು ದೆಹಲಿಯಲ್ಲಿ ಚಲಿಸುವ ಬಸ್ಸಿನಲ್ಲಿ ನಾಲ್ವರು ಕಾಮುಕರು ‘ನಿರ್ಭಯಾ’ಳ ಮೇಲೆ ನಡೆಸಿದ ಪೈಶಾಚಿಕ ಅತ್ಯಾಚಾರ ದೇಶಾದ್ಯಂತ ಪ್ರತಿಭಟನೆಗಳಿಗೆ ಕಾರಣವಾಯಿತು. ತಪ್ಪಿತಸ್ಥರೆಲ್ಲರ ಬಂಧನವೂ ನಡೆದು ತ್ವರಿತ ನ್ಯಾಯಾಲಯದಲ್ಲಿ ವಿಚಾರಣೆ ನಡೆದು ತಪ್ಪಿತಸ್ಥರಿಗೆ ಶಿಕ್ಷೆಯೂ ಜಾರಿಯಾಯಿತು. ದೆಹಲಿಯ ಪೈಶಾಚಿಕ ಘಟನೆ ನಡೆಯುವುದಕ್ಕೂ ಎರಡು ತಿಂಗಳು ಮೊದಲು ನಮ್ಮದೇ ಕರ್ನಾಟಕದ ಧರ್ಮಸ್ಥಳದಲ್ಲಿ ಪಿ ಯು ಸಿ ಓದುತ್ತಿದ್ದ ಸೌಜನ್ಯಾಳ ಮೇಲೆ ಅಮಾನುಷ ರೀತಿಯಲ್ಲಿ ಅತ್ಯಾಚಾರವೆಸಗಿ ಹತ್ಯೆ ಮಾಡಲಾಯಿತು. ಪೊಲೀಸರ ಲೆಕ್ಕದಲ್ಲಿ ಅಪರಾಧಿಯ ಬಂಧನವಾಗಿತ್ತು. ಆದರೆ ಸೌಜನ್ಯಾಳ ಹೆತ್ತವರ ಲೆಕ್ಕದಲ್ಲಿ, ಸ್ಥಳೀಯರ ಲೆಕ್ಕದಲ್ಲಿ ಸೌಜನ್ಯಾಳನ್ನು ಹತ್ಯೆ ಮಾಡಿದವರೇ ಬೇರೆ ಪೋಲೀಸರು ಬಂಧಿಸಿರುವುದೇ ಬೇರೆಯವನನ್ನು. ಎರಡು ಬಾರಿ ನಡೆದ ಸಿಐಡಿ ತನಿಖೆಯ ಪ್ರಕಾರ ಸೌಜನ್ಯ ಹತ್ಯೆಗೆ ಕಾರಣವಾಗಿರುವ ವ್ಯಕ್ತಿ ಸಂತೋಷ್ ರಾವ್. ಆದರೆ ಪೋಲೀಸರ ಈ ತನಿಖಾ ವೈಖರಿಯನ್ನು ಒಪ್ಪದ ಜನತೆ ಸಿಬಿಐ ತನಿಖೆಗೆ ಸತತವಾಗಿ ಆಗ್ರಹಿಸುತ್ತಲೇ ಬಂದರು. ಸಿಬಿಐ ತನಿಖೆಗೆ ಸರಕಾರ ಬಹಳಷ್ಟು ಮೀನ ಮೇಷ ಎಣಿಸಿದ ನಂತರ ಜನತೆಯ ಒತ್ತಾಯಕ್ಕೆ ಮಣಿದು ಒಪ್ಪಿಕೊಂಡಿತು.
ಯಾರೀ ಸೌಜನ್ಯ?
ಆಕೆ ಸೌಜನ್ಯ, ಧರ್ಮಸ್ಥಳದ ಪಾಂಗಾಳ ಮನೆಯ ಚಂದಪ್ಪ ಗೌಡ ಮತ್ತು ಕುಸುಮಾವತಿಯ ಮಗಳು. ಉಜಿರೆಯ ಎಸ್ ಡಿ ಎಂ ಕಾಲೇಜಿನಲ್ಲಿ ಪಿ ಯು ಸಿ ಓದುತ್ತಿದ್ದಳು. ಅಕ್ಟೋಬರ್ 9, 2012ರಂದು ಎಂದಿನಂತೆ ಕಾಲೇಜು ಮುಗಿಸಿ ಮನೆಗೆಂದು ಹೊರಟವಳು ಮನೆ ತಲುಪಲೇ ಇಲ್ಲ. ರಾತ್ರಿಯೆಲ್ಲ ಸೌಜನ್ಯಳನ್ನು ಹುಡುಕಿದವರಿಗೆ ಮರುದಿನ ನೇತ್ರಾವತಿ ನದಿ ತೀರದ ಬಳಿ ಅವಳು ಸಿಕ್ಕಿದ್ದು ಹೆಣವಾಗಿ, ಅರೆನಗ್ನ ಸ್ಥಿತಿಯಲ್ಲಿ. ದೈಹಿಕ ದೌರ್ಜನ್ಯದ ಕುರುಹುಗಳು ದೇಹದ ತುಂಬೆಲ್ಲ ಇದ್ದವು. ಮರ್ಮಾಂಗದಲ್ಲಿ ಮಣ್ಣು ತುಂಬಲಾಗಿತ್ತು. ಸೌಜನ್ಯಳ ದೇಹ ಸಿಕ್ಕ ಜಾಗದಲ್ಲೂ ಹಿಂದಿನ ರಾತ್ರಿ ಹುಡುಕಾಟ ನಡೆಸಲಾಗಿತ್ತು. ರಾತ್ರಿ ಸಿಗದೆ ಬೆಳಿಗ್ಗೆ ಸಿಕ್ಕ ಹೆಣ ಅನೇಕ ಸಂಶಯಗಳಿಗೆ ಎಡೆಮಾಡಿಕೊಟ್ಟಿತು. ರಾತ್ರಿಯೆಲ್ಲ ಮಳೆಯಾಗಿದ್ದರೂ ಸೌಜನ್ಯಳ ದೇಹವಾಗಲಿ ಹತ್ತಿರದಲ್ಲಿ ಚೆಲ್ಲಾಪಿಲ್ಲಿಯಾಗಿದ್ದ ಸೌಜನ್ಯಳ ಪುಸ್ತಕವಾಗಲಿ ಒಂದಿನಿತೂ ತೇವವಾಗಿರಲಿಲ್ಲ. ಬೇರೆಡೆ ಅತ್ಯಾಚಾರವೆಸಗಿ ಕೊಲೆಮಾಡಿ ಬೆಳಗಿನ ಜಾವ ಇಲ್ಲಿ ತಂದು ಬಿಸಾಡಲಾಗಿದೆ ಎಂಬ ಆರೋಪ ಸ್ಥಳೀಯರದಾಗಿತ್ತು. ಸಾಮೂಹಿಕ ಅತ್ಯಾಚಾರ ನಡೆದ ಕುರುಹುಗಳು ಹೇರಳವಾಗಿದ್ದವು. ವಿದ್ಯಾರ್ಥಿ ವೃಂದ, ಧಾರ್ಮಿಕ ಸಂಘಟನೆಗಳು, ಎಡಪಂಥೀಯ ಸಂಘಟನೆಗಳು ಪ್ರತಿಭಟನೆಗೆ ಇಳಿದವು. ಅಪರಾಧಿಗಳನ್ನು ಶೀಘ್ರ ಬಂಧಿಸುವಂತೆ ಒತ್ತಾಯ ಹೇರಲಾರಂಭಿಸಿದವು. ಪೋಲೀಸರಿಗೆ ಸಿಗದ ಅಪರಾಧಿಯನ್ನು ಸಂಶಯಾಸ್ಪದವಾಗಿ ಓಡಾಡುತ್ತಿದ್ದ ಅನುಮಾನದ ಮೇಲೆ ‘ಕೆಲವು ಜನರೇ’ ಹಿಡಿದುಕೊಟ್ಟರು; ‘ವಿಚಾರಣೆಯ’ ನಂತರ ಪೋಲೀಸರು ‘ಆ ಜನರು’ ಹಿಡಿದುಕೊಟ್ಟ ಸಂತೋಷ್ ರಾವ್ ಅಪರಾಧಿ ಎಂದು ನಿರ್ಧರಿಸಿದರು.
ಪ್ರತಿಭಟನೆಯಲ್ಲಿ ಸಂಕುಚಿತ ಸಂಘಟನೆಗಳ ಸ್ವಾರ್ಥ
ಸೌಜನ್ಯ ಪ್ರಕರಣ ನಡೆದ ಮೊದಲ ದಿನಗಳಲ್ಲಿ ಅದನ್ನು ವಿರೋಧಿಸಿ ಅಪರಾಧಿಗಳ ಶೀಘ್ರ ಬಂಧನಕ್ಕೆ ಒತ್ತಾಯಿಸಿ ಅನೇಕ ಹಿಂದೂ ಪರ ಸಂಘಟನೆಗಳು ಬೀದಿಗಿಳಿದಿದ್ದವು. ಮುಸ್ಲಿಂ ಚಾಲಕರ ಕೃತ್ಯವಿರಬಹುದೆಂಬ ಅನುಮಾನ ಅವರನ್ನು ಬೀದಿಗಿಳಿಯುವಂತೆ ಮಾಡಿತ್ತು. ಯಾವಾಗ ಸಂತೋಷ್ ರಾವ್ ನ ಬಂಧನವಾಯಿತೋ ಬಹುತೇಕ ಹಿಂದೂ ಸಂಘಟನೆಗಳು ಮೌನಕ್ಕೆ ಶರಣಾಗಿ ಹೋದವು. ಪ್ರಕರಣ ನಡೆದಾಗ ಆಡಳಿತದಲ್ಲಿದ್ದಿದ್ದು ಬಿ.ಜೆ.ಪಿ ಸರಕಾರವೆಂಬ ಅಂಶ ಕೂಡ ಅವರ ಮೌನಕ್ಕೆ ಕಾರಣ. ಆದರೆ ಉಳಿದ ಸಂಘಟನೆಗಳು ಮೌನಕ್ಕೆ ಶರಣಾಗಲಿಲ್ಲ. ಸಂತೋಷ್ ರಾವ್ ನನ್ನು ಕೇಸಿಗೆ ಫಿಟ್ ಮಾಡಲಾಗಿದೆ ಎಂಬುದು ಅವರ ಅನುಮಾನ. ಈ ಸಂತೋಷ್ ರಾವ್ ಮೂಲತಃ ಕಾರ್ಕಳದವನು. ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿದ್ದ ಸಂತೋಷನಿಗೆ ಪದೇ ಪದೇ ಧರ್ಮಸ್ಥಳಕ್ಕೆ ಭೇಟಿ ನೀಡುವ, ಧರ್ಮಸ್ಥಳದಲ್ಲಿ ಕಾಲ ಕಳೆಯುವ ಅಭ್ಯಾಸವಾಗಿತ್ತು. ಸೌಜನ್ಯ ಪ್ರಕರಣದ ಆರೋಪಿ ಎಂದು ಬಂಧಿಸುವವರೆಗೆ ಈತನ ಮೇಲೆ ಯಾವುದೇ ಪ್ರಕರಣವಿರಲಿಲ್ಲ ಎಂಬುದು ಕೂಡ ಸಂತೋಷ್ ಅಂತಹ ಅಮಾನುಷ ಕೃತ್ಯವೆಸಗಿರಲಾರ ಎಂಬ ಜನರ ಭಾವನೆಗೆ ಕಾರಣವಾಗಿತ್ತು. ಮೇಲಾಗಿ ಘಟನೆ ನಡೆದ ಮೊದಲ ಕೆಲವು ದಿನಗಳಲ್ಲಿ ವರದಿಯಾದಂತೆ ಶಿಕ್ಷಕಿಯೊಬ್ಬರು ಬಸ್ಸಿನಲ್ಲಿ ಹೋಗುವಾಗ ನಾಲ್ವರು ಸೌಜನ್ಯಳನ್ನು ಬಲವಂತವಾಗಿ ಹೊತ್ತೊಯ್ಯುತ್ತಿದ್ದುದನ್ನು ನೋಡಿದರಂತೆ. ನಂತರ ಆ ವಿಷಯವಾಗಿ ಆ ಶಿಕ್ಷಕಿಯಿಂದ ಯಾವುದೇ ಹೇಳಿಕೆ ಬರಲಿಲ್ಲವಾದರೂ ಜನರಿಗೆ ನಿಜವಾದ ಆರೋಪಿಗಳು ಬೇರೆಯೇ ಇರಬಹುದು ಎಂಬ ಅನುಮಾನ ಬೆಳೆಯುವಂತೆ ಮಾಡಿತು. ಸಂತೋಷ್ ರಾವ್ ನ ಬಂಧನವಾದ ನಂತರವೂ ಪ್ರತಿಭಟನೆ ನಿಲ್ಲಲಿಲ್ಲ. ಪ್ರಮುಖವಾಗಿ ಎಡಪಂಥೀಯ ಸಂಘಟನೆಗಳು ಜನರ ಪ್ರತಿಭಟನೆಯನ್ನು ಸಾಯದಂತೆ ನೋಡಿಕೊಂಡವು ಎಂದರೆ ತಪ್ಪಲ್ಲ. ಸಂತೋಷ್ ನ ಬಂಧನದಿಂದಲೇ ಹಿಂದೂ ಸಂಘಟನೆಗಳು ಸುಮ್ಮನಾಗಿಬಿಟ್ಟವು, ಯಾವಾಗ ಸೌಜನ್ಯ ಪ್ರಕರಣದಲ್ಲಿ ಧರ್ಮಸ್ಥಳದ ದೊಡ್ಡ ದೊಡ್ಡ ಮನೆಯ ಮಕ್ಕಳ ಕೈವಾಡವಿದೆ ಎಂಬ ಅನುಮಾನ ದಟ್ಟವಾಗತೊಡಗಿತೋ ತನಗೂ ಈ ಪ್ರತಿಭಟನೆಗಳಿಗೂ ಸಂಬಂಧವೇ ಇಲ್ಲವೆಂಬಂತೆ ವರ್ತಿಸಿತು ಪರಿವಾರ. ಅದೇ ಹಿಂದೂ ಸಂಘಟನೆಗೆ ಸೇರಿದ ಮಹೇಶ್ ಶೆಟ್ಟಿ ಎಂಬ ಕಟ್ಟರ್ ಹಿಂದೂತ್ವವಾದಿ ಮಾತ್ರ ಮೊದಲಿನಿಂದಲೂ ಸೌಜನ್ಯಾಳ ಪರ ಧರ್ಮಸ್ಥಳದ ‘ಅಧಿಕಾರಸ್ಥರ’ ವಿರುದ್ಧ ಪ್ರತಿಭಟಿಸುತ್ತಿದ್ದ; ತನ್ನ ಸಂಘಟನೆಗಳ ವಿರೋಧದ ನಡುವೆಯೂ. ಮಹೇಶ್ ಶೆಟ್ಟಿ ಕೂಡ ಕೆಲವು ತಿಂಗಳುಗಳ ಕಾಲ ಮೌನಕ್ಕೆ ಶರಣಾಗಿಬಿಟ್ಟ.
ಸೌಜನ್ಯ ಪ್ರಕರಣಕ್ಕೆ ಒಂದು ವರುಷ ತುಂಬಿದಾಗ…
ಸೌಜನ್ಯ ಪ್ರಕರಣಕ್ಕೆ ಒಂದು ವರುಷ ತುಂಬಿದ ಸಂದರ್ಭದಲ್ಲಿ ನಿಜ ಆರೋಪಿಗಳನ್ನು ಬಂಧಿಸುವಂತೆ ಒತ್ತಾಯಿಸಿ ಎಡಪಂಥೀಯ ಸಂಘಟನೆಗಳು ವಿದ್ಯಾರ್ಥಿಗಳ ಜೊತೆಗೆ ಪ್ರತಿಭಟನೆ ನಡೆಸಿದವು. ಎಡಪಂಥೀಯ ಮತ್ತು ಜನಪರ ಸಂಘಟನೆಗಳ ಪ್ರತಿಭಟನೆ ಕೇವಲ ದಕ್ಷಿಣ ಕನ್ನಡಕ್ಕೆ ಸೀಮಿತವಾಗದೆ ಬೆಂಗಳೂರು ಗುಲ್ಬರ್ಗದಂತಹ ದೂರದ ಊರುಗಳಲ್ಲೂ ಪ್ರತಿಭಟನೆಯನ್ನು ಹಮ್ಮಿಕೊಂಡಿದ್ದವು. ಒಂದು ಹಂತದಲ್ಲಿ ಸೌಜನ್ಯ ಪ್ರಕರಣ ಬಗೆಹರಿಯದಿರುವುದಕ್ಕೆ ವೀರೇಂದ್ರ ಹೆಗ್ಗಡೆಯವರೇ ಕಾರಣ ಎಂಬ ಆರೋಪವೂ ಕೇಳಿ ಬಂತು. ಹಿಂದೂ ಧಾರ್ಮಿಕ ಕ್ಷೇತ್ರದ ಧರ್ಮಾಧಿಕಾರಿಯ ವಿರುದ್ಧ ಕೇಳಿ ಬಂದ ಇಂತಹ ಆರೋಪದ ವಿರುದ್ಧ ಹೆಗ್ಗಡೆಯವರ ಪರವಾಗಿ ಸಭೆಗಳೂ ನಡೆದವು. ಹಿಂದೂ ಸಂಘಟನೆಗಳು, ಬಿಜೆಪಿ ಮತ್ತು ಕೆಲವು ಕಾಂಗ್ರೆಸ್ ಮುಖಂಡರೂ ಕೂಡ ಈ ಸಭೆಗಳಲ್ಲಿ ಭಾಗವಹಿಸಿ ಜನರ ಹೋರಾಟದ ವಿರುದ್ಧ ನಿಲುವನ್ನು ತಳೆದುಬಿಟ್ಟರು. ಒಂದು ವರುಷವಾದ ಸಂದರ್ಭದಲ್ಲಿ ಸೌಜನ್ಯಳ ತಂದೆ ತಾಯಿ ಪತ್ರಿಕಾಗೋಷ್ಠಿ ನಡೆಸಿ ವೀರೇಂದ್ರ ಹೆಗ್ಗಡೆ ಮತ್ತವರ ಸಂಗಡಿಗರ ಪರಿವಾರದ ಸದಸ್ಯರೇ ಈ ಪ್ರಕರಣದಲ್ಲಿ ನಿಜವಾದ ಅಪರಾಧಿಗಳು ಎಂದು ನೇರ ಆರೋಪ ಹೊರಸಿದರಾದರೂ ಆ ಸುದ್ದಿ ವಾರ್ತಾ ಭಾರತಿ, ಜಯಕಿರಣದಂತಹ ಪತ್ರಿಕೆಗಳಲ್ಲಿ ಬಂದಿದ್ದು ಬಿಟ್ಟರೆ ಉಳಿದ ಪತ್ರಿಕೆಗಳಲ್ಲಿ ಬರಲಿಲ್ಲ. ಈ ಇಡೀ ಪ್ರಕರಣಕ್ಕೊಂದು ಬಹುದೊಡ್ಡ ತಿರುವು ಬಂದಿದ್ದು ಟಿವಿ 9 ಸುದ್ದಿ ವಾಹಿನಿ ಸೌಜನ್ಯಳ ತಂದೆ ತಾಯಿ, ಮಾವ ಮತ್ತು ಮಹೇಶ್ ಶೆಟ್ಟಿಯನ್ನು ಸ್ಟುಡಿಯೋಗೆ ಕರೆಸಿ ನೇರಪ್ರಸಾರ ಮಾಡಿದಾಗ!
ಆರೋಪ ಯಾರ ಮೇಲೆ?
ವೀರೇಂದ್ರ ಹೆಗ್ಗಡೆಯ ತಮ್ಮನ ಮಗ ನಿಶ್ಚಲ್ ಹೆಗ್ಡೆ, ಅನ್ನಪೂರ್ಣ ಛತ್ರದ ಮ್ಯಾನೇಜರ್ ಮಗ ಧೀರಜ್ ಜೈನ್, ವೀರೇಂದ್ರ ಹೆಗ್ಗಡೆಯ ಮನೆಯಲ್ಲಿ ಕೆಲಸ ಮಾಡುವವರ ಮಗ ಮಲ್ಲಿಕ್ ಜೈನ್ ಮತ್ತು ಉದಯ್ ಜೈನ್ ಮೇಲೆ ಸೌಜನ್ಯಳ ತಂದೆ ತಾಯಿಗಳು ನೇರ ಆರೋಪ ಮಾಡಿದ್ದರು. ತಮ್ಮ ಮಗಳ ಮೇಲೆ ಅತ್ಯಾಚಾರವೆಸಗಿ ಹತ್ಯೆಗೈಯ್ದಿರುವುದು ಈ ನಾಲ್ವರೇ ಹೊರತು ಸಂತೋಷ್ ರಾವ್ ಅಲ್ಲ ಎಂಬುದು ಅವರ ಆರೋಪ. ವಿಶೇಷವೆಂದರೆ ಸೌಜನ್ಯಳ ಹತ್ಯೆ ಮಾಡಿದ ಆರೋಪದಡಿಯಲ್ಲಿ ಬಂಧಿಸಲಾದ ಸಂತೋಷ ನನ್ನು ಪೊಲೀಸರಿಗೆ ಹಿಡಿದುಕೊಟ್ಟಿದ್ದು ಈ ನಾಲ್ವರೇ! ಈ ಆರೋಪಗಳನ್ನು ಸೌಜನ್ಯಳ ತಂದೆ ತಾಯಿ ಮತ್ತು ಅನೇಕ ಸಂಘಟನೆಯವರು ಘಟನೆ ನಡೆದ ದಿನದಿಂದ ಹೇಳುತ್ತಲೇ ಬಂದಿದ್ದಾರಾದರೂ ಆ ಸುದ್ದಿ ಧರ್ಮಸ್ಥಳದ ವೀರೇಂದ್ರ ಹೆಗ್ಗಡೆಯ ಕುಟುಂಬಸ್ಥರ ಕಡೆಗೆ ಬೆರಳು ತೋರುತ್ತಿತ್ತಾದ್ದರಿಂದ ಅದು ದಕ್ಷಿಣ ಕನ್ನಡದ ವ್ಯಾಪ್ತಿಯನ್ನು ಬಿಟ್ಟು ಹೊರಬಂದಿದ್ದು ಕಡಿಮೆ!
ಪ್ರಕರಣವು ಶರಾ ಬರೆಯುವಷ್ಟು ಸರಳವಾಗಿರಲಿಲ್ಲ..
ಮಂಗಳೂರಿನಲ್ಲಿ ಆಯೋಜಿಸಿದ್ದ ಪ್ರತಿಭಟನಾ ಸಭೆಗೆ ಹೋಗುತ್ತಿದ್ದ ಸೌಜನ್ಯಳ ತಂದೆ ತಾಯಿಯನ್ನು ಬೆದರಿಸಿದ್ದು, ತೋಟದ ಕೆಲಸಗಳ ಉಸ್ತುವಾರಿ ವಹಿಸಿಕೊಂಡಿರುವ ಬಾಲಕೃಷ್ಣ ಪೂಜಾರಿ ಎಂಬ ವ್ಯಕ್ತಿ ಸೌಜನ್ಯಳ ತಂದೆ ತಾಯಿಯನ್ನು ಮಾನಸಿಕ ಅಸ್ವಸ್ಥರೆಂದು ಆರೋಪಿಸಿ ಉಜಿರೆಯ ಬೆನಕ ಆಸ್ಪತ್ರೆಗೆ ಸೇರಿಸಿದ್ದು, ಸೌಜನ್ಯಳ ಅಜ್ಜನನ್ನೇ ವೀರೇಂದ್ರ ಹೆಗ್ಗಡೆಯ ಪರವಾಗಿ ಸೌಜನ್ಯಳ ತಂದೆ ತಾಯಿಯ ವಿರುದ್ಧ ಮಾತನಾಡುವಂತೆ ಮಾಡಿದ್ದು, ಉಜಿರೆಯ ಕಾಲೇಜಿನಲ್ಲಿ ಸೌಜನ್ಯಳ ಪರ ಪ್ರತಿಭಟನೆಗಳನ್ನು ನಡೆಸದಂತೆ ನಿರ್ಬಂಧ ಹೇರಲು ಪ್ರಯತ್ನಿಸಿದ್ದು, ಸಿಐಡಿ ತನಿಖೆಗೆಂದು ಬಂದ ಜಗದೀಶ್ ವರ್ಗಾವಣೆ ಪಡೆದುಕೊಂಡು ಹೊರಟುಹೋಗಿದ್ದು… ಇವೆಲ್ಲವೂ ಈ ಪ್ರಕರಣ ‘ಮಾನಸಿಕ ಅಸ್ವಸ್ಥನೊಬ್ಬ ಮಾಡಿದ ವಿಕೃತ ಕೆಲಸ’ ಎಂದು ಶರಾ ಬರೆಯುವಷ್ಟು ಸರಳವಾಗಿಲ್ಲವೆಂಬುದನ್ನೇ ತಿಳಿಸಿತ್ತು.
ತನಿಖೆ ಎಂಬ ಪ್ರಹಸನಗಳು…
ಸೌಜನ್ಯ ಅತ್ಯಾಚಾರ ಕೊಲೆ ಪ್ರಕರಣವನ್ನು ಸರಕಾರ ಸಿಐಡಿಗೆ ವಹಿಸಿತ್ತು. ಸಿಐಡಿ ತನಿಖೆ ನಡೆಸಿ ಹೆಗ್ಗಡೆ ಕುಟುಂಬದ ಕೈವಾಡವಿಲ್ಲ, ಸಂತೋಷ್ ರಾವ್ ಪ್ರಕರಣದ ಆರೋಪಿ ಎಂದು ಅದು ವರದಿ ನೀಡಿತ್ತು. ಆರೋಪಿಗಳಾಗಿದ್ದ ನಿಶ್ಚಲ್ ಜೈನ್, ಧೀರಜ್ ಜೈನ್, ಉದಯ್ ಜೈನ್ ಮತ್ತು ಮಲ್ಲಿಕ್ ಅವರಿಗೆ ಕ್ಲೀನ್‌ ಚಿಟ್‌ ನೀಡಿತ್ತು.
ಬಳಿಕ ಜನರ ಒತ್ತಡಕ್ಕೆ ಮಣಿದು ಪ್ರಕರಣವು 2013 ರಲ್ಲಿ ಸಿಬಿಐ ಮೆಟ್ಟಲೇರಿತು. 2016 ರಲ್ಲಿ ತನಿಖೆ ಪೂರ್ಣಗೊಳಿಸಿದ ಸಿಬಿಐ ಆರೋಪ ಪಟ್ಟಿ ಸಲ್ಲಿಸಿತು. ಆ ಆರೋಪ ಪಟ್ಟಿ ಸೂಕ್ತವಾಗಿಲ್ಲ ಎಂದು ಆರೋಪಿಸಿದ ಸೌಜನ್ಯಾಳ ತಂದೆ, ಪ್ರಕರಣದ ಮರು ತನಿಖೆಗೆ ಕೋರಿದ್ದರು. ಸಿಬಿಐ ನ್ಯಾಯಾಲಯವು ಹೆಚ್ಚಿನ ತನಿಖೆ ನಡೆಸಿ 2017ರ ಎಪ್ರಿಲ್‌ 24ರ ಒಳಗೆ ವರದಿ ನೀಡುವಂತೆ ಸಿಬಿಐ ಗೆ ಆದೇಶಿಸಿತು. ಆ ಆದೇಶಕ್ಕೆ 2017ರ ಎಪ್ರಿಲ್‌ 11 ರಂದು ಹೈಕೋರ್ಟ್‌ ತಡೆಯಾಜ್ಞೆ ನೀಡಿತು. ಸೌಜನ್ಯಾಳ ಮಾವ ವಿಠಲ ಗೌಡರು “ಸದರಿ ಪ್ರಕರಣದ ತಡೆಯಾಜ್ಞೆ ತೆರವುಗೊಂಡು ಸಿಬಿಐ ಕೋರ್ಟಿನಲ್ಲಿದೆ. ಈ ಪ್ರಕರಣವನ್ನು ಅಲ್ಲಿ ಯಾರೂ ಗಮನಿಸುತ್ತಿಲ್ಲ. ಪ್ರಭಾವಿಗಳ ಒತ್ತಡಕ್ಕೆ ಮಣಿದು ಕೇಸ್‌ ವಿಚಾರಣೆಗೆ ಬರದಂತೆ ನೋಡಿಕೊಂಡಿದ್ದಾರೆ. ಕೋರ್ಟಲ್ಲಿ ನ್ಯಾಯ ಸಿಗುತ್ತದೆ ಎಂಬುದು ಸುಳ್ಳುʼ ಎಂದು ವಿಷಾದ ವ್ಯಕ್ತಪಡಿಸುತ್ತಾರೆ!.
ಒಂದು ಅತ್ಯಾಚಾರ ಮತ್ತು ಹತ್ಯೆಯ ಪ್ರಕರಣ ಇಷ್ಟೊಂದು ಗೋಜಲಾಗಬೇಕೆ? ಕೆಲವು ಸಂಘಟನೆಗಳ ಸ್ವಾರ್ಥದ ಮೂಲವಾಗಬೇಕೆ? ಮಗಳನ್ನು ಕಳೆದುಕೊಂಡ ನೋವಿನಲ್ಲಿರುವ ತಂದೆ ತಾಯಿ ಬಲಾಢ್ಯರ ಕಪಿ ಮುಷ್ಟಿಯಲ್ಲಿ ನಲುಗಬೇಕೆ? ಪೊಲೀಸ್ ತನಿಖೆ ಎಲ್ಲಾ ರೀತಿಯ ಒತ್ತಡಗಳಿಂದಲೂ ಮುಕ್ತವಾಗುವವರೆಗೆ ಈ ರೀತಿಯ ಪ್ರಕರಣಗಳು ಮತ್ತದರ ಸುತ್ತಲಿನ ಸಂಗತಿಗಳು ನಡೆಯುತ್ತಲೇ ಇರುತ್ತವೆ.
ಡಾ ಅಶೋಕ್ ಕೆ ಆರ್
ವೈದ್ಯರು, ಪ್ರಗತಿಪರ ಚಿಂತಕರು. ಸಮಾಜಮುಖಿ ಚಟುವಟಿಕೆಗಳಲ್ಲಿ ಆಸಕ್ತರು.
