ಮೆಟ್ರೋ ದರ ವಿವಾದ ತಾರಕಕ್ಕೆ ಬೆಲೆ ಹೆಚ್ಚಳಕ್ಕೆ – ಪ್ರಯಾಣಿಕರ ಆಕ್ರೋಶ

ಬೆಂಗಳೂರು : ನಮ್ಮ ಮೆಟ್ರೋ(Namma Metro) ಪ್ರಯಾಣಿಕರಿಂದ ಈಗಾಗಲೇ ಗರಿಷ್ಠ ₹90 ಪ್ರಯಾಣ ದರ ವಸೂಲಿ ಮಾಡುತ್ತಿರುವ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತವು (BMRCL), ತನ್ನದೇ ಸ್ವಂತ ದಾಖಲೆಗಳಲ್ಲಿ 2031ರ ವೇಳೆಗೆ ಗರಿಷ್ಠ ದರ ₹75 ಇರಲಿದೆ ಎಂದು ಉಲ್ಲೇಖಿಸಿರುವುದು ಹೊಸ ವಿವಾದಕ್ಕೆ ಕಾರಣವಾಗಿದೆ. BMRCLನ ಈ ವೈರುಧ್ಯದ ಲೆಕ್ಕಾಚಾರಕ್ಕೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದು, ತಕ್ಷಣವೇ ಟಿಕೆಟ್ ದರವನ್ನು ಪರಿಷ್ಕರಿಸುವಂತೆ ಪ್ರಯಾಣಿಕರು ಆಗ್ರಹಿಸಿದ್ದಾರೆ.

DPRನಲ್ಲಿ ಒಂದು ಲೆಕ್ಕ, ವಾಸ್ತವದಲ್ಲಿ ಮತ್ತೊಂದು!
ಜೂನ್ 2024ರಲ್ಲಿ ಸಿದ್ಧಗೊಂಡ ಮೆಟ್ರೋ ಹಂತ-3ಎ (ರೆಡ್ ಲೈನ್: ಹೆಬ್ಬಾಳ–ಸರ್ಜಾಪುರ) ಯೋಜನೆಯ ವಿವರವಾದ ಯೋಜನಾ ವರದಿ (DPR) ಹಾಗೂ 2026ರಲ್ಲಿ ಪರಿಷ್ಕರಿಸಲಾದ ವರದಿಯಲ್ಲಿ, ಪ್ರತಿ ಮೂರು ವರ್ಷಕ್ಕೊಮ್ಮೆ 12% ದರ ಹೆಚ್ಚಳವಾಗಲಿದೆ ಎಂದು ಅಂದಾಜಿಸಲಾಗಿತ್ತು. ಈ ಸೂತ್ರದ ಪ್ರಕಾರ 2031ರ ವೇಳೆಗೆ ಗರಿಷ್ಠ ಪ್ರಯಾಣ ದರ ₹75 ಆಗಬೇಕಿತ್ತು.

ಆದರೆ, ಪ್ರಯಾಣ ದರ ನಿಗದಿ ಸಮಿತಿ (FFC) ಶಿಫಾರಸಿನಂತೆ ವಾರ್ಷಿಕ 5% ದರ ಹೆಚ್ಚಳದ ನಿಯಮದಡಿ 2025ರ ಫೆಬ್ರವರಿಯಿಂದಲೇ ಬಿಎಂಆರ್‌ಸಿಎಲ್ ಗರಿಷ್ಠ ₹90 ದರವನ್ನು ಜಾರಿಗೆ ತಂದಿದೆ. ನಿಯಮಾವಳಿ ಮತ್ತು ಡಿಪಿಆರ್ ಲೆಕ್ಕಾಚಾರಗಳ ನಡುವಿನ ಈ ಬೃಹತ್ ವ್ಯತ್ಯಾಸದ ಬಗ್ಗೆ ಬಿಎಂಆರ್‌ಸಿಎಲ್ ಹಲವು ತಿಂಗಳುಗಳಿಂದ ಯಾವುದೇ ಸ್ಪಷ್ಟನೆ ನೀಡದಿರುವುದು ಸಾರ್ವಜನಿಕರ ಅಸಮಾಧಾನಕ್ಕೆ ಕಾರಣವಾಗಿದೆ.

ದರ ಏರಿಕೆ ಆರೋಪ
ಮೆಟ್ರೋ ದರ ನಿಗದಿಪಡಿಸುವ ಸೂತ್ರವನ್ನು ಬಿಎಂಆರ್‌ಸಿಎಲ್ ತಪ್ಪಾಗಿ ಅನ್ವಯಿಸಿದೆ ಎಂಬ ಆರೋಪಗಳು ಬಲವಾಗಿ ಕೇಳಿಬರುತ್ತಿವೆ. ಆರಂಭದಲ್ಲಿ 105% ನಷ್ಟು ದರ ಹೆಚ್ಚಳ ಮಾಡಿ, ನಂತರ ಅದನ್ನು 71% ಗೆ ಇಳಿಸಲಾಗಿತ್ತು. ಪರಿಣಾಮವಾಗಿ, ಬಿಎಂಆರ್‌ಸಿಎಲ್ ತನ್ನದೇ ಯೋಜನಾ ವರದಿಯಲ್ಲಿ ಅಂದಾಜಿಸಿದ್ದಕ್ಕಿಂತಲೂ ಹೆಚ್ಚಿನ ಮೊತ್ತವನ್ನು ಪ್ರಯಾಣಿಕರು ಪ್ರತಿದಿನ ಪಾವತಿಸುವಂತಾಗಿದೆ.

‘ಮುಂದಿನ ಏರಿಕೆಗೂ ಮುನ್ನ ಹಿಂದಿನ ಲೋಪ ಸರಿಪಡಿಸಿ’
ಈ ಕುರಿತು ಮಾತನಾಡಿರುವ ಬೆಂಗಳೂರು ಮೆಟ್ರೋ ಪ್ರಯಾಣಿಕರ ಸಂಘದ ಸಹ-ಸಂಯೋಜಕ ರಾಜೇಶ್ ಭಟ್, “ಮತ್ತೊಮ್ಮೆ ದರ ಹೆಚ್ಚಳ ಮಾಡುವ ಮುನ್ನ ಈಗಿನ ದರ ವ್ಯವಸ್ಥೆಯಲ್ಲಿರುವ ಲೋಪಗಳನ್ನು ಸರಿಪಡಿಸಬೇಕು. ಸೂತ್ರದ ತಪ್ಪು ಅನ್ವಯದ ಬಗ್ಗೆ ಸ್ಪಷ್ಟನೆ ನೀಡದೆ ಮುಂದಿನ ದರ ಏರಿಕೆ ಮಾಡಬಾರದು” ಎಂದು ಒತ್ತಾಯಿಸಿದ್ದಾರೆ. ಅಲ್ಲದೆ, ಬಿಎಂಆರ್‌ಸಿಎಲ್ ತನ್ನ ವೆಚ್ಚ, ಆದಾಯ ಮತ್ತು ಲಾಭದ ವಿವರಗಳನ್ನು ಒಳಗೊಂಡ ‘ಶ್ವೇತಪತ್ರ’ (White Paper) ಪ್ರಕಟಿಸಬೇಕು ಹಾಗೂ ದರ ನಿಗದಿ ಪ್ರಕ್ರಿಯೆಯಲ್ಲಿ ಪ್ರಯಾಣಿಕರಿಗೂ ಸೂಕ್ತ ಪ್ರತಿನಿಧಿತ್ವ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಸಾರ್ವಜನಿಕ ಸಾರಿಗೆ ಲಾಭಕ್ಕಲ್ಲ!
“ನಗರದ ಸಂಚಾರ ದಟ್ಟಣೆ ಹಾಗೂ ಮಾಲಿನ್ಯ ಕಡಿಮೆ ಮಾಡಲು ಸಾರ್ವಜನಿಕ ಸಾರಿಗೆಯನ್ನು ಕೈಗೆಟುಕುವ ದರದಲ್ಲಿ ನೀಡಬೇಕು. ಅದನ್ನು ಬಿಟ್ಟು ಲಾಭದ ದೃಷ್ಟಿಯಿಂದ ಮೆಟ್ರೋ ದರ ನಿಗದಿಪಡಿಸುತ್ತಿರುವುದು ದುರದೃಷ್ಟಕರ. ತಪ್ಪಾದ ಲೆಕ್ಕಾಚಾರಗಳಿಂದಾಗಿ ದೇಶದ ಇತರ ನಗರಗಳಿಗೆ ಹೋಲಿಸಿದರೆ ಬೆಂಗಳೂರು ಮೆಟ್ರೋ ದರ ಅತ್ಯಂತ ದುಬಾರಿಯಾಗಿದೆ” ಎಂದು ನಿಯಮಿತ ಮೆಟ್ರೋ ಪ್ರಯಾಣಿಕ ಕೊಚ್ಚು ಶಂಕರ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.