ಭಾರತದಲ್ಲಿ ‘ಕಾಕ್ರೋಚ್ ಜನತಾ ಪಾರ್ಟಿ’ ಎಕ್ಸ್ ಖಾತೆ ನಿಷೇಧ: ನಮ್ಮ ಬೆಳವಣಿಗೆ ನೋಡಿ ಸರ್ಕಾರ ಹೆದರಿದೆ ಎಂದ ಸಂಸ್ಥಾಪಕ ಅಭಿಜೀತ್ ದೀಪ್ಕೆ

ಕಳೆದ ವಾರವಷ್ಟೇ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿದ್ದ ವ್ಯಂಗ್ಯ ಮತ್ತು ಡಿಜಿಟಲ್ ಪ್ರತಿಭಟನೆಯ ವೇದಿಕೆಯಾದ ‘ಕಾಕ್ರೋಚ್ ಜನತಾ ಪಾರ್ಟಿ’ಯ (CJP) ಅಧಿಕೃತ ಎಕ್ಸ್ (ಟ್ವಿಟರ್) ಖಾತೆಯನ್ನು ಭಾರತದಲ್ಲಿ ಗುರುವಾರದಂದು ನಿರ್ಬಂಧಿಸಲಾಗಿದೆ (Withheld). ಈ ಇಂಟರ್ನೆಟ್ ನಿಷೇಧದ ಬೆನ್ನಲ್ಲೇ, ಪಕ್ಷದ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಅವರು ‘ಕಾಕ್ರೋಚ್ ಈಸ್ ಬ್ಯಾಕ್’ (Cockroach is Back) ಎಂಬ ಹೆಸರಿನಲ್ಲಿ ಹೊಸ ಖಾತೆಯನ್ನು ತೆರೆದಿದ್ದಾರೆ.

ಖಾತೆ ಮುಚ್ಚಲ್ಪಟ್ಟ ವಿಷಯದ ಕುರಿತು ಪಿಟಿಐ (PTI) ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿರುವ ಅಭಿಜೀತ್ ದೀಪ್ಕೆ, “ನಿನ್ನೆಯಷ್ಟೇ ನಮ್ಮ ಖಾತೆಯನ್ನು ಹ್ಯಾಕ್ ಮಾಡಲು ಪ್ರಯತ್ನಗಳು ನಡೆದಿದ್ದರಿಂದ ಈ ರೀತಿಯ ಕ್ರಮವನ್ನು ನಾವು ಮೊದಲೇ ಊಹಿಸಿದ್ದೆವು. ಆದರೆ ಇದು ಸರ್ಕಾರದ ಸ್ವಯಂ-ಕೃತ ಅಪರಾಧವಾಗಿದೆ (ಸೆಲ್ಫ್ ಗೋಲ್). ನಮ್ಮ ತಂಡವು ಈ ಡಿಜಿಟಲ್ ಸೆನ್ಸಾರ್‌ಶಿಪ್ ವಿರುದ್ಧ ಕಾನೂನಾತ್ಮಕವಾಗಿ ಹೋರಾಡಲಿದೆ” ಎಂದು ತಿಳಿಸಿದ್ದಾರೆ. ಹೊಸದಾಗಿ ಆರಂಭಿಸಲಾದ ‘ಕಾಕ್ರೋಚ್ ಈಸ್ ಬ್ಯಾಕ್’ ಎಕ್ಸ್ ಖಾತೆಯು ಲೈವ್ ಆದ ಕೇವಲ ಒಂದು ಗಂಟೆಯಲ್ಲೇ ಬರೋಬ್ಬರಿ 16,800 ಕ್ಕೂ ಹೆಚ್ಚು ಫಾಲೋವರ್ಸ್‌ಗಳನ್ನು ಸಂಪಾದಿಸಿದೆ.

ಅಭಿಜೀತ್ ದೀಪ್ಕೆ ಅವರ ಪ್ರಕಾರ, ಭಾರತದಲ್ಲಿ ಬ್ಯಾನ್ ಆಗುವ ಮುನ್ನ ಈ ಜಿರಳೆ ಪಾರ್ಟಿಯ ಮೂಲ ಎಕ್ಸ್ ಖಾತೆಯು 2,01,000 ಕ್ಕೂ ಹೆಚ್ಚು ಫಾಲೋವರ್ಸ್‌ಗಳನ್ನು ಹೊಂದಿತ್ತು. ಇತ್ತೀಚೆಗೆ ಸುಪ್ರೀಂಕೋೋರ್ಟ್ ಪ್ರಧಾನ ನ್ಯಾಯಮೂರ್ತಿ (CJI) ಸೂರ್ಯಕಾಂತ್ ಅವರು ಪ್ರಕರಣವೊಂದರ ವಿಚಾರಣೆ ವೇಳೆ, “ಇತ್ತೀಚಿನ ದಿನಗಳಲ್ಲಿ ಉದ್ಯೋಗವಿಲ್ಲದ ಕೆಲವು ಯುವಕರು ಜಿರಳೆಗಳಂತೆ, ಪರಾವಲಂಬಿಗಳಂತೆ ತಯಾರಾಗುತ್ತಿದ್ದಾರೆ. ಇವರು ಆರ್‌ಟಿಐ ಮತ್ತು ಸಾಮಾಜಿಕ ಜಾಲತಾಣಗಳ ಹೆಸರಿನಲ್ಲಿ ಇಡೀ ವ್ಯವಸ್ಥೆಯ ಮೇಲೆ ದಾಳಿ ಮಾಡುತ್ತಿದ್ದಾರೆ” ಎಂದು ಹೇಳಿದ್ದರು. ಈ ವಿವಾದಾತ್ಮಕ ಹೇಳಿಕೆಯ ಬೆನ್ನಲ್ಲೇ ಮೇ 16 ರಂದು ಈ ಆನ್‌ಲೈನ್ ವ್ಯಂಗ್ಯ ಪಕ್ಷವನ್ನು ಸ್ಥಾಪಿಸಲಾಗಿತ್ತು. ತದನಂತರ ಸಿಜೆಐ ಅವರು ತಮಗೆ ಯಾವುದೇ ಉದ್ಯೋಗಿಗಳನ್ನು ನಿಂದಿಸುವ ಉದ್ದೇಶವಿರಲಿಲ್ಲ ಮತ್ತು ನಕಲಿ ಪದವಿಗಳ ಮೂಲಕ ವಕೀಲ ವೃತ್ತಿಗೆ ಬರುವವರನ್ನು ಮಾತ್ರ ತಾವು ಹಾಗೆ ಕರೆದಿದ್ದಾಗಿ ಸ್ಪಷ್ಟನೆ ನೀಡಿದ್ದರು.

ಎಕ್ಸ್‌ನಲ್ಲಿ ಖಾತೆ ನಿಷೇಧಕ್ಕೊಳಗಾಗಿದ್ದರೂ, ಮೆಟಾ ಮಾಲೀಕತ್ವದ ಇನ್‌ಸ್ಟಾಗ್ರಾಮ್‌ನಲ್ಲಿ (Instagram) ಈ ಪಕ್ಷದ ಖಾತೆಯು ಅತ್ಯಂತ ಸಕ್ರಿಯವಾಗಿದ್ದು, ಬರೋಬ್ಬರಿ 14.3 ಮಿಲಿಯನ್ (1.43 ಕೋಟಿ) ಫಾಲೋವರ್ಸ್‌ಗಳನ್ನು ಹೊಂದುವ ಮೂಲಕ ಮುನ್ನುಗ್ಗುತ್ತಿದೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಜಿರಳೆ ಪಕ್ಷದ ಫಾಲೋವರ್ಸ್‌ಗಳ ಸಂಖ್ಯೆಯು ದೇಶದ ಆಡಳಿತಾರೂಢ ಭಾರತೀಯ ಜನತಾ ಪಾರ್ಟಿಯ (BJP – 8.8 ಮಿಲಿಯನ್) ಅಧಿಕೃತ ಖಾತೆಗಿಂತಲೂ ದುಪ್ಪಟ್ಟಾಗಿದೆ ಎಂದು ನೆಟ್ಟಿಗರು ಹೋಲಿಕೆ ಮಾಡುತ್ತಿದ್ದಾರೆ.

ಕೇವಲ ಮೀಮ್‌ಗಳು (Memes), ಗ್ರಾಫಿಕ್ಸ್ ಮತ್ತು ಕಟು ವ್ಯಂಗ್ಯದ ಮೂಲಕ ಯುವಜನತೆಯ ನಿರುದ್ಯೋಗ, ಪೇಪರ್ ಲೀಕ್ ಹಗರಣಗಳು ಮತ್ತು ಶಿಕ್ಷಣ ವ್ಯವಸ್ಥೆಯ ಲೋಪದೋಷಗಳನ್ನು ಪ್ರಶ್ನಿಸುತ್ತಿದ್ದ ಒಂದು ಸಣ್ಣ ಪ್ಲಾಟ್‌ಫಾರ್ಮ್ ಅನ್ನು ನೋಡಿ ಸರ್ಕಾರ ಹೆದರಿದೆ ಎಂದು ಆಮ್ ಆದ್ಮಿ ಪಕ್ಷದ (AAP) ಮಾಜಿ ಸದಸ್ಯರಾದ ಅಭಿಜೀತ್ ಆರೋಪಿಸಿದ್ದಾರೆ. ಪ್ರಸ್ತುತ ಇನ್‌ಸ್ಟಾಗ್ರಾಮ್ ಖಾತೆಯನ್ನು ಕೂಡ ಹ್ಯಾಕ್ ಮಾಡಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಅವರು ಎಚ್ಚರಿಸಿದ್ದಾರೆ.

ಈ ನಡುವೆ ಮೂಲ ಖಾತೆಯನ್ನು ನಿಷೇಧಿಸಿದರೂ ಇಂಟರ್ನೆಟ್‌ನಲ್ಲಿ ಜಿರಳೆಗಳ ಹಾವಳಿ ನಿಂತಿಲ್ಲ. ಎಕ್ಸ್ ವೇದಿಕೆಯಲ್ಲಿ ಸದ್ಯ ‘ದಿ ಕಾಕ್ರೋಚ್ ಯೂತ್’, ‘ಕಾಕ್ರೋಚ್ ನ್ಯೂಸ್’, ‘ಕಾಕ್ರೋಚ್ ಪಾರ್ಟಿ ಆಫ್ ಇಂಡಿಯಾ (ಜೆನ್-ಝೆಡ್)’ ಸೇರಿದಂತೆ ನೂರಾರು ಪರ್ಯಾಯ ಖಾತೆಗಳು ಸಕ್ರಿಯವಾಗಿವೆ. ಕೇವಲ ಹಾಸ್ಯಕ್ಕಾಗಿ ಆರಂಭವಾದ ಈ ಆನ್‌ಲೈನ್ ಡಿಜಿಟಲ್ ಸತ್ಯಾಗ್ರಹವು ಇಂದು ದೇಶದಲ್ಲಿ ಯುವಜನತೆಯ ಪ್ರತಿಭಟನೆಯ ಹೊಸ ರೂಪವಾಗಿ ಮತ್ತು ಡಿಜಿಟಲ್ ಭಿನ್ನಮತದ ಅತಿ ದೊಡ್ಡ ಧ್ವನಿಯಾಗಿ ಮಾರ್ಪಟ್ಟಿದೆ. ಪ್ರಶಾಂತ್ ಭೂಷಣ್, ಅಂಜಲಿ ಭಾರದ್ವಾಜ್, ಮಹುವಾ ಮೊಯಿತ್ರಾ ಮತ್ತು ಕೀರ್ತಿ ಆಜಾದ್ ಅವರಂತಹ ಪ್ರಮುಖ ನಾಯಕರು ಮತ್ತು ಸಾಮಾಜಿಕ ಕಾರ್ಯಕರ್ತರು ಈ ಜಿರಳೆ ಚಳವಳಿಯನ್ನು ಮುಕ್ತವಾಗಿ ಬೆಂಬಲಿಸುತ್ತಿದ್ದಾರೆ.