ಭಾರತೀಯ ಜನತಾ ಪಕ್ಷದ (BJP) ವಿರುದ್ಧ ಜನರಲ್ಲಿ ಭಾರಿ ಆಕ್ರೋಶವಿದ್ದು, ಮುಂಬರುವ ಮುಂದಿನ ಲೋಕಸಭಾ ಚುನಾವಣೆಯನ್ನು ನಾವು ‘ಈಗಾಗಲೇ ಗೆದ್ದಾಗಿದೆ’. ಆದರೆ, ನಮ್ಮ ಮುಂದಿರುವ ಅಸಲಿ ಸವಾಲು ಚುನಾವಣೆ ಗೆಲ್ಲುವುದಲ್ಲ, ಬದಲಿಗೆ ದೇಶದಲ್ಲಿ ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆಗಳು (Free and Fair Elections) ನಡೆಯುವಂತೆ ನೋಡಿಕೊಳ್ಳುವುದು ಎಂದು ಕಾಂಗ್ರೆಸ್ ಹಿರಿಯ ನಾಯಕ ರಾಹುಲ್ ಗಾಂಧಿ ಪ್ರತಿಪಾದಿಸಿದ್ದಾರೆ. ದೆಹಲಿಯಲ್ಲಿ ಈ ವಾರ ನಡೆದ ವಿರೋಧ ಪಕ್ಷಗಳ ‘ಇಂಡಿಯಾ’ (INDIA) ಒಕ್ಕೂಟದ ಉನ್ನತ ಮಟ್ಟದ ಸಭೆಯಲ್ಲಿ ಅವರು ಈ ಆಘಾತಕಾರಿ ಹಾಗೂ ಮಹತ್ವದ ಹೇಳಿಕೆ ನೀಡಿದ್ದಾರೆ.
ವಿರೋಧ ಪಕ್ಷಗಳು ಒಗ್ಗಟ್ಟಾಗಿ ನಿಂತು ಬಿಜೆಪಿಯ ನೀತಿಗಳ ವಿರುದ್ಧ ವ್ಯವಸ್ಥಿತವಾಗಿ ಪ್ರತಿರೋಧ (Resistance) ತೋರಿದರೆ, ಆಡಳಿತ ಪಕ್ಷವನ್ನು ಸೋಲಿಸುವುದು ಅತ್ಯಂತ ಸುಲಭ ಎಂದು ರಾಹುಲ್ ಗಾಂಧಿ ಒಕ್ಕೂಟದ ನಾಯಕರಿಗೆ ಕರೆ ನೀಡಿದ್ದಾರೆ. ಇತ್ತೀಚೆಗೆ ನಡೆದ ಸಭೆಯಲ್ಲಿ ವಿರೋಧ ಪಕ್ಷಗಳ ನಾಯಕರು ಒಮ್ಮತದಿಂದ ‘ನೀಟ್’ (NEET) ಮತ್ತು ಸಿಬಿಎಸ್ಇ ಪರೀಕ್ಷಾ ಅಕ್ರಮಗಳ ವಿವಾದಕ್ಕೆ ಸಂಬಂಧಿಸಿದಂತೆ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಗೆ ಒತ್ತಾಯಿಸಲು ಹಾಗೂ ದೇಶದಲ್ಲಿ ನಡೆಯುತ್ತಿರುವ ಚುನಾವಣಾ ಅಕ್ರಮಗಳ ಕುರಿತು ಭಾರತದ ಮುಖ್ಯ ನ್ಯಾಯಮೂರ್ತಿಗಳಿಗೆ (CJI) ಜಂಟಿ ಪತ್ರ ಬರೆಯಲು ನಿರ್ಧರಿಸಿದ್ದಾರೆ. ಸಭೆಯಲ್ಲಿ ರಾಹುಲ್ ಗಾಂಧಿ ಆಡಿದ ಸುಮಾರು 9 ನಿಮಿಷಗಳ ಸುದೀರ್ಘ ಭಾಷಣದ ವಿಡಿಯೋವನ್ನು ಅವರು ಶುಕ್ರವಾರ ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಗಳಲ್ಲಿ ಹಂಚಿಕೊಂಡಿದ್ದಾರೆ.
ಸಭೆಯಲ್ಲಿ ಎಡಪಕ್ಷಗಳು ಸೇರಿದಂತೆ ಕೆಲವು ಮೈತ್ರಿ ಪಕ್ಷಗಳ ನಾಯಕರು ಕಾಂಗ್ರೆಸ್ ಪಕ್ಷದ ವಿರುದ್ಧ ಮಾಡಿದ ಟೀಕೆಗಳಿಗೆ ಅತ್ಯಂತ ವಿನಮ್ರವಾಗಿ ಉತ್ತರಿಸಿದ ರಾಹುಲ್ ಗಾಂಧಿ, ಶೈವ ಪರಂಪರೆಯ ಉದಾಹರಣೆಯನ್ನು ನೀಡಿದರು. “ಇಂದು ಕಾಂಗ್ರೆಸ್ ಪಕ್ಷದ ಬಗ್ಗೆ ಇಲ್ಲಿ ವ್ಯಕ್ತವಾದ ಯಾವುದೇ ಆಕ್ಷೇಪಗಳಿಗೆ ಉತ್ತರಿಸುವುದು ನನ್ನ ಕೆಲಸವಲ್ಲ. ಶೈವ ಪರಂಪರೆಯಲ್ಲಿ ಜಗತ್ತಿನ ಎಲ್ಲಾ ವಿಷವನ್ನು ಕುಡಿದು ‘ನೀಲಕಂಠ’ನಾದ ಶಿವನಂತೆ, ಮೈತ್ರಿ ಪಕ್ಷಗಳು ನನ್ನ ಮೇಲೆ ಅಥವಾ ಕಾಂಗ್ರೆಸ್ ಮೇಲೆ ಮಾಡುವ ಎಲ್ಲಾ ಟೀಕೆಗಳನ್ನು ನಾನು ಅತ್ಯಂತ ಸಂತೋಷದಿಂದ, ಮುಖದಲ್ಲಿ ಮುಗುಳ್ನಗೆಯೊಂದಿಗೆ ಸ್ವೀಕರಿಸುತ್ತೇನೆ. ನಮ್ಮ ಮುಖ್ಯ ಪಾತ್ರವೇ ನಿಮ್ಮೆಲ್ಲರನ್ನು ಪ್ರೀತಿ ಮತ್ತು ವಿಶ್ವಾಸದಿಂದ ಒಟ್ಟಿಗೆ ಕೊಂಡೊಯ್ಯುವುದಾಗಿದೆ,” ಎಂದು ಅವರು ಮಾರ್ಮಿಕವಾಗಿ ಹೇಳಿದರು.
ಇಂಡಿಯಾ ಒಕ್ಕೂಟದ ಪ್ರಮುಖ ಪಕ್ಷಗಳಾದ ಸಮಾಜವಾದಿ ಪಕ್ಷ (SP), ತೃಣಮೂಲ ಕಾಂಗ್ರೆಸ್ (TMC) ಮತ್ತು ಆರ್ಜೆಡಿ (RJD) ಇಂದಿಗೂ ತಮ್ಮ ಹಳೆಯ ಸಾಂಪ್ರದಾಯಿಕ ರಾಜಕೀಯ ಶೈಲಿಯನ್ನೇ ನಂಬಿಕೊಂಡಿವೆ ಎಂದು ರಾಹುಲ್ ಗಾಂಧಿ ಕಳವಳ ವ್ಯಕ್ತಪಡಿಸಿದರು. “ಆ ಹಳೆಯ ರಾಜಕೀಯ ತಂತ್ರಗಳು ದೇಶದ ಸಾಂವಿಧಾನಿಕ ವ್ಯವಸ್ಥೆಯು ನಿಷ್ಪಕ್ಷಪಾತವಾಗಿದ್ದಾಗ ಮಾತ್ರ ಕೆಲಸ ಮಾಡುತ್ತಿದ್ದವು. ಆದರೆ ಇಂದು ಆ ಪರಿಸ್ಥಿತಿ ಇಲ್ಲ.
ಬಿಜೆಪಿ ಇಡೀ ದೇಶದ ನ್ಯಾಯಾಂಗ ವ್ಯವಸ್ಥೆ, ಅಧಿಕಾರಶಾಹಿ, ಗುಪ್ತಚರ ಸಂಸ್ಥೆಗಳು ಹಾಗೂ ಕೊನೆಗೆ ಚುನಾವಣಾ ಆಯೋಗವನ್ನೂ (Election Commission) ತನ್ನ ಸಂಪೂರ್ಣ ನಿಯಂತ್ರಣಕ್ಕೆ ತೆಗೆದುಕೊಂಡಿದೆ,” ಎಂದು ಅವರು ಗಂಭೀರ ಆರೋಪ ಮಾಡಿದರು.
ಪಶ್ಚಿಮ ಬಂಗಾಳದ ಉದಾಹರಣೆ ನೀಡಿದ ಅವರು, “ಟಿಎಂಸಿಯಲ್ಲಿರುವ ನನ್ನ ಹಲವು ಸ್ನೇಹಿತರು ತಾವು ಚುನಾವಣೆಯನ್ನು ಸುಲಭವಾಗಿ ಗೆಲ್ಲುತ್ತೇವೆ ಎಂಬ ಭ್ರಮೆಯಲ್ಲಿದ್ದರು. ಆದರೆ ನಾನು ಅವರಿಗೆ ಗುಜರಾತ್, ಮಧ್ಯಪ್ರದೇಶ, ಛತ್ತೀಸ್ಗಢ, ಹರಿಯಾಣ ಮತ್ತು ಮಹಾರಾಷ್ಟ್ರಗಳಲ್ಲಿ ಏನಾಯಿತು ಎಂಬುದನ್ನು ಕಣ್ಣಾರೆ ಕಂಡಿದ್ದೇನೆ ಎಂದು ಎಚ್ಚರಿಸಿದ್ದೆ.
ಇಂದು ಮಮತಾ ಬ್ಯಾನರ್ಜಿ ಅವರಿಗೆ ತಮ್ಮ ಚುನಾವಣೆಯನ್ನು ಕದಿಯಲಾಗಿದೆ ಎಂಬ ಬಗ್ಗೆ ಶೇ. 90 ರಷ್ಟು ಖಾತ್ರಿಯಿದೆ. ಉದ್ಧವ್ ಠಾಕ್ರೆ ಮತ್ತು ತೇಜಸ್ವಿ ಯಾದವ್ ಅವರಿಗೆ ಶೇ. 40 ರಷ್ಟು ಸಂಶಯವಿದೆ. ಆದರೆ ನೆನಪಿಡಿ, ದೇಶದಲ್ಲಿ ನೂರಕ್ಕೆ ನೂರು ಪ್ರತಿಶತದಷ್ಟು ಚುನಾವಣೆಗಳನ್ನು ವ್ಯವಸ್ಥಿತವಾಗಿ ಕದಿಯಲಾಗುತ್ತಿದೆ. ಮೊದಲು ನಿಮ್ಮ ಮನಸ್ಸಿನಿಂದ ಆ ಗೊಂದಲವನ್ನು ದೂರ ಮಾಡಿ,” ಎಂದು ಮೈತ್ರಿ ನಾಯಕರಿಗೆ ತಿಳಿಸಿದರು.
ಬಿಜೆಪಿ ಮತ್ತು ಆರ್ಎಸ್ಎಸ್ (RSS) ಒಟ್ಟಾಗಿ ಇಡೀ ದೇಶದ ಆಡಳಿತ ಯಂತ್ರದ ಮೇಲಿನ ತಮ್ಮ ಹಿಡಿತವನ್ನು ಮತ್ತಷ್ಟು ಬಿಗಿಗೊಳಿಸುತ್ತಿರುವುದರಿಂದ, ಮುಂದಿನ ದಿನಗಳಲ್ಲಿ ಸಾಮಾನ್ಯ ರಾಜಕೀಯ ಹೋರಾಟಗಳು ಶೂನ್ಯವಾಗಲಿವೆ ಎಂದ ರಾಹುಲ್, ಇನ್ನು ಮುಂದೆ ಕೇವಲ ‘ಪ್ರತಿರೋಧ’ ಮಾತ್ರ ಕೆಲಸ ಮಾಡಲಿದೆ ಎಂದರು. “ನಾನು ಈ ದೇಶದ ಉದ್ದಗಲಕ್ಕೂ 4,000 ಕಿಲೋಮೀಟರ್ ನಡೆದಿದ್ದೇನೆ (ಭಾರತ್ ಜೋಡೋ ಯಾತ್ರೆ).
ಜನ ಸಾಮಾನ್ಯರ ಧ್ವನಿಯಾಗಿ ನಿಲ್ಲುವ ಪ್ರತಿರೋಧಕ್ಕೆ ಭಾರಿ ಶಕ್ತಿಯಿದೆ ಎಂಬುದನ್ನು ನಾನು ಕಣ್ಣಾರೆ ಕಂಡಿದ್ದೇನೆ. ನೀಟ್ ವಿವಾದ, ಸಿಬಿಎಸ್ಇ ಗೊಂದಲಗಳು, ಗ್ರೇಟ್ ನಿಕೋಬಾರ್ ಯೋಜನೆ ಇವೆಲ್ಲದರ ವಿರುದ್ಧ ನಾವು ಪ್ರತಿದಿನ ಬೆಳಿಗ್ಗೆ ಎದ್ದು ಹೇಗೆ ಪ್ರತಿರೋಧ ತೋರಬಹುದು ಎಂದು ಯೋಚಿಸಬೇಕು ಮತ್ತು ನಿರಂತರವಾಗಿ ಹೋರಾಡಬೇಕು,” ಎಂದು ಸಲಹೆ ನೀಡಿದರು.
ವಿರೋಧ ಪಕ್ಷಗಳ ನಡುವೆ ಯಾವುದೇ ಸಮನ್ವಯತೆ ಇಲ್ಲ ಎಂಬುದು ಕೇವಲ ಬಿಜೆಪಿ ಹರಡುತ್ತಿರುವ ಸುಳ್ಳು ಸುದ್ಧಿ ಎಂದ ಅವರು, ದೇಶದ ಅಸ್ಮಿತೆಯನ್ನು ರಕ್ಷಿಸುವ ವಿಷಯ ಬಂದಾಗ ನಾವೆಲ್ಲರೂ ಒಂದೇ ಸೂರಿನಡಿ ನಿಲ್ಲಲಿದ್ದೇವೆ ಎಂದರು. “ಕಳೆದ 2024 ರ ಸಾರ್ವತ್ರಿಕ ಚುನಾವಣೆಯಲ್ಲಿ ನಾವೇ ಗೆದ್ದಿದ್ದೇವೆ, ಸೋತಿಲ್ಲ. ನಿತೀಶ್ ಕುಮಾರ್ ಒಕ್ಕೂಟದಿಂದ ಹೊರಹೋಗಲು ನಾನು ಅಥವಾ ಕಾಂಗ್ರೆಸ್ ಕಾರಣವಲ್ಲ. ಈ ಹಿಂದೆ ನಮ್ಮ ಸಭೆಗಳಲ್ಲಿ ಒಂದು ರೀತಿಯ ನಿರಾಶೆ ಎದ್ದುಕಾಣುತ್ತಿತ್ತು.
ಬಿಜೆಪಿಯನ್ನು ಸೋಲಿಸಲು ಸಾಧ್ಯವೇ ಎಂಬ ಕೀಳರಿಮೆ ಇತ್ತು. ಆದರೆ ನೆನಪಿಡಿ, ಕಳೆದ ಚುನಾವಣೆಯಲ್ಲಿ ನಮ್ಮ ಒಕ್ಕೂಟವು ಬಿಜೆಪಿಯನ್ನು ಸೋಲಿಸಬಲ್ಲದು ಎಂದು ನನ್ನನ್ನು ಬಿಟ್ಟು ಬೇರೆ ಯಾರೂ ನಂಬಿರಲಿಲ್ಲ. ಈಗ ನೀವೆಲ್ಲರೂ ಆ ಗೆಲುವಿನ ವಿಶ್ವಾಸವನ್ನು ಮೈಗೂಡಿಸಿಕೊಳ್ಳಬೇಕು. ನಾವು ಒಟ್ಟಾಗಿ ನಿಂತರೆ, ಅವರು ಎಷ್ಟೇ ಅಕ್ರಮ ಎಸಗಿದರೂ ರಾಜ್ಯದಿಂದ ರಾಜ್ಯಕ್ಕೆ ಬಿಜೆಪಿ ಸಾಮ್ರಾಜ್ಯ ಪತನಗೊಳ್ಳುವುದು ಗ್ಯಾರಂಟಿ,” ಎಂದು ರಾಹುಲ್ ಗಾಂಧಿ ವಿಶ್ವಾಸ ವ್ಯಕ್ತಪಡಿಸಿದರು.
