ಮತ್ತೊಂದು ಸುಂಕದ ಬರೆ ಎಳೆದ ಟ್ರಂಪ್‌: ಭಾರತದ ಮೇಲೆ 50% ಸುಂಕ ವಿಧಿಸಿದ ‌ʼಮೈ ಫ್ರೆಂಡ್‌ ಡೊಲಾಂಡ್ʼ

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತಷ್ಟು ಉಗ್ರರಾಗಿದ್ದಾರೆ. ‘ಆತ್ಮೀಯ ಮಿತ್ರ ಪ್ರಧಾನಿ ನರೇಂದ್ರ ಮೋದಿ’ ಅವರ ಮೌನದ ಪರಿಣಾಮವೋ ಏನೋ, ಟ್ರಂಪ್ ಸುಂಕದ ಮೇಲೆ ಸುಂಕಗಳನ್ನು ಹೇರುತ್ತಿದ್ದಾರೆ. ಭಾರತದ ರಫ್ತುಗಳ ಮೇಲೆ ಹೆಚ್ಚುವರಿ 25% ಸುಂಕವನ್ನು ಹೆಚ್ಚಿಸುವುದಾಗಿ ಟ್ರಂಪ್ ಬುಧವಾರ ಘೋಷಿಸಿದ್ದಾರೆ. ಈ ಕುರಿತು ಅವರು ಕಾರ್ಯಕಾರಿ ಆದೇಶಕ್ಕೆ ಸಹಿ ಹಾಕಿದ್ದಾರೆ. ಜುಲೈ 30 ರಂದು ಘೋಷಿಸಿದ 25% ಸುಂಕದೊಂದಿಗೆ, ಇತ್ತೀಚಿನ ಹೆಚ್ಚಳದೊಂದಿಗೆ ಒಟ್ಟು ಸುಂಕಗಳು 50% ಕ್ಕೆ ತಲುಪಿವೆ. ಇದರಿಂದ ಭಾರತದಿಂದ ಅಮೆರಿಕಕ್ಕೆ ಆಮದು ಮಾಡಿಕೊಳ್ಳುವ ಉತ್ಪನ್ನಗಳ ಮೇಲೆ ಭಾರಿ ಸುಂಕಗಳು ಜಾರಿಗೆ ಬರಲಿವೆ. ರಷ್ಯಾದಿಂದ ತೈಲ ಖರೀದಿಯನ್ನು ಮುಂದುವರಿಸಿದ ಕಾರಣ ಈ ಕ್ರಮ ಕೈಗೊಂಡಿರುವುದಾಗಿ ಟ್ರಂಪ್ ತಿಳಿಸಿದ್ದಾರೆ.

ಮೊದಲ 25% ಸುಂಕ ಆಗಸ್ಟ್ 7 ರಿಂದ ಮತ್ತು ಇತ್ತೀಚೆಗೆ ಘೋಷಿಸಿದ 25% ಸುಂಕ ಆಗಸ್ಟ್ 27ರಿಂದ ಜಾರಿಗೆ ಬರಲಿದೆ. ಭಾರತ ಪ್ರತೀಕಾರದ ಸುಂಕಗಳನ್ನು ವಿಧಿಸಿದರೆ, ಈ ಸುಂಕಗಳನ್ನು ಮತ್ತಷ್ಟು ಹೆಚ್ಚಿಸುವ ಮತ್ತು ಪರಿಷ್ಕರಿಸುವ ಅಧಿಕಾರ ಅಧ್ಯಕ್ಷರಿಗೆ ಇರುತ್ತದೆ ಎಂದು ಶ್ವೇತಭವನ ಎಚ್ಚರಿಸಿದೆ. ಅಮೆರಿಕವು ಚೀನಾ ಮೇಲೆ 51%, ಮಲೇಷ್ಯಾ ಮೇಲೆ 25%, ಶ್ರೀಲಂಕಾ ಮೇಲೆ 30%, ವಿಯೆಟ್ನಾಂ ಮೇಲೆ 20% ಮತ್ತು ಜಪಾನ್ ಮೇಲೆ 15% ಸುಂಕಗಳನ್ನು ವಿಧಿಸಿದೆ. ಪಾಕಿಸ್ತಾನದ ಮೇಲೆ ವಿಧಿಸಿದ 19% ಸುಂಕಗಳಿಗೆ ಹೋಲಿಸಿದರೆ, ಟ್ರಂಪ್ ಭಾರತವನ್ನು ಯಾವ ರೀತಿ ಪರಿಗಣಿಸುತ್ತಿದ್ದಾರೆ ಎಂಬುದು ಸ್ಪಷ್ಟವಾಗುತ್ತದೆ.

ಮೋದಿ ಈಗಲಾದರೂ ಸ್ಪಂದಿಸಬೇಕು: ಪ್ರತಿಪಕ್ಷಗಳು

ಟ್ರಂಪ್‌ರ ಕ್ರಮಗಳನ್ನು ಪ್ರತಿಪಕ್ಷಗಳ ನಾಯಕರು ತೀವ್ರವಾಗಿ ಖಂಡಿಸಿದ್ದಾರೆ. ಟ್ರಂಪ್‌ರ ಸುಂಕದ ಘೋಷಣೆಗಳ ಬಗ್ಗೆ ಪ್ರಧಾನಿ ಮೋದಿ ಈಗಲಾದರೂ ಮೌನ ಮುರಿಯಬೇಕು ಎಂದು ಅವರು ಆಗ್ರಹಿಸಿದ್ದಾರೆ. ಟ್ರಂಪ್‌ರ ಸುಂಕಗಳ ಬಗ್ಗೆ ಪ್ರಧಾನಿ ಮೋದಿ ಉತ್ತರಿಸಬೇಕು ಎಂದು ಕಾಂಗ್ರೆಸ್‌ನ ಹಿರಿಯ ನಾಯಕ ರಾಹುಲ್ ಗಾಂಧಿ ಎಕ್ಸ್‌ನಲ್ಲಿ ಆಗ್ರಹಿಸಿದ್ದಾರೆ. ಈ ಸುಂಕಗಳು ಭಾರತದ ರಫ್ತುಗಳ ಮೇಲೆ ತೀವ್ರ ಪರಿಣಾಮ ಬೀರಲಿವೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.

ಅಮೆರಿಕದ ಕ್ರಮಗಳು ಅನ್ಯಾಯ: ಭಾರತೀಯ ವಿದೇಶಾಂಗ ಇಲಾಖೆ

ಅಮೆರಿಕದ ಕ್ರಮಗಳು ಅನ್ಯಾಯದವು ಎಂದು ಭಾರತೀಯ ವಿದೇಶಾಂಗ ಇಲಾಖೆ ಹೇಳಿದೆ. ಈ ಸುಂಕಗಳು ಅಸಮಂಜಸವಾಗಿವೆ ಎಂದು ಅದು ಟೀಕಿಸಿದೆ. ದೇಶಕ್ಕೆ ಅಗತ್ಯವಿರುವ ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ವಿದೇಶಾಂಗ ಇಲಾಖೆ ಹೇಳಿಕೆಯಲ್ಲಿ ತಿಳಿಸಿದೆ. “ಅಮೆರಿಕ ಇತ್ತೀಚೆಗೆ ರಷ್ಯಾದಿಂದ ಭಾರತದ ತೈಲ ಆಮದುಗಳನ್ನು ಗುರಿಯಾಗಿಸಿಕೊಂಡಿದೆ. ನಮ್ಮ ಆಮದುಗಳು ಮಾರುಕಟ್ಟೆ ಪರಿಸ್ಥಿತಿಗಳನ್ನು ಅವಲಂಬಿಸಿವೆ. 140 ಕೋಟಿ ಭಾರತೀಯರ ಇಂಧನ ಭದ್ರತೆಯನ್ನು ಗಮನದಲ್ಲಿಟ್ಟುಕೊಂಡು ಖರೀದಿಗಳು ನಡೆಯುತ್ತವೆ. ಅಮೆರಿಕ ಭಾರತದ ಮೇಲೆ ಹೆಚ್ಚುವರಿ ಸುಂಕಗಳನ್ನು ವಿಧಿಸುವುದು ದುರದೃಷ್ಟಕರ” ಎಂದು ವಿದೇಶಾಂಗ ಇಲಾಖೆ ಹೇಳಿದೆ.

ರಫ್ತುಗಳು 30% ಕುಸಿತ: ಜಿಆರ್‌ಟಿಐ

ಅಮೆರಿಕದ ಸುಂಕಗಳು ಭಾರತದ ಆರ್ಥಿಕತೆಯ ಮೇಲೆ ತೀವ್ರ ಹೊರೆಯನ್ನುಂಟುಮಾಡಲಿವೆ ಎಂದು ನವದೆಹಲಿಯ ಗ್ಲೋಬಲ್ ಟ್ರೇಡ್ ರಿಸರ್ಚ್ ಇನ್‌ಸ್ಟಿಟ್ಯೂಟ್ (GRTI) ನ ಅಜಯ್ ಶ್ರೀವಾಸ್ತವ ಹೇಳಿದ್ದಾರೆ. ಹೆಚ್ಚಿನ ಸುಂಕಗಳಿಂದಾಗಿ ಪ್ರಸ್ತುತ ಹಣಕಾಸು ವರ್ಷ 2025-26 ರಲ್ಲಿ ಅಮೆರಿಕಕ್ಕೆ ಭಾರತೀಯ ಸರಕುಗಳ ರಫ್ತು 30% ರಷ್ಟು ಕುಸಿಯಬಹುದು ಎಂದು ಅವರು ಅಂದಾಜಿಸಿದ್ದಾರೆ. ರಫ್ತುಗಳು $86.5 ಶತಕೋಟಿಯಿಂದ $60.6 ಶತಕೋಟಿಗೆ ಇಳಿಯಬಹುದು ಎಂದು ಅಂದಾಜಿಸಲಾಗಿದೆ.