ಸರ್ಕಾರ ಸಿದ್ಧಪಡಿಸಿದ ಭಾಷಣವನ್ನು ಓದುವುದು ರಾಜ್ಯಪಾಲರ ಸಂವಿಧಾನಬದ್ಧ ಕರ್ತವ್ಯ: ಬಸವರಾಜ ಹೊರಟ್ಟಿ

ಬೆಂಗಳೂರು: ರಾಜ್ಯ ವಿಧಾನಮಂಡಲವನ್ನು ಉದ್ದೇಶಿಸಿ ಮಾತನಾಡಲು ಸರ್ಕಾರ ಸಿದ್ಧಪಡಿಸಿದ ಭಾಷಣವನ್ನು ತಿದ್ದುಪಡಿ ಮಾಡುವ ಕೇರಳ ರಾಜ್ಯಪಾಲರ ನಿರ್ಧಾರದ ಕುರಿತಾದ ಚರ್ಚೆಯ ಬಗ್ಗೆ ಮಾತನಾಡಿದ ಕರ್ನಾಟಕ ವಿಧಾನ ಪರಿಷತ್ ಸಭಾಪತಿ ಬಸವರಾಜ ಹೊರಟ್ಟಿ ಅವರು, ರಾಜ್ಯ ಸರ್ಕಾರ ಲಿಖಿತವಾಗಿ ನೀಡಿದ ಭಾಷಣವನ್ನೇ ಓದಲು ರಾಜ್ಯಪಾಲರು ಸಂವಿಧಾನದ ನಿಯಮಗಳಿಗೆ ಬದ್ಧರಾಗಿರುತ್ತಾರೆ ಎಂದು ಬುಧವಾರ ಹೇಳಿದ್ದಾರೆ.

“ಕರ್ನಾಟಕದಲ್ಲಿ ಅಂತಹ ಪರಿಸ್ಥಿತಿ ಉದ್ಭವಿಸುತ್ತದೆ ಎಂದು ನನಗನ್ನಿಸುವುದಿಲ್ಲ. ರಾಜ್ಯ ಸರ್ಕಾರ ಸಿದ್ಧಪಡಿಸಿದ ಭಾಷಣವನ್ನು ಓದುವುದು ರಾಜ್ಯಪಾಲರ ಸಂವಿಧಾನಬದ್ಧ ಕರ್ತವ್ಯವಾಗಿದೆ. ರಾಜ್ಯಪಾಲರು ಯಾರೇ ಆಗಿರಲಿ, ಅವರು ಸಂವಿಧಾನವನ್ನು ಕಡೆಗಣಿಸುವಂತಿಲ್ಲ,” ಎಂದು ಹೊರಟ್ಟಿ ಹೇಳಿದರು.

ಸಂವಿಧಾನದ 176ನೇ ವಿಧಿಯ ನಿಬಂಧನೆಗಳನ್ನು ಉಲ್ಲೇಖಿಸಿದ ಹೊರಟ್ಟಿ, “ಕೆಲವು ಸಾಲುಗಳನ್ನು ಬಿಡುವುದಿರಲಿ, ರಾಜ್ಯ ಸರ್ಕಾರ ಸಿದ್ಧಪಡಿಸಿದ ಭಾಷಣಕ್ಕೆ ರಾಜ್ಯಪಾಲರು ಒಂದೇ ಒಂದು ಪದವನ್ನು ಸೇರಿಸುವಂತಿಲ್ಲ ಅಥವಾ ಅದರಿಂದ ಅಳಿಸುವಂತಿಲ್ಲ,” ಎಂದು ಹೇಳಿದರು.

‘ಅನುದಾನಿತ ಶಾಲೆಗಳು ಮುಚ್ಚದಂತೆ ಕ್ರಮ ಕೈಗೊಳ್ಳಿ’: ಬಸವರಾಜ ಹೊರಟ್ಟಿ

ಕರ್ನಾಟಕದ ರಾಜ್ಯಪಾಲ ಥಾವರ್‌ಚಂದ್ ಗೆಹ್ಲೋಟ್ ಅವರು ಇದುವರೆಗೂ ರಾಜ್ಯ ಸರ್ಕಾರದೊಂದಿಗೆ ಸಂಘರ್ಷದಿಂದ ದೂರವಿದ್ದರೂ, ರಾಜ್ಯ ವಿಧಾನಮಂಡಲವನ್ನು ಉದ್ದೇಶಿಸಿ ಮಾಡುವ ಭಾಷಣದಲ್ಲಿ ಕೇಂದ್ರವನ್ನು ಟೀಕಿಸುವಂತೆ ಕೇಳಿಕೊಂಡರೆ ಅವರಿಗೆ ಮುಜುಗರವಾಗಬಹುದು ಎಂದು ಹೊರಟ್ಟಿ ಅಭಿಪ್ರಾಯಪಟ್ಟರು.

ಬಾಕಿ ಉಳಿದಿರುವ ವಿಷಯಗಳ ಮಂಡನೆ

ಮುಂಬರುವ ರಾಜ್ಯ ವಿಧಾನಮಂಡಲದ ವಿಶೇಷ ಅಧಿವೇಶನದಲ್ಲಿ, ಚಳಿಗಾಲದ ಅಧಿವೇಶನದಲ್ಲಿ ಬಾಕಿ ಉಳಿದಿರುವ ವಿಷಯಗಳನ್ನು ಮಂಡಿಸಲು ಪ್ರಯತ್ನಿಸುವುದಾಗಿ ಹೊರಟ್ಟಿ ಹೇಳಿದರು.

“ನರೇಗಾ (MGNREGA) ಕುರಿತ ಚರ್ಚೆಗಳ ಜೊತೆಗೆ, ಪ್ರಶ್ನೋತ್ತರ ಕಲಾಪವೂ ಇರುತ್ತದೆ,” ಎಂದು ಸಭಾಪತಿಗಳು ತಿಳಿಸಿದರು.