ಇಸ್ರೇಲ್‌ – ಗಾಜಾ | ‘ಮಾನವೀಯತೆ’ ಮೇಲಿನ ದಾಳಿಗೆ 250 ದಿನ

ಗಾಜಾ: ನಿರಂಕುಶ ಪ್ರಭುತ್ವ ಬಳಸಿ ಅಕ್ರಮವಾಗಿ ಗಾಜಾದ ಮೇಲೆ ಇಸ್ರೇಲ್ ನಡೆಸಿದ ದಾಳಿ ಇಂದಿಗೆ 250 ದಿನಗಳನ್ನು ತಲುಪಿದೆ. ಈ ದಾಳಿಯಲ್ಲಿ ಒಟ್ಟು 37,202 ಜನರು ಸಾವನ್ನಪ್ಪಿದ್ದಾರೆ.

ಅವರಲ್ಲಿ ಅರ್ಧದಷ್ಟು ಮಕ್ಕಳು (15,694 ಜನರು), 498 ಆರೋಗ್ಯ ಕಾರ್ಯಕರ್ತರು ಮತ್ತು 150 ಪತ್ರಕರ್ತರು. ಇದುವರೆಗೆ 33 ಜನರು ಹಸಿವಿನಿಂದ ಸಾವನ್ನಪ್ಪಿದ್ದಾರೆ ಎಂದು ಗಾಜಾ ಆರೋಗ್ಯ ಸಚಿವಾಲಯದ ಅಧಿಕೃತ ವರದಿ ಬಹಿರಂಗಪಡಿಸಿದೆ. 70ರಷ್ಟು ಮಹಿಳೆಯರು ಮತ್ತು ಮಕ್ಕಳು.

ಇಸ್ರೇಲ್ ಇದುವರೆಗೆ 79,000 ಟನ್ ಸ್ಫೋಟಕಗಳನ್ನು ಗಾಜಾದ ಮೇಲೆ ಬೀಳಿಸಿದೆ. ಪ್ರಮುಖ ಆಸ್ಪತ್ರೆಗಳು ಮತ್ತು ಪೂಜಾ ಸ್ಥಳಗಳು ನಾಶವಾದವು. 206 ಸಂರಕ್ಷಿತ ಕಟ್ಟಡಗಳೂ ನಾಶವಾಗಿವೆ. 17,000 ಮಕ್ಕಳು ತಮ್ಮ ಪೋಷಕರನ್ನು ಕಳೆದುಕೊಂಡಿದ್ದಾರೆ.

ಗಾಜಾದ ಮೇಲೆ ಇಸ್ರೇಲ್ ದಾಳಿ ನಡೆಸಿದ ಮೊದಲ ತಿಂಗಳುಗಳಲ್ಲಿ ಲೈಂಗಿಕ ಹಿಂಸಾಚಾರವೂ ನಡೆಯಿತು ಎಂದು ಯುಎನ್ (ಯುನೈಟೆಡ್ ನೇಷನ್ಸ್) ತಜ್ಞರು ಹೇಳಿದ್ದಾರೆ. ವಿಶ್ವಸಂಸ್ಥೆಯ ವರದಿಯು ಇಸ್ರೇಲ್‌ನ ಈ ದಾಳಿಯನ್ನು ಮಾನವೀಯತೆಯ ವಿರುದ್ಧದ ಅಪರಾಧ ಎಂದು ಬಣ್ಣಿಸಿದೆ. ಇಸ್ರೇಲ್ ಆರೋಪಗಳನ್ನು ನಿರಾಕರಿಸಿದೆ.

ಗಾಜಾದಲ್ಲಿ ತಕ್ಷಣದ ಕದನ ವಿರಾಮಕ್ಕಾಗಿ ಹಮಾಸ್‌ನ ಪ್ರಸ್ತಾವನೆಯನ್ನು ಇಸ್ರೇಲ್ ಪರಿಗಣಿಸಲಿದೆ ಎಂದು US ವಿದೇಶಾಂಗ ಕಾರ್ಯದರ್ಶಿ ಆಂಥೋನಿ ಬ್ಲಿಂಕೆನ್ ಹೇಳಿದ್ದಾರೆ. ಸಂಪೂರ್ಣ ಕದನ ವಿರಾಮ ಮತ್ತು ಗಾಜಾದಿಂದ ಇಸ್ರೇಲಿ ಸೇನೆಯನ್ನು ಸಂಪೂರ್ಣವಾಗಿ ಹಿಂತೆಗೆದುಕೊಳ್ಳುವುದು ಮುಂತಾದ ಪ್ರಸ್ತಾವನೆಗಳನ್ನು ಹಮಾಸ್ ಮುಂದಿಟ್ಟಿದ್ದು, ಕೆಲವು ಪ್ರಸ್ತಾವನೆಗಳು ಕಾರ್ಯಸಾಧುವಲ್ಲ ಎಂದು ಇಸ್ರೇಲ್ ಹೇಳಿದೆ.