ಮತದಾರರ ಪಟ್ಟಿಯಿಂದ ತಮ್ಮ ಹೆಸರುಗಳನ್ನು ಅಕ್ರಮವಾಗಿ ತೆಗೆದುಹಾಕದೆ, ಪಟ್ಟಿಯ ಪಾವಿತ್ರ್ಯತೆ ಮತ್ತು ನಿಷ್ಪಕ್ಷಪಾತತೆಯನ್ನು ಕಾಪಾಡಿಕೊಳ್ಳಬೇಕೆಂಬುದಷ್ಟೇ ದೇಶದ ಕೋಟ್ಯಂತರ ನಾಗರಿಕರ ಸರಳ ಬೇಡಿಕೆಯಾಗಿದೆ ಎಂದು ಹಿರಿಯ ನ್ಯಾಯವಾದಿ ಹಾಗೂ ರಾಜ್ಯಸಭಾ ಸಂಸದ ಕಪಿಲ್ ಸಿಬಲ್ ಪ್ರತಿಪಾದಿಸಿದ್ದಾರೆ.
ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಗ್ಯಾನೇಶ್ ಕುಮಾರ್ ಅವರ ರಾಜೀನಾಮೆಗೆ ಆಗ್ರಹಿಸಿ ಶನಿವಾರ ದೆಹಲಿಯ ಜಂತರ್ ಮಂತರ್‌ನಲ್ಲಿ ಕಾಕ್ರೋಚ್ ಜನತಾ ಪಾರ್ಟಿ (ಸಿಜೆಪಿ) ಕರೆ ನೀಡಿರುವ ಪ್ರತಿಭಟನೆಯನ್ನು ಹತ್ತಿಕ್ಕಲು ಕೇಂದ್ರ ಸರ್ಕಾರ ಅಸಾಧಾರಣ ಭದ್ರತಾ ನಿರ್ಬಂಧಗಳನ್ನು ವಿಧಿಸಿರುವುದನ್ನು ಅವರು ತೀವ್ರವಾಗಿ ಖಂಡಿಸಿದರು. ಸರ್ಕಾರ ಹಾಗೂ ಅದರ ತಪ್ಪು ನೀತಿಗಳ ವಿರುದ್ಧ ದೇಶದ ಪ್ರಜೆಗಳು ಧ್ವನಿ ಎತ್ತಿದರೆ ಮೋದಿ ಸರ್ಕಾರ ಎಷ್ಟು ಭಯಪಡುತ್ತದೆ ಎಂಬುದಕ್ಕೆ ದೆಹಲಿಯಲ್ಲಿ ಮಾಡಲಾಗಿರುವ ಈ ಭದ್ರತಾ ಕೋಟೆಯೇ ಸಾಕ್ಷಿ ಎಂದು ಅವರು ಲೇವಡಿ ಮಾಡಿದರು.
ಸರ್ಕಾರದ ಜನವಿರೋಧಿ ನೀತಿಗಳ ವಿರುದ್ಧ ಜಂತರ್ ಮಂತರ್‌ನಲ್ಲಿ ಶಾಂತಿಯುತವಾಗಿ ಪ್ರತಿಭಟನೆ ನಡೆಸಲು ಬಯಸುವ ನಾಗರಿಕರ ವಿರುದ್ಧ ಆಡಳಿತ ಯಂತ್ರವು ಇಷ್ಟೊಂದು ಕ್ರೂರವಾಗಿ ನಡೆದುಕೊಳ್ಳುತ್ತಿರುವ ರೀತಿ ಆತಂಕಕಾರಿಯಾಗಿದೆ ಎಂದು ಸಿಬಲ್ ಕಳವಳ ವ್ಯಕ್ತಪಡಿಸಿದರು. “ಪ್ರಜಾಪ್ರಭುತ್ವದಲ್ಲಿ ಜಂತರ್ ಮಂತರ್ ಇರುವುದೇ ಪ್ರತಿಭಟನೆಗಳನ್ನು ನಡೆಸಿ ತಮ್ಮ ಅಸಮಾಧಾನವನ್ನು ಹೊರಹಾಕಲು. ಅಂತಹ ಸಾರ್ವಜನಿಕ ಸ್ಥಳಕ್ಕೇ ಯಾರೂ ತಲುಪದಂತೆ ಇಡೀ ಪ್ರದೇಶವನ್ನು ದಿಗ್ಬಂಧನಗೊಳಿಸುವುದು ಎಂತಹ ಪ್ರಜಾಪ್ರಭುತ್ವ?” ಎಂದು ಅವರು ಪ್ರಶ್ನಿಸಿದ್ದಾರೆ.