ನಮ್ಮ ಕಷ್ಟಗಳು ಮುಗಿದಿಲ್ಲ, ಕಣ್ಣೀರು ಬತ್ತಿಲ್ಲ, ಗಾಯಗಳು ಮಾಸಿಲ್ಲ: ಮೋದಿಯವರೆದುರು ನರ್ತಿಸಲಾಗದು ಎಂದ ಕುಕಿ ಬುಡಕಟ್ಟು ಜನರು

ಇಂಫಾಲ್: ಜನಾಂಗೀಯ ಸಂಘರ್ಷಗಳಿಂದಾಗಿ ಕಳೆದ ಎರಡು ವರ್ಷಗಳಿಂದ ಹೊಗೆಯಾಡುತ್ತಿರುವ ಈಶಾನ್ಯ ರಾಜ್ಯವಾದ ಮಣಿಪುರಕ್ಕೆ ಪ್ರಧಾನಿ ಮೋದಿ ಅಂತಿಮವಾಗಿ ಈ ತಿಂಗಳ 13ರಂದು ಭೇಟಿ ನೀಡಲಿದ್ದಾರೆ. 2023ರ ಮೇ ತಿಂಗಳಲ್ಲಿ ಕುಕಿ ಮತ್ತು ಮೈತೀ ಸಮುದಾಯಗಳ ನಡುವೆ ತೀವ್ರ ಹಿಂಸಾಚಾರ ಭುಗಿಲೆದ್ದ ನಂತರ, ಮೋದಿ ಅವರು ಮೊದಲ ಬಾರಿಗೆ ರಾಜ್ಯಕ್ಕೆ ಭೇಟಿ ನೀಡುತ್ತಿದ್ದಾರೆ. ಈ ಸಂದರ್ಭದಲ್ಲಿ ಮೋದಿ ಅವರನ್ನು ಅದ್ಧೂರಿಯಾಗಿ ಸ್ವಾಗತಿಸಲು ಅನೇಕ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಏರ್ಪಡಿಸಲಾಗಿದೆ.

ಆದರೆ, ಈ ಕಾರ್ಯಕ್ರಮದಲ್ಲಿ ನೃತ್ಯ ಪ್ರದರ್ಶನ ನೀಡಲು ಕುಕಿ-ಜೋ ಸಮುದಾಯ ನಿರಾಕರಿಸಿದೆ. “ಕಣ್ಣೀರಿನಿಂದ ಈ ನೃತ್ಯ ಪ್ರದರ್ಶನವನ್ನು ಮಾಡಲು ಸಾಧ್ಯವಿಲ್ಲ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಪ್ರಧಾನಿ ಮೋದಿ ಈ ಸ್ವಾಗತ ಕಾರ್ಯಕ್ರಮದಲ್ಲಿ ಭಾಗವಹಿಸುವುದಕ್ಕಿಂತ, ಹಿಂಸಾಚಾರದಿಂದ ನಿರಾಶ್ರಿತರಾಗಿ ಪರಿಹಾರ ಶಿಬಿರಗಳಲ್ಲಿ ಆಶ್ರಯ ಪಡೆದಿರುವ ಸಂತ್ರಸ್ತರನ್ನು ಭೇಟಿ ಮಾಡಿದ್ದರೆ ಉತ್ತಮ ಎಂದು ಇಂಫಾಲ್ ಹ್ಮರ್ ಡಿಸ್ಪ್ಲೇಸ್ಡ್ ಕಮಿಟಿ ಹೇಳಿದೆ.

ಚುರಾಚಾಂದ್‌ಪುರ ಜಿಲ್ಲೆಯ ಗ್ಯಾಂಗ್‌ಟೆ ಸ್ಟೂಡೆಂಟ್ ಆರ್ಗನೈಸೇಶನ್ ಸದಸ್ಯರು, “ನಾವು ಪ್ರಧಾನಿ ಭೇಟಿಯನ್ನು ಸ್ವಾಗತಿಸುತ್ತೇವೆ, ಆದರೆ ನಮ್ಮ ಮನಸ್ಸಿನಲ್ಲಿ ದುಃಖ ಮತ್ತು ಕಣ್ಣೀರು ತುಂಬಿರುವಾಗ ಪ್ರಧಾನಿ ಮುಂದೆ ನೃತ್ಯ ಮಾಡಲು ಸಾಧ್ಯವಿಲ್ಲ” ಎಂದು ಹೇಳಿದರು. “ನಮ್ಮ ಕಷ್ಟಗಳು ಇನ್ನೂ ಮುಗಿದಿಲ್ಲ. ಕಣ್ಣೀರು ಇನ್ನೂ ಬತ್ತಿಲ್ಲ. ನಮ್ಮ ಗಾಯಗಳು ಇನ್ನೂ ಮಾಸಿಲ್ಲ. ಈ ಪರಿಸ್ಥಿತಿಯಲ್ಲಿ ನಿಮ್ಮೊಂದಿಗೆ ಸಂತೋಷದಿಂದ ನೃತ್ಯ ಮಾಡಲು ಸಾಧ್ಯವಿಲ್ಲ” ಎಂದು ಅವರು ಸ್ಪಷ್ಟಪಡಿಸಿದರು.

ಹಿಂದೆ, ಜನಾಂಗೀಯ ಹಿಂಸಾಚಾರಕ್ಕೆ ಬಲಿಯಾದ ಜನರು ತಮ್ಮ ನೋವನ್ನು ಗುಣಪಡಿಸಲು ಮತ್ತು ತಮ್ಮ ಸಂಕಟವನ್ನು ವ್ಯಕ್ತಪಡಿಸಲು ಪ್ರಧಾನಿ ಭೇಟಿಯು ಸಹಾಯ ಮಾಡುತ್ತದೆ ಎಂದು ಸಮುದಾಯದವರು ಹೇಳಿದ್ದರು. ಕುಕಿ ಹಿಂಪಿ ಮಣಿಪುರ ಸಂಘಟನೆಯ ಪ್ರತಿನಿಧಿಗಳು, ಪ್ರಧಾನಿಯನ್ನು ಖಂಡಿತವಾಗಿ ಸ್ವಾಗತಿಸಬೇಕು, ಆದರೆ ಅವರ ಭೇಟಿಯು ಸಮುದಾಯದ ಆಶಯಗಳಿಗೆ ನ್ಯಾಯ ಮತ್ತು ಮಾನ್ಯತೆ ನೀಡಬೇಕು ಎಂದು ಒತ್ತಾಯಿಸಿದರು. ಸಮಸ್ಯೆಗೆ ರಾಜಕೀಯ ಪರಿಹಾರವು ಸ್ಪಷ್ಟ ಮತ್ತು ಸ್ಥಿರವಾಗಿರಬೇಕು, ಕೇವಲ ತಾತ್ಕಾಲಿಕ ಸಮಾಧಾನದ ಕ್ರಮಗಳು ಸಮಸ್ಯೆಯನ್ನು ಪರಿಹರಿಸುವುದಿಲ್ಲ ಎಂದು ಅವರು ಹೇಳಿದರು.