ರಷ್ಯಾದ ದಕ್ಷಿಣ ಪ್ರಾಂತ್ಯದ ಡಾಗೆಸ್ತಾನ್‌ ಪ್ರದೇಶದಲ್ಲಿ ಭಯೋತ್ಪಾದಕ ದಾಳಿ ನಡೆದಿದೆ. ಕ್ರಿಶ್ಚಿಯನ್ನರು ಮತ್ತು ಯಹೂದಿಗಳ ಪ್ರಾರ್ಥನಾ ಮಂದಿರಗಳ ಮೇಲೆ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳೊಂದಿಗೆ ಮನಬಂದಂತೆ ಗುಂಡು ಹಾರಿಸಲಾಯಿತು.
ಈ ಬಂದೂಕುಧಾರಿಗಳ ದಾಳಿಯಲ್ಲಿ 15ಕ್ಕೂ ಹೆಚ್ಚು ಪೊಲೀಸರು ಮತ್ತು ಅನೇಕ ನಾಗರಿಕರು ಸಾವನ್ನಪ್ಪಿದ್ದಾರೆ ಎಂದು ಪ್ರದೇಶದ ಗವರ್ನರ್ ಬಹಿರಂಗಪಡಿಸಿದ್ದಾರೆ.
ಈ ಗುಂಡಿನ ದಾಳಿಯಲ್ಲಿ ಸಾವನ್ನಪ್ಪಿದವರ ಸಂಖ್ಯೆ 15 ದಾಟಿದೆ ಎಂದು ವರದಿಯಾಗಿದೆ. ರಷ್ಯಾದ ಭದ್ರತಾ ಪಡೆಗಳು ದಾಳಿಕೋರರ ವಿರುದ್ಧ ಪ್ರತಿದಾಳಿ ನಡೆಸಿ ಇಬ್ಬರು ಭಯೋತ್ಪಾದಕರನ್ನು ಕೊಂದಿವೆ. ಚರ್ಚ್ ಮೇಲಿನ ದಾಳಿಯಲ್ಲಿ ಫಾದರ್ ಸೇರಿದಂತೆ ಆರು ಜನರು ಸಾವನ್ನಪ್ಪಿದ್ದಾರೆ ಎಂದು ಡಾಗೆಸ್ತಾನ್‌ ಸಾರ್ವಜನಿಕ ನಿಗಾ ಆಯೋಗದ ಅಧಿಕಾರಿ ಶಮಿಲ್ ಖದುಲೆವ್ ಹೇಳಿದ್ದಾರೆ. ಚರ್ಚ್‌ನಲ್ಲಿ ಕೊಲೆಯಾದ ಫಾದರ್ ಅವರನ್ನು 66 ವರ್ಷದ ನಿಕೊಲಾಯ್ ಎಂದು ಗುರುತಿಸಲಾಗಿದೆ. ಬಂದೂಕುಧಾರಿಗಳು ಚರ್ಚ್‌ನಲ್ಲಿ ಕಾವಲು ಕಾಯುತ್ತಿದ್ದ ಭದ್ರತಾ ಸಿಬ್ಬಂದಿಯನ್ನು ಗುಂಡಿಕ್ಕಿ ಕೊಂದರು.
ಈ ಭಯೋತ್ಪಾದಕ ದಾಳಿಯ ನಂತರ, ಯಹೂದಿಗಳ ಪೂಜಾ ಸ್ಥಳದಲ್ಲಿ ಬೆಂಕಿ ಕಾಣಿಸಿಕೊಂಡಿತು. ಭಾನುವಾರ ಮೂರು ಕಡೆ ದಾಳಿ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮಖಚ್ಕಲಾ ನಗರದಲ್ಲಿ ಪೊಲೀಸರ ಸಂಚಾರ ನಿಲುಗಡೆಗಳ ಮೇಲೆ ದಾಳಿಗಳು ವರದಿಯಾಗಿವೆ. ಈ ದಾಳಿಯಲ್ಲಿ 12 ಕಾನೂನು ಜಾರಿ ಅಧಿಕಾರಿಗಳು ಗಾಯಗೊಂಡಿದ್ದಾರೆ ಎಂದು ಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ದಾಳಿಯ ಸ್ವರೂಪವನ್ನು ನೋಡಿದರೆ, ಇದು ಒಂದು ಯೋಜನೆಯ ಪ್ರಕಾರ ನಡೆದಿದೆ ಎಂದು ಪೊಲೀಸ್ ಅಧಿಕಾರಿಗಳು ಹೇಳುತ್ತಾರೆ. ಡರ್ಬೆಂಟ್ ನಗರದ ಮೇಲಿನ ದಾಳಿಯ ಸಮಯದಲ್ಲಿಯೇ ಮಖಚ್ಕಲಾದಲ್ಲಿ ಪೊಲೀಸ್ ಟ್ರಾಫಿಕ್ ಪೋಸ್ಟ್ ಮೇಲೆ ಗುಂಡು ಹಾರಿಸಲಾಯಿತು. ದಾಳಿಯಲ್ಲಿ ಓರ್ವ ಪೊಲೀಸ್ ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
