ಜಾರ್ಖಂಡ್ ಇತಿಹಾಸದಲ್ಲೇ ಅತಿ ದೊಡ್ಡ ನಕ್ಸಲ್ ಶರಣಾಗತಿ: ಡಿಜಿಪಿ ತದಾಶಾ ಮಿಸ್ತ್ರಿ ಸಮ್ಮುಖದಲ್ಲಿ 27 ಮಾವೋವಾದಿಗಳು ಶರಣು

ಜಾರ್ಖಂಡ್ ರಾಜ್ಯದ ಭದ್ರತಾ ಇತಿಹಾಸದಲ್ಲೇ ಅತ್ಯಂತ ಪ್ರಮುಖ ಮೈಲಿಗಲ್ಲಾಗುವಂತಹ ಘಟನೆಯೊಂದರಲ್ಲಿ, ಇವತ್ತು ಬರೋಬ್ಬರಿ 27 ಮಂದಿ ಮಾವೋವಾದಿಗಳು (Maoists) ಪೊಲೀಸರ ಮುಂದೆ ಶರಣಾಗಿದ್ದಾರೆ. ಜಾರ್ಖಂಡ್ ರಾಜ್ಯ ಪೊಲೀಸ್ ಮಹಾನಿರ್ದೇಶಕರಾದ (ಡಿಜಿಪಿ) ತದಾಶಾ ಮಿಸ್ತ್ರಿ ಹಾಗೂ ಹಿರಿಯ ಪೊಲೀಸ್ ಅಧಿಕಾರಿಗಳ ಸಮ್ಮುಖದಲ್ಲಿ ಈ ನಕ್ಸಲರು ತಮ್ಮ ಆಧುನಿಕ ಶಸ್ತ್ರಾಸ್ತ್ರಗಳೊಂದಿಗೆ ಶರಣಾಗತಿಯಾಗಿದ್ದಾರೆ.

ರಾಜ್ಯದಲ್ಲಿ ಸಶಸ್ತ್ರ ಬಂಡಾಯವನ್ನು ಹತ್ತಿಕ್ಕಲು ಮತ್ತು ನಕ್ಸಲರನ್ನು ಸಮಾಜದ ಮುಖ್ಯವಾಹಿನಿಗೆ ತರಲು ಜಾರ್ಖಂಡ್ ಸರ್ಕಾರ ಜಾರಿಗೆ ತಂದಿರುವ ‘ಆಪರೇಷನ್ ನವಜೀವನ್’ (Operation Navajeevan) ಯೋಜನೆಯಿಂದ ಪ್ರಭಾವಿತರಾಗಿ ಈ ನಕ್ಸಲರು ಶರಣಾಗಿದ್ದಾರೆ ಎಂದು ಅಧಿಕಾರಿಗಳು ಬಹಿರಂಗಪಡಿಸಿದ್ದಾರೆ. ಇವತ್ತು ಶರಣಾದವರಲ್ಲಿ ಹೆಚ್ಚಿನವರು ದೇಶದ ವಿವಿಧ ರಾಜ್ಯಗಳ ಪೊಲೀಸರಿಗೆ ಬೇಕಾಗಿದ್ದ ‘ಮೋಸ್ಟ್ ವಾಂಟೆಡ್’ (Most Wanted) ಉಗ್ರಗಾಮಿಗಳಾಗಿದ್ದಾರೆ. ಇವರೆಲ್ಲರಿಗೂ ಸರ್ಕಾರದ ನಿಯಮಾವಳಿಗಳ ಪ್ರಕಾರ ಸೂಕ್ತ ಪುನರ್ವಸತಿ ಕಲ್ಪಿಸಲಾಗುವುದು ಎಂದು ಡಿಜಿಪಿ ತಿಳಿಸಿದ್ದಾರೆ.

ಪ್ರಸ್ತುತ 2026 ರ ಸಾಲಿನಲ್ಲಿ ಜಾರ್ಖಂಡ್ ಪೊಲೀಸರು ನಕ್ಸಲ್ ನಿಗ್ರಹ ಕಾರ್ಯಾಚರಣೆಯಲ್ಲಿ ಭಾರಿ ಯಶಸ್ಸು ಸಾಧಿಸಿದ್ದಾರೆ. ಈ ವರ್ಷದಲ್ಲಿ ಇದುವರೆಗೆ 22 ಮಂದಿ ಮಾವೋವಾದಿಗಳನ್ನು ಎನ್‌ಕೌಂಟರ್‌ನಲ್ಲಿ ಮಟ್ಟಹಾಕಲಾಗಿದ್ದು, 44 ಜನರನ್ನು ಬಂಧಿಸಲಾಗಿದೆ ಹಾಗೂ ಇವತ್ತಿನವರನ್ನು ಹೊರತುಪಡಿಸಿ ಈ ಮುನ್ನ 29 ಜನ ಶರಣಾಗಿದ್ದಾರೆ ಎಂದು ಇಲಾಖೆಯ ಅಂಕಿ-ಅಂಶಗಳು ತಿಳಿಸಿವೆ.

ಮಾವೋವಾದಿ ಸಂಘಟನೆಯ ಅತ್ಯಂತ ಹಿರಿಯ ಹಾಗೂ ಕೊನೆಯ ಸಕ್ರಿಯ ಪಾಲಿಟ್‌ಬ್ಯುರೊ ಸದಸ್ಯ ಮಿಶ್ರಾ ಬಸ್ತ್ರ ಅಲಿಯಾಸ್ ಸಾಗರ್ ಜಿ ಕೂಡ ಇವತ್ತು ಶರಣಾದವರ ಪಟ್ಟಿಯಲ್ಲಿದ್ದಾನೆ ಎಂದು ಆರಂಭದಲ್ಲಿ ಮಾಧ್ಯಮಗಳು ವರದಿ ಮಾಡಿದ್ದವು. ಆದರೆ, ಪೊಲೀಸರು ಬಿಡುಗಡೆ ಮಾಡಿರುವ ಅಧಿಕೃತ ಪ್ರಕಟಣೆಯಲ್ಲಿ ಆತನ ಹೆಸರು ಎಲ್ಲೂ ಉಲ್ಲೇಖವಾಗಿಲ್ಲ. ಆದಾಗ್ಯೂ, ಇವತ್ತು ಶರಣಾಗಿರುವ 27 ಜನರ ಗುಂಪಿನಲ್ಲಿ ಸಾಗರ್ ಜಿ ಅವರ ಅತ್ಯಂತ ಆಪ್ತ ವಲಯದ ಟಾಪ್ ಕಮಾಂಡರ್‌ಗಳು, ಸ್ಪೆಷಲ್ ಜೋನಲ್ ಕಮಿಟಿ ಸದಸ್ಯರು ಹಾಗೂ ಏರಿಯಾ ಕಮಿಟಿ ಸದಸ್ಯರು ಇದ್ದಾರೆ ಎಂದು ಜಾರ್ಖಂಡ್ ಪೊಲೀಸ್ ಮೂಲಗಳು ಖಚಿತಪಡಿಸಿವೆ.