ಪರಿಸರ ಹೋರಾಟಗಾರ್ತಿ, ಸಾಮಾಜಿಕ ಕಾರ್ಯಕರ್ತೆ ಗ್ರೆಟಾ ಥನಬರ್ಗ್ ಯುದ್ಧಪೀಡಿತ ಪ್ರದೇಶ ಗಾಜಾಗೆ ಪ್ರಯಾಣ ಬೆಳೆಸಿದ್ದಾರೆ. ಸಿಸಿಲಿ ಬಂದರಿನಿಂದ ಸಣ್ಣ ಹಡಗೊಂದರಲ್ಲಿ ಪ್ರಯಾಣ ಬೆಳೆಸಿದ ಗ್ರೆಟಾ 2 ಸಾವಿರ ಕಿಲೋಮೀಟರ್ ಪ್ರಯಾಣದ ನಂತರ ಯುದ್ಧಪೀಡಿತ ಪ್ರದೇಶ ಗಾಜಾ ತಲುಪಲಿದ್ದಾರೆ.
ಗಾಜಾಗೆ ಮಾನವೀಯ ನೆರವಿನ ನಿರ್ಬಂಧ ಹಾಗೂ ಯುದ್ಧಾಪರಾಧವನ್ನು ವಿರೋಧಿಸಿ ಶಾಂತಿಯ ಹೋರಾಟದ ರೂಪದಲ್ಲಿ ಈ ಕ್ರಮ ಕೈಗೊಂಡಿರುವುದಾಗಿ ಗ್ರೆಟಾ ಹೇಳಿದ್ದಾರೆ. ಗ್ದೆಟಾ ಥನ್‌ಬರ್ಗ್ ಮತ್ತು ಗೇಮ್ ಆಫ್ ಥ್ರೋನ್ಸ್ ನಟ ಲಿಯಾಮ್ ಕನ್ನಿಂಗ್ಹ್ಯಾಮ್ ಸೇರಿದಂತೆ ಒಟ್ಟು 12 ಕಾರ್ಯಕರ್ತರು ಗಾಜಾ ಪಟ್ಟಿಗೆ ನೆರವು ಮತ್ತು ಮಾನವೀಯ ನೆರವು ನೀಡಲು ಮ್ಯಾಡ್ಲೀನ್ ಹಡಗಿನಲ್ಲಿದ್ದಾರೆ.
ಗ್ರೆಟಾ ಅವರ ಪ್ರಯಾಣದ ಬಗ್ಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಇಸ್ರೇಲ್ ನಾವು ಎಲ್ಲದಕ್ಕೂ ಸಿದ್ಧ ಎಂದು ಹೇಳಿದೆ. ಲಂಡನ್‌ನ ಟೈಮ್ಸ್ ಜೊತೆ ಮಾತನಾಡಿದ ಇಸ್ರೇಲ್ ರಕ್ಷಣಾ ಪಡೆಗಳ (ಐಡಿಎಫ್) ವಕ್ತಾರ ಬ್ರಿಗೇಡಿಯರ್ ಜನರಲ್ ಎಫೀ ಡೆಫ್ರಿನ್, ನೆರವು ಹಡಗು ಆಗಮನವನ್ನು ತಡೆಯಲು ಇಸ್ರೇಲ್ ಸೇನೆಯು “ಕ್ರಮ ಕೈಗೊಳ್ಳಲು ಸಿದ್ಧವಾಗಿದೆ” ಎಂದು ಹೇಳಿದ್ದಾರೆ.
“ಇಸ್ರೇಲ್ ನೌಕಾಪಡೆಯು ಇಸ್ರೇಲ್‌ನ ಕಡಲ ಪ್ರದೇಶ ಮತ್ತು ಸಮುದ್ರದಲ್ಲಿನ ಗಡಿಗಳನ್ನು ರಕ್ಷಿಸಲು ಹಗಲು ರಾತ್ರಿ ಕಾರ್ಯನಿರ್ವಹಿಸುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ನಾವು ಹಲವು ಅನುಭವವನ್ನು ಗಳಿಸಿದ್ದೇವೆ ಮತ್ತು ಅದಕ್ಕೆ ಅನುಗುಣವಾಗಿ ನಾವು ಕಾರ್ಯನಿರ್ವಹಿಸುತ್ತೇವೆ” ಎಂದು ಬ್ರಿಗೇಡಿಯರ್ ಜನರಲ್ ಎಫೀ ಡೆಫ್ರಿನ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಐಡಿಎಫ್‌ನ ಎಚ್ಚರಿಕೆಗೆ ಪ್ರತಿಕ್ರಿಯೆಯಾಗಿ, ಹಡಗಿನಲ್ಲಿದ್ದ ಕಾರ್ಯಕರ್ತರು “ಮ್ಯಾಡ್ಲೀನ್ ಮೇಲೆ ದಾಳಿ ಮಾಡುವ ಇಸ್ರೇಲ್‌ನ ಘೋಷಿತ ಉದ್ದೇಶವನ್ನು ಬಲವಾಗಿ ಖಂಡಿಸುತ್ತೇವೆ” ಎಂದು ಹೇಳಿದ್ದಾರೆ. ಹಾಗೆಯೇ ನೆರವು ನೀಡುವ ಹಡಗನ್ನು ‘ಬೆದರಿಕೆ’ ಎಂದು ಹೇಳಿದ ಬಗ್ಗೆ ಖಂಡಿಸಿದ್ದಾರೆ.
ಫ್ರೀಡಂ ಫ್ಲೋಟಿಲ್ಲಾ ಒಕ್ಕೂಟದಿಂದ ಹೊರಟ ಮ್ಯಾಡ್ಲೀನ್ ಹಡಗು ಜೂನ್ 7 ರೊಳಗೆ ಗಾಜಾ ಪಟ್ಟಿಯನ್ನು ತಲುಪುವ ನಿರೀಕ್ಷೆಯಿದೆ. ಗಾಜಾದ ಮೊದಲ ಮತ್ತು ಏಕೈಕ ಮೀನುಗಾರ ಮಹಿಳೆಯ ಹೆಸರಿನ ಈ ಹಡಗು ಜೂನ್ 1 ರಂದು ಸಿಸಿಲಿಯ ಕ್ಯಾಟಾನಿಯಾದಿಂದ ಹೊರಟಿದೆ. ಫೋರೆನ್ಸಿಕ್ ಆರ್ಕಿಟೆಕ್ಚರ್ ಹಡಗಿನ ಸ್ಥಳವನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡಲು ಗಾರ್ಮಿನ್ ಲೈವ್ ಟ್ರ್ಯಾಕರ್ ಅನ್ನು ಬಳಸಿದೆ.
ಇತ್ತೀಚಿನ ಮಾಹಿತಿ ಪ್ರಕಾರ, ಜೂನ್ 4 ರ ಹೊತ್ತಿಗೆ ಹಡಗು ಸಿಸಿಲಿ ಬಂದರಿನಿಂದ ಸುಮಾರು 600 ಕಿಮೀ (375 ಮೈಲಿ) ದೂರದಲ್ಲಿತ್ತು.
