ವೈಮಾನಿಕ ದಾಳಿಗೆ ಇರಾನ್ ಮಾಜಿ ಅಧ್ಯಕ್ಷ ಮಹಮೂದ್ ಅಹಮದಿನೆಜಾದ್ ಸಾ*ವು

ಅಮೆರಿಕ ಮತ್ತು ಇಸ್ರೇಲ್ ಜಂಟಿ ವೈಮಾನಿಕ ದಾಳಿಗಳ ಮಧ್ಯೆ ಇರಾನ್ ರಾಜಕೀಯದಲ್ಲಿ ಮತ್ತೊಂದು ಭಾರೀ ಸಂಚಲನ ಉಂಟಾಗಿದೆ. ಇರಾನ್‌ನ ಮಾಜಿ ಅಧ್ಯಕ್ಷ ಮಹಮೂದ್ ಅಹಮದಿನೆಜಾದ್ (69) ಅವರು ರಾಜಧಾನಿ ಟೆಹ್ರಾನ್ನಲ್ಲಿ ನಡೆದ ವೈಮಾನಿಕ ದಾಳಿಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಇರಾನ್‌ನ Islamic Labour News Agency (ILNA) ವರದಿ ಮಾಡಿದೆ.

ನಿವಾಸದ ಮೇಲೆಯೇ ದಾಳಿ
ಟೆಹ್ರಾನ್‌ನಲ್ಲಿರುವ ಅಹಮದಿನೆಜಾದ್ ಅವರ ನಿವಾಸವನ್ನು ಗುರಿಯಾಗಿಸಿಕೊಂಡು ಈ ದಾಳಿ ನಡೆದಿದ್ದು, ದಾಳಿಯ ಸಂದರ್ಭದಲ್ಲಿ ಅವರು ತಮ್ಮ ಅಂಗರಕ್ಷಕನೊಂದಿಗೆ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ವರದಿ ತಿಳಿಸಿದೆ. ಆದರೆ ಈ ಬಗ್ಗೆ ಇರಾನ್ ಸರ್ಕಾರದಿಂದ ಇನ್ನೂ ಅಧಿಕೃತ ದೃಢೀಕರಣ ಹೊರಬಂದಿಲ್ಲ. ಹೀಗಾಗಿ ಘಟನೆಯ ನಿಖರ ವಿವರಗಳು ಸ್ಪಷ್ಟವಾಗಬೇಕಿದೆ.

ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ತಾರಕಕ್ಕೆ
ಇತ್ತೀಚಿನ ದಿನಗಳಲ್ಲಿ ಅಮೆರಿಕ–ಇಸ್ರೇಲ್ ಪಡೆಗಳು ಇರಾನ್‌ನ ಸೈನಿಕ ಮತ್ತು ತಂತ್ರಜ್ಞಾನದ ಪ್ರಮುಖ ಕೇಂದ್ರಗಳನ್ನು ಗುರಿಯಾಗಿಸಿಕೊಂಡು ನಿರಂತರ ದಾಳಿ ನಡೆಸುತ್ತಿರುವುದಾಗಿ ಆರೋಪಗಳಿವೆ. ಈ ಹಿನ್ನೆಲೆದಲ್ಲಿ ಮಾಜಿ ರಾಷ್ಟ್ರಪತಿ ಸಾವಿನ ಸುದ್ದಿ ಹೊರಬಿದ್ದಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಗಂಭೀರಗೊಳಿಸಿದೆ.

ವಿವಾದಾತ್ಮಕ ನಾಯಕತ್ವದ ಅಂತ್ಯ?
2005ರಿಂದ 2013ರವರೆಗೆ ಇರಾನ್ ಅಧ್ಯಕ್ಷರಾಗಿದ್ದ ಅಹಮದಿನೆಜಾದ್, ತಮ್ಮ ಪ್ರಖರ ಭಾಷಣಗಳು ಹಾಗೂ ಪಾಶ್ಚಾತ್ಯ ರಾಷ್ಟ್ರಗಳ ವಿರುದ್ಧದ ಕಠಿಣ ನಿಲುವಿನಿಂದಾಗಿ ಜಾಗತಿಕವಾಗಿ ಗಮನ ಸೆಳೆದಿದ್ದರು. ಪರಮಾಣು ಕಾರ್ಯಕ್ರಮದ ವಿಷಯದಲ್ಲಿ ಕಟ್ಟುನಿಟ್ಟಿನ ನೀತಿ ಅನುಸರಿಸಿದ್ದ ಅವರು, ಅದರ ಪರಿಣಾಮವಾಗಿ ಇರಾನ್ ಮೇಲೆ ಹಲವು ಆರ್ಥಿಕ ನಿರ್ಬಂಧಗಳು ಜಾರಿಯಾಗಿದ್ದವು.

ಇಸ್ರೇಲ್ ವಿರುದ್ಧದ ಕಟು ಟೀಕೆಗಳು ಹಾಗೂ ಪಾಶ್ಚಾತ್ಯ ರಾಷ್ಟ್ರಗಳ ವಿರುದ್ಧದ ತೀಕ್ಷ್ಣ ಹೇಳಿಕೆಗಳಿಂದಾಗಿ ಅವರ ಆಡಳಿತಾವಧಿಯಲ್ಲಿ ಇರಾನ್ ಜಾಗತಿಕವಾಗಿ ಏಕಾಂಗಿತನಕ್ಕೆ ಒಳಗಾದಿತ್ತು. ಆಡಳಿತದ ಕೊನೆಯ ಹಂತದಲ್ಲಿ ಅವರ ವಿರುದ್ಧವೇ ಸಂಪ್ರದಾಯವಾದಿ ವಲಯದಲ್ಲಿ ಅಸಮಾಧಾನ ವ್ಯಕ್ತವಾಗಿತ್ತು.