ಹೊಸದಿಲ್ಲಿ: ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರಿಗೆ ಬೆದರಿಕೆ ಹಾಕಿರುವ 28 ವರ್ಷದ ವಿದ್ಯಾರ್ಥಿಯನ್ನು ಗುಜರಾತ್‌ ಭಯೋತ್ಪಾದಕ ನಿಗ್ರಹ ದಳ(ಎಟಿಎಸ್‌) ನ ಅಧಿಕಾರಿಗಳು ಬಂಧಿಸಿದ್ದಾರೆ.
ಅಮಾನ್‌ ಸಕ್ಸೆನಾ(28) ಎಂಬಾತನು ಪ್ರಧಾನಿ ನರೇಂದ್ರ ಮೋದಿಗೆ ಇಮೇಲ್‌ ಮುಖಾಂತರ ಬೆದರಿಕೆಯೊಡ್ಡಿದ್ದರು. ಈ ಕುರಿತು ತನಿಖೆ ಶುರು ಮಾಡಿದ ಎಟಿಎಸ್‌ ಅಧಿಕಾರಿಗಳ ತಂಡ ಮತ್ತು ಯುಪಿ ಪೊಲೀಸರು ಸೇರಿ ಜಂಟಿ ದಾಳಿ ನಡೆಸಿದ್ದು, ಉತ್ತರ ಪ್ರದೇಶದ ಬದೌನ್‌ ಜಿಲ್ಲೆಯಲ್ಲಿದ ಆರೋಪಿಯನ್ನು ಬಂಧಿಸಿದ್ದಾರೆ. ಪ್ರಧಾನಿಯವರಿಗೆ ಬೆದರಿಕೆ ಹಾಕಿರುವುದಕ್ಕೆ ಸಂಬಂಧಿಸಿದಂತೆ ಅಮಾನ್‌ ಸಕ್ಸೆನಾ, ಗುಜರಾತ್‌ ಮೂಲದ ಓರ್ವ ಮಹಿಳೆ ಮತ್ತು ಆಕೆಯ ದೆಹಲಿ ಮೂಲದ ಸ್ನೇಹಿತನ ವಿರುದ್ಧ ಪ್ರಕರಣ ದಾಖಲಿಸಲಾಗದೆ.
ಮಾಧ್ಯಮ ವರದಿಗಳ ಪ್ರಕಾರ, ಆರೋಪಿಯು ತನ್ನ ಫೋನ್‌ ಸ್ವಿಚ್‌ ಆಫ್‌ ಮಾಡಿದ್ದು, ನಂತರ ಆತನ ತಂದೆಯ ಫೋನ್‌ ಮುಖಾಂತರ ಅವರ ಸಿಮ್‌ ಬಳಕೆ ಮಾಡಿದಾಗ ಸಿಕ್ಕಿಬಿದ್ದು, ಆತ ಇರುವ ಸ್ಥಳವನ್ನು ಪತ್ತೆ ಹಚ್ಚಲಾಗಿದೆ. ಈ ಕುರಿತು ಮಾತನಾಡಿರುವ ಅಮಾನ್‌ ಸಕ್ಸೆನಾ ಅವರ ತಂದೆ, ʼ ನನ್ನ ಮಗ ತಪ್ಪು ದಾರಿಗೆ ಇಳಿಯಲು ದೆಹಲಿ ಮೂಲದ ಗೆಳತಿಯರೇ ಕಾರಣ. ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರಿಗೆ ಇವನ ಫೋನ್‌ ಮುಖಾಂತರ ಅವನ ಗೆಳತಿಯರೇ ಬೆದರಿಕೆ ಇಮೇಲ್‌ ಕಳುಹಿಸಿರಬಹುದುʼ ಎಂದು ಆರೋಪ ಮಾಡಿದ್ದಾರೆ.
