ಕೋಲ್ಕತ್ತಾ: ತೃಣಮೂಲ ಕಾಂಗ್ರೆಸ್ಗೆ ಕೈಕೊಟ್ಟ ಲೋಕಸಭೆ ಸದಸ್ಯರನ್ನು ಭಾರತೀಯ ಜನತಾ ಪಾರ್ಟಿಗೆ ಸೇರಿಸಿಕೊಳ್ಳುವ ಸಾಧ್ಯತೆಗಳು ದಟ್ಟವಾಗಿವೆ. ಇದರ ನಡುವೆಯೇ, ಈ ಹಿಂದೆ ಮಮತಾ ಬ್ಯಾನರ್ಜಿ ಆಡಳಿತ ಪೋಷಿಸುತ್ತಿತ್ತು ಎಂದು ತಾವು ಯಾವುದನ್ನು ಹಳಿಯುತ್ತಿದ್ದರೋ, ಅದೇ ಹಫ್ತಾ ವಸೂಲಿ ದಂಧೆಯತ್ತ ತಮ್ಮ ರಾಜ್ಯದ ಹೊಸ ಆಡಳಿತ ಪಕ್ಷದ ಕೆಲ ನಾಯಕರು ಮರುಳಾಗುತ್ತಿದ್ದಾರೆ ಎಂದು ಬಿಜೆಪಿಯ ಹಿರಿಯ ನಾಯಕ ಹಾಗೂ ಪಶ್ಚಿಮ ಬಂಗಾಳದ ಪಂಚಾಯತ್ ಮಂತ್ರಿ ದಿಲಿಪ್ ಘೋಷ್ ರವಿವಾರ ಎಚ್ಚರಿಸಿದ್ದಾರೆ.
ಪಶ್ಚಿಮ ಬಂಗಾಳದಲ್ಲಿ ಕಮಿಷನ್ ದಂಧೆ ಇನ್ನು ಪೂರ್ತಿಯಾಗಿ ನಿರ್ಮೂಲನೆಯಾಗಿಲ್ಲ ಎಂದು ರಾಜ್ಯ ಬಿಜೆಪಿ ಅಧ್ಯಕ್ಷ ಶಮೀಕ್ ಭಟ್ಟಾಚಾರ್ಯ ಒಪ್ಪಿಕೊಂಡ ಮರುದಿನವೇ ಘೋಷ್ ಅವರ ಈ ಮಾತುಗಳು ಬಂದಿವೆ. ಆಡಳಿತ ಬದಲಾದ ಮೇಲೆ ಬಿಜೆಪಿಗೆ ಬಂದ ಕೆಲವರು ಹಾಗೂ ಸ್ವತಃ ತಮ್ಮ ಪಕ್ಷದ ಕೆಲವು ನಾಯಕರು ಮತ್ತು ಕಾರ್ಯಕರ್ತರು ದುರಾಸೆಗೆ ಬಿದ್ದು ಈ ಕೆಟ್ಟ ಪದ್ಧತಿ ಮುಂದುವರಿಯಲು ನೆರವಾಗುತ್ತಿದ್ದಾರೆ ಎಂದು ಭಟ್ಟಾಚಾರ್ಯ ಎಚ್ಚರಿಸಿದ್ದರು.
ಈ ವರ್ಷದ ಆರಂಭದಲ್ಲಿ ನಡೆದ ಶಾಸನಸಭೆ ಚುನಾವಣೆಯಲ್ಲಿ ಬದಲಾವಣೆಗಾಗಿ ವೋಟು ಹಾಕಿ ಬಿಜೆಪಿಯನ್ನು ಅಧಿಕಾರಕ್ಕೆ ತಂದ ಜನ, ತೃಣಮೂಲ ಕಾಂಗ್ರೆಸ್ನಿಂದ ಬಂಡಾಯವೆದ್ದು ಬಂದವರನ್ನು ಯಾವುದೇ ಹದವರಿಕೆಯಿಲ್ಲದೆ ಪಕ್ಷಕ್ಕೆ ಸೇರಿಸಿಕೊಳ್ಳುವುದನ್ನು ಒಪ್ಪುವುದಿಲ್ಲ ಎಂದು ರಾಜ್ಯದ ಹಣಕಾಸು ಮಂತ್ರಿ ಸ್ವಪನ್ ದಾಸಗುಪ್ತಾ ಇತ್ತೀಚೆಗೆ ಸಾರ್ವಜನಿಕವಾಗಿ ನೀಡಿದ್ದ ಎಚ್ಚರಿಕೆಯ ಬೆನ್ನಲ್ಲೇ ಘೋಷ್ ಅವರ ಈ ಮಾತುಗಳು ಹೊರಬಿದ್ದಿವೆ.
ಶಾಸನಸಭೆ ಚುನಾವಣೆಯಲ್ಲಿ ಬಿಜೆಪಿ ಟಿಎಮ್ಸಿಯನ್ನು ಮಣ್ಣುಮುಕ್ಕಿಸಿದೆಯಾದರೂ, ಘೋಷ್, ಭಟ್ಟಾಚಾರ್ಯ ಮತ್ತು ದಾಸಗುಪ್ತಾ ಅವರ ಇತ್ತೀಚಿನ ಮಾತುಗಳು ಕೇಸರಿ ಪಡೆಯ ರಾಜ್ಯ ಘಟಕದ ಒಳಗಿರುವ ತಳಮಳವನ್ನು ಎತ್ತಿಕಾಣಿಸಿವೆ. ತಾವು ದೀರ್ಘಕಾಲದಿಂದ ಯಾರನ್ನು ಮತ್ತು ಯಾವುದನ್ನು ವಿರೋಧಿಸಿಕೊಂಡು ಬಂದಿದ್ದೆವೋ, ಆ ಜನ ಮತ್ತು ಆ ಕೆಟ್ಟ ಅಭ್ಯಾಸಗಳೇ ಈಗ ತಮ್ಮ ಸಂಘಟನೆಯೊಳಗೆ ತೂರಿಕೊಳ್ಳುತ್ತಿವೆ ಎಂಬ ಆತಂಕ ತಳಮಟ್ಟದ ಕಾರ್ಯಕರ್ತರಿಂದ ಹಿಡಿದು ಮೇಲ್ಮಟ್ಟದ ನಾಯಕರವರೆಗೆ ವ್ಯಕ್ತವಾಗುತ್ತಿದೆ.
ಈ ಮುಂಚೆ ಯಾರೂ ಅಷ್ಟಾಗಿ ಕೇಳಿರದ ‘ನ್ಯಾಷನಲ್ ಕಾಂಗ್ರೆಸ್ ಪಾರ್ಟಿ ಆಫ್ ಇಂಡಿಯಾ’ (NCPI) ಜೊತೆ ಗುರುತಿಸಿಕೊಂಡಿರುವ ಟಿಎಮ್ಸಿಯ ಬಂಡಾಯ ಲೋಕಸಭಾ ಸಂಸದರನ್ನು ಪಕ್ಷಕ್ಕೆ ಸೇರಿಸಿಕೊಳ್ಳಲು ಬಿಜೆಪಿಯ ಕೇಂದ್ರ ನಾಯಕತ್ವ ಯೋಚಿಸುತ್ತಿದೆ ಎಂಬ ಸುಳಿವುಗಳು ಸಿಕ್ಕ ಬೆನ್ನಲ್ಲೇ ಈ ಕಳವಳಗಳು ಹೊರಬಂದಿವೆ.
ತೃಣಮೂಲ ಕಾಂಗ್ರೆಸ್ನಿಂದ ಹೊರಬಂದ ಮೂವರು ಅಸಮಾಧಾನಿತ ರಾಜ್ಯಸಭಾ ಸದಸ್ಯರನ್ನು ಈ ಹಿಂದೆ ಬಿಜೆಪಿ ತನ್ನಿಮಿತ್ತ ಸೇರಿಸಿಕೊಂಡು, ಅವರನ್ನು ಮರಳಿ ಮೇಲ್ಮನೆಗೆ ಆರಿಸಿ ಕಳುಹಿಸಿತ್ತು.
“ಹಫ್ತಾ ವಸೂಲಿ ಮಾಡುವ ಈ ಕೆಟ್ಟ ಅಭ್ಯಾಸ ಒಂದೇ ರಾತ್ರಿಯಲ್ಲಿ ಮಾಯವಾಗುವುದಿಲ್ಲ,” ಎಂದು ಹೇಳಿದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮಾಜಿ ಪ್ರಚಾರಕರಾದ ಘೋಷ್, ದಂಧೆಕೋರರು ಬಿಜೆಪಿ ನಾಯಕರನ್ನು ಬುಟ್ಟಿಗೆ ಹಾಕಿಕೊಳ್ಳಲು ಯತ್ನಿಸುತ್ತಿದ್ದಾರೆ ಮತ್ತು “ಅವರಲ್ಲಿ ಹಲವರು ಈ ಹೊಸ ಜೇನುತುಪ್ಪದ ಸವಿಗೆ ಬಿದ್ದು ಚಟ ಬೆಳೆಸಿಕೊಳ್ಳುತ್ತಿದ್ದಾರೆ” ಎಂದು ಎಚ್ಚರಿಸಿದರು.
ಹೊಸದಾಗಿ ಗೆದ್ದುಬಂದ ಬಿಜೆಪಿ ಶಾಸಕರು ಅಧಿಕಾರದ ಆಸೆಗೆ ಬೀಳಬಾರದು ಎಂದು ಎಚ್ಚರಿಸಿದ ಘೋಷ್, ದಂಧೆಕೋರರು ಅವರಲ್ಲಿ ಕೆಲವರನ್ನು ತಮ್ಮ ಬಲೆಗೆ ಬೀಳಿಸಿಕೊಳ್ಳುತ್ತಿದ್ದಾರೆ ಮತ್ತು ಹಲವು ಬಿಜೆಪಿ ನಾಯಕರು “ಈ ಹೊಸ ಜೇನುತುಪ್ಪಕ್ಕೆ ಮರುಳಾಗುತ್ತಿದ್ದಾರೆ” ಎಂದರು. ಪಕ್ಷದ ನಾಯಕರ ನಡೆವಳಿಕೆಯ ಮೇಲೆ ಬಿಜೆಪಿಯ ಹಿರಿಯ ನಾಯಕರು ಕಣ್ಣಿಟ್ಟಿದ್ದು, ಸೂಕ್ತ ಅವಧಿಯೊಳಗೆ ತಮ್ಮ ತಪ್ಪುಗಳನ್ನು ತಿದ್ದುಕೊಳ್ಳದಿದ್ದರೆ ಕ್ರಮ ಕೈಗೊಳ್ಳಲಿದ್ದಾರೆ ಎಂದು ಅವರು ಹೇಳಿದರು.
ಟಿಎಮ್ಸಿಯ ಕಮಿಷನ್ ದಂಧೆ ಮತ್ತು ಲಂಚದ ಜಾಲವನ್ನು ಬುಡಮೇಲು ಮಾಡುತ್ತೇವೆ ಎಂಬ ಭರವಸೆ ನೀಡಿ ಅಧಿಕಾರಕ್ಕೆ ಬಂದ ಬಿಜೆಪಿಯ ವಿರುದ್ಧವೇ ಇತ್ತೀಚೆಗೆ ಆರೋಪಗಳು ಕೇಳಿಬಂದಿವೆ. ಕೋಲ್ಕತ್ತಾದ ನಿರ್ಮಾಣ ಉದ್ಯಮಿಯೊಬ್ಬರು (ಪ್ರಮೋಟರ್) ಕೇಸರಿ ಪಡೆಯ ನಾಯಕನೊಬ್ಬ ತಮ್ಮ ಬಳಿ 5 ಲಕ್ಷ ರೂಪಾಯಿಗೆ ಬೇಡಿಕೆ ಇಟ್ಟಿದ್ದಾನೆ ಎಂದು ಆರೋಪಿಸಿದ್ದರೆ, ಉತ್ತರ ಬಂಗಾಳದ ಸಿಲಿಗುರಿಯ ಉದ್ಯಮಿಯೊಬ್ಬರು ಆಡಳಿತ ಪಕ್ಷದವರಿಂದ ತಿಂಗಳಿಗೆ 10 ಲಕ್ಷ ರೂಪಾಯಿ ಕಮಿಷನ್ ಬೇಡಿಕೆ ಬಂದಿದೆ ಎಂದು ದೂರಿರುತ್ತಾರೆ. ಕೋಲ್ಕತ್ತಾದ ಆ ನಾಯಕನನ್ನು ಬಿಜೆಪಿ ಕೆಲಸದಿಂದ ತೆಗೆದುಹಾಕಿದ್ದರೆ, ಸಿಲಿಗುರಿಯಲ್ಲಿ ಕಮಿಷನ್ ಕೇಳಿದವನನ್ನು ಕಾವಲುಪಡೆ ಬಂಧಿಸಿದೆ.
ರಾಜ್ಯದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದಾಗಿನಿಂದ ಪಕ್ಷವನ್ನು ‘ತೃಣಮೂಲೀಕರಣ’ದಿಂದ ಉಳಿಸುವುದಾಗಿ ಪದೇಪದೇ ಪಣ ತೊಡುತ್ತಿರುವ ಭಟ್ಟಾಚಾರ್ಯ, ಇತ್ತೀಚೆಗೆ “ಕೆಲವು ಕಡೆಗಳಲ್ಲಿ ತಪ್ಪುಗಳು ನಡೆದಿವೆ” ಎಂದು ಒಪ್ಪಿಕೊಂಡಿದ್ದಾರೆ. ತಮ್ಮ ನಡತೆಯನ್ನು ತಿದ್ದುಕೊಳ್ಳಲು ಪಕ್ಷದ ಪದಾಧಿಕಾರಿಗಳಿಗೆ 15 ದಿನಗಳ ಗಡುವು ನೀಡಿರುವ ಅವರು, ಇಲ್ಲದಿದ್ದರೆ “ಬಿಜೆಪಿ ಎಂದರೆ ಏನು ಎಂದು ತಿಳಿಸಬೇಕಾಗುತ್ತದೆ” ಎಂದು ಎಚ್ಚರಿಸಿದ್ದಾರೆ.
“ಮುಂದಿನ ದಿನಗಳಲ್ಲಿ ಮೊಟ್ಟೆಗಳು ಮತ್ತೆ ಎದುರು ದಿಕ್ಕಿನಿಂದ ತೂರಿಬರಬಹುದು,” ಎಂದು ಅವರು ಹೇಳಿದರು. ಚುನಾವಣೆಯ ನಂತರ ಭ್ರಷ್ಟಾಚಾರದ ಆರೋಪ ಹೊತ್ತಿದ್ದ ಟಿಎಮ್ಸಿ ನಾಯಕರ ಮೇಲೆ ಬಿಜೆಪಿ ಬೆಂಬಲಿಗರು ಮೊಟ್ಟೆ ಎಸೆದಿದ್ದ ಹಲವು ಘಟನೆಗಳನ್ನು ನೆನಪಿಸಿ ಅವರು ಈ ಮಾತುಗಳನ್ನು ಆಡಿದ್ದಾರೆ.
ಶಾಸನಸಭೆ ಚುನಾವಣೆಯಲ್ಲಿ ಬಿಜೆಪಿಯೆದುರು ಸೋತು ಅಧಿಕಾರ ಕಳೆದುಕೊಂಡ ನಂತರ ಟಿಎಮ್ಸಿ ದೊಡ್ಡ ಸಂಕಟಕ್ಕೆ ಸಿಲುಕಿದೆ. ರಾಜ್ಯ ಶಾಸನಸಭೆಯಲ್ಲಿದ್ದ 80 ಟಿಎಮ್ಸಿ ಸದಸ್ಯರ ಪೈಕಿ ಸುಮಾರು 60 ಮಂದಿ ಮಮತಾ ಬ್ಯಾನರ್ಜಿ ವಿರುದ್ಧ ದಂಗೆ ಎದ್ದಿದ್ದಷ್ಟೇ ಅಲ್ಲದೆ, ಲೋಕಸಭೆಯಲ್ಲಿದ್ದ ಅವರ ಪಕ್ಷದ ಸದಸ್ಯರ ಗುಂಪೊಂದು ಹೊರಬಂದು, ಈವರೆಗೆ ಯಾರೂ ಅಷ್ಟಾಗಿ ಅರಿಯದ ‘ನ್ಯಾಷನಲ್ ಕಾಂಗ್ರೆಸ್ ಪಾರ್ಟಿ ಆಫ್ ಇಂಡಿಯಾ’ (NCPI) ಪಕ್ಷವನ್ನು ಸೇರಿ ಬಿಜೆಪಿ ನೇತೃತ್ವದ ಆಡಳಿತಾರೂಢ ಎನ್ಡಿಎ ಒಕ್ಕೂಟಕ್ಕೆ ಬೆಂಬಲ ಸೂಚಿಸಿತ್ತು.
ರಿತಬ್ರತ ಬಂಡೋಪಾಧ್ಯಾಯ ನೇತೃತ್ವದ ಈ ಬಂಡಾಯ ಶಾಸಕರು ಆಡಳಿತಾರೂಢ ಬಿಜೆಪಿಯ ‘ಬಿ-ಟೀಮ್’ ಆಗಿ ಕೆಲಸ ಮಾಡುತ್ತಿದ್ದಾರೆ ಎಂದು ಟಿಎಮ್ಸಿ ಆರೋಪಿಸಿತ್ತು.
ಈ ದಂಗೆಯಿಂದಾಗಿ ಟಿಎಮ್ಸಿ ತೀವ್ರವಾಗಿ ನಜ್ಜುಗುಜ್ಜಾಗಿದ್ದು, ಮಮತಾ ಬ್ಯಾನರ್ಜಿ ಅವರ ಪಕ್ಷ ತಕ್ಷಣಕ್ಕೆ ಮತ್ತೆ ಚೇತರಿಸಿಕೊಳ್ಳುವುದು ಅತ್ಯಂತ ಕಷ್ಟಕರವಾಗಿದೆ. ಆದರೆ ಲೋಕಸಭೆಯ ಟಿಎಮ್ಸಿ ಬಂಡಾಯಗಾರರನ್ನು ಬಿಜೆಪಿಗೆ ಸೇರಿಸಿಕೊಳ್ಳುವ ಸಾಧ್ಯತೆಯ ಕುರಿತು ಕೇಳಿಬರುತ್ತಿರುವ ಮಾತುಗಳು ಕೇಸರಿ ಪಡೆಯ ಪಶ್ಚಿಮ ಬಂಗಾಳ ಘಟಕದಲ್ಲಿ ತಳಮಳವನ್ನುಂಟುಮಾಡಿದೆ.
ಲೋಕಸಭೆಯ ಬಂಡಾಯ ಟಿಎಮ್ಸಿ ಸಂಸದರನ್ನು ಪಕ್ಷಕ್ಕೆ ಸೇರಿಸಿಕೊಂಡರೆ, ಕೆಳಮನೆಯಲ್ಲಿ ಎನ್ಡಿಎ ಸಂಖ್ಯಾವಲ ಹೆಚ್ಚಿ ಹೊಸ ಕಾಯ್ದೆ-ಕಾನೂನುಗಳನ್ನು ಸುಲಭವಾಗಿ ಅಂಗೀಕರಿಸಬಹುದು ಎಂಬುದು ಬಿಜೆಪಿಯ ದೊಡ್ಡ ನಾಯಕರ ಲೆಕ್ಕಾಚಾರ. ಆದರೆ ಅವರನ್ನು ಬಿಜೆಪಿಗೆ ಸೇರಿಸಿಕೊಳ್ಳುವ ಈ ಆಲೋಚನೆಯು ಪಶ್ಚಿಮ ಬಂಗಾಳದ ರಾಜ್ಯ ಬಿಜೆಪಿ ನಾಯಕರ ನಿದ್ದೆಗೆಡಿಸಿದೆ.
ಟಿಎಮ್ಸಿ ಮತ್ತು ಮಮತಾ ಬ್ಯಾನರ್ಜಿ ಸರ್ಕಾರ ನೀಡಿದ ರಾಜಕೀಯ ಸವಾಲುಗಳ ನಡುವೆಯೂ ವರ್ಷಗಟ್ಟಲೆ ಪಕ್ಷವನ್ನು ಬೆಳೆಸಿದ ತಮ್ಮದೇ ಪದಾಧಿಕಾರಿಗಳ ಕನಸಿಗೆ ಇದರಿಂದ ತೊಂದರೆಯಾಗಬಹುದು ಎಂದು ಕೆಲವು ರಾಜ್ಯ ಬಿಜೆಪಿ ನಾಯಕರು ಹೆದರಿದ್ದಾರೆ. 2029ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯ ಸ್ಪರ್ಧಾಳುಗಳಾಗಲು ತಾವೇ ಸೂಕ್ತ ವ್ಯಕ್ತಿಗಳು ಎಂದು ಅವರು ಭಾವಿಸಿದ್ದಾರೆ.
ಒಂದು ವೇಳೆ ಬಂಡಾಯ ಟಿಎಮ್ಸಿ ಸಂಸದರನ್ನು ಬಿಜೆಪಿಗೆ ಸೇರಿಸಿಕೊಂಡರೆ, ಅವರು ಆಯಾ ಕ್ಷೇತ್ರಗಳಲ್ಲಿ ಬಿಜೆಪಿಯ ಲೋಕಸಭಾ ಟಿಕೆಟ್ಗಾಗಿ ಹಕ್ಕು ಮಂಡಿಸಬಹುದು ಎಂಬುದು ಅವರ ಕಳವಳ. ಅಲ್ಲದೆ, ಮಾಜಿ ಟಿಎಮ್ಸಿ ಸಂಸದರನ್ನು ಸೇರಿಸಿಕೊಳ್ಳುವುದರಿಂದ ಶಾಸನಸಭೆ ಚುನಾವಣೆಯ ಸಮಯದಲ್ಲಿ ಬಿಜೆಪಿ ಮತ್ತು ಮಮತಾ ಬ್ಯಾನರ್ಜಿ ಅವರ ಪಕ್ಷದ ನಡುವೆ ತಾವು ಕಾಯ್ದುಕೊಂಡಿದ್ದ ರಾಜಕೀಯ ವ್ಯತ್ಯಾಸವೇ ಅಳಿಸಿಹೋಗಬಹುದು ಎಂದು ಕೆಲವರು ವಾದಿಸುತ್ತಿದ್ದಾರೆ.
ಚರ್ಚೆ ಕಾವು ಪಡೆದುಕೊಳ್ಳುತ್ತಿದ್ದಂತೆ ಭಟ್ಟಾಚಾರ್ಯ ಅವರ ಮಾತುಗಳ ಧಾಟಿಯೂ ಬದಲಾಯಿತು. “ಒಳ್ಳೆಯ ಟಿಎಮ್ಸಿ” ಎಂದು ಅವರು ಆರಂಭದಲ್ಲಿ ಆಡಿದ ಮಾತುಗಳು ಮಮತಾ ಬ್ಯಾನರ್ಜಿ ಅವರ ಪಕ್ಷದ ಆಯ್ದ ನಾಯಕರಿಗೆ ಬಿಜೆಪಿಯಲ್ಲಿ ಜಾಗ ಸಿಗಬಹುದು ಎಂಬ ಅನುಮಾನಕ್ಕೆ ಹಾದಿಮಾಡಿಕೊಟ್ಟಿತ್ತು.
ಇದು ಬಿಜೆಪಿಯ ಕಾರ್ಯಕರ್ತರ ಪಡೆಯಲ್ಲಿ ಆತಂಕವನ್ನು ಹುಟ್ಟುಹಾಕಿತು. ಅಸಮಾಧಾನ ಹೆಚ್ಚಾಗುತ್ತಿದ್ದಂತೆ ತಮ್ಮ ನಿಲುವನ್ನು ತಿದ್ದುಕೊಂಡ ಅವರು, ಬಿಜೆಪಿ “ಒಳ್ಳೆಯ” ಮತ್ತು “ಕೆಟ್ಟ” ಟಿಎಮ್ಸಿ ನಡುವೆ ಯಾವುದೇ ವ್ಯತ್ಯಾಸ ಮಾಡುವುದಿಲ್ಲ ಹಾಗೂ ರಾಜ್ಯದಲ್ಲಿದ್ದದ್ದು “ಒಂದೇ ಟಿಎಮ್ಸಿ” ಮತ್ತು ಜನ ಅದನ್ನು ತಿರಸ್ಕರಿಸಿದ್ದಾರೆ ಎಂದು ಹೇಳಿದರು. ಬಿಜೆಪಿಯ “ತೃಣಮೂಲೀಕರಣ”ವನ್ನು ತಡೆಯುವುದಾಗಿ ಅವರು ಪದೇಪದೇ ಪಣ ತೊಟ್ಟಿದ್ದು, ಪಕ್ಷದ ಕಾರ್ಯಕರ್ತರಿಗೆ ಧೈರ್ಯ ತುಂಬುವ ಯತ್ನ ಎಂದೇ ನೋಡಲಾಗಿದೆ.
ಆದಾಗ್ಯೂ, ಟಿಎಮ್ಸಿಯ ಮೂವರು ಮಾಜಿ ರಾಜ್ಯಸಭಾ ಸದಸ್ಯರನ್ನು ಬಿಜೆಪಿ ಸೇರಿಸಿಕೊಂಡಿದ್ದು ಈ ಕಳವಳವನ್ನು ಮತ್ತಷ್ಟು ಹೆಚ್ಚಿಸಿದೆ. ಅವರಲ್ಲಿ ಪ್ರಕಾಶ್ ಚಿಕ್ ಬಾರೈಕ್ ಕೂಡ ಒಬ್ಬರು. ಶಾಸನಸಭೆ ಚುನಾವಣೆಯ ಪ್ರಚಾರದ ಸಮಯದಲ್ಲಿ ಅಂದಿನ ರಾಜ್ಯ ಬಿಜೆಪಿ ಅಧ್ಯಕ್ಷ ಸುಕಾಂತ ಮಜುಂದಾರ್ ಅವರು ಈ ಬಾರೈಕ್ ವಿರುದ್ಧ ಭ್ರಷ್ಟಾಚಾರದ ಆರೋಪಗಳನ್ನು ಮಾಡಿ ಪದೇಪದೇ ವಾಗ್ದಾಳಿ ನಡೆಸಿದ್ದರು.
ಬಾರೈಕ್ ಅವರನ್ನು ಬಿಜೆಪಿಗೆ ಸೇರಿಸಿಕೊಂಡು, ತದನಂತರ ಅವರನ್ನು ಮತ್ತೆ ರಾಜ್ಯಸಭೆಗೆ ಆಯ್ಕೆ ಮಾಡಿದ್ದು, ಮಾಜಿ ಟಿಎಮ್ಸಿ ನಾಯಕರನ್ನು ಸೇರಿಸಿಕೊಳ್ಳುವುದರಿಂದ ಮಮತಾ ಬ್ಯಾನರ್ಜಿ ಆಡಳಿತದ ವಿರುದ್ಧ ಕೇಸರಿ ಪಡೆ ಕಾಯ್ದುಕೊಳ್ಳಲು ಬಯಸಿದ್ದ ರಾಜಕೀಯ ವ್ಯತ್ಯಾಸವು – ಆಳುಗರ ವಿಚಾರದಲ್ಲಾಗಲಿ ಅಥವಾ ಅವರ ಅಭ್ಯಾಸಗಳ ವಿಚಾರದಲ್ಲಾಗಲಿ – ತೀರಾ ಸಡಿಲವಾಗಬಹುದು ಎಂಬ ಕಳವಳವನ್ನು ಗಟ್ಟಿಗೊಳಿಸಿದೆ.
