2021ರ CRS (ನಾಗರಿಕ ನೋಂದಣಿ ವ್ಯವಸ್ಥೆ) ವರದಿಯು ಇದೇ ಮೇ ತಿಂಗಳ ಆರಂಭದಲ್ಲಿ ಬಿಡುಗಡೆ ಮಾಡಿದ ವರದಿಯಲ್ಲಿ ಕೋವಿಡ್ 19 ಇದ್ದ ಸಂದರ್ಭದಲ್ಲಿನ ಒಟ್ಟಾರೆ ಸಾವಿನ ಸಂಖ್ಯೆಯ ಸರಾಸರಿಯನ್ನು ಹೊರಹಾಕಿದೆ. ಇದರಲ್ಲಿ 2021 ರ ವರ್ಷದಲ್ಲಿ ಕರ್ನಾಟಕದಲ್ಲಿ ಒಟ್ಟಾರೆ ಮರಣ ಪ್ರಮಾಣದಲ್ಲಿ ತೀವ್ರ ಏರಿಕೆಯನ್ನು ತೋರಿಸಿದೆ. ಇದರ ದತ್ತಾಂಶವು 2012 ಮತ್ತು 2020 ರ ನಡುವೆ ರಾಜ್ಯದಲ್ಲಿ ವಾರ್ಷಿಕ ಸರಾಸರಿ ಸಾವುಗಳ ಸಂಖ್ಯೆ 4.5 ಲಕ್ಷವಾಗಿದ್ದರೆ, 2021 ರಲ್ಲಿ ಈ ಸಂಖ್ಯೆ 6.6 ಲಕ್ಷಕ್ಕೆ ಏರಿದೆ – 2 ಲಕ್ಷಕ್ಕೂ ಹೆಚ್ಚು ಸಾವುಗಳ ಹೆಚ್ಚಳವಾಗಿದೆ ಎಂದು ಹೇಳಲಾಗಿದೆ.
2021ರ ವರ್ಷದಲ್ಲಿ ಗ್ರಾಮೀಣ ಪ್ರದೇಶಗಳಲ್ಲಿ 3.5 ಲಕ್ಷ ಸಾವುಗಳಾಗಿದ್ದರೆ, ನಗರ ಪ್ರದೇಶಗಳಲ್ಲಿ 3.2 ಲಕ್ಷ ಸಾವುಗಳ ವರದಿಯಾಗಿವೆ. ಆ ವರ್ಷ ಕರ್ನಾಟಕದಲ್ಲಿ ಸಂಭವಿಸಿದ ಒಟ್ಟು ಸಾವುಗಳಲ್ಲಿ ಪುರುಷರ ಪಾಲು ಶೇ. 60 ರಷ್ಟಿದ್ದು, 4 ಲಕ್ಷ ಸಾವುಗಳು ಸಂಭವಿಸಿವೆ. ಅತಿ ಹೆಚ್ಚು ಸಾವುಗಳು 70 ವರ್ಷ ಮೇಲ್ಪಟ್ಟವರ ಸಂಖ್ಯೆಯಲ್ಲಿ 2.6 ಲಕ್ಷವಾಗಿದ್ದರೆ, ನಂತರದ ಸ್ಥಾನ 55–64 ವರ್ಷ ವಯಸ್ಸಿನವರಲ್ಲಿನ ಸಾವಿನ ಸಂಖ್ಯೆ 1.3 ಲಕ್ಷ ಮತ್ತು ಕನಿಷ್ಠ ಸಾವುಗಳು 1 ರಿಂದ 4 ವರ್ಷ ವಯಸ್ಸಿನವರಲ್ಲಿ ಸಂಭವಿಸಿದ್ದು, 947 ಸಾವುಗಳಾಗಿವೆ.
ಅಚ್ಚರಿ ಮತ್ತು ಆಘಾತಕಾರಿ ಅಂಶ ಏನೆಂದರೆ ಆ ವರ್ಷ 18 ರಾಜ್ಯಗಳಲ್ಲಿ ದಾಖಲಾದ 19.7 ಲಕ್ಷ ಹೆಚ್ಚುವರಿ ಸಾವುಗಳಿಗೆ ಕರ್ನಾಟಕ ಮಾತ್ರ 1.6 ಲಕ್ಷ ಕೊಡುಗೆ ನೀಡಿದೆ. ಇದು ಸಾಂಕ್ರಾಮಿಕ ರೋಗದ ಸಂಖ್ಯೆಯ ವ್ಯಾಪ್ತಿಯನ್ನು ಮತ್ತು ಆ ಸಂದರ್ಭದಲ್ಲಿ ಆಡಳಿತ ವ್ಯವಸ್ಥೆ ಕೋವಿಡ್ ಸಾಂಕ್ರಾಮಿಕದ ನಿಯಂತ್ರಣ ಎತ್ತಿ ತೋರಿಸುತ್ತದೆ.
2021 ರಲ್ಲಿ ಭಾರತವು ಒಂದು ಕೋಟಿಗೂ ಹೆಚ್ಚು ಸಾವುಗಳನ್ನು ದಾಖಲಿಸಿದೆ, ಇದು 2020 ರಲ್ಲಿ 81.2 ಲಕ್ಷ ಸಾವುಗಳಿಂದ 21 ಲಕ್ಷ ಹೆಚ್ಚಾಗಿದೆ. 2019 ರಲ್ಲಿ, ನೋಂದಾಯಿತ ಸಾವುಗಳ ಸಂಖ್ಯೆ 76.4 ಲಕ್ಷ ಎಂದು ಹೇಳಲಾಗಿದೆ.
ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು 2021 ರಲ್ಲಿ 3.3 ಲಕ್ಷ ಕೋವಿಡ್ -19 ಸಾವುಗಳನ್ನು ವರದಿ ಮಾಡಿತ್ತು. ವೈದ್ಯಕೀಯ ಮರಣ ಪ್ರಮಾಣೀಕರಣ (MCCD) ವರದಿಯು ಆ ವರ್ಷ ಕೋವಿಡ್ -19 ಕಾರಣದಿಂದಾಗಿ 4.13 ಲಕ್ಷ ಸಾವುಗಳನ್ನು ತೋರಿಸಿದೆ.
ರಿಜಿಸ್ಟ್ರಾರ್ ಜನರಲ್ ಕಚೇರಿ ಇತ್ತೀಚೆಗೆ 2021 ಕ್ಕೆ ಸಂಬಂಧಿಸಿದ ಮೂರು ವರದಿಗಳನ್ನು ಬಿಡುಗಡೆ ಮಾಡಿದೆ. ಅವುಗಳಲ್ಲಿ 1)ಮಾದರಿ ನೋಂದಣಿ ವ್ಯವಸ್ಥೆ (SRS) ಅಂಕಿಅಂಶಗಳ ವರದಿ, 2)ನಾಗರಿಕ ನೋಂದಣಿ ವ್ಯವಸ್ಥೆ (CRS) ವರದಿ ಮತ್ತು 3)ಮರಣದ ಕಾರಣದ ವೈದ್ಯಕೀಯ ಪ್ರಮಾಣೀಕರಣ (MCCD) ವರದಿ.
ಕೋವಿಡ್ ಸಾಂಕ್ರಾಮಿಕ ರೋಗವು ಉತ್ತುಂಗಕ್ಕೇರಿದಾಗ 2021 ರಲ್ಲಿ ಕೋವಿಡ್ -19 ಬಲಿಪಶುಗಳ ಬೃಹತ್ ಎಣಿಕೆಯನ್ನು ಈ ಅಂಕಿಅಂಶಗಳು ಸೂಚಿಸುತ್ತವೆ ಎಂದು ವಿಶ್ಲೇಷಕರು ಹೇಳಿದ್ದಾರೆ.
