ಅಮೆರಿಕ ಸುಂಕದ ಬೆದರಿಕೆಗೆ ಚೀನಾ ತಿರುಗೇಟು: ‘ನಾವು ಯಾರೊಂದಿಗೆ ವ್ಯವಹರಿಸಬೇಕೆನ್ನುವುದನ್ನು ಇನ್ನೊಬ್ಬರು ನಿರ್ಧರಿಸಲು ಸಾಧ್ಯವಿಲ್ಲ’

ಬೀಜಿಂಗ್: ರಷ್ಯಾ ತೈಲ ಖರೀದಿದಾರರ ಮೇಲೆ ಸುಂಕ ವಿಧಿಸುವ ಅಮೆರಿಕದ ಪ್ರಸ್ತಾವನೆಗೆ ಚೀನಾ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದೆ. ಇಂಧನ ಖರೀದಿಯ ನಿರ್ಧಾರಗಳು ಸಾರ್ವಭೌಮ ಮತ್ತು ತಮ್ಮ ಇಂಧನ ಸ್ವಾತಂತ್ರ್ಯದ ಬಗ್ಗೆ ರಾಜಿ ಮಾಡಿಕೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಚೀನಾವು ಅಮೆರಿಕದ ಈ ಬೆದರಿಕೆಯನ್ನು ತಿರಸ್ಕರಿಸಿದ್ದು, “ನಮ್ಮ ಇಂಧನ ಖರೀದಿ ನಿರ್ಧಾರಗಳು ಸಾರ್ವಭೌಮವಾಗಿವೆ ಮತ್ತು ನಮ್ಮ ಇಂಧನ ಸ್ವಾತಂತ್ರ್ಯವನ್ನು ರಾಜಿ ಮಾಡಿಕೊಳ್ಳುವುದಿಲ್ಲ,” ಎಂದು ಹೇಳಿದೆ. ರಷ್ಯಾ-ಉಕ್ರೇನ್ ಯುದ್ಧದ ಬಳಿಕ ಅಮೆರಿಕ ಮತ್ತು ಪಾಶ್ಚಿಮಾತ್ಯ ರಾಷ್ಟ್ರಗಳು ರಷ್ಯಾ ಮೇಲೆ ನಿರ್ಬಂಧಗಳನ್ನು ಹೇರಿದ್ದವು. ಆದರೆ, ಭಾರತ ಮತ್ತು ಚೀನಾದಂತಹ ದೇಶಗಳು ರಷ್ಯಾದಿಂದ ತೈಲ ಖರೀದಿಯನ್ನು ಮುಂದುವರಿಸಿದ್ದವು.

ಅಮೆರಿಕದ ಈ ನಡೆಯು ಚೀನಾದ ಇಂಧನ ಭದ್ರತೆ ಮತ್ತು ಆರ್ಥಿಕ ಸಾರ್ವಭೌಮತ್ವದ ಮೇಲೆ ನೇರ ದಾಳಿ ಎಂದು ವಿಶ್ಲೇಷಿಸಲಾಗುತ್ತಿದೆ. ಚೀನಾ ಇತ್ತೀಚೆಗೆ ರಷ್ಯಾದಿಂದ ಕಡಿಮೆ ದರದಲ್ಲಿ ತೈಲ ಖರೀದಿಸುತ್ತಿದ್ದು, ಇದು ಅದರ ಆರ್ಥಿಕತೆಗೆ ಲಾಭದಾಯಕವಾಗಿದೆ. ಅಮೆರಿಕದ ಸುಂಕದ ಬೆದರಿಕೆಯು ರಷ್ಯಾ ಜೊತೆಗಿನ ಚೀನಾದ ಬಾಂಧವ್ಯವನ್ನು ದುರ್ಬಲಗೊಳಿಸುವ ಪ್ರಯತ್ನ ಎಂದು ಬೀಜಿಂಗ್ ಭಾವಿಸಿದೆ.

ತಮ್ಮ ಆರ್ಥಿಕ ಮತ್ತು ರಾಜಕೀಯ ನಿರ್ಧಾರಗಳ ಮೇಲೆ ಯಾವುದೇ ಬಾಹ್ಯ ಶಕ್ತಿಗಳ ಹಸ್ತಕ್ಷೇಪವನ್ನು ಸಹಿಸುವುದಿಲ್ಲ ಎಂದು ಚೀನಾ ಈ ಹೇಳಿಕೆಯ ಮೂಲಕ ಸ್ಪಷ್ಟ ಸಂದೇಶ ರವಾನಿಸಿದೆ.