ಸಾಂವಿಧಾನಿಕ ಹುದ್ದೆಯ ಮುಖ್ಯಸ್ಥರಾಗಿ 25 ವರ್ಷಗಳನ್ನು ಪೂರೈಸಿದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಆಡಳಿತ ಸಾಧನೆಯನ್ನು ಬಿಜೆಪಿ ನಾಯಕರು ಕೊಂಡಾಡಿದ್ದಾರೆ. ಸ್ವಾಮಿ ವಿವೇಕಾನಂದರ ದೂರದೃಷ್ಟಿಯನ್ನು ಸ್ಮರಿಸಿದ ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್, “ಶತಮಾನಕ್ಕೂ ಹಿಂದೆ ಒಬ್ಬ ನರೇಂದ್ರ (ಸ್ವಾಮಿ ವಿವೇಕಾನಂದರು) ಭಾರತವನ್ನು ‘ವಿಶ್ವಗುರು’ ಮಾಡುವ ಕನಸು ಕಂಡಿದ್ದರು; ಆ ನೂರು ವರ್ಷಗಳ ಹಳೆಯ ಕನಸನ್ನು ಇಂದು ಮತ್ತೊಬ್ಬ ನರೇಂದ್ರ (ಮೋದಿ) ನನಸು ಮಾಡುತ್ತಿದ್ದಾರೆ” ಎಂದು ಶ್ಲಾಘಿಸಿದ್ದಾರೆ.
2001 ರ ಅಕ್ಟೋಬರ್ 7 ರಂದು ಗುಜರಾತ್ ಮುಖ್ಯಮಂತ್ರಿಯಾಗಿ ಮೊದಲ ಬಾರಿಗೆ ಅಧಿಕಾರ ಸ್ವೀಕರಿಸಿದ್ದ ನರೇಂದ್ರ ಮೋದಿ, ಸತತ 12.5 ವರ್ಷಗಳ ಕಾಲ ಮುಖ್ಯಮಂತ್ರಿಯಾಗಿ ಹಾಗೂ ಕಳೆದ 12.5 ವರ್ಷಗಳಿಂದ ಸತತ ಮೂರು ಬಾರಿ ಗೆದ್ದು ಪ್ರಧಾನಮಂತ್ರಿಯಾಗಿ ಒಟ್ಟು 25 ವರ್ಷಗಳ ಆಡಳಿತ ಪೂರೈಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವೀಡಿಯೊಗಳನ್ನು ಹಂಚಿಕೊಂಡಿರುವ ಬಿಜೆಪಿ, “ವಿರೋಧ ಪಕ್ಷಗಳ ಪ್ರತಿಯೊಂದು ಟೀಕೆ ಮತ್ತು ದಾಳಿಗೂ ಮೋದಿ ತಮ್ಮ ಕಾರ್ಯಸಾಧನೆ, ಆತ್ಮನಿರ್ಭರ ಭಾರತದ ದೂರದೃಷ್ಟಿ ಮತ್ತು ಅಭಿವೃದ್ಧಿಯ ಮೂಲಕವೇ ಉತ್ತರ ನೀಡಿದ್ದಾರೆ. ಇದು ಎಂದಿಗೂ ಬಾಗದ, ನಿಲ್ಲದ ಉಕ್ಕಿನ ನಾಯಕತ್ವದ ಕಥೆ” ಎಂದು ಬಣ್ಣಿಸಿದೆ.
ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ನಬಿನ್ ಮಾತನಾಡಿ, “ಪ್ರಧಾನಿ ಮೋದಿಯವರ ಈ 25 ‘ಸುವರ್ಣ ವರ್ಷಗಳ’ ಪಯಣವು ಕೇವಲ ಒಂದು ಕಾಲಾವಧಿಯಲ್ಲ, ಬದಲಾಗಿ ರಾಷ್ಟ್ರ ನಿರ್ಮಾಣ, ಸಾರ್ವಜನಿಕ ಸೇವೆ ಮತ್ತು ಆಧುನಿಕ ಭಾರತದ ಉದಯದ ಐತಿಹಾಸಿಕ ಅಧ್ಯಾಯ” ಎಂದು ಶ್ಲಾಘಿಸಿದರು. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಪ್ರತಿಕ್ರಿಯಿಸಿ, “ಮೋದಿ ಅವರ ಸತತ ಸೇವೆ, ಹೋರಾಟ ಮತ್ತು ಸಮರ್ಪಣೆಯು ಬಡವರು, ಮಹಿಳೆಯರು ಹಾಗೂ ಯುವಜನರ ಕಲ್ಯಾಣಕ್ಕೆ ಸಮಾನಾರ್ಥಕವಾಗಿದೆ. ಫಲಿತಾಂಶ ಆಧಾರಿತ ರಾಜಕೀಯ ಮತ್ತು ಕಠಿಣ ನಿರ್ಧಾರಗಳ ಮೂಲಕ ಅವರು ಆಡಳಿತದ ವ್ಯಾಖ್ಯಾನವನ್ನೇ ಬದಲಿಸಿದ್ದಾರೆ” ಎಂದು ತಿಳಿಸಿದರು.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಹಾಗೂ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಕೂಡ ಪ್ರಧಾನಿಯವರ ನಾಯಕತ್ವವನ್ನು ಮುಕ್ತಕಂಠದಿಂದ ಹೊಗಳಿದ್ದಾರೆ. “ಹಲವು ಬಾರಿ ಸುಲಭದ ದಾರಿಗಳು ಎದುರಿದ್ದರೂ, ಕಷ್ಟಕರವಾಗಿದ್ದರೂ ಸರಿಯಾದ ಹಾದಿಯನ್ನೇ ನೀವು ಆರಿಸಿಕೊಂಡಿದ್ದೀರಿ. ಇಂತಹ ನಿಸ್ವಾರ್ಥ ಧೈರ್ಯ ಅತ್ಯಂತ ಅಪರೂಪದ್ದು” ಎಂದು ಗಡ್ಕರಿ ಬಣ್ಣಿಸಿದ್ದಾರೆ.