ಗುವಾಹಾಟಿ: ಸರಕಾರಿ ಗುತ್ತಿಗೆ ಕೊಡಿಸುವುದಾಗಿ ನಂಬಿಸಿ ಕೋಟ್ಯಂತರ ರೂಪಾಯಿ ವಂಚನೆ (Fraud) ಎಸಗುತ್ತಿದ್ದ ಅಸ್ಸಾಂ (Assam) ಸರಕಾರದ ಹಿರಿಯ ಅಧಿಕಾರಿಯೊಬ್ಬರನ್ನು ಮುಖ್ಯಮಂತ್ರಿಯವರ (CM) ವಿಶೇಷ ವಿಜಿಲೆನ್ಸ್ ಕೋಶದ ಪೊಲೀಸರು ಬಂಧಿಸಿದ್ದಾರೆ.
ಬಂಧಿತ ಅಧಿಕಾರಿಯನ್ನು ದೇಬೇಶ್ವರ್ ಬೋರಾ ಎಂದು ಗುರುತಿಸಲಾಗಿದ್ದು, ಈತ ಜನರನ್ನು ನಂಬಿಸಲು ಮಿಮಿಕ್ರಿ ಕಲಾವಿದರ ಮೂಲಕ ಮುಖ್ಯಮಂತ್ರಿ, ಮುಖ್ಯ ಕಾರ್ಯದರ್ಶಿ ಹಾಗೂ ಇತರ ಉನ್ನತಾಧಿಕಾರಿಗಳ ಧ್ವನಿಯಲ್ಲಿ ಮಾತನಾಡಿಸಿ ವಂಚಿಸುತ್ತಿದ್ದ ಎಂಬ ಆಘಾತಕಾರಿ ವಿಷಯ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ವಂಚನೆ ಬಯಲಿಗೆ ಬಂದಿದ್ದು ಹೇಗೆ?
ಮೇ 30 ರಂದು ವ್ಯಕ್ತಿಯೊಬ್ಬರು ನೀಡಿದ ದೂರಿನ ಆಧಾರದ ಮೇಲೆ ಈ ಬೃಹತ್ ಜಾಲ ಬಯಲಾಗಿದೆ. ಸರಕಾರಿ ಗುತ್ತಿಗೆ ಕೊಡಿಸುವುದಾಗಿ ನಂಬಿಸಿದ್ದ ದೇಬೇಶ್ವರ್ ಬೋರಾ, ದೂರುದಾರರಿಂದ ಹತ್ತು ಲಕ್ಷ ರೂಪಾಯಿ ಪಡೆದುಕೊಂಡಿದ್ದ. ಬಳಿಕ ಮತ್ತೆ 40 ಲಕ್ಷ ರೂಪಾಯಿಗೆ ಬೇಡಿಕೆ ಇಟ್ಟಿದ್ದ. ಇದರಿಂದ ಅನುಮಾನಗೊಂಡ ಉದ್ಯಮಿ ಹಣ ನೀಡಲು ನಿರಾಕರಿಸಿ, ತನಗೆ ನೀಡಿದ್ದ ಹತ್ತು ಲಕ್ಷ ರೂಪಾಯಿಯನ್ನು ಹಿಂತಿರುಗಿಸುವಂತೆ ಕೇಳಿದ್ದರು. ಹಣ ಸಿಗದಿದ್ದಾಗ ಅವರು ವಿಜಿಲೆನ್ಸ್ ಕೋಶದ ಮೆಟ್ಟಿಲೇರಿದ್ದರು.
ಮಿಮಿಕ್ರಿ ಕಲಾವಿದರ ಬಳಕೆ ಮತ್ತು ಕಾರ್ಯವೈಖರಿ
ಪ್ರಕರಣದ ತನಿಖೆ ನಡೆಸಿದ ಹಿರಿಯ ಪೊಲೀಸ್ ಅಧಿಕಾರಿ ರೋಸಿ ಕಲಿತಾ ಅವರು ಘಟನೆಯ ವಿವರ ನೀಡಿದ್ದಾರೆ. ಆರೋಪಿ ಬೋರಾ ತನಗೆ ಸರಕಾರದ ಉನ್ನತ ಮಟ್ಟದಲ್ಲಿ ನೇರ ಸಂಪರ್ಕವಿದೆ ಎಂದು ಜನರಿಗೆ ತೋರಿಸಿಕೊಳ್ಳುತ್ತಿದ್ದ. ಹಣ ನೀಡಲು ಬರುವ ಉದ್ಯಮಿಗಳ ಎದುರಲ್ಲೇ ಆತ ಹಿರಿಯ ಅಧಿಕಾರಿಗಳಿಗೆ ಕರೆ ಮಾಡುತ್ತಿದ್ದ. ಕರೆಯ ಮತ್ತೊಂದು ತುದಿಯಲ್ಲಿ ಮಿಮಿಕ್ರಿ ಕಲಾವಿದರು ಅಥವಾ ಆತನ ಸಹಚರರು ಮುಖ್ಯಮಂತ್ರಿ ಹಾಗೂ ಇತರ ಹಿರಿಯ ಅಧಿಕಾರಿಗಳ ಧ್ವನಿಯಲ್ಲಿ ಮಾತನಾಡಿ, ಗುತ್ತಿಗೆ ನೀಡುವುದಾಗಿ ಭರವಸೆ ನೀಡುತ್ತಿದ್ದರು. ಇದನ್ನು ನಿಜವೆಂದು ನಂಬುತ್ತಿದ್ದ ಜನರು ಆತನಿಗೆ ಕೋಟ್ಯಂತರ ರೂಪಾಯಿ ನೀಡುತ್ತಿದ್ದರು.
ತನಿಖೆ ವೇಳೆ ಕೆ.ಕೆ ಎಂಟರ್ಪ್ರೈಸಸ್ ಮತ್ತು ಡಿ.ಬಿ ಎಂಟರ್ಪ್ರೈಸಸ್ ಎಂಬ ಎರಡು ಸಂಸ್ಥೆಗಳ ಮಾಲೀಕರಿಗೂ ಸರಕಾರಿ ಗುತ್ತಿಗೆಯ ಆಮಿಷ ಒಡ್ಡಿ ಸುಮಾರು 2.5 ಕೋಟಿ ರೂಪಾಯಿ ವಂಚಿಸಿರುವುದು ತಿಳಿದುಬಂದಿದೆ.
18 ಸಿಮ್ ಕಾರ್ಡ್ಗಳ ವಶ:
ವಿಜಿಲೆನ್ಸ್ ತಂಡವು ತನಿಖೆಯ ಭಾಗವಾಗಿ ಆರೋಪಿಯಿಂದ 18 ಸಿಮ್ ಕಾರ್ಡ್ಗಳನ್ನು ವಶಪಡಿಸಿಕೊಂಡಿದೆ. ಇವುಗಳಲ್ಲಿ ಕೇವಲ ಒಂದು ಸಿಮ್ ಕಾರ್ಡ್ ಮಾತ್ರ ಆತನ ಹೆಸರಿನಲ್ಲಿ ನೋಂದಾಯಿತವಾಗಿತ್ತು. ತನ್ನ ಅಧಿಕಾರವನ್ನು ದುರುಪಯೋಗಪಡಿಸಿಕೊಳ್ಳಲು ಮತ್ತು ಪೊಲೀಸರ ಕಣ್ಣಿಗೆ ಬೀಳದಂತೆ ತಪ್ಪಿಸಿಕೊಳ್ಳಲು ಈತ ಬೇರೆಯವರ ಹೆಸರಿನಲ್ಲಿದ್ದ ಸಿಮ್ ಕಾರ್ಡ್ಗಳನ್ನು ಬಳಸುತ್ತಿದ್ದ. ಮುಖ್ಯಮಂತ್ರಿಯವರ ಹೆಸರನ್ನೇ ಬಳಸಿ ವಂಚಿಸಿರುವುದು ಅತ್ಯಂತ ಗಂಭೀರ ಅಪರಾಧವಾಗಿದೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.
ಕೋಟಿ ಕೋಟಿ ಅಕ್ರಮ – ವಿಸ್ತರಿಸಿದ ತನಿಖೆ:
ಆರೋಪಿ ದೇಬೇಶ್ವರ್ ಬೋರಾನನ್ನು ಧೇಮಾಜಿಯಲ್ಲಿ ಬಂಧಿಸಿ, ಕೋರ್ಟ್ಗೆ ಹಾಜರುಪಡಿಸಿದ ನಂತರ ನಾಲ್ಕು ದಿನಗಳ ಕಾಲ ಪೊಲೀಸ್ ವಶಕ್ಕೆ ಪಡೆಯಲಾಗಿದೆ. ಆತನ ಧೇಮಾಜಿ ಮತ್ತು ಗುವಾಹಾಟಿ ಮನೆಗಳು ಹಾಗೂ ಕಚೇರಿಯ ಮೇಲೆ ಏಕಕಾಲದಲ್ಲಿ ದಾಳಿ ನಡೆಸಲಾಗಿದ್ದು, ಹಲವು ಪ್ರಮುಖ ದಾಖಲೆಗಳನ್ನು ಜಪ್ತಿ ಮಾಡಲಾಗಿದೆ.
ಆರ್ಥಿಕ ವಹಿವಾಟುಗಳ ನೈಜತೆಯನ್ನು ಪರಿಶೀಲಿಸಲು ಚಾರ್ಟರ್ಡ್ ಅಕೌಂಟೆಂಟ್ಗಳ ನೆರವು ಪಡೆಯಲಾಗುತ್ತಿದ್ದು, ವಂಚನೆಯ ಮೊತ್ತ ಕೋಟಿ ಕೋಟಿ ದಾಟಿದೆ ಎಂದು ಅಂದಾಜಿಸಲಾಗಿದೆ. ಈ ವಂಚನೆ ಜಾಲವು ಅಸ್ಸಾಂ ಮಾತ್ರವಲ್ಲದೆ ಇತರ ರಾಜ್ಯಗಳಿಗೂ ಹರಡಿರುವ ಶಂಕೆ ವ್ಯಕ್ತವಾಗಿದ್ದು, ಹೊರರಾಜ್ಯಗಳಿಂದಲೂ ದೂರುಗಳು ಬರುತ್ತಿವೆ. ಸದ್ಯ ಪೊಲೀಸರು ಹಣದ ವ್ಯವಹಾರ, ನಕಲಿ ಸಿಮ್ ಕಾರ್ಡ್ಗಳು ಮತ್ತು ಈ ಮಿಮಿಕ್ರಿ ಜಾಲದ ಹಿಂದೆ ಇರುವ ಇತರ ಸಹಚರರ ಪತ್ತೆಗೆ ಜಾಲ ಬೀಸಿದ್ದಾರೆ.
