‘ಗಾಜಾವನ್ನು ನಾವೇ ನಿಯಂತ್ರಿಸುತ್ತೇವೆ’: ಇಸ್ರೇಲ್ ಪ್ರಧಾನಿ ಪ್ರಮುಖ ಘೋಷಣೆ

ಟೆಲ್ ಅವೀವ್: ಗಾಜಾದಲ್ಲಿ ಬಾಂಬ್ ದಾಳಿ ನಿಲ್ಲಿಸುವಂತೆ ಫ್ರಾನ್ಸ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಕರೆ ನೀಡಿರುವ ಕುರಿತು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ತೀವ್ರವಾಗಿ ಪ್ರತಿಕ್ರಿಯಿಸಿದ್ದಾರೆ.

ನೆತನ್ಯಾಹು ಅವರು ಫ್ರೆಂಚ್ ಅಧ್ಯಕ್ಷರ ಹೆಸರನ್ನು ಉಲ್ಲೇಖಿಸದೆ ಪ್ರಮುಖ ಹೇಳಿಕೆಗಳನ್ನು ನೀಡಿದರು. “ವಿಶ್ವ ನಾಯಕರು ಹಮಾಸ್ ಸಂಘಟನೆಯನ್ನು ಖಂಡಿಸಬೇಕು, ಇಸ್ರೇಲ್ ದೇಶವನ್ನಲ್ಲ” ಎಂದು ಅವರು ಹೇಳಿದರು. “ಇಂದು ಗಾಜಾದಲ್ಲಿ ಹಮಾಸ್ ಎಸಗುತ್ತಿರುವ ಹಿಂಸೆಯನ್ನು ನಾಳೆ ಪ್ಯಾರಿಸ್ ಮತ್ತು ನ್ಯೂಯಾರ್ಕ್ ಸೇರಿದಂತೆ ವಿಶ್ವದ ಎಲ್ಲಿಯಾದರೂ ಎಸಗಬಲ್ಲದು” ಎಂದು ನೆತನ್ಯಾಹು ಹೇಳಿದರು.

ಮಾನವೀಯ ನೆರವಿಗಾಗಿ ಕಾಲಕಾಲಕ್ಕೆ ಗಾಜಾ ಮೇಲಿನ ದಾಳಿಯನ್ನು ನಿಲ್ಲಿಸಲು ಸಿದ್ಧರಿದ್ದೇವೆ ಆದರೆ ದಾಳಿಯನ್ನು ಸಂಪೂರ್ಣವಾಗಿ ನಿಲ್ಲಿಸುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಯುದ್ಧದ ಅಂತ್ಯದ ನಂತರ ಗಾಜಾ ಆಡಳಿತವನ್ನು ತಾನೇ ನಿಯಂತ್ರಿಸುವುದಾಗಿ ಅವರು ಹೇಳಿದರು.

ಗಾಜಾ ಗಡಿಯಲ್ಲಿರುವ ಇಸ್ರೇಲಿ ಗ್ರಾಮಗಳ ಮೇಯರ್‌ಗಳೊಂದಿಗೆ ನಡೆಸಿದ ಸಭೆಯಲ್ಲಿ ನೆತನ್ಯಾಹು ಈ ವಿವರಗಳನ್ನು ಬಹಿರಂಗಪಡಿಸಿದ್ದಾರೆ. ಗಾಜಾವನ್ನು ನಿಯಂತ್ರಿಸಲು ಇತರ ದೇಶಗಳ ಸೈನ್ಯದ ಸಹಾಯ ಅಗತ್ಯವಿಲ್ಲ ಎಂದು ಅವರು ಹೇಳಿದರು.