ಇಸ್ರೇಲ್-ಗಾಝಾ ಯುದ್ಧ: ಇಂದಿಗೆ (ಅ. 7) ಎರಡು ವರ್ಷ ಪೂರ್ಣ; ಕೊನೆಗೊಳ್ಳದ ಟ್ರಂಪ್ ಶಾಂತಿ ಮಾತುಕತೆ

ಅಕ್ಟೋಬರ್ 7, 2023ರ ದಿನವನ್ನು ಯಾರೂ ಮರೆಯಲು ಸಾಧ್ಯವಿಲ್ಲ. ಅದು ಇಡೀ ಜಗತ್ತು ಬೆಚ್ಚಿಬಿದ್ದ ದಿನ. ಹಮಾಸ್ ಉಗ್ರರು ಅನಿರೀಕ್ಷಿತವಾಗಿ ಇಸ್ರೇಲ್‌ಗೆ ನುಗ್ಗಿ 1,200 ಜನರನ್ನು ಹತ್ಯೆ ಮಾಡಿ, ಸುಮಾರು 251 ಕ್ಕೂ ಹೆಚ್ಚು ಜನರನ್ನು ಒತ್ತೆಯಾಳಾಗಿ ಕರೆದುಕೊಂಡು ಹೋಗಿದ್ದರು.

ಈ ಘಟನೆಯು ಇಸ್ರೇಲ್ ಮಾತ್ರವಲ್ಲದೆ ಇಡೀ ಜಗತ್ತನ್ನೇ ಆತಂಕಕ್ಕೆ ತಳ್ಳಿತು. ಇದಕ್ಕೆ ಇಸ್ರೇಲ್ ಸಹ ತಕ್ಷಣವೇ ಪ್ರತಿಕ್ರಿಯಿಸಿ, ಹಮಾಸ್ ಭಯೋತ್ಪಾದಕರನ್ನೇ ಗುರಿಯಾಗಿಟ್ಟುಕೊಂಡು ಗಾಝಾ ಮೇಲೆ ಭೀಕರ ದಾಳಿಗಳನ್ನು ನಡೆಸಿತು. ಹಮಾಸ್‌ನ ಉನ್ನತ ನಾಯಕರೆಲ್ಲರನ್ನು ನಿರ್ಮೂಲನೆ ಮಾಡಲಾಯಿತು. ಈ ಸಂಘರ್ಷದಲ್ಲಿ ನೂರಾರು ಪ್ಯಾಲೆಸ್ತೀನಿಯರು ಸಹ ಪ್ರಾಣ ಕಳೆದುಕೊಂಡರು. ಆ ದಿನ ಪ್ರಾರಂಭವಾದ ಯುದ್ಧವು ಇಂದಿಗೂ ಮುಂದುವರಿದಿದೆ. ಇಂದಿಗೆ (07-10-2025) ಗಾಝಾ-ಇಸ್ರೇಲ್ ಯುದ್ಧ ಪ್ರಾರಂಭವಾಗಿ ಎರಡು ವರ್ಷಗಳು ಪೂರ್ಣಗೊಂಡಿವೆ. ಗಾಝಾ ಪ್ರಸ್ತುತ ಶವಗಳ ದಿಬ್ಬವಾಗಿ ಮಾರ್ಪಟ್ಟಿದೆ ಮತ್ತು ಎಲ್ಲೆಡೆ ಬಿದ್ದ ಕಟ್ಟಡಗಳಿಂದ ಕಳೆಗುಂದಿದೆ.

ಪ್ರಸ್ತುತ, ಟ್ರಂಪ್ ಅವರು ಶಾಂತಿ ಒಪ್ಪಂದಕ್ಕಾಗಿ 20 ಅಂಶಗಳ ಯೋಜನೆಯನ್ನು ಪ್ರಸ್ತಾಪಿಸಿದ್ದಾರೆ. ಇದಕ್ಕೆ ಇಸ್ರೇಲ್ ಮತ್ತು ಹಮಾಸ್ ಪ್ರಸ್ತುತ ತಾತ್ವಿಕವಾಗಿ ಸಮ್ಮತಿ ಸೂಚಿಸಿವೆ. ಎಲ್ಲಾ ಒತ್ತೆಯಾಳುಗಳನ್ನು ಒಂದೇ ಬಾರಿಗೆ ಬಿಡುಗಡೆ ಮಾಡಲು ಹಮಾಸ್ ಒಪ್ಪಿಕೊಂಡಿದೆ. ಅದೇ ರೀತಿ, ಪ್ಯಾಲೆಸ್ತೀನಿಯನ್ ಖೈದಿಗಳನ್ನು ಬಿಡುಗಡೆ ಮಾಡಲು ಇಸ್ರೇಲ್ ಕೂಡ ಒಪ್ಪಿಕೊಂಡಿದೆ. ಸೋಮವಾರ ಈಜಿಪ್ಟ್‌ನಲ್ಲಿ ಶಾಂತಿ ಮಾತುಕತೆಗಳು ನಡೆದವು. ಆದರೆ, ಇಲ್ಲಿಯವರೆಗೆ ಹಮಾಸ್ ಇಸ್ರೇಲಿ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿಲ್ಲ.

ಇನ್ನೊಂದೆಡೆ, ಕಳೆದ ಭಾನುವಾರ ಸಂಜೆ 6 ಗಂಟೆಯವರೆಗೆ ಹಮಾಸ್‌ಗೆ ಗಡುವು (ಡೆಡ್‌ಲೈನ್) ನೀಡಲಾಗಿತ್ತು. ಆ ಸಮಯದೊಳಗೆ ಶಾಂತಿ ಒಪ್ಪಂದಕ್ಕೆ ಒಪ್ಪದಿದ್ದರೆ ನರಕವನ್ನು ನೋಡಬೇಕಾಗುತ್ತದೆ ಎಂದು ತೀವ್ರ ಎಚ್ಚರಿಕೆ ನೀಡಲಾಗಿತ್ತು. ಆದರೆ, ಆ ಗಡುವು ಮುಗಿದಿದೆ. ಎರಡು ವರ್ಷಗಳೇ ಪೂರ್ಣಗೊಂಡಿವೆ. ಆದರೆ ಒತ್ತೆಯಾಳುಗಳು ಮಾತ್ರ ಬಿಡುಗಡೆಯಾಗಿಲ್ಲ. ಟ್ರಂಪ್ ಅವರ ಶಾಂತಿ ಮಾತುಕತೆಗಳು ಎಷ್ಟರ ಮಟ್ಟಿಗೆ ಫಲ ನೀಡುತ್ತವೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಈ ಮಧ್ಯೆ, ಅಂತರರಾಷ್ಟ್ರೀಯ ಮಧ್ಯವರ್ತಿಗಳ ಪ್ರಯತ್ನದಿಂದಾಗಿ ಹಮಾಸ್ ಕೆಲವೇ ಕೆಲವು ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಿದೆ. ಹಾಗೆಯೇ ಇಸ್ರೇಲ್ ಕೂಡ ಪ್ಯಾಲೆಸ್ತೀನಿಯನ್ ಖೈದಿಗಳನ್ನು ಬಿಡುಗಡೆ ಮಾಡಿದೆ. ಇಸ್ರೇಲ್ ಎಲ್ಲಾ ಒತ್ತೆಯಾಳುಗಳನ್ನು ಒಂದೇ ಬಾರಿಗೆ ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸುತ್ತಿದೆ. ಆದರೆ ಹಮಾಸ್ ಇದಕ್ಕೆ ಒಪ್ಪುತ್ತಿಲ್ಲ. ಇದರಿಂದಾಗಿ ಯುದ್ಧ ಮುಂದುವರಿಯುತ್ತಲೇ ಇದೆ. ಇದೀಗ ಟ್ರಂಪ್ ಅವರು ಸ್ವತಃ ಕಣಕ್ಕಿಳಿದು ಶಾಂತಿಗೆ ಮುನ್ನುಡಿ ಬರೆದಿದ್ದಾರೆ. ಈ ಮಾತುಕತೆಗಳು ಎಷ್ಟು ಪ್ರಯೋಜನ ನೀಡುತ್ತವೆ ಎಂಬುದನ್ನು ಕಾದು ನೋಡಬೇಕಿದೆ.