ಭೋಜಪುರಿ ತಾರೆಗಳಾದ ಮನೋಜ್ ತಿವಾರಿ, ರವಿ ಕಿಶನ್ ಮತ್ತು ದಿನೇಶ್ ಲಾಲ್ ಯಾದವ್ (ನಿರಾಹುವಾ) ನಂತರ ಪವನ್ ಸಿಂಗ್ ಅವರನ್ನು ಲೋಕಸಭಾ ಸಂಸದರನ್ನಾಗಿ ಮಾಡಲು ಬಿಜೆಪಿ ಸಿದ್ಧತೆ ನಡೆಸಿತ್ತು.
2024 ರ ಸಾರ್ವತ್ರಿಕ ಚುನಾವಣೆಗೆ ಬಿಜೆಪಿ ಬಿಡುಗಡೆ ಮಾಡಿದ ಮೊದಲ ಪಟ್ಟಿಯಲ್ಲಿ ಪವನ್ ಸಿಂಗ್ ಅವರ ಹೆಸರನ್ನು ಸಹ ಸೇರಿಸಲಾಗಿತ್ತು ಆದರೆ ಪಕ್ಷಕ್ಕೆ ಅದು ಬಹಳ ದುಬಾರಿಯಾಗಿ ಪರಿಣಮಿಸಿತ್ತು. ಪವನ್ ಸಿಂಗ್ ಅವರ ಹಿನ್ನೆಲೆ ಬಿಜೆಪಿ ಪಕ್ಷದ ಕುರಿತು ಸಾಕಷ್ಟು ಪ್ರಶ್ನೆಗಳನ್ನು ಹುಟ್ಟು ಹಾಕಿತ್ತು. ಕೊನೆಗೆ ಪರಿಸ್ಥಿತಿ ಯಾವ ಮಟ್ಟಕ್ಕೆ ಹೋಯಿತೆಂದರೆ ಸ್ವತಃ ಪವನ್ ಸಿಂಗ್ ತಾನು ಚುನಾವಣೆಗೆ ಸ್ಪರ್ಧಿಸುವುದಿಲ್ಲ ಎಂದು ಹೇಳುವಂತಾಯಿತು.
ಪಶ್ಚಿಮ ಬಂಗಾಳದ 20 ಸ್ಥಾನಗಳಿಗೆ ಅಭ್ಯರ್ಥಿಗಳನ್ನು ಸೇರಿದಂತೆ ಲೋಕಸಭಾ ಚುನಾವಣೆಗೆ ಬಿಜೆಪಿ ತನ್ನ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಶನಿವಾರ ಬಿಡುಗಡೆ ಮಾಡಿತ್ತು.
ಹಿಂದಿ ಭಾಷಿಕರ ಪ್ರಾಬಲ್ಯದ ಅಸನ್ಸೋಲ್ ಕ್ಷೇತ್ರದಲ್ಲಿ ಭೋಜ್ಪುರಿ ಗಾಯಕ ಪವನ್ ಸಿಂಗ್ ಅವರ ಹೆಸರು ಈ ಪಟ್ಟಿಯಲ್ಲಿ ಅತ್ಯಂತ ಆಸಕ್ತಿದಾಯಕವಾಗಿ ಕಂಡುಬಂದಿತ್ತು. ಆದರೆ ಈ ಪಟ್ಟಿ ಹೊರಬಂದ ಕೂಡಲೇ ತೃಣಮೂಲ ಕಾಂಗ್ರೆಸ್ ನಾಯಕರು ಹಳೆಯ ಹಾಡುಗಳನ್ನು ಉಲ್ಲೇಖಿಸಿ ಪವನ್ ಸಿಂಗ್ ಅವರನ್ನು ಟೀಕಿಸಲು ಪ್ರಾರಂಭಿಸಿದರು.
ಹಿರಿಯ ಕಾಂಗ್ರೆಸ್ ಮುಖಂಡ ಮತ್ತು ಸುಪ್ರೀಂ ಕೋರ್ಟ್ ಹಿರಿಯ ವಕೀಲ ಅಭಿಷೇಕ್ ಮನು ಸಿಂಘ್ವಿ ಕೂಡ ಪವನ್ ಸಿಂಗ್ ಅವರ ಉಮೇದುವಾರಿಕೆಯನ್ನು ನಾಚಿಕೆಗೇಡಿನ ಸಂಗತಿ ಎಂದು ಕರೆದರು. ಆದರೆ ಪವನ್ ಸಿಂಗ್ ಅವರ ಉಮೇದುವಾರಿಕೆಯಿಂದಾಗಿ ಬಂಗಾಳದಲ್ಲಿ ಬಿಜೆಪಿ ಹೆಚ್ಚು ವಿರೋಧವನ್ನು ಎದುರಿಸಿತು.
ಈ ಟೀಕೆಗಳಿಗೆ ಪ್ರತಿಕ್ರಿಯಿಸಿದ ಬಿಜೆಪಿ ವಕ್ತಾರ ಶಮಿಕ್ ಭಟ್ಟಾಚಾರ್ಯ, “ಟಿಎಂಸಿ ಚುನಾವಣೆಗೆ ಮುಂಚಿತವಾಗಿ ಅಸನ್ಸೋಲ್ನಲ್ಲಿ ಸೋಲನ್ನು ಒಪ್ಪಿಕೊಂಡಿದೆ ಎಂಬುದು ಸ್ಪಷ್ಟವಾಗಿದೆ. ಈ ದಾಳಿಗಳು ಅವರ ಹತಾಶೆಯ ಸಂಕೇತವಾಗಿದೆ” ಎಂದಿದ್ದರು.
ಆದರೆ ಭಾನುವಾರ ಬೆಳಿಗ್ಗೆ, ಬಿಜೆಪಿಯ ಕೇಂದ್ರ ನಾಯಕತ್ವಕ್ಕೆ ಧನ್ಯವಾದ ಅರ್ಪಿಸಿ ಪವನ್ ಸಿಂಗ್ ಸ್ವತಃ ಚುನಾವಣೆಯಲ್ಲಿ ಸ್ಪರ್ಧಿಸಲು ನಿರಾಕರಿಸಿದಾಗ, ಶಮಿಕ್ ಭಟ್ಟಾಚಾರ್ಯ ಅವರ ಧ್ವನಿ ಬದಲಾಯಿತು. “ಈ ಸಮಯದಲ್ಲಿ ಏನೂ ವಿವರವಾಗಿ ತಿಳಿದಿಲ್ಲ. ಪಕ್ಷದ ನಾಯಕತ್ವವು ಈ ಬಗ್ಗೆ ಅವರೊಂದಿಗೆ ಮಾತನಾಡುತ್ತದೆ. ಆಗ ಮಾತ್ರ ನಿಜವಾದ ಕಾರಣ ತಿಳಿಯುತ್ತದೆ” ಎಂದು ಅವರು ಹೇಳಿದರು.
ಶನಿವಾರ ಸಂಜೆಯಿಂದ, ರಾಜಕೀಯ ವಲಯಗಳಲ್ಲಿ ಈ ವಿಷಯದ ಬಗ್ಗೆ ಚರ್ಚೆಯ ಮಾರುಕಟ್ಟೆ ಬಿಸಿಯಾಗಿತ್ತು, ಭಾನುವಾರ ಚುನಾವಣೆಯಲ್ಲಿ ಸ್ಪರ್ಧಿಸಲು ಪವನ್ ಸಿಂಗ್ ನಿರಾಕರಿಸಿದ ನಂತರ ಇದು ತೀವ್ರಗೊಂಡಿದೆ. ಈಗ ಅವರ ನಿರಾಕರಣೆಯ ಹಿಂದಿನ ಕಾರಣಗಳ ಬಗ್ಗೆ ಎಲ್ಲಾ ಬಗೆಯ ಊಹಾಪೋಹಗಳನ್ನು ಮಾಡಲಾಗುತ್ತಿದೆ.
ಪವನ್ ಸಿಂಗ್ ಒಬ್ಬ ಜನಪ್ರಿಯ ಭೋಜ್ ಪುರಿ ಗಾಯಕ. ಅವರ ಕೆಲವು ಹಾಡುಗಳು ಭಾರಿ ಹಿಟ್ ಆಗಿವೆ. ಅವರು ‘ಪ್ರತಿಗ್ಯಾ’, ‘ಸತ್ಯ’ ಮತ್ತು ‘ಹರ್ ಹರ್ ಗಂಗೆ’ ಚಿತ್ರಗಳಲ್ಲಿಯೂ ಕೆಲಸ ಮಾಡಿದ್ದಾರೆ.
ಅವರು ಭೋಜ್ ಪುರಿ ಚಲನಚಿತ್ರೋದ್ಯಮದ ಜನಪ್ರಿಯ ಮುಖ. ಆದಾಗ್ಯೂ, ಅವರ ಹಾಡುಗಳು ಅಶ್ಲೀಲವಾಗಿವೆ ಎಂದು ಆರೋಪಿಸಲಾಗಿದೆ. “ಹಮ್ ಹಸೀನಾ ಬಂಗಾಲ್‌ ಕೇ. ‘ಸಾ’ ನಂತಹ ಹಾಡುಗಳ ಮೂಲಕ ಬಂಗಾಳದ ಮಹಿಳೆಯರ ಬಗೆಗಿನ ಅಶ್ಲೀಲ ಹಾಡುಗಳ ಅವರು ಈ ಹಿಂದೆ ಟೀಕಿಸಲ್ಪಟ್ಟಿದ್ದಾರೆ.
ಸುಮಾರು ಎರಡು ದಶಕಗಳಿಂದ ಭೋಜ್ಪುರಿ ಚಲನಚಿತ್ರೋದ್ಯಮದೊಂದಿಗೆ ಸಂಬಂಧ ಹೊಂದಿರುವ ಪವನ್, 2014ರಲ್ಲಿ ಆಗಿನ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಅರುಣ್ ಸಿಂಗ್ ಅವರ ಸಮ್ಮುಖದಲ್ಲಿ ಪಕ್ಷಕ್ಕೆ ಸೇರಿಕೊಳ್ಳುವ ಮೂಲಕ ತಮ್ಮ ರಾಜಕೀಯ ಜೀವನವನ್ನು ಪ್ರಾರಂಭಿಸಿದರು.
ಅಸನ್ಸೋಲ್ ಕ್ಷೇತ್ರದ ಲೆಕ್ಕಾಚಾರ
ಈ ವಿಷಯವನ್ನು ಮತ್ತಷ್ಟು ಚರ್ಚಿಸುವ ಮೊದಲು, ಅಸನ್ಸೋಲ್ ಸ್ಥಾನದ ಲೆಕ್ಕಾಚಾರವನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ.
ಜಾರ್ಖಂಡ್‌ ರಾಜ್ಯಕ್ಕೆ ಹೊಂದಿಕೊಂಡಂತೆ ಕಲ್ಲಿದ್ದಲು ಗಣಿ ಹೊಂದಿರುವ ಈ ಪ್ರದೇಶದಲ್ಲಿ ಹಿಂದಿ ಮಾತನಾಡುವ ಜನರು ಪ್ರಾಬಲ್ಯ ಹೊಂದಿದ್ದಾರೆ. ಇಲ್ಲಿನ 1.5 ದಶಲಕ್ಷಕ್ಕೂ ಹೆಚ್ಚು ಮತದಾರರಲ್ಲಿ, ಅರ್ಧದಷ್ಟು ಹಿಂದಿ ಮಾತನಾಡುವವರು.
ಬಲವಾದ ಟ್ರೇಡ್ ಯೂನಿಯನ್ ಚಟುವಟಿಕೆಗಳಿಂದಾಗಿ, 2014ರ ಚುನಾವಣೆಗೂ ಮೊದಲು ಸಿಪಿಎಂ ಸತತ 30 ವರ್ಷಗಳ ಕಾಲ ಇಲ್ಲಿಂದ ಗೆಲ್ಲುತ್ತಿತ್ತು. ಆದರೆ 2014ರಲ್ಲಿ, ಪ್ರಸಿದ್ಧ ಗಾಯಕ ಬಾಬುಲ್ ಸುಪ್ರಿಯೋ ಅವರನ್ನು ಕಣಕ್ಕಿಳಿಸುವ ಮೂಲಕ ಬಿಜೆಪಿ ಈ ಸ್ಥಾನವನ್ನು ಗೆದ್ದುಕೊಂಡಿತು.
ಅಷ್ಟೇ ಅಲ್ಲ, ಈ ಪ್ರದೇಶದ ಮತದಾರರ ಮೇಲೆ ತನ್ನ ಹಿಡಿತವನ್ನು ಬಲಪಡಿಸಲು, ಪಕ್ಷವು ಮೊದಲ ಬಾರಿ ಸಂಸತ್ತಿಗೆ ತಲುಪಿದ ತಕ್ಷಣ ಅವರನ್ನು ಸಚಿವರನ್ನಾಗಿ ಮಾಡಿತು. ಅದರ ನಂತರ, 2019ರಲ್ಲಿ, ಬಾಬುಲ್ ಇಲ್ಲಿ ಗೆಲುವಿನ ಓಟವನ್ನು ಉಳಿಸಿಕೊಂಡರು.
ಆದರೆ 2021ರ ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯಲ್ಲಿ, ಬಿಜೆಪಿ ನಿರೀಕ್ಷಿತ ಯಶಸ್ಸನ್ನು ಪಡೆಯದ ಕಾರಣ ಬಾಬುಲ್ ಅವರನ್ನು ಕೇಂದ್ರ ಸಚಿವ ಸಂಪುಟದಿಂದ ತೆಗೆದುಹಾಕಲಾಯಿತು.
ಇದರಿಂದ ಸಿಟ್ಟಾದ ಅವರು ಕೆಲವು ದಿನಗಳ ನಂತರ ಲೋಕಸಭಾ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿ ತೃಣಮೂಲ ಕಾಂಗ್ರೆಸ್ ಸೇರಿದರು.
ಈ ಖಾಲಿ ಸ್ಥಾನಕ್ಕೆ ನಡೆದ ಉಪಚುನಾವಣೆಯಲ್ಲಿ, ತೃಣಮೂಲ ಕಾಂಗ್ರೆಸ್ ಎಲ್ಲರನ್ನೂ ಆಶ್ಚರ್ಯಗೊಳಿಸಿತು ಮತ್ತು ಬಿಹಾರಿ ಬಾಬು ಎಂದು ಕರೆಯಲ್ಪಡುವ ನಟ ಶತ್ರುಘ್ನ ಸಿನ್ಹಾ ಅವರನ್ನು ಕಣಕ್ಕಿಳಿಸಿತು. ಆ ಉಪಚುನಾವಣೆಯಲ್ಲಿ ಬಿಹಾರಿ ಬಾಬು ಬಿಜೆಪಿ ಅಭ್ಯರ್ಥಿ ಅಗ್ನಿಮಿತ್ರ ಪೌಲ್ ಅವರನ್ನು ಸುಮಾರು ಮೂರು ಲಕ್ಷ ಮತಗಳ ಅಂತರದಿಂದ ಸೋಲಿಸಿದರು.
ಮೂರು ದಶಕಗಳಿಂದ ಎಡಪಕ್ಷಗಳ ಭದ್ರಕೋಟೆಯಾಗಿದ್ದ ಕೆಂಪು ಕೋಟೆಯಲ್ಲಿ ಬಿರುಕು ಮೂಡಿಸಲು ಬಾಬುಲ್ ಸುಪ್ರಿಯೋ ರೂಪದಲ್ಲಿ ಸ್ಟಾರ್ ಪವರ್ ಅನ್ನು ಮೊದಲು ಬಳಸಿದ್ದು ಬಿಜೆಪಿ ಎಂಬುದು ಕುತೂಹಲಕಾರಿ.
ಅದರ ನಂತರ, ತೃಣಮೂಲ ಕಾಂಗ್ರೆಸ್ ಕೂಡ ಬಿಹಾರಿ ಬಾಬು ಅವರ ಸಹಾಯದಿಂದ ಅದೇ ರೀತಿಯಲ್ಲಿ ಅದನ್ನು ವಶಪಡಿಸಿಕೊಂಡಿತು. ಬಹುಶಃ ಈ ಚಿಂತನೆಯ ಅಡಿಯಲ್ಲಿ, ಪವನ್ ಸಿಂಗ್ ಅವರಿಗೆ ಇಲ್ಲಿ ಇತರ ಸ್ಪರ್ಧಿಗಳಿಗಿಂತ ಆದ್ಯತೆ ನೀಡಲಾಯಿತು.
ಪವನ್ ಸಿಂಗ್ ಉಮೇದುವಾರಿಕೆಗೆ ವಿರೋಧ
ಪವನ್ ಸಿಂಗ್ ಅವರನ್ನು ಅಭ್ಯರ್ಥಿಯನ್ನಾಗಿ ಮಾಡಿದ ಸುದ್ದಿಯ ನಂತರ, ರಾಜಕೀಯ ವಲಯದಲ್ಲಿ ಅವರ ವಿರುದ್ಧ ಆರೋಪಗಳ ಮಹಾಪೂರವೇ ಹರಿದುಬಂದಿತ್ತು. ಸಾಮಾಜಿಕ ಮಾಧ್ಯಮದಲ್ಲಿ ಬಹಳಷ್ಟು ಪೋಸ್ಟುಗಳು ಕಾಣಿಸಿಕೊಳ್ಳಲು ಪ್ರಾರಂಭಿಸಿದವು, ಇದರಲ್ಲಿ ಪವನ್ ಮಹಿಳಾ ವಿರೋಧಿ ಹಾಡುಗಳನ್ನು ಹಾಡಿದ್ದಾರೆ ಮತ್ತು ಬಂಗಾಳದ ಮಹಿಳೆಯರ ಬಗ್ಗೆ ಅಶ್ಲೀಲ ವರ್ತನೆಗಳನ್ನು ಅಳವಡಿಸಿಕೊಂಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಪವನ್ ಸಿಂಗ್ ತಮ್ಮ ಭೋಜ್ಪುರಿ ಹಾಡುಗಳು ಮತ್ತು ವೀಡಿಯೊಗಳಲ್ಲಿ ಬಂಗಾಳದ ಮಹಿಳೆಯರ ಬಗ್ಗೆ ಅಶ್ಲೀಲ ಮನೋಭಾವವನ್ನು ತೋರಿಸಿದ್ದಾರೆ ಎಂದು ತೃಣಮೂಲ ಕಾಂಗ್ರೆಸ್ ವಕ್ತಾರ ಅರೂಪ್ ಚಕ್ರವರ್ತಿ ಟ್ವೀಟ್‌ ಮೂಲಕ ಆರೋಪಿಸಿದ್ದರು.
ಅಸನ್ಸೋಲ್ ಮಾಜಿ ಬಿಜೆಪಿ ಸಂಸದ ಮತ್ತು ರಾಜ್ಯ ಸಚಿವ ಬಾಬುಲ್ ಸುಪ್ರಿಯೋ ತಮ್ಮ ಟ್ವೀಟಿನಲ್ಲಿ ಹೀಗೆ ಬರೆದಿದ್ದಾರೆ: “ಅಸನ್ಸೋಲ್ ಟಿಕೆಟ್ ಪಡೆದಿರುವ ಪವನ್ ಸಿಂಗ್ ವರಿಗೆ ಶುಭಾಶಯ. ಒಬ್ಬ ಕಲಾವಿದನಾಗಿ ಅವರ ಬಗ್ಗೆ ಏನನ್ನೂ ಹೇಳಲು ಸಾಧ್ಯವಿಲ್ಲ. ಆದರೆ ಅವರ ಹಾಡುಗಳ ಪೋಸ್ಟರುಗಳನ್ನು ನೋಡಿದರೆ ಎಲ್ಲವೂ ಅರ್ಥವಾಗುತ್ತದೆ. ಪವನ್ ಸಿಂಗ್ ಅವರ ಉಮೇದುವಾರಿಕೆಯು ಬಂಗಾಳ ಮತ್ತು ಅದರ ಮಹಿಳೆಯರ ಬಗ್ಗೆ ಬಿಜೆಪಿ ಹೇಗೆ ಯೋಚಿಸುತ್ತದೆ ಎಂಬುದನ್ನು ಸ್ಪಷ್ಟವಾಗಿ ತೋರಿಸುತ್ತದೆ.”
ಈಗ ತೃಣಮೂಲ ಕಾಂಗ್ರೆಸ್ ಪವನ್ ಸಿಂಗ್ ಅವರ ಟಿಕೆಟ್ ನಿರಾಕರಣೆಯನ್ನು ತನ್ನ ನೈತಿಕ ಗೆಲುವು ಎಂದು ನೋಡುತ್ತಿದೆ. ಪಕ್ಷದ ಹಿರಿಯ ನಾಯಕರೊಬ್ಬರು, “ಪರಿಸ್ಥಿತಿ ತನಗೆ ತುಂಬಾ ಪ್ರತಿಕೂಲವಾಗಿದೆ ಎಂದು ಪವನ್ ಸಿಂಗ್ ಅರಿತುಕೊಂಡಿರಬಹುದು” ಎಂದಿದ್ದಾರೆ.
ಅಲ್ಲದೆ, ಈ ಸ್ಥಾನದಲ್ಲಿ ನಡೆದ ಉಪಚುನಾವಣೆಯ ಅಂಕಿಅಂಶವೂ ಅವರ ಮುಂದೆ ಇತ್ತು. ಹೀಗಾಗಿ ಅವರು ಕಣಕ್ಕಿಳಿಯುವ ಮೊದಲೇ ತಮ್ಮ ಶಸ್ತ್ರಾಸ್ತ್ರಗಳನ್ನು ಕೆಳಗಿಳಿಸಿದರು.
ಟಿಎಂಸಿ ಪ್ರಧಾನ ಕಾರ್ಯದರ್ಶಿ ಅಭಿಷೇಕ್ ಬ್ಯಾನರ್ಜಿ ತಮ್ಮ ಟ್ವೀಟ್ನಲ್ಲಿ, “ಇದು ಬಂಗಾಳದ ಜನರ ಅದಮ್ಯ ಇಚ್ಛಾಶಕ್ತಿ ಮತ್ತು ಪ್ರತಿಭಟನೆಯ ಗೆಲುವು” ಎಂದಿದ್ದಾರೆ.
ಈಗ ಬಿಜೆಪಿ ಅಭ್ಯರ್ಥಿ ಯಾರು?
ಮತ್ತೊಂದೆಡೆ, ಈ ವಿಷಯದ ಬಗ್ಗೆ ಯಾವುದೇ ಬಿಜೆಪಿ ನಾಯಕರು ಈ ಸಮಯದಲ್ಲಿ ಏನನ್ನೂ ಹೇಳಲು ಸಿದ್ಧರಿಲ್ಲ. ಪಕ್ಷದ ಹಿರಿಯ ನಾಯಕರೊಬ್ಬರು, “ಅಗ್ನಿಮಿತ್ರ ಪಾಲ್ ಅವರಲ್ಲದೆ, ಪವನ್ ಸಿಂಗ್ ಅವರ ಹೆಸರನ್ನು ಈ ಸ್ಥಾನಕ್ಕೆ ಚರ್ಚಿಸಲಾಗುತ್ತಿತ್ತು. ಆದರೆ ಬಹುಶಃ ಪಕ್ಷದ ಕೇಂದ್ರ ನಾಯಕತ್ವವು ಪವನ್ ಸಿಂಗ್ ಅವರ ಸ್ಟಾರ್ ಪವರ್ ಮತ್ತು ಕಲ್ಲಿದ್ದಲು ಗಣಿಗಳ ಬಿಹಾರಿ ಕಾರ್ಮಿಕರನ್ನು ಗಮನದಲ್ಲಿಟ್ಟುಕೊಂಡು ಆದ್ಯತೆ ನೀಡಿತು.”
“ಆದರೆ ದಾಳಗಳು ಅವರನ್ನು ಹಿಮ್ಮೆಟ್ಟಿಸಿದವು. ಈಗ ಕೇಂದ್ರ ನಾಯಕತ್ವವು ಮೊದಲು ಪವನ್ ಸಿಂಗ್ ಅವರೊಂದಿಗೆ ಮಾತನಾಡಿ ಅವರ ಮನವೊಲಿಸಲು ಪ್ರಯತ್ನಿಸುತ್ತದೆ. ಆದರೆ ಅವರು ತಮ್ಮ ನಿರ್ಧಾರಕ್ಕೆ ಅಂಟಿಕೊಂಡಿದ್ದರೆ, ಇನ್ನೊಬ್ಬ ಅಭ್ಯರ್ಥಿಯನ್ನು ಘೋಷಿಸಲಾಗುವುದು.”
ರಾಜಕೀಯ ವಿಶ್ಲೇಷಕ ಪ್ರೊಫೆಸರ್ ಸಮೀರನ್ ಪೌಲ್, “ನೀವು ಪವನ್ ಸಿಂಗ್ ವಿಷಯದಲ್ಲಿ ತಲೆ ಬೋಳಿಸಿಕೊಂಡ ತಕ್ಷಣವೇ ಆಲಿಕಲ್ಲು ಬೀಳುತ್ತದೆ ಎಂಬ ಮಾತು ನಿಜವಾಗಿದೆ. ಹೆಸರನ್ನು ಘೋಷಿಸುತ್ತಿದ್ದಂತೆ, ಅವರ ಮೇಲಿನ ದಾಳಿಗಳು ಪ್ರಾರಂಭವಾದವು. ಇದಲ್ಲದೆ, ಈ ಸ್ಥಾನದ ಉಪಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿಯ ಗೆಲುವಿನ ಅಂತರವನ್ನು ಸಹ ಅವರು ನೆನಪಿನಲ್ಲಿಟ್ಟುಕೊಳ್ಳುತ್ತಾರೆ. ಬಹುಶಃ, ತನ್ನ ಮುಖವನ್ನು ಉಳಿಸಿಕೊಳ್ಳಲು, ಅವರು ಕ್ಷೇತ್ರವನ್ನು ಪ್ರವೇಶಿಸಲು ನಿರಾಕರಿಸಿದ್ದಾರೆ” ಎಂದಿದ್ದಾರೆ.
ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಇತ್ತೀಚೆಗೆ ಶತ್ರುಘ್ನ ಸಿನ್ಹಾ ಅವರು ಈ ಸ್ಥಾನಕ್ಕೆ ಪಕ್ಷದ ಅಭ್ಯರ್ಥಿ ಎಂದು ಸೂಚಿಸಿದ್ದರು ಎಂದು ಅವರು ಹೇಳಿದರು. ಬಿಹಾರಿ ಬಾಬುವಿನ ಎದುರು ತನ್ನ ಜನಪ್ರಿಯತೆ ಏನೂ ಅಲ್ಲವೆನ್ನುವುದು ಪವನ್‌ಗೆ ಅರ್ಥವಾಗಿರಬಹುದು.
