ಕನ್ನಡದ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರ ಅಗಲಿಕೆಯ ನಂತರ ಬಿಡುಗಡೆ ಆಗುತ್ತಿರುವ ಎರಡನೇ ಚಿತ್ರ ಲಕ್ಕಿ ಮ್ಯಾನ್ ನಿನ್ನೆ ಅದ್ಭುತ ಓಪನಿಂಗ್ ಕಂಡಿದೆ. ಚಿತ್ರದ ನಾಯಕ ಡಾರ್ಲಿಂಗ್ ಕೃಷ್ಣ ಆದರೂ ಈ ಚಿತ್ರ ಪುನೀತ್ ಅವರ ಕಾರಣಕ್ಕೆ ಜನಸಾಗರವನ್ನೇ ಚಿತ್ರಮಂದಿರಕ್ಕೆ ಎಳೆದು ತರುತ್ತಿದೆ. ಈ ಅವಕಾಶ ಬಿಟ್ಟರೆ ಮತ್ತೆ ಪುನೀತ್ ಅವರನ್ನು ನೋಡಲು ಸಾಧ್ಯ ಆಗೋದು ಅವರ ಕಟ್ಟ ಕಡೆಯ ಚಿತ್ರ ಆಗಲಿರುವ ಗಂಧದಗುಡಿಯಲ್ಲಿ ಮಾತ್ರ ಅನ್ನೋದನ್ನು ಕನ್ನಡ ಸಿನಿ ಪ್ರೇಮಿಗಳು ಅರಿತಿದ್ದಾರೆ. ಹಾಗಾಗಿ, ಲಕ್ಕಿ ಮ್ಯಾನ್ ನೋಡಲು ಇಡೀ ರಾಜ್ಯದ ಕನ್ನಡ ಸಿನಿಮಾ ಪ್ರಿಯರು ಕಾದು ಕುಳಿತಿದ್ದರು.
ಈಗ ಸಿನಿಮಾ ನೋಡಿ ಬಂದ ಪ್ರೇಕ್ಷಕರು ಅತಿ ಭಾವುಕರಾಗಿ ಸಿನಿಮಾ ಮಾತನಾಡುತ್ತಿರುವುದು ಎಲ್ಲೆಡೆ ಕಾಣಬರುತ್ತಿದೆ. ತಮಿಳು ಚಿತ್ರದ ರಿಮೇಕ್ ಆಗಿರುವ ಈ ಚಿತ್ರದಲ್ಲಿ ತಮಿಳಿನ ಖ್ಯಾತ ನಟ ಪ್ರಭುದೇವ ಅವರು ಹಾಡೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಆದರೆ ಅವರಿಗಂತ ಹೆಚ್ಚು ಎಲ್ಲರಿಗೂ ಇಷ್ಟ ಆಗುತ್ತಿರುವುದು ಈ ಚಿತ್ರದಲ್ಲಿ ಅತಿಥಿ ಪಾತ್ರ ಮಾಡಿರುವ ಪುನೀತ್. ಈಗ ಬಾರದ ಊರಿನ ಅತಿಥಿಯಾಗಿ ಹೋಗಿರುವ ಪುನೀತ್ ಅವರನ್ನು ತೆರೆಯ ಮೇಲೆ ಮತ್ತೆ ನೋಡಿ ಪ್ರೇಕ್ಷಕರು ಮನಸ್ಸು ಮತ್ತು ಕಣ್ಣು ಎರಡನ್ನೂ ತುಂಬಿಕೊಳ್ಳುತ್ತಿದ್ದಾರೆ.
ಈ ಚಿತ್ರದಲ್ಲಿ ಅಪ್ಪು ದೇವರ ಪಾತ್ರದಲ್ಲಿ ಕಾಣಿಸಿಕೊಂಡಿರುವುದರಿಂದ ಅಭಿಮಾನಿಗಳ ಭಾವುಕತೆ ಇನ್ನಷ್ಟು ಹೆಚ್ಚಾಗಿದೆ. ನಮ್ಮನ್ನೆಲ್ಲಾ ಅಗಲಿ ದೇವರಾಗಿ ಹೋಗಿರುವ ಅಪ್ಪು, ಮತ್ತೆ ದೇವರಾಗಿ ನಮ್ಮ ಮುಂದೆ ಬಂದಿದ್ದಾರೆ ಅನ್ನೋದೇ ಸಿನಿಮಾ ನೋಡಿದ ಎಲ್ಲ ಪ್ರೇಕ್ಷಕರ ಭಾವುಕ ಮಾತು. ಕಣ್ಣಂಚಿನಲ್ಲಿ ನೀರಿಟ್ಟುಕೊಂಡೇ ಚಿತ್ರಮಂದಿರಗಳಿಂದ ಹೊರಬರುತ್ತಿರೋ ಪ್ರೇಕ್ಷಕರು, ಅಪ್ಪು ಅವರನ್ನು ತೆರೆ ಮೇಲೆ ನೋಡಿ ರೋಮಾಂಚಿತರಾಗಿದ್ದಾರೆ. ಇನ್ನು ಸಿನಿಮಾ ಬಗ್ಗೆ ಕೂಡ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಾಗಾಗಿ ಅಪ್ಪು ಜೊತೆ ಈ ಸಿನಿಮಾ ಮಾಡಿ ಡಾರ್ಲಿಂಗ್ ಕೃಷ್ಣ ಅವರು ಲಕ್ಕಿ ಮ್ಯಾನ್ ಎನಿಸಿಕೊಂಡಿದ್ದರೂ, ಈ ಚಿತ್ರ ನೋಡಿದ ನಾವೇ ಲಕ್ಕಿ ಮ್ಯಾನ್ ಅನ್ನೋದು ಅಪ್ಪು ಅಭಿಮಾನಿಗಳನ್ನು ಸೇರಿದಂತೆ ಎಲ್ಲ ಕನ್ನಡ ಸಿನಿಮಾ ಪ್ರೇಕ್ಷಕರ ಅನುಭವ.
