ಭಾರತದಲ್ಲಿ ಸಿಗರೇಟ್ ಸೇದದಿದ್ದರೂ ಇತರರು ಬಿಡುವ ಹೊಗೆಯನ್ನು ಸೇವಿಸುವುದರಿಂದ ಸಂಭವಿಸುವ ಸಾವುಗಳ ಸಂಖ್ಯೆ 1990ಕ್ಕೆ ಹೋಲಿಸಿದರೆ ಶೇಕಡಾ 50ರಷ್ಟು ಹೆಚ್ಚಾಗಿದೆ ಎಂದು ಜಾಗತಿಕ ಅಧ್ಯಯನವೊಂದು ಆಘಾತಕಾರಿ ಮಾಹಿತಿ ಹೊರಹಾಕಿದೆ. 2023ರ ವೇಳೆಗೆ ದೇಶದಲ್ಲಿ ಬರೋಬ್ಬರಿ 44.4 ಕೋಟಿ ಜನರು ಪರೋಕ್ಷ ಧೂಮಪಾನದ ದುಷ್ಪರಿಣಾಮಗಳಿಗೆ ತುತ್ತಾಗಿದ್ದಾರೆ ಎಂದು ಈ ವರದಿ ಬಹಿರಂಗಪಡಿಸಿದೆ.
ಆರೋಗ್ಯದ ದೃಷ್ಟಿಯಿಂದ ಇದು ವಿಶೇಷವಾಗಿ ಮಕ್ಕಳಿಗೆ ತೀವ್ರತರವಾದ ಅಪಾಯವನ್ನು ತಂದೊಡ್ಡುತ್ತಿದೆ. 1990ರಲ್ಲಿ ಪರೋಕ್ಷ ಧೂಮಪಾನದ ಹೊಗೆಗೆ ಒಡ್ಡಿಕೊಳ್ಳುತ್ತಿದ್ದವರ ಸಂಖ್ಯೆ 37.5 ಕೋಟಿಯಷ್ಟಿತ್ತು, ಆದರೆ 2023ರ ವೇಳೆಗೆ ಈ ಸಂಖ್ಯೆ 44.4 ಕೋಟಿಗೆ ತಲುಪಿದೆ ಎಂದು ಪ್ರತಿಷ್ಠಿತ ‘ಲ್ಯಾನ್ಸೆಟ್ ಪಬ್ಲಿಕ್ ಹೆಲ್ತ್’ ನಿಯತಕಾಲಿಕೆಯಲ್ಲಿ ಪ್ರಕಟವಾದ ವರದಿಯಲ್ಲಿ ತಿಳಿಸಲಾಗಿದೆ.
‘ಗ್ಲೋಬಲ್ ಬರ್ಡನ್ ಆಫ್ ಡಿಸೀಸ್ (GBD) 2023 ಸೆಕೆಂಡ್ಹ್ಯಾಂಡ್ ಸ್ಮೋಕ್ ಕೊಲಾಬರೇಷನ್’ ಅಡಿಯಲ್ಲಿ ಒಂದಾದ ಅಂತರರಾಷ್ಟ್ರೀಯ ಸಂಶೋಧಕರ ತಂಡವು ವಿಶ್ವದ 204 ದೇಶಗಳಲ್ಲಿ ಪರೋಕ್ಷ ಧೂಮಪಾನದ ಪ್ರಮಾಣ ಮತ್ತು ಅದರಿಂದ ಉಂಟಾಗುವ ರೋಗಗಳ ಹೊರೆಯನ್ನು ಸಮಗ್ರವಾಗಿ ವಿಶ್ಲೇಷಿಸಿದೆ. ಭಾರತದಲ್ಲಿ 1990ರಲ್ಲಿ ಪರೋಕ್ಷ ಧೂಮಪಾನದಿಂದಾಗಿ 2,17,700 ಸಾವುಗಳು ಸಂಭವಿಸಿದ್ದರೆ, 2023ರ ವೇಳೆಗೆ ಆ ಸಂಖ್ಯೆ 3,25,600ಕ್ಕೆ ಏರಿಕೆಯಾಗಿದೆ.
ಪರೋಕ್ಷ ಧೂಮಪಾನದ ಹೊಗೆಯನ್ನು ನಿರಂತರವಾಗಿ ಸೇವಿಸುವುದರಿಂದ ಹೃದಯ ಸಂಬಂಧಿ ಕಾಯಿಲೆಗಳು ಮತ್ತು ಶ್ವಾಸಕೋಶದ ಗಂಭೀರ ಸಮಸ್ಯೆಗಳು ಸೇರಿದಂತೆ ಹಲವು ಮಾರಣಾಂತಿಕ ಕಾಯಿಲೆಗಳ ಅಪಾಯ ಹೆಚ್ಚುತ್ತದೆ ಎಂದು ದೆಹಲಿಯ ಪ್ರಮುಖ ವೈದ್ಯೆ ಡಾ. ನೀತು ಜೈನ್ ಪಿಟಿಐ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
