2019 ರಲ್ಲಿ ಇಸ್ರೇಲಿ ಸ್ಪೈವೇರ್ ಪೆಗಾಸಸ್ ಬಳಸಿಕೊಂಡು ಹ್ಯಾಕಿಂಗ್ ಆದ 1,223 ಜನರ ವಾಟ್ಸಾಪ್‌ಗಳಲ್ಲಿ ಕನಿಷ್ಠ 100 ವಾಟ್ಸಾಪ್‌ಗಳು ಭಾರತದ್ದು ಎಂದು ಅಮೆರಿಕದ ನ್ಯಾಯಾಲಯದಲ್ಲಿ ಹೂಡಲಾಗಿರುವ ಹೊಸ ಕಾನೂನು ದಾವೆಯನ್ನು ಉಲ್ಲೇಖಿಸಿ ಮೀಡಿಯಾನಾಮಾ ಗುರುವಾರ ವರದಿ ಮಾಡಿದೆ.
ಏಪ್ರಿಲ್ 4 ರಂದು ಪ್ರಕಟವಾದ ಕಾನೂನು ದಾಖಲಾತಿಯು, ಪೆಗಾಸಸ್ ಸ್ಪೈವೇರನ್ನು ತಯಾರಿಸುವ ಇಸ್ರೇಲಿ NSO ಗ್ರೂಪ್ ಟೆಕ್ನಾಲಜೀಸ್ ವಿರುದ್ಧ WhatsApp ಸಲ್ಲಿಸಿದ ಮೊಕದ್ದಮೆಯಲ್ಲಿ ನ್ಯಾಯಾಲಯದ ಪ್ರಕ್ರಿಯೆಗಳ ಭಾಗವಾಗಿತ್ತು.
ಅಮೆರಿಕ ಮೂಲದ ತಂತ್ರಜ್ಞಾನ ಕಂಪನಿ ಮೆಟಾ ಒಡೆತನದ ವಾಟ್ಸಾಪ್, 2019 ರಿಂದ ಇಸ್ರೇಲಿ ಸೈಬರ್ ಗುಪ್ತಚರ ಕಂಪನಿಯೊಂದಿಗೆ ಕಾನೂನು ಹೋರಾಟ ನಡೆಸುತ್ತಿದೆ. ಏಪ್ರಿಲ್ 2019 ಮತ್ತು ಮೇ 2019 ರ ಎರಡು ವಾರಗಳ ಅವಧಿಯಲ್ಲಿ 1,400 ಬಳಕೆದಾರರ ವಿರುದ್ಧ NSO ಗ್ರೂಪ್‌ನ ಸ್ಪೈವೇರ್ ಅನ್ನು ಬಳಕೆಯಾಗಿದೆ ಎಂದು ಮೆಸೇಜಿಂಗ್ ಪ್ಲಾಟ್‌ಫಾರ್ಮ್ ವಾಟ್ಸಾಪ್ ಆರೋಪಿಸಿದೆ.
ಡಿಸೆಂಬರ್ 20 ರಂದು, ಅಮೆರಿಕದ ಜಿಲ್ಲಾ ನ್ಯಾಯಾಲಯವು 2019 ರಲ್ಲಿ 1,400 ವಾಟ್ಸಾಪ್ ಖಾತೆಗಳ ಅನಧಿಕೃತ ಕಣ್ಗಾವಲಿಗೆ ತನ್ನ ಸ್ಪೈವೇರ್ ಪೆಗಾಸಸ್ ಬಳಸಿದ NSO ಗ್ರೂಪ್ ಹೊಣೆಗಾರನಾಗಿದೆ ಎಂದು ತೀರ್ಪು ನೀಡಿತು.
NSO ಗ್ರೂಪ್ ವಾಟ್ಸಾಪ್‌ಗೆ ನೀಡಬೇಕಾದ ಹಾನಿಯನ್ನು ಪ್ರತ್ಯೇಕ ವಿಚಾರಣೆಯಲ್ಲಿ ನಿರ್ಧರಿಸಲಾಗುತ್ತದೆ ಎಂದು ವರದಿಯಾಗಿದೆ.
ವಿಚಾರಣೆಯ ಸಮಯದಲ್ಲಿ, ಎರಡು ವಾರಗಳ ಅವಧಿಯಲ್ಲಿ ಪೆಗಾಸಸ್ ಬಳಸಿ ಗುರಿಯಾಗಿಸಿಕೊಂಡ ವ್ಯಕ್ತಿಗಳ ಸಂಖ್ಯೆಯನ್ನು ವಾಟ್ಸಾಪ್ ದೇಶವಾರು ಪಟ್ಟಿ ಮಾಡಿತ್ತು. 51 ದೇಶಗಳ ಜನರ ವಾಟ್ಸಾಪಿಗೆ ಪೆಗಾಸಸ್ ಅನ್ನು ಬಿಡಲಾಗಿದೆ.
456 ಜನರ ವಾಟ್ಸಾಪುಗಳಲ್ಲಿ ಮೆಕ್ಸಿಕೋ ಅಗ್ರಸ್ಥಾನದಲ್ಲಿದೆ. ಇದರ ನಂತರ ಭಾರತ (100), ಬಹ್ರೇನ್ (82), ಮೊರಾಕೊ (69), ಪಾಕಿಸ್ತಾನ (58), ಇಂಡೋನೇಷ್ಯಾ (54) ಮತ್ತು ಇಸ್ರೇಲ್ (51) ಇವೆ.
ಪಟ್ಟಿಯ ಪ್ರಕಾರ, ಟರ್ಕಿಯಲ್ಲಿ ಇಪ್ಪತ್ತಾರು, ಸ್ಪೇನ್‌ನಲ್ಲಿ 21 ಮತ್ತು ಫ್ರಾನ್ಸ್‌ನಲ್ಲಿ ಏಳು ಜನರ ವಾಟ್ಸಾಪನ್ನು ಗುರಿಯಾಗಿಸಲಾಗಿದೆ. ಕೆನಡಾ ಮತ್ತು ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಇಬ್ಬರು ಸೇರಿದಂತೆ ಅಮೆರಿಕದಲ್ಲಿ ಕನಿಷ್ಠ ಒಬ್ಬನ ವಾಟ್ಸಾಪನ್ನು ಗುರಿಯಾಗಿಸಲಾಗಿದೆ.
2019 ರ ಈ ವಾಟ್ಸಾಪ್ ಹ್ಯಾಕಿಂಗ್ ನಲ್ಲಿ ಗುರಿಯಾದ ವ್ಯಕ್ತಿಗಳ ಗುರುತುಗಳು ಇನ್ನೂ ಸ್ಪಷ್ಟವಾಗಿಲ್ಲ.
ಇಸ್ರೇಲಿ ತಂತ್ರಜ್ಞಾನ ಸುದ್ದಿ ವೆಬ್‌ಸೈಟ್ CTech, NSO ಗ್ರೂಪ್ ಅನ್ನು ಉಲ್ಲೇಖಿಸಿ, ಈ ಪಟ್ಟಿಯು “is an interpretation of information taken out of context, alongside half-truths and one-sided claims by Meta — claims that have already been refuted and will continue to be refuted,” ಎಂದು ಹೇಳಿದೆ.
“ಉದಾಹರಣೆಗೆ, ಅಪರಾಧ ಅಥವಾ ಭಯೋತ್ಪಾದಕ ಚಟುವಟಿಕೆಯಲ್ಲಿ ಶಂಕಿತ ವ್ಯಕ್ತಿಯ ಫೋನ್ ಅನ್ನು ನಿರ್ದಿಷ್ಟ ಪ್ರದೇಶದಲ್ಲಿ ಗುರುತಿಸಲಾಗಿದೆ ಎಂಬ ಅಂಶವು ಗ್ರಾಹಕರ ಗುರುತನ್ನು ಸೂಚಿಸುವುದಿಲ್ಲ,” ಎಂದು ಸಂಸ್ಥೆ ಹೇಳಿದೆ.
ಎಲೆಕ್ಟ್ರಾನಿಕ್ ಸಾಧನಕ್ಕೆ ಸೇರಿಸಿದಾಗ, ಪೆಗಾಸಸ್ ಸಾಫ್ಟ್‌ವೇರ್ ಸಾಮಾನ್ಯವಾಗಿ ಬಳಕೆದಾರರ ಅರಿವಿಲ್ಲದೆ ಫೋನ್ ಕರೆಗಳು, ಇಮೇಲ್‌ಗಳು, ಸ್ಥಳ ಮಾಹಿತಿ, ಎನ್‌ಕ್ರಿಪ್ಟ್ ಮಾಡಿದ ಸಂದೇಶಗಳು ಮತ್ತು ಛಾಯಾಚಿತ್ರಗಳಿಗೆ ಪ್ರವೇಶವನ್ನು ಪಡೆಯಬಹುದು.
ಜುಲೈ 2021 ರಲ್ಲಿ, 17 ಮಾಧ್ಯಮ ಸಂಸ್ಥೆಗಳು ಮತ್ತು ಮಾನವ ಹಕ್ಕುಗಳ ಗುಂಪು ಅಮ್ನೆಸ್ಟಿ ಇಂಟರ್ನ್ಯಾಷನಲ್ ನಡೆಸಿದ ತನಿಖೆಯಲ್ಲಿ, ಭಾರತ ಸೇರಿದಂತೆ ಪ್ರಪಂಚದಾದ್ಯಂತ ಪತ್ರಕರ್ತರು, ಕಾರ್ಯಕರ್ತರು ಮತ್ತು ರಾಜಕಾರಣಿಗಳ ಅನಧಿಕೃತ ಕಣ್ಗಾವಲುಗಾಗಿ ಪೆಗಾಸಸ್ ಅನ್ನು ಬಳಸಲಾಗುತ್ತಿದೆ ಎಂದು ತೋರಿಸಿದೆ.
ಈ ಸ್ಪೈವೇರ್ ಅನ್ನು NSO ಗ್ರೂಪ್ ಪ್ರಪಂಚದಾದ್ಯಂತದ ಸರ್ಕಾರಗಳಿಗೆ ಪರವಾನಗಿ ನೀಡಿದೆ. ಸೈಬರ್ ಗುಪ್ತಚರ ಕಂಪನಿಯು ಪೆಗಾಸಸ್ ಸಾಫ್ಟ್‌ವೇರ್ ಅನ್ನು ಉತ್ತಮ ಮಾನವ ಹಕ್ಕುಗಳ ದಾಖಲೆಗಳನ್ನು ಹೊಂದಿರುವ “ಪರಿಶೀಲಿಸಲ್ಪಟ್ಟ ಸರ್ಕಾರಗಳಿಗೆ” ಮಾತ್ರ ಮಾರಾಟ ಮಾಡುತ್ತದೆ ಮತ್ತು ಇದು ಅಪರಾಧಿಗಳನ್ನು ಗುರಿಯಾಗಿಸುವ ಉದ್ದೇಶವನ್ನು ಹೊಂದಿದೆ ಎಂದು ಹೇಳುತ್ತದೆ.
ಭಾರತದಲ್ಲಿ, ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ , ಮಾಜಿ ಚುನಾವಣಾ ಆಯುಕ್ತ ಅಶೋಕ್ ಲವಾಸಾ, ಕೇಂದ್ರ ಸಚಿವರಾದ ಅಶ್ವಿನಿ ವೈಷ್ಣವ್ ಮತ್ತು ಪ್ರಹ್ಲಾದ್ ಸಿಂಗ್ ಪಟೇಲ್, ಕೈಗಾರಿಕೋದ್ಯಮಿ ಅನಿಲ್ ಅಂಬಾನಿ ಮತ್ತು ಮಾಜಿ ಕೇಂದ್ರ ತನಿಖಾ ದಳದ ನಿರ್ದೇಶಕ ಅಲೋಕ್ ವರ್ಮಾ ಅವರು ಸಂಭಾವ್ಯ ಗುರಿಯಾಗಿದ್ದಾರೆ ಎಂದು ದಿ ವೈರ್ ವರದಿ ಮಾಡಿದೆ.
ಭಾರತ ಸರ್ಕಾರ ಈ ಆರೋಪಗಳನ್ನು ನಿರಾಕರಿಸಿತ್ತು. ಕೇಂದ್ರ ಮಾಹಿತಿ ತಂತ್ರಜ್ಞಾನ ಸಚಿವ ವೈಷ್ಣವ್ ಅವರು ಜುಲೈ 2021 ರಲ್ಲಿ ಸಂಸತ್ತಿನಲ್ಲಿ ಭಾರತದಲ್ಲಿ ಅಕ್ರಮ ಕಣ್ಗಾವಲು ಸಾಧ್ಯವಿಲ್ಲ ಎಂದು ಹೇಳಿದರು.
ವರದಿಗಳ ನಂತರ, ಸುಪ್ರೀಂ ಕೋರ್ಟ್ ಆರೋಪಗಳನ್ನು ಪರಿಶೀಲಿಸಲು ತಜ್ಞರ ಸಮಿತಿಯನ್ನು ನೇಮಿಸಿತು. ಆಗಸ್ಟ್ 2022 ರಲ್ಲಿ, ಸಮಿತಿಯು ಪರಿಶೀಲಿಸಿದ 29 ಫೋನ್‌ಗಳಲ್ಲಿ ಐದು ಫೋನ್‌ಗಳಲ್ಲಿ ಕೆಲವು ಮಾಲ್‌ವೇರ್ ಕಂಡುಬಂದಿದೆ ಎಂದು ನ್ಯಾಯಾಲಯ ಹೇಳಿದೆ. ಆದಾಗ್ಯೂ, ಈ ಮಾಲ್‌ವೇರ್ ಪೆಗಾಸಸ್ ಆಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.
ಕೇಂದ್ರ ಸರ್ಕಾರವು ತನಿಖೆಗೆ ಸಹಕರಿಸಲಿಲ್ಲ ಎಂಬ ಸಮಿತಿಯ ತೀರ್ಮಾನವನ್ನು ನ್ಯಾಯಾಧೀಶರ ಗಮನಕ್ಕೆ ಬಂತು.
“ಯುಎಸ್‌ನ ವಿದೇಶಾಂಗ ನೀತಿ ಮತ್ತು ರಾಷ್ಟ್ರೀಯ ಭದ್ರತಾ ಹಿತಾಸಕ್ತಿಗಳಿಗೆ ವಿರುದ್ಧವಾಗಿ” ಕಂಪನಿಯು ವರ್ತಿಸಿದೆ ಎಂದು ನಿರ್ಧರಿಸಿದ ನಂತರ, ಯುಎಸ್ ಸರ್ಕಾರವು ನವೆಂಬರ್ 2021 ರಲ್ಲಿ NSO ಗ್ರೂಪ್ ಅನ್ನು ಕಪ್ಪುಪಟ್ಟಿಗೆ ಸೇರಿಸಿತು.
ವಾಟ್ಸಾಪ್ ಹ್ಯಾಕಿಂಗ್ ಪ್ರಕರಣ
ಡಿಸೆಂಬರ್‌ನಲ್ಲಿ ನೀಡಿದ ತೀರ್ಪಿನಲ್ಲಿ, ಕ್ಯಾಲಿಫೋರ್ನಿಯಾದ ಉತ್ತರ ಜಿಲ್ಲೆಯ ಯುಎಸ್ ಜಿಲ್ಲಾ ನ್ಯಾಯಾಲಯದ ನ್ಯಾಯಾಧೀಶ ಫಿಲ್ಲಿಸ್ ಹ್ಯಾಮಿಲ್ಟನ್, NSO ಗ್ರೂಪ್ ಕಂಪ್ಯೂಟರ್ ವಂಚನೆ ಮತ್ತು ದುರುಪಯೋಗ ಕಾಯ್ದೆ ಮತ್ತು ಕ್ಯಾಲಿಫೋರ್ನಿಯಾ ಕಂಪ್ಯೂಟರ್ ಡೇಟಾ ಪ್ರವೇಶ ಮತ್ತು ವಂಚನೆ ಕಾಯ್ದೆಯ ವಿಭಾಗಗಳನ್ನು ಉಲ್ಲಂಘಿಸಿದೆ ಎಂದು ಹೇಳಿದರು.
ಕಂಪ್ಯೂಟರ್ ವಂಚನೆ ಮತ್ತು ದುರುಪಯೋಗ ಕಾಯ್ದೆಯು ಫೆಡರಲ್ ಶಾಸನವಾಗಿದ್ದು, ಕಂಪ್ಯೂಟರ್‌ಗಳು, ನೆಟ್‌ವರ್ಕ್‌ಗಳು ಮತ್ತು ಇತರ ಡಿಜಿಟಲ್ ಮಾಹಿತಿಗೆ ಅನಧಿಕೃತ ಪ್ರವೇಶವನ್ನು ಅಪರಾಧೀಕರಿಸುತ್ತದೆ. ಕ್ಯಾಲಿಫೋರ್ನಿಯಾ ಕಂಪ್ಯೂಟರ್ ಡೇಟಾ ಪ್ರವೇಶ ಮತ್ತು ವಂಚನೆ ಕಾಯ್ದೆಯು ಅದೇ ಕಾನೂನಿಗೆ ಸಮಾನವಾದ ರಾಜ್ಯ ಕಾಯ್ದೆಯಾಗಿದೆ.
ಇಸ್ರೇಲಿ ಸಂಸ್ಥೆಯು WhatsApp ನ ಸೇವಾ ನಿಯಮಗಳನ್ನು ಉಲ್ಲಂಘಿಸಿದೆ ಎಂದು ಹ್ಯಾಮಿಲ್ಟನ್ ಹೇಳಿದ್ದಾರೆ.
ಮಾರ್ಚ್ 2024 ರಲ್ಲಿ, ಹ್ಯಾಮಿಲ್ಟನ್ ಇಸ್ರೇಲಿ ಸಂಸ್ಥೆಗೆ ಪೆಗಾಸಸ್ ಮತ್ತು ಅದರ ಇತರ ಸ್ಪೈವೇರ್ ಉತ್ಪನ್ನಗಳ ಕೋಡ್ ಅನ್ನು ಕಾನೂನು ಪ್ರಕ್ರಿಯೆಯ ಭಾಗವಾಗಿ WhatsApp ಗೆ ಹಸ್ತಾಂತರಿಸುವಂತೆ ಆದೇಶಿಸಿದರು.
ಡಿಸೆಂಬರ್‌ನಲ್ಲಿ ನ್ಯಾಯಾಧೀಶರು, ಎನ್‌ಎಸ್‌ಒ ಕಂಪನಿಯು ನ್ಯಾಯಾಲಯದ ಆದೇಶಗಳನ್ನು ಪಾಲಿಸಲು ಪದೇ ಪದೇ ವಿಫಲವಾಗಿದೆ ಎಂದು ಹೇಳಿರುವುದನ್ನು ದಿ ಗಾರ್ಡಿಯನ್ ವರದಿ ಮಾಡಿದೆ.
ಕ್ಯಾಲಿಫೋರ್ನಿಯಾದಲ್ಲಿ ಮೊಕದ್ದಮೆ ಹೂಡಿದ್ದರೂ, ಇಸ್ರೇಲಿ ಸಂಸ್ಥೆಯು ತನ್ನ ಸ್ಪೈವೇರ್‌ನ ಕೋಡ್ ಅನ್ನು ಇಸ್ರೇಲಿ ಪ್ರಜೆಯೊಬ್ಬರು ಇಸ್ರೇಲ್‌ನಲ್ಲಿ ಮಾತ್ರ ವೀಕ್ಷಿಸಲು ಲಭ್ಯವಾಗುವಂತೆ ಮಾಡಿದೆ, ಇದು “ಅಪ್ರಾಯೋಗಿಕ” ಎಂದು ಹ್ಯಾಮಿಲ್ಟನ್ ತಮ್ಮ ತೀರ್ಪಿನಲ್ಲಿ ಹೇಳಿದ್ದಾರೆ.
