ಕನ್ನಡದ ಕವಿ ರಾಜೇಂದ್ರ ಪ್ರಸಾದ್ ಹಾಗೂ ಅದ್ನಾನ್ ಕಫೀಲ್ ದರ್ವೇಶ್ ಅವರಿಗೆ 2026ರ ಪ್ರತಿಷ್ಠಿತ ಕೇದಾರನಾಥ ಸಿಂಗ್ ಕವಿತಾ ಸಮ್ಮಾನ್

ಮಂಡ್ಯ/ವಾರಣಾಸಿ: ಸಮಕಾಲೀನ ಭಾರತೀಯ ಕಾವ್ಯ ಲೋಕದ ಖ್ಯಾತ ಕವಿ ದಿವಂಗತ ಕೇದಾರನಾಥ ಸಿಂಗ್ ಅವರ ಸ್ಮರಣಾರ್ಥ ‘ಸಾಖಿ’ ಪತ್ರಿಕೆ ನೀಡುವ ಪ್ರತಿಷ್ಠಿತ ‘ಕೇದಾರನಾಥ ಸಿಂಗ್ ಕವಿತಾ ಸಮ್ಮಾನ್’ (2026) ಪ್ರಶಸ್ತಿಯನ್ನು ಪ್ರಕಟಿಸಲಾಗಿದೆ. ಈ ಸಾಲಿನ ಪ್ರಶಸ್ತಿಗೆ ಕನ್ನಡದ ಪ್ರಖರ ಕವಿ ರಾಜೇಂದ್ರ ಪ್ರಸಾದ್ (ಭಾರತೀಯ ಭಾಷಾ ವಿಭಾಗ) ಹಾಗೂ ಹಿಂದಿಯ ಯುವ ಕವಿ ಅದ್ನಾನ್ ಕಫೀಲ್ ದರ್ವೇಶ್ (ಹಿಂದಿ ವಿಭಾಗ) ಆಯ್ಕೆಯಾಗಿದ್ದಾರೆ.

ನವದೆಹಲಿಯ ಇಂಡಿಯಾ ಇಂಟರ್‌ನ್ಯಾಷನಲ್ ಸೆಂಟರ್‌ನಲ್ಲಿ (IIC) ನಡೆದ ಆಯ್ಕೆ ಸಮಿತಿ ಸಭೆಯಲ್ಲಿ ಈ ಸರ್ವಾನುಮತದ ತೀರ್ಮಾನ ಕೈಗೊಳ್ಳಲಾಗಿದೆ ಎಂದು ಸಮಿತಿಯ ಸಂಚಾಲಕ ಪ್ರೊ. ಎ. ಅರವಿಂದಾಕ್ಷನ್ ಮತ್ತು ‘ಸಾಖಿ’ ಪತ್ರಿಕೆಯ ಸಂಪಾದಕ ಸದಾನಂದ ಶಾಹಿ ತಿಳಿಸಿದ್ದಾರೆ. ಈ ಆಯ್ಕೆ ಸಮಿತಿಯಲ್ಲಿ ಖ್ಯಾತ ಲೇಖಕ ಉದಯ ಪ್ರಕಾಶ್, ಹಿರಿಯ ಕವಯಿತ್ರಿ ಗಗನ್ ಗಿಲ್, ಖ್ಯಾತ ಕನ್ನಡ ನಾಟಕಕಾರ ಹಾಗೂ ಕವಿ ಪ್ರೊ. ಎಚ್.ಎಸ್. ಶಿವಪ್ರಕಾಶ್ ಮತ್ತು ಖ್ಯಾತ ತಮಿಳು ಲೇಖಕಿ ಸಲ್ಮಾ ಜ್ಯೂರಿ ಸದಸ್ಯರಾಗಿದ್ದರು.

ಕನ್ನಡ ಕವಿ ರಾಜೇಂದ್ರ ಪ್ರಸಾದ್ ಆಯ್ಕೆಗೆ ಮೆಚ್ಚುಗೆ

ವಾಣಿಜ್ಯ ವಿಭಾಗದಲ್ಲಿ ಶಿಕ್ಷಣ ಪಡೆದು, ಸಮಕಾಲೀನ ಕನ್ನಡ ಸಾಹಿತ್ಯದಲ್ಲಿ ವಿಶಿಷ್ಟ ಕಾವ್ಯ ಧ್ವನಿಯಾಗಿ ಮೂಡಿಬಂದಿರುವ ರಾಜೇಂದ್ರ ಪ್ರಸಾದ್ ಅವರ ಸಾಹಿತ್ಯಿಕ ಕೊಡುಗೆಯನ್ನು ತೀರ್ಪುಗಾರರ ಮಂಡಳಿ ಶ್ಲಾಘಿಸಿದೆ. ‘ಸಂಕಥನ’ ಪತ್ರಿಕೆಯ ಸಂಪಾದನೆ, ಪ್ರಕಾಶನದ ಜೊತೆಗೆ ಶಾಸ್ತ್ರೀಯ ಸಂಗೀತ, ಕಲೆ, ಕೃಷಿ ಮತ್ತು ಪ್ರಗತಿಪರ ಸಾಮಾಜಿಕ ಕಾಳಜಿಗಳಲ್ಲಿ ತೊಡಗಿಸಿಕೊಂಡಿರುವ ಇವರ ಕವಿತೆಗಳಲ್ಲಿ ಪ್ರೀತಿ, ಪ್ರತಿರೋಧ, ಸಾಮಾಜಿಕ ವಿಮರ್ಶೆ, ಪರಿಸರ ಮತ್ತು ಆಳವಾದ ಆಧ್ಯಾತ್ಮಿಕ ಪ್ರಜ್ಞೆ ಮೇಳೈಸಿದೆ. ಪ್ರಾಚೀನ-ಮಧ್ಯಕಾಲೀನ ಭಾಷಾ ಶಕ್ತಿಯನ್ನು ಆಧುನಿಕ ಕಾವ್ಯಕ್ಕೆ ಬೆಸೆದಿರುವ ಹಾಗೂ ಕರುಣಾಮಯಿ ಬುದ್ಧ ‘ಅವಲೋಕಿತೇಶ್ವರ’ನನ್ನು ಕುರಿತ ಅವರ ವಚನಗಳು ಇಂದಿನ ಜಗತ್ತಿಗೆ ಅತ್ಯಂತ ಅಗತ್ಯವಾದ ಮಾನವೀಯ ಸ್ಪರ್ಶವನ್ನು ನೀಡಿವೆ ಎಂದು ಸಮಿತಿ ಮೆಚ್ಚುಗೆ ವ್ಯಕ್ತಪಡಿಸಿದೆ.

ಹಿಂದಿ ಕವಿ ಅದ್ನಾನ್ ಕಫೀಲ್ ದರ್ವೇಶ್

ಹಿಂದಿ ಸಮಕಾಲೀನ 12 ಯುವ ಕವಿಗಳ ಕೃತಿಗಳನ್ನು ಪರಿಶೀಲಿಸಿದ ಬಳಿಕ ಅದ್ನಾನ್ ಕಫೀಲ್ ಅವರ ಕವಿತೆಗಳನ್ನು ಆಯ್ಕೆ ಮಾಡಲಾಯಿತು. ಇವರ ಕಾವ್ಯವು ಸಮಕಾಲೀನ ಭಾರತೀಯ ನಾಗರಿಕನ ಅಂತರಂಗದ ಬದುಕನ್ನು, ಸಹೋದರತೆ, ಬದಲಾಗುತ್ತಿರುವ ಸಮಾಜದ ಮೌನ ಮತ್ತು ಹೇಳಲಾಗದ ನೋವನ್ನು ಅತ್ಯಂತ ಮಾರ್ಮಿಕವಾಗಿ ತೆರೆದಿಡುತ್ತದೆ ಎಂದು ಜ್ಯೂರಿ ಅಭಿಪ್ರಾಯಪಟ್ಟಿದೆ.

ನವೆಂಬರ್ 19 ರಂದು ಪ್ರಶಸ್ತಿ ಪ್ರದಾನ

ಕವಿ ಕೇದಾರನಾಥ ಸಿಂಗ್ ಅವರ ಜನ್ಮದಿನವಾದ ನವೆಂಬರ್ 19 ರಂದು ನವದೆಹಲಿಯಲ್ಲಿ ನಡೆಯಲಿರುವ ಸಮಾರಂಭದಲ್ಲಿ ಈ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಗುವುದು. ಪ್ರಶಸ್ತಿಯು ತಲಾ ₹25,000 ನಗದು ಪುರಸ್ಕಾರ ಹಾಗೂ ಪ್ರಶಸ್ತಿ ಪತ್ರವನ್ನು ಒಳಗೊಂಡಿದೆ. ಇದೇ ಸಂದರ್ಭದಲ್ಲಿ ಕನ್ನಡ ಕವಿ ರಾಜೇಂದ್ರ ಪ್ರಸಾದ್ ಅವರ ಆಯ್ದ ಕವಿತೆಗಳ ಹಿಂದಿ ಅನುವಾದಿತ ಪುಸ್ತಕವನ್ನು ಬಿಡುಗಡೆ ಮಾಡಲು ಹಾಗೂ ಎರಡೂ ಭಾಷೆಗಳ ಕವಿಗೋಷ್ಠಿ ಆಯೋಜಿಸಲು ನಿರ್ಧರಿಸಲಾಗಿದೆ.