ರಸಾಯನಶಾಸ್ತ್ರದಲ್ಲಿ ಮೂವರಿಗೆ ನೊಬೆಲ್ ಪ್ರಶಸ್ತಿ: ಮೆಟಲ್ ಆರ್ಗಾನಿಕ್ ಫ್ರೇಮ್‌ವರ್ಕ್ಸ್‌ (MOFs) ಅಭಿವೃದ್ಧಿಗಾಗಿ ಗೌರವ

ಸ್ಟಾಕ್‌ಹೋಮ್: ಈ ವರ್ಷದ ರಸಾಯನಶಾಸ್ತ್ರ ನೊಬೆಲ್ ಪ್ರಶಸ್ತಿಯನ್ನು ಮೂವರು ವಿಜ್ಞಾನಿಗಳಿಗೆ ಘೋಷಿಸಲಾಗಿದೆ. ಮೆಟಲ್ ಆರ್ಗಾನಿಕ್ ಫ್ರೇಮ್‌ವರ್ಕ್ಸ್‌ (ಲೋಹ-ಸೇಂದ್ರಿಯ ಚೌಕಟ್ಟುಗಳು) ಅಭಿವೃದ್ಧಿಪಡಿಸಿದ್ದಕ್ಕಾಗಿ ಸುಸುಮು ಕಿತಗವಾ, ರಿಚರ್ಡ್ ರಾಬ್ಸನ್ ಮತ್ತು ಒಮರ್ ಎಂ. ಯಾಗಿ ಅವರಿಗೆ ಈ ಪುರಸ್ಕಾರವನ್ನು ಪ್ರಕಟಿಸಲಾಗಿದೆ.

ಈ ಬಗ್ಗೆ ರಾಯಲ್ ಸ್ವೀಡಿಷ್ ಅಕಾಡೆಮಿ ಆಫ್ ಸೈನ್ಸಸ್ ಬುಧವಾರ ಪತ್ರಿಕಾ ಪ್ರಕಟಣೆ ಬಿಡುಗಡೆ ಮಾಡಿದೆ. ಈ ವಿಜ್ಞಾನಿಗಳು ಅನಿಲಗಳು ಮತ್ತು ಇತರ ರಾಸಾಯನಿಕಗಳು ಹರಿಯಲು ಸಾಧ್ಯವಾಗುವ ದೊಡ್ಡ ಖಾಲಿ ಜಾಗಗಳನ್ನು ಹೊಂದಿರುವ ಹೊಸ ರೀತಿಯ ಆಣ್ವಿಕ ನಿರ್ಮಾಣಗಳನ್ನು (Molecular Constructions) ಅಭಿವೃದ್ಧಿಪಡಿಸಿದ್ದಾರೆ ಎಂದು ನೊಬೆಲ್ ಅಕಾಡೆಮಿ ತಿಳಿಸಿದೆ.

ಮೆಟಲ್ ಆರ್ಗಾನಿಕ್ ಫ್ರೇಮ್‌ವರ್ಕ್ಸ್‌ (MOFs) ಎಂದು ಕರೆಯಲ್ಪಡುವ ಈ ರಚನೆಗಳನ್ನು ಮರುಭೂಮಿಯ ಗಾಳಿಯಿಂದ ನೀರನ್ನು ಸಂಗ್ರಹಿಸಲು, ವಿಷಕಾರಿ ಅನಿಲಗಳನ್ನು ಸಂಗ್ರಹಿಸಿಡಲು, ಅಥವಾ ರಾಸಾಯನಿಕ ಕ್ರಿಯೆಗಳನ್ನು ವೇಗವರ್ಧಿಸಲು ಸಹ ಬಳಸಬಹುದು. 1989 ರಲ್ಲಿ, ರಿಚರ್ಡ್ ರಾಬ್ಸನ್ ಮೊದಲು ಅಣುಗಳ ಆಂತರಿಕ ಗುಣಲಕ್ಷಣಗಳನ್ನು ನವೀನ ರೀತಿಯಲ್ಲಿ ಬಳಸುವುದನ್ನು ಪರೀಕ್ಷಿಸಿದರು.

ಆದರೆ, ಆ ಆಣ್ವಿಕ ನಿರ್ಮಾಣವು ಅಸ್ಥಿರವಾಗಿದ್ದು, ಸುಲಭವಾಗಿ ಒಡೆಯುತ್ತಿತ್ತು. ನಂತರ, ಸುಸುಮು ಕಿತಗವಾ ಮತ್ತು ಒಮರ್ ಯಾಗಿ ಅವರು ಈ ವಿಧಾನಕ್ಕೆ ಒಂದು ಬಲವಾದ ಅಡಿಪಾಯ ಹಾಕಿದರು. ಕಿತಗವಾ ಅವರು ಅನಿಲಗಳು ಆ ನಿರ್ಮಾಣಗಳ ಮೂಲಕ ಒಳಗೆ ಮತ್ತು ಹೊರಗೆ ಹರಿಯಬಲ್ಲವು ಎಂದು ಸಾಬೀತುಪಡಿಸಿದರು. ಆ ಫ್ರೇಮ್‌ವರ್ಕ್‌ಗಳಿಗೆ ಅಗತ್ಯವಾದ ಹೊಸ ಗುಣಲಕ್ಷಣಗಳನ್ನು ಒದಗಿಸುವ ಮೂಲಕ ಅವುಗಳನ್ನು ಹೆಚ್ಚು ಸ್ಥಿರವಾಗಿ ಮತ್ತು ದೃಢವಾಗಿ ಇರುವಂತೆ ಯಾಗಿ ಅವರು ವಿನ್ಯಾಸಗೊಳಿಸಿದರು.