ನಟ ಶಿವರಾಜ್ಕುಮಾರ್ ಅವರಿಗೆ ಎಸ್ಐಆರ್ ನೋಟಿಸ್ ನೀಡಲಾದ ಪ್ರಕರಣ ಹಾಗೂ ಅದಕ್ಕೆ ಅಧಿಕಾರಿಗಳು ಸ್ಪಂದಿಸಿದ ರೀತಿಗೆ ಸಂಬಂಧಿಸಿದಂತೆ ಇನಾಯತ್ ಅಲಿ ಅವರು ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದು, ಆಡಳಿತ ವ್ಯವಸ್ಥೆಯ ಇಬ್ಬಗೆಯ ನೀತಿಯನ್ನು ನೇರವಾಗಿ ಪ್ರಶ್ನಿಸಿದ್ದಾರೆ.
ಬೆಂಗಳೂರಿನ ಬ್ಯಾಟರಾಯನಪುರ ವಿಧಾನಸಭಾ ಕ್ಷೇತ್ರದಲ್ಲಿ 2002ರ ಮತದಾರರ ಪಟ್ಟಿಯ ದಾಖಲೆಗಳಿಗೆ ಗಣತಿ ನಮೂನೆಯು ಮ್ಯಾಪಿಂಗ್ ಆಗದ ಕಾರಣ ಹಿರಿಯ ನಟ ಶಿವರಾಜ್ಕುಮಾರ್ ಅವರಿಗೆ ಎಸ್ಐಆರ್ ನೋಟಿಸ್ ನೀಡಲಾಗಿತ್ತು. ಈ ವಿಚಾರ ಬೆಳಕಿಗೆ ಬರುತ್ತಿದ್ದಂತೆಯೇ ಜಿಲ್ಲಾಧಿಕಾರಿಗಳ ಕಚೇರಿಯ ಅಧಿಕಾರಿಗಳು ಖುದ್ದು ಅವರ ಮನೆಗೇ ಭೇಟಿ ನೀಡಿ, ಅವರ ಪಾಸ್ಪೋರ್ಟ್ ಪರಿಶೀಲಿಸಿ, ಮತದಾರರ ಪಟ್ಟಿಯಲ್ಲಿ ಅವರ ಹೆಸರು ಸರಿಪಡಿಸುವ ಪ್ರಕ್ರಿಯೆಯನ್ನು ಕೈಗೆತ್ತಿಕೊಂಡಿದ್ದಾರೆ.
ಈ ಸಮಸ್ಯೆ ಸುಖಾಂತ್ಯ ಕಂಡಿರುವುದು ಸಂತಸದ ವಿಷಯ. ಈ ಪ್ರಕ್ರಿಯೆಯಿಂದ ಬಾಧಿತರಾದ ಪ್ರತಿಯೊಬ್ಬ ನಾಗರಿಕನಿಗೂ ವ್ಯವಸ್ಥೆ ಇದೇ ರೀತಿಯಲ್ಲಿಯೇ ಕಾರ್ಯನಿರ್ವಹಿಸಬೇಕು. ಆಡಳಿತ ವ್ಯವಸ್ಥೆಯ ಅಧಿಕಾರಿಯೊಬ್ಬರು ಖುದ್ದಾಗಿ ಸ್ಥಳಕ್ಕೆ ಧಾವಿಸಿ, ಜನರ ಅಹವಾಲು ಆಲಿಸಿ, ದಾಖಲೆಗಳನ್ನು ಪರಿಶೀಲಿಸಿ, ಗೌರವಯುತವಾಗಿ ಸಮಸ್ಯೆಯನ್ನು ಇತ್ಯರ್ಥಪಡಿಸುವುದು ನಿಜಕ್ಕೂ ಶ್ಲಾಘನೀಯ.
ಆದರೆ ಈ ಬೆಳವಣಿಗೆಯು ಅತ್ಯಂತ ಸರಳ ಮತ್ತು ನೇರವಾದ ಪ್ರಶ್ನೆಯೊಂದನ್ನು ಹುಟ್ಟುಹಾಕಿದೆ. ಪ್ರಸ್ತುತ ಕರ್ನಾಟಕದಲ್ಲಿ ಯಾವುದೇ ಮ್ಯಾಪಿಂಗ್ ಇಲ್ಲ ಎಂಬ ಇದೇ ಮಾದರಿಯ ನೋಟಿಸ್ ಹಿಡಿದುಕೊಂಡು ಎಷ್ಟು ಜನಸಾಮಾನ್ಯರು ಕಂಗಾಲಾಗಿ ಕುಳಿತಿದ್ದಾರೆ? ಅವರ ಮನೆ ಬಾಗಿಲಿಗೆ ಯಾವ ಅಧಿಕಾರಿಯೂ ಭೇಟಿ ನೀಡುತ್ತಿಲ್ಲ, ಯಾರೊಬ್ಬರೂ ಖುದ್ದು ದಾಖಲೆ ಪರಿಶೀಲಿಸುತ್ತಿಲ್ಲ ಮತ್ತು ಮುಂದೇನು ಮಾಡಬೇಕೆಂಬ ಕನಿಷ್ಠ ಸ್ಪಷ್ಟತೆಯೂ ಅವರಿಗಿಲ್ಲ.
ವಿಚಾರಣೆಗಾಗಿ ದೂರದ ಕಚೇರಿಗಳಿಗೆ ಪ್ರಯಾಣಿಸಲು ಶಕ್ತಿ ಇಲ್ಲದ ವೃದ್ಧ ಪೋಷಕರು, ಕಚೇರಿಯ ಸರತಿ ಸಾಲಿನಲ್ಲಿ ನಿಂತರೆ ಒಂದು ದಿನದ ಆದಾಯವನ್ನೇ ಕಳೆದುಕೊಳ್ಳುವ ಬಡ ದಿನಗೂಲಿ ಕಾರ್ಮಿಕರು ಹಾಗೂ ಸಿಇಒ ವೆಬ್ಸೈಟ್ ಪರಿಶೀಲಿಸಲು ಸ್ಮಾರ್ಟ್ಫೋನ್ ಸೌಲಭ್ಯವೇ ಇಲ್ಲದ ಅಸಹಾಯಕರು ಇಂದು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ಆಡಳಿತ ವ್ಯವಸ್ಥೆಯು ಇಂತಹ ಒಂದು ಪ್ರಕರಣವನ್ನು ಇಷ್ಟೊಂದು ಕ್ಷಿಪ್ರವಾಗಿ ಮತ್ತು ಖುದ್ದಾಗಿ ಇತ್ಯರ್ಥಪಡಿಸಲು ಸಾಧ್ಯವೆಂಬುದನ್ನು ಸಾಬೀತುಪಡಿಸಿದೆ. ಆದರೆ ಇದೇ ರೀತಿಯ ಕಾಳಜಿ ಮತ್ತು ತುರ್ತು ಸ್ಪಂದನೆ ಅದೇ ನೋಟಿಸ್ ಹಿಡಿದಿರುವ ಪ್ರತಿಯೊಬ್ಬ ಸಾಮಾನ್ಯ ನಾಗರಿಕನಿಗೂ ತಲುಪಲಿದೆಯೇ? ಅಥವಾ ಅಧಿಕಾರಿಗಳು ಖುದ್ದು ಮನೆಗೆ ತೆರಳಲು ಆ ವ್ಯಕ್ತಿ ಸಮಾಜದಲ್ಲಿ ಪ್ರಸಿದ್ಧ ಮುಖವೇ ಆಗಿರಬೇಕೇ ಎಂಬುದು ಇಂದಿನ ಅಸಲಿ ಪ್ರಶ್ನೆಯಾಗಿದೆ.
ಕೇವಲ ಪ್ರಸಿದ್ಧರಲ್ಲದ ಕಾರಣಕ್ಕಾಗಿ ಅಥವಾ ಜನಪ್ರಿಯ ಮುಖ ಹೊಂದಿಲ್ಲದ ಕಾರಣಕ್ಕೆ ಸಾಮಾನ್ಯ ನಾಗರಿಕರು ಯಾವುದೇ ರೀತಿಯಲ್ಲೂ ಈ ಗೌರವ ಮತ್ತು ಹಕ್ಕಿನಿಂದ ವಂಚಿತರಾಗಲು ಸಾಧ್ಯವಿಲ್ಲ ಎಂದು ಇನಾಯತ್ ಅಲಿ ಅಭಿಪ್ರಾಯಪಟ್ಟಿದ್ದಾರೆ.
