ಇಡಿ ತನಿಖೆಗೆ ಕೇಜ್ರಿವಾಲ್ ಗೈರು: ನಾವು ಇಂಡಿಯಾ ಮೈತ್ರಿ ತೊರೆಯುವುದಿಲ್ಲ ಎಂದ ಆಪ್‌

ದೆಹಲಿ: ಇಡಿ ತನಿಖೆ ಕುರಿತು ಆಮ್ ಆದ್ಮಿ ಪಕ್ಷದ ಮುಖ್ಯಸ್ಥ ಹಾಗೂ ಸಿಎಂ ಅರವಿಂದ್ ಕೇಜ್ರಿವಾಲ್ ಮತ್ತೊಮ್ಮೆ ಸುಮ್ಮನಾಗಿದ್ದಾರೆ. ದೆಹಲಿ ಮದ್ಯ ಹಗರಣಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ ಇಂದು ವಿಚಾರಣೆಗೆ ಹಾಜರಾಗುವಂತೆ ಇಡಿ ಅವರಿಗೆ ನೋಟಿಸ್ ಕಳುಹಿಸಿದ್ದರೂ, ಕೇಜ್ರಿವಾಲ್ ಸತತ ಏಳನೇ ಬಾರಿ ವಿಚಾರಣೆಯನ್ನು ತಪ್ಪಿಸಿಕೊಂಡಿದ್ದಾರೆ.

ವಿವರಗಳ ಪ್ರಕಾರ, ಮದ್ಯ ನೀತಿ ಪ್ರಕರಣದಲ್ಲಿ ಏಳನೇ ಬಾರಿಗೆ ಇಡಿ ನೀಡಿದ ಸಮನ್ಸನ್ನು ಕೇಜ್ರಿವಾಲ್ ನಿರ್ಲಕ್ಷಿಸಿದ್ದಾರೆ. ಕೇಜ್ರಿವಾಲ್ ಇಂದು ವಿಚಾರಣೆಗೆ ಹಾಜರಾಗಿರಲಿಲ್ಲ. ಇದಕ್ಕೆ ಪ್ರತಿಕ್ರಿಯಿಸಿದ ಆಮ್ ಆದ್ಮಿ ಪಕ್ಷ, ‘ಸದ್ಯ ಈ ವಿಷಯ ನ್ಯಾಯಾಲಯದ ವ್ಯಾಪ್ತಿಯಲ್ಲಿದ್ದು ಕಾನೂನು ಪ್ರಕ್ರಿಯೆಯನ್ನು ಗೌರವಿಸುವಂತೆ ಇಡಿಗೆ ಸಲಹೆ ನೀಡಿದೆ. ಕೇಜ್ರಿವಾಲ್‌ಗೆ ಪದೇ ಪದೇ ಸಮನ್ಸ್ ನೀಡುವ ಬದಲು ನ್ಯಾಯಾಲಯದ ತೀರ್ಪಿಗಾಗಿ ಕಾಯುವಂತೆ ಪಕ್ಷ ಆಗ್ರಹಿಸಿದೆ. ಮುಖ್ಯಮಂತ್ರಿಗೆ ಹಲವು ಬಾರಿ ಸಮನ್ಸ್ ಕಳುಹಿಸಿರುವುದು ಅನುಚಿತ. ಮುಂದಿನ ವಿಚಾರಣೆ ಮಾರ್ಚ್ 16ರಂದು ನಡೆಯಲಿದೆ. ಇಡಿ ಪದೇ ಪದೇ ಸಮನ್ಸ್ ಕಳುಹಿಸುವ ಬದಲು ತಾಳ್ಮೆಯಿಂದಿರಬೇಕು. ನ್ಯಾಯಾಲಯದ ತೀರ್ಪಿಗೆ ಕಾಯಬೇಕು. ಇಂಡಿಯಾ ಮೈತ್ರಿಯನ್ನು ತೊರೆಯುವ ಉದ್ದೇಶ ನಮಗಿಲ್ಲ. ಮೋದಿ ಸರಕಾರ ಈ ರೀತಿ ಒತ್ತಡ ಹೇರಬಾರದು ಎಂದು ಪಕ್ಷವು ಹೇಳಿದೆ.

ಈ ನಡುವೆ, ಇಡಿ ಇದುವರೆಗೆ ಏಳು ಬಾರಿ ಕೇಜ್ರಿವಾಲ್‌ ಅವರಿಗೆ ಸಮನ್ಸ್ ಕಳುಹಿಸಿದೆ. ಇಡಿ ಅಧಿಕಾರಿಗಳು ಇತ್ತೀಚೆಗೆ ಫೆಬ್ರವರಿ 22ರಂದು ಕೇಜ್ರಿವಾಲ್ ಅವರಿಗೆ ನೋಟಿಸ್ ಜಾರಿ ಮಾಡಿದ್ದು, ಈ ಹಿಂದೆ ನವೆಂಬರ್ 2, ಡಿಸೆಂಬರ್ 21 ಮತ್ತು ನಂತರ ಜನವರಿ 3ರಂದು ನೋಟಿಸ್ ನೀಡಿದ್ದರು. ಇದಾದ ಬಳಿಕ ಜನವರಿ 13ರಂದು ಕೂಡ ನಾಲ್ಕನೇ ಬಾರಿಗೆ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್ ಕಳುಹಿಸಿತ್ತು. ಆದರೆ, ಕೇಜ್ರಿವಾಲ್ ನಾಲ್ಕು ಬಾರಿ ಇಡಿ ನೋಟಿಸ್‌ಗಳನ್ನು ನಿರ್ಲಕ್ಷಿಸಿದ್ದಾರೆ. ಇದರೊಂದಿಗೆ ಇಡಿ ಜನವರಿ 31 ಮತ್ತು ಫೆಬ್ರವರಿ 14ರಂದು ನೋಟಿಸ್ ಕಳುಹಿಸಿದೆ. ಆದರೆ, ಆಗಲೂ ಅವರು ವಿಚಾರಣೆಗೆ ಹಾಜರಾಗಿರಲಿಲ್ಲ. ಇದಲ್ಲದೆ, ಇಡಿ ನೋಟೀಸ್‌ಗಳನ್ನು ಅಕ್ರಮ ಎಂದು ಅವರು ನಿರ್ಲಕ್ಷಿಸಿದ್ದಾರೆ.